ವಾಟ್ಸಾಪ್‌ನಲ್ಲಿ ಮೆಸೇಜ್ ಶೆಡ್ಯೂಲಿಂಗ್ ಫೀಚರ್: ನಿರ್ದಿಷ್ಟ ಸಮಯಕ್ಕೆ ತಾನಾಗಿಯೇ ಸಂದೇಶ ರವಾನೆ, ಇಲ್ಲಿದೆ ನೋಡಿ ಕಂಪ್ಲೀಟ್ ಮಾಹಿತಿ!

ನವದೆಹಲಿ: ಜನಪ್ರಿಯ ಮೆಸೇಜಿಂಗ್ ಆ್ಯಪ್ (messaging app) ವಾಟ್ಸಾಪ್ (WhatsApp) ತನ್ನ ಬಳಕೆದಾರರಿಗೆ ಅತ್ಯಂತ ಉಪಯುಕ್ತವಾದ ಹೊಸ ವೈಶಿಷ್ಟ್ಯವೊಂದನ್ನು ಪರಿಚಯಿಸಲು ಸಜ್ಜಾಗಿದೆ. ಬಳಕೆದಾರರು ಮುಂಚಿತವಾಗಿಯೇ ಸಂದೇಶಗಳನ್ನು ನಿಗದಿಪಡಿಸಿ ಕಳುಹಿಸುವ ‘ಶೆಡ್ಯೂಲ್ಡ್ ಮೆಸೇಜಸ್’ (Scheduled Messages) ಫೀಚರ್ ಅನ್ನು ವಾಟ್ಸಾಪ್ ಪ್ರಸ್ತುತ ಪರೀಕ್ಷಿಸುತ್ತಿದೆ. ಇದರ ಮೂಲಕ ಪಠ್ಯಗಳು, ಫೋಟೋಗಳು ಮತ್ತು ವಿಡಿಯೋಗಳನ್ನು ಮುಂಚಿತವಾಗಿ ಡ್ರಾಫ್ಟ್ (draft) ಮಾಡಿ, ನಿಗದಿತ ದಿನಾಂಕ ಮತ್ತು ಸಮಯಕ್ಕೆ ತಾನಾಗಿಯೇ ಕಳುಹಿಸುವಂತೆ ಹೊಂದಿಸಬಹುದು. ಆಂಡ್ರಾಯ್ಡ್ ಬೀಟಾ (Android beta) ಆವೃತ್ತಿಯ ಕೆಲ ಬಳಕೆದಾರರಿಗೆ ಈ ನವೀಕರಣ ಈಗಾಗಲೇ ಲಭ್ಯವಾಗುತ್ತಿದ್ದು, ಮುಂಬರುವ ದಿನಗಳಲ್ಲಿ ಇತರರಿಗೂ ವಿಸ್ತರಿಸುವ ನಿರೀಕ್ಷೆಯಿದೆ.

ವಾಟ್ಸಾಪ್‌ನ ನೂತನ ನವೀಕರಣಗಳನ್ನು ಗಮನಿಸುವ ‘WABetaInfo’ ವರದಿಯ ಪ್ರಕಾರ, ಆಂಡ್ರಾಯ್ಡ್ ಬೀಟಾ ಆವೃತ್ತಿ 2.26.40.7 ರಲ್ಲಿ ಈ ಶೆಡ್ಯೂಲಿಂಗ್ ಆಯ್ಕೆ ಕಂಡುಬಂದಿದೆ. ವೈಯಕ್ತಿಕ ಅಥವಾ ಗ್ರೂಪ್ ಚಾಟ್‌ಗಳಲ್ಲಿ ಸಂದೇಶ ಟೈಪ್ ಮಾಡಿ ‘ಸೆಂಡ್’ ಬಟನ್ ಅನ್ನು ದೀರ್ಘವಾಗಿ ಒತ್ತಿ ಹಿಡಿಯುವ (ಲಾಂಗ್ ಪ್ರೆಸ್) ಮೂಲಕ ಸಮಯವನ್ನು ನಿಗದಿಪಡಿಸಬಹುದು. ಸಂದೇಶವನ್ನು ಕನಿಷ್ಠ 10 ನಿಮಿಷಗಳಿಂದ ಗರಿಷ್ಠ ಎರಡು ವಾರಗಳವರೆಗೆ ಮುಂಚಿತವಾಗಿ ಶೆಡ್ಯೂಲ್ ಮಾಡಲು ಸಾಧ್ಯವಿದೆ. ನಿಮ್ಮ ಮೊಬೈಲ್ ಡೇಟಾ ಆಫ್ ಆಗಿದ್ದರೂ ಅಥವಾ ವಾಟ್ಸಾಪ್ ಮುಚ್ಚಲ್ಪಟ್ಟಿದ್ದರೂ ನಿಗದಿತ ಸಮಯಕ್ಕೆ ಸಂದೇಶ ತಂತಾನೇ ರವಾನೆಯಾಗುವುದು ಇದರ ವಿಶೇಷ.

ಸೌದಿ ಅರೇಬಿಯಾ ಮೇಲೆ ಹೌತಿ ಬಂಡುಕೋರರ ದಾಳಿ: ಅಕ್ಟೋಬರ್ 15ರ ವರೆಗೆ ಏರ್ ಇಂಡಿಯಾ ವಿಮಾನ ರದ್ದು

ಕೇವಲ ಪಠ್ಯ ಸಂದೇಶಗಳು ಮಾತ್ರವಲ್ಲದೆ ಫೋಟೋ, ವಿಡಿಯೋ ಮತ್ತು ಲಿಂಕ್‌ಗಳನ್ನೂ ಕಳುಹಿಸಬಹುದು. ಆದರೆ ಒಂದು ಬಾರಿಗೆ ಒಂದೇ ಮಾಧ್ಯಮ ಕಡತವನ್ನು ನಿಗದಿಪಡಿಸಲು ಅವಕಾಶ ನೀಡಲಾಗುವುದು. ಸಂದೇಶ ರವಾನೆಯಾಗುವ ಮುನ್ನ ಅದನ್ನು ಪರಿಶೀಲಿಸಲು ಮತ್ತು ರದ್ದುಗೊಳಿಸಲು ಚಾಟ್ ಮಾಹಿತಿ ಪರದೆಯಲ್ಲಿ ಪ್ರತ್ಯೇಕ ಆಯ್ಕೆ ಇರುತ್ತದೆ. ಬಳಕೆದಾರರು ಶೆಡ್ಯೂಲ್ ಮಾಡಿದ ಸಂದೇಶವನ್ನು ರದ್ದುಗೊಳಿಸಿದರೆ ಸ್ವೀಕೃತಿದಾರರಿಗೆ ಯಾವುದೇ ಅಧಿಸೂಚನೆ ಹೋಗುವುದಿಲ್ಲ.

ಗ್ರೂಪ್ ಚಾಟ್‌ಗಳಲ್ಲಿ ಮೆಸೇಜ್ ಶೆಡ್ಯೂಲ್ ಮಾಡಿದಾಗ ಇದ್ದ ಸದಸ್ಯರಿಗೆ ಮಾತ್ರ ಅದು ತಲುಪಲಿದ್ದು, ನಂತರ ಗ್ರೂಪ್ ಸೇರಿದವರಿಗೆ ಅದು ಕಾಣಿಸುವುದಿಲ್ಲ. ಈ ಸಂಪೂರ್ಣ ಪ್ರಕ್ರಿಯೆಯು ಎಂದಿನಂತೆ ‘ಎಂಡ್-ಟು-ಎಂಡ್ ಎನ್‌ಕ್ರಿಪ್ಶನ್’ ಭದ್ರತೆಯನ್ನು ಹೊಂದಿರುತ್ತದೆ. ಗೂಗಲ್ ಪ್ಲೇ ಸ್ಟೋರ್‌ನ ಆಯ್ದ ಆಂಡ್ರಾಯ್ಡ್ ಬೀಟಾ ಬಳಕೆದಾರರಿಗೆ ಇದು ಸದ್ಯ ಲಭ್ಯವಿದ್ದು, ಸಾರ್ವಜನಿಕರಿಗೆ ಬಿಡುಗಡೆಯಾಗುವ ಅಧಿಕೃತ ದಿನಾಂಕ ಇನ್ನಷ್ಟೇ ಪ್ರಕಟವಾಗಬೇಕಿದೆ.

ಮುಖ್ಯವಾಗಿ ಹುಟ್ಟುಹಬ್ಬ, ವಾರ್ಷಿಕೋತ್ಸವದ ಶುಭಾಶಯಗಳು ಹಾಗೂ ವೃತ್ತಿಪರ ಕಾರ್ಯಕ್ರಮಗಳ ನೆನಪೋಲೆಗಳನ್ನು ಸರಿಯಾದ ಸಮಯಕ್ಕೆ ಮರೆಯದೆ ಕಳುಹಿಸಲು ಈ ಹೊಸ ವೈಶಿಷ್ಟ್ಯವು ನೆರವಾಗಲಿದೆ. ಥರ್ಡ್ ಪಾರ್ಟಿ ಆ್ಯಪ್‌ಗಳ ಹಂಗಿಲ್ಲದೆ ಅಧಿಕೃತವಾಗಿಯೇ ಈ ಸೌಲಭ್ಯ ಲಭ್ಯವಾಗುತ್ತಿರುವುದು ಕೋಟ್ಯಂತರ ವಾಟ್ಸಾಪ್ ಬಳಕೆದಾರರ ಅನುಕೂಲವನ್ನು ಮತ್ತಷ್ಟು ಹೆಚ್ಚಿಸಲಿದೆ.