ಬೆಂಗಳೂರು, ಮಾ. 11: ಪಶ್ಚಿಮ ಏಷ್ಯಾದಲ್ಲಿ ಇರಾನ್, ಇಸ್ರೇಲ್ ಮತ್ತು ಅಮೆರಿಕ ನಡುವೆ ನಡೆಯುತ್ತಿರುವ ಭೀಕರ ಯುದ್ಧವು ಭಾರತದ ಅಡುಗೆಮನೆಗಳ ಮೇಲೆ ದೊಡ್ಡ ಮಟ್ಟದ ಪರಿಣಾಮ ಬೀರಲು ಪ್ರಾರಂಭಿಸಿದೆ. ಭಾರತವು ತನ್ನ ಒಟ್ಟು ಎಲ್ಪಿಜಿ ಅಗತ್ಯದ ಶೇಕಡಾ 90ರಷ್ಟನ್ನು ಸೌದಿ ಅರೇಬಿಯಾ (Saudi Arabia), ಕತಾರ್ (Kathar) ಮತ್ತು ಯುಎಇ (UAE) ಮುಂತಾದ ಗಲ್ಫ್ ರಾಷ್ಟ್ರಗಳಿಂದ (Gulf Countries) ಆಮದು ಮಾಡಿಕೊಳ್ಳುತ್ತದೆ. ಹೊರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಹಡಗು ಸಂಚಾರಕ್ಕೆ ಅಡ್ಡಿ ಉಂಟಾಗಿರುವುದರಿಂದ ಅಡುಗೆ ಅನಿಲ ಪೂರೈಕೆಯಲ್ಲಿ ವಿಧಿಸಲಾದ ಮಿತಿಗಳು ಮತ್ತು ಬೆಲೆ ಏರಿಕೆ ಗ್ರಾಹಕರನ್ನು ಚಿಂತೆಗೀಡು ಮಾಡಿದೆ. ಇಂತಹ ಬಿಕ್ಕಟ್ಟಿನ ಸಮಯದಲ್ಲಿ ಅಡುಗೆ ಮಾಡಲು ಲಭ್ಯವಿರುವ ಪರ್ಯಾಯ ಮಾರ್ಗಗಳು ಮತ್ತು ಕಡಿಮೆ ಇಂಧನ ಬಳಸುವ ವಿಧಾನಗಳು ಇಲ್ಲಿವೆ:
ಅಡುಗೆ ಅನಿಲಕ್ಕೆ (LPG) ಇರುವ ಪ್ರಮುಖ ಪರ್ಯಾಯಗಳು
ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG): ಇದು ಸಿಲಿಂಡರ್ ಪೂರೈಕೆಯ ತೊಂದರೆಯಿಲ್ಲದೆ ನೇರವಾಗಿ ಪೈಪ್ಗಳ ಮೂಲಕ ಮನೆಗೆ ಬರುತ್ತದೆ. ಇದು ಎಲ್ಪಿಜಿಗಿಂತ ಹೆಚ್ಚು ಸುರಕ್ಷಿತ ಮತ್ತು ದೀರ್ಘಕಾಲದ ಬಳಕೆಗೆ ಅಗ್ಗವಾಗಿದೆ.
ಎಲೆಕ್ಟ್ರಿಕ್ ಮತ್ತು ಇಂಡಕ್ಷನ್ ಕುಕ್ಟಾಪ್ಗಳು: ಎಲೆಕ್ಟ್ರಿಕ್ ಒಲೆಗಳು ಸ್ಟೀಲ್ ಮತ್ತು ಮಣ್ಣಿನ ಪಾತ್ರೆಗಳಿಗೂ ಹೊಂದಿಕೆಯಾಗುತ್ತವೆ. ಇಂಡಕ್ಷನ್ ಸ್ಟೌವ್ಗಳು ಶಕ್ತಿಯ ದಕ್ಷತೆಯನ್ನು ಹೊಂದಿದ್ದು, ಅಡುಗೆಯನ್ನು ವೇಗವಾಗಿ ಸಿದ್ಧಪಡಿಸುತ್ತವೆ.
ಮೈಕ್ರೋವೇವ್ ಮತ್ತು ಏರ್ ಫ್ರೈಯರ್: ಆಹಾರವನ್ನು ಬಿಸಿ ಮಾಡಲು, ಸ್ಟೀಮ್ ಮಾಡಲು ಅಥವಾ ಎಣ್ಣೆ ರಹಿತವಾಗಿ ಫ್ರೈ ಮಾಡಲು ಇವು ಅತ್ಯುತ್ತಮ. ಇವು ಅಡುಗೆಯ ಸಮಯ ಮತ್ತು ಶಕ್ತಿಯನ್ನು ಉಳಿಸುತ್ತವೆ.
ಸೌರ ಒಲೆ (Solar Cooker): ಬಿಸಿಲು ಹೆಚ್ಚಿರುವ ಪ್ರದೇಶಗಳಲ್ಲಿ ಸೌರ ಒಲೆಗಳು ಇಂಧನವಿಲ್ಲದೆ ಅಡುಗೆ ಮಾಡಲು ಪರಿಸರ ಸ್ನೇಹಿ ಮಾರ್ಗಗಳಾಗಿವೆ.
ಬಯೋಗ್ಯಾಸ್: ಹಳ್ಳಿಗಳಲ್ಲಿ ಮನೆಯ ಸಾವಯವ ತ್ಯಾಜ್ಯದಿಂದ ಬಯೋಗ್ಯಾಸ್ ತಯಾರಿಸಿ ಅಡುಗೆಗೆ ಬಳಸಬಹುದು.
ಯುದ್ಧದ ಭೀತಿ: ದುಬೈ ತೊರೆಯುತ್ತಿರುವ ನಿವಾಸಿಗಳು; ಬೀದಿಗೆ ಬಿದ್ದ ಸಾಕುಪ್ರಾಣಿಗಳು
ಇಂಧನ ಉಳಿಸುವ ಅಡುಗೆ ವಿಧಾನಗಳು ಮತ್ತು ಆಹಾರಗಳು
ಕಡಿಮೆ ಇಂಧನ ಅಥವಾ ವಿದ್ಯುತ್ ಬಳಸಿ ಅಡುಗೆ ಮಾಡಲು ಸಿದ್ಧಪಡಿಸಿದ ಆಹಾರಗಳು ಇಲ್ಲಿವೆ:
ಪ್ರೆಶರ್ ಕುಕ್ಕರ್ ಬಳಕೆ: ಬೇಳೆ, ಕಿಚಡಿ ಅಥವಾ ಪಲಾವ್ ಅನ್ನು ಕುಕ್ಕರ್ನಲ್ಲಿ ಮಾಡುವುದರಿಂದ ತೆರೆದ ಪಾತ್ರೆಗಿಂತ ಶೇಕಡಾ 30ರಷ್ಟು ಇಂಧನ ಉಳಿತಾಯವಾಗುತ್ತದೆ.
ನೋ-ಕುಕ್ ಸಲಾಡ್ಗಳು: ಮೊಳಕೆ ಹೆಸರು ಕಾಳು ಚಾಟ್, ಕಡಲೆಕಾಯಿ ಚಾಟ್ ಅಥವಾ ಬೀಟ್ರೂಟ್ ರೈತಾದಂತಹ ಆಹಾರಗಳಿಗೆ ಅಡುಗೆ ಅನಿಲದ ಅಗತ್ಯವೇ ಇರುವುದಿಲ್ಲ.
ಚಪಾತಿ ಉಳಿತಾಯದ ಸೂತ್ರ: ಕಬ್ಬಿಣದ ಹಂಚು (Cast Iron Tawa) ಬಳಸುವುದರಿಂದ ಶಾಖ ದೀರ್ಘಕಾಲ ಉಳಿಯುತ್ತದೆ. ಚಪಾತಿ ಲಟ್ಟಿಸುವ ಮುನ್ನವೇ ಎಲ್ಲವನ್ನೂ ಸಿದ್ಧಪಡಿಸಿಟ್ಟುಕೊಂಡು ಸತತವಾಗಿ ಬೇಯಿಸುವುದರಿಂದ ಪದೇ ಪದೆ ಹಂಚು ಬಿಸಿ ಮಾಡುವ ಅಗತ್ಯವಿರುವುದಿಲ್ಲ.
ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನತೆ ಹೆಚ್ಚುತ್ತಲೇ ಇರುವುದರಿಂದ, ಎಲ್ಪಿಜಿ ಅವಲಂಬನೆ ಕಡಿಮೆ ಮಾಡಿ ಇಂತಹ ಪರ್ಯಾಯ ಮಾರ್ಗಗಳನ್ನು ಅಳವಡಿಸಿಕೊಳ್ಳುವುದು ಇಂದಿನ ತುರ್ತು ಅಗತ್ಯವಾಗಿದೆ.