ಪಟನಾ: ಬಿಹಾರ ಚುನಾವಣೆಯಲ್ಲಿ (Bihara Election Result) ಹೀನಾಯ ಸೋಲನ್ನು ಕಂಡ ಬಳಿಕ ಆರ್‌ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ (Lalu Prasad Yadav) ಅವರ ಮನೆ ಜಗಳ ಇದೀಗ ಬೀದಿಗೆ ಬಿದ್ದಿದೆ. ಮಗಳು ರೋಹಿಣಿ ಆಚಾರ್ಯ (Rohini Acharya) ಅವರು ರಾಜಕೀಯವನ್ನು ತೊರೆಯುವುದಾಗಿ ಮತ್ತು ಕುಟುಂಬವನ್ನು ತ್ಯಜಿಸುವುದಾಗಿ ಸಾರ್ವಜನಿಕವಾಗಿ ಘೋಷಿಸಿದ ನಂತರ ಮತ್ತು ಮನೆಯಲ್ಲಿ ಗಂಭೀರ ದೌರ್ಜನ್ಯ ನಡೆದಿದೆ ಎಂದು ಆರೋಪಿಸಿದ್ದಾರೆ. ಆರ್‌ಜೆಡಿ (RJD) ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ ಅವರ ಪುತ್ರಿ ರೋಹಿಣಿ ಭಾನುವಾರ ಸಾಮಾಜಿಕ ಮಾಧ್ಯಮದಲ್ಲಿ ಇತ್ತೀಚಿನ ಕೌಟುಂಬಿಕ ಕಲಹದ ಘಟನೆಗಳನ್ನು ವಿವರಿಸುತ್ತಾ, ತನಗೆ "ಅವಮಾನ," "ದುರುಪಯೋಗ" ಮತ್ತು ಚಪ್ಪಲಿಯಿಂದ ಹೊಡೆಯುವ ಬೆದರಿಕೆಗಳನ್ನು ಎದುರಿಸಲಾಗಿದೆ ಎಂದು ಹೇಳಿದ್ದಾರೆ.
ಒಂದು ಕುಟುಂಬದಲ್ಲಿ, ವಿಶೇಷವಾಗಿ ಸಹೋದರರು ಇರುವಾಗ, ಹೆಣ್ಣುಮಕ್ಕಳು ಮಾತ್ರ ತ್ಯಾಗ ಮಾಡಬೇಕೆಂದು ಏಕೆ ನಿರೀಕ್ಷಿಸಲಾಗಿದೆ?" ಎಂದು ರೋಹಿಣಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಯಾದವ್ ಕುಟುಂಬ ಸದಸ್ಯರಾಗಲಿ ಅಥವಾ ಆರ್‌ಜೆಡಿಯವರ ಆರೋಪಗಳಿಗೆ ತಕ್ಷಣ ಪ್ರತಿಕ್ರಿಯಿಸಿಲ್ಲ. ರೋಹಿಣಿ ಅವರ ಆರೋಪದ ಬಳಿಕ ಲಾಲು ಯಾದವ್ ಅವರ ನಾಲ್ವರು ಹೆಣ್ಣುಮಕ್ಕಳಾದ ರಾಜಲಕ್ಷ್ಮಿ, ರಾಗಿಣಿ, ಹೇಮಾ ಮತ್ತು ಚಂದಾ ತಮ್ಮ ಮಕ್ಕಳೊಂದಿಗೆ ಪಾಟ್ನಾದಲ್ಲಿರುವ ಮನೆಯನ್ನು ತೊರೆದಿದ್ದಾರೆ.
ನವೆಂಬರ್ 20ರಂದು ಬಿಹಾರದಲ್ಲಿ ಎನ್ ಡಿಎ ಪ್ರಮಾಣ ವಚನ, ಪ್ರಧಾನಿ ಮೋದಿ ಭಾಗವಹಿಸುವ ನಿರೀಕ್ಷೆ
ತೇಜಸ್ವಿ ಮತ್ತು ಆಪ್ತ ಸಹಾಯಕರ ವಿರುದ್ಧ ಆರೋಪ
ರೋಹಿಣಿ ತನ್ನ ಸಹೋದರ ತೇಜಸ್ವಿ ಯಾದವ್ ಮತ್ತು ಅವರ ಸಹಾಯಕರಾದ ಆರ್‌ಜೆಡಿ ಸಂಸದ ಸಂಜಯ್ ಯಾದವ್ ಮತ್ತು ರಮೀಜ್ ಅವರು ತಮ್ಮನ್ನು ಕುಟುಂಬದಿಂದ ಹೊರಹಾಕಿದ್ದಾರೆ ಎಂದು ನೇರವಾಗಿ ಆರೋಪಿಸಿದ್ದಾರೆ. ಚುನಾವಣಾ ಸೋಲಿನ ಬಗ್ಗೆ ಪಕ್ಷದ ನಾಯಕತ್ವವನ್ನು ಪ್ರಶ್ನಿಸಿದ ನಂತರ ತನ್ನನ್ನು "ಅವಮಾನಿಸಲಾಗಿದೆ, ನಿಂದಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.
ತೇಜ್‌ ಪ್ರತಾಪ್ ಬೆಂಬಲ
ಕುಟುಂಬದಿಂದ ಹೊರಹಾಕಲ್ಪಟ್ಟ ತೇಜ್‌ ಪ್ರತಾಪ್ ಯಾದವ್ ತಮ್ಮ ಸಹೋದರಿಯ ಬೆಂಬಲಕ್ಕೆ ನಿಂತಿದಿದ್ದಾರೆ. ಒಬ್ಬ ಮಹಿಳೆಯಾಗಿ, ತಾಯಿಯಾಗಿ, ಸಹೋದರಿಯಾಗಿ, ಅವರು ಮಾಡಿದ್ದು ಶ್ಲಾಘನೀಯ ಮತ್ತು ಅಪರೂಪ" ಎಂದು ಅವರು ಹೇಳಿದರು. ಯಾರಾದರೂ ತಮ್ಮ ಸಹೋದರಿಯನ್ನು ಅವಮಾನಿಸಲು ಪ್ರಯತ್ನಿಸಿದರೆ, "ಶ್ರೀಕೃಷ್ಣನ ಸುದರ್ಶನ ಚಕ್ರವು ಅವರನ್ನು ಹೊಡೆಯುತ್ತದೆ" ಎಂದು ಅವರು ಎಚ್ಚರಿಸಿದ್ದಾರೆ. ತಮ್ಮ ಪಕ್ಷದ ಜನಶಕ್ತಿ ಜನತಾದಳದ ಅಧಿಕೃತ ಖಾತೆಯಲ್ಲಿ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಅವರು ಎಚ್ಚರಿಕೆ ನೀಡಿದ್ದಾರೆ. ದೇಶದ್ರೋಹಿಗಳೇ ಕೇಳಿ, ನೀವು ನಮ್ಮ ಕುಟುಂಬದ ಮೇಲೆ ದಾಳಿ ಮಾಡಿದರೆ, ಬಿಹಾರದ ಜನರು ನಿಮ್ಮನ್ನು ಎಂದಿಗೂ ಕ್ಷಮಿಸುವುದಿಲ್ಲ." ಲಾಲು ಪ್ರಸಾದ್ ಯಾದವ್ ಅವರ ಒಂದು ಸೂಚನೆಯ ಮೇರೆಗೆ ಜನರು "ಈ ದೇಶದ್ರೋಹಿಗಳನ್ನು ಸಮಾಧಿ ಮಾಡುತ್ತಾರೆ" ಎಂದು ಅವರು ಹೇಳಿದ್ದಾರೆ.