ನವದೆಹಲಿ, ಸೆ. 9: 2025ರ ನವೆಂಬರ್ನಲ್ಲಿ ದೆಹಲಿಯ ರೆಡ್ ಪೋರ್ಟ್ ಬಳಿ ನಡೆದ ಕಾರ್ ಸ್ಫೋಟ (Red Fort Blast) ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಸಲ್ಲಿಸಿರುವ ಚಾರ್ಜ್ಶೀಟ್ನಲ್ಲಿ ಮಹತ್ವದ ಸಂಗತಿಗಳು ಬಹಿರಂಗವಾಗಿವೆ. ಸ್ಫೋಟದಲ್ಲಿ ಮೃತಪಟ್ಟಿದ್ದ ಉಮರ್ ಉನ್ ನಬಿಯನ್ನು (Umer Un Nabi) ಪುನಶ್ಚೇತನಗೊಂಡ ಅನ್ಸಾರ್ ಘಜ್ವತ್-ಉಲ್-ಹಿಂದ್ (AGuH) ಭಯೋತ್ಪಾದಕ ಘಟಕದ ಪ್ರಮುಖ ಸಂಚುಕೋರ ಹಾಗೂ ಆಪರೇಷನಲ್ ಇನ್ಚಾರ್ಜ್ ಎಂದು NIA ಆರೋಪಿಸಿದೆ.
2025ರ ನವೆಂಬರ್ 10ರ ಸಂಜೆ ರೆಡ್ ಪೋರ್ಟ್ ಸಮೀಪ ಹ್ಯುಂಡೈ i20 ಕಾರಿನಲ್ಲಿ ಸ್ಫೋಟ ಸಂಭವಿಸಿತ್ತು. ತನಿಖೆಯ ಪ್ರಕಾರ ಕಾರನ್ನು ವಾಹನಾಧಾರಿತ ಸುಧಾರಿತ ಸ್ಫೋಟಕ ಸಾಧನವಾಗಿ ಬಳಸಲಾಗಿತ್ತು. ಕಾರಿನೊಳಗಿದ್ದ ನಬಿಯೇ ಸ್ಫೋಟಕ ಸಾಧನವನ್ನು ಸಕ್ರಿಯಗೊಳಿಸಿದ್ದ ಎಂದು NIA ಚಾರ್ಜ್ಶೀಟ್ನಲ್ಲಿ ಹೇಳಿದೆ. ಘಟನಾ ಸ್ಥಳದಿಂದ ದೊರೆತ ಜೈವಿಕ ಮಾದರಿಗಳ ಡಿಎನ್ಎ ಪರೀಕ್ಷೆಯಲ್ಲೂ ನಬಿ ಕಾರಿನೊಳಗಿದ್ದದ್ದು ದೃಢಪಟ್ಟಿದೆ ಎಂದು ಸಂಸ್ಥೆ ತಿಳಿಸಿದೆ.
NIA ಪ್ರಕಾರ, ನಬಿ 2022ರ ಆರಂಭದಿಂದಲೇ ನಿಷ್ಕ್ರಿಯವಾಗಿದ್ದ AGuH ಘಟಕವನ್ನು ಪುನಶ್ಚೇತನಗೊಳಿಸಲು ಹಾಗೂ ಭಯೋತ್ಪಾದಕ ಚಟುವಟಿಕೆಗಳಿಗೆ ಜನರನ್ನು ಸಜ್ಜುಗೊಳಿಸುವ ಜಾಲ ನಿರ್ಮಿಸಲು ಕೆಲಸ ಮಾಡುತ್ತಿದ್ದ. ರೆಡ್ ಪೋರ್ಟ್ ಅನ್ನು ಗುರಿಯಾಗಿಸುವ ಮುನ್ನ ಆರೋಪಿಗಳು ಹಲವು ಬಾರಿ ಸ್ಥಳ ಪರಿಶೀಲನೆ ನಡೆಸಿದ್ದರು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
ವಿಧಿವಿಜ್ಞಾನ ಪರೀಕ್ಷೆಯಲ್ಲಿ ಸ್ಫೋಟದ ಸ್ಥಳದಿಂದ ಸಂಗ್ರಹಿಸಿದ ವಸ್ತುಗಳಲ್ಲಿ TATP ಮತ್ತು ಅಮೋನಿಯಂ ನೈಟ್ರೇಟ್ನ ಅವಶೇಷಗಳು ಪತ್ತೆಯಾಗಿವೆ ಎಂದು NIA ಹೇಳಿದೆ. ಸ್ಫೋಟಕವನ್ನು ವಾಹನದೊಳಗಿನಿಂದಲೇ ಕಮಾಂಡ್ ವ್ಯವಸ್ಥೆಯ ಮೂಲಕ ಸಕ್ರಿಯಗೊಳಿಸಲಾಗಿತ್ತು ಎಂಬುದಕ್ಕೂ ಸಾಕ್ಷ್ಯ ದೊರೆತಿದೆ ಎಂದು ಚಾರ್ಜ್ಶೀಟ್ನಲ್ಲಿ ಉಲ್ಲೇಖಿಸಲಾಗಿದೆ.
ದೆಹಲಿ ಬಾಂಬ್ ಸ್ಫೋಟದ ರೂವಾರಿ ಉಮರ್ನ ಸಹಾಯಕನನ್ನು ಬಂಧಿಸಿದ ಎನ್ಐಎ
ಸಹ ಆರೋಪಿ ಜಸೀರ್ ಬಿಲಾಲ್ ವಾನಿ ಯುಟ್ಯೂಬ್ ಮತ್ತು ಚಾಟ್ಜಿಪಿಟಿ ಮೂಲಕ ರಾಕೆಟ್ ತಯಾರಿಸುವ ವಿಧಾನಗಳ ಕುರಿತು ಹುಡುಕಾಟ ನಡೆಸಿದ್ದ ಎಂದು ಚಾರ್ಜ್ಶೀಟ್ನಲ್ಲಿ ಹೇಳಲಾಗಿದೆ. ನಬಿ ಆತನಿಗೆ ಎರಡು ಡ್ರೋನ್ಗಳನ್ನು ಒದಗಿಸಿದ್ದನೆಂದೂ ಆರೋಪಿಸಲಾಗಿದೆ.
ಆರೋಪಿಗಳು ಎನ್ಕ್ರಿಪ್ಟೆಡ್ ಮೆಸೇಜಿಂಗ್ ಆ್ಯಪ್ಗಳ ಮೂಲಕ ಸಂಪರ್ಕದಲ್ಲಿದ್ದರು. ಜಮ್ಮು-ಕಾಶ್ಮೀರ ಮತ್ತು ದೆಹಲಿ-ಎನ್ಸಿಆರ್ ಪ್ರದೇಶಗಳಲ್ಲಿ ರಹಸ್ಯ ಸಭೆಗಳನ್ನು ನಡೆಸಿ ತರಬೇತಿ ಹಾಗೂ ಭಯೋತ್ಪಾದಕ ಚಟುವಟಿಕೆಗಳಿಗೆ ಸಿದ್ಧತೆ ನಡೆಸಲಾಗಿತ್ತು ಎಂದು NIA ಆರೋಪಿಸಿದೆ. ನಬಿ ಹಣಕಾಸು ವ್ಯವಸ್ಥೆ, ಅಕ್ರಮ ಶಸ್ತ್ರಾಸ್ತ್ರಗಳ ಸಂಗ್ರಹ, ತರಬೇತಿ ಮತ್ತು ಇತರ ವ್ಯವಸ್ಥೆಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದನೆಂದು ತನಿಖಾ ಸಂಸ್ಥೆ ಹೇಳಿದೆ.
ನಬಿ ಸ್ಫೋಟದಲ್ಲೇ ಮೃತಪಟ್ಟಿರುವುದರಿಂದ ಆತನ ವಿರುದ್ಧದ ಕಾನೂನು ಪ್ರಕ್ರಿಯೆ ಅಂತ್ಯಗೊಂಡಿದೆ. ಚಾರ್ಜ್ಶೀಟ್ನಲ್ಲಿರುವ ಆರೋಪಗಳು ನ್ಯಾಯಾಲಯದ ವಿಚಾರಣೆ ಮತ್ತು ನ್ಯಾಯಾಂಗ ಪರಿಶೀಲನೆಗೆ ಒಳಪಟ್ಟಿವೆ.