ನಗೋಯಾ, ಅ.3: ಜಪಾನ್‌ನ ಐಚಿ-ನಗೋಯಾದ ಕೊರೋಗಿ ಅಥ್ಲೆಟಿಕ್ ಪಾರ್ಕ್‌ನಲ್ಲಿ ಶನಿವಾರ ನಡೆದ ಏಷ್ಯನ್ ಗೇಮ್ಸ್‌ ಚಿನ್ನದ ಪದಕದ ಪಂದ್ಯದಲ್ಲಿ ಪಾಕಿಸ್ತಾನದ ವಿರುದ್ಧ ಬಿರುಸಿನ ಬ್ಯಾಟಿಂಗ್‌ ನಡೆಸಿ ಅರ್ಧಶತಕ ಸಿಡಿಸಿದ ಭಾರತದ ಎಡಗೈ ಬ್ಯಾಟರ್ ಅಭಿಷೇಕ್ ಶರ್ಮಾ ದಾಖಲೆಯೊಂದನ್ನು ಬರೆದಿದ್ದಾರೆ.
ಭಾರತ-ಪಾಕಿಸ್ತಾನ ಟಿ20 ಅಂತಾರಾಷ್ಟ್ರೀಯ ಪಂದ್ಯವೊಂದರ ಇನಿಂಗ್ಸ್‌ನಲ್ಲಿ ಭಾರತೀಯ ಬ್ಯಾಟರ್‌ವೊಬ್ಬರು ಸಿಡಿಸಿದ ಗರಿಷ್ಠ ಸಿಕ್ಸರ್‌ಗಳ ದಾಖಲೆಯಲ್ಲಿ ಅಭಿಷೇಕ್ ಸಿಡಿಸಿದ ಏಳು ಸಿಕ್ಸರ್‌ಗಳು ಅವರನ್ನು ಮಾಜಿ ಆಟಗಾರ ಯುವರಾಜ್‌ ಸಿಂಗ್‌ ಜತೆ ಜಂಟಿ ಅಗ್ರಸ್ಥಾನಕ್ಕೇರಿಸಿತು. ಈ ಹಾದಿಯಲ್ಲಿ ಅವರು ವಿರಾಟ್ ಕೊಹ್ಲಿ(11 ಸಿಕ್ಸರ್) ದಾಖಲೆಯನ್ನು ಹಿಂದಿಕ್ಕಿದರು.
2026ರ ಕ್ಯಾಲೆಂಡರ್ ವರ್ಷದಲ್ಲಿ ಅಭಿಷೇಕ್ ಅವರ ಟಿ20 ಕ್ರಿಕೆಟ್‌ನ ಗಮನಾರ್ಹ ಸಿಕ್ಸರ್-ಬಾರಿಸುವ ದಾಖಲೆಗೆ ಮತ್ತಷ್ಟು ಕೊಡುಗೆ ನೀಡಿದೆ. ಅವರು ಈಗ 2026ರಲ್ಲಿ ಟಿ20 ಕ್ರಿಕೆಟ್‌ನಲ್ಲಿ 104 ಸಿಕ್ಸರ್‌ಗಳನ್ನು ಬಾರಿಸಿದ್ದು, ಇದು ಒಂದು ಕ್ಯಾಲೆಂಡರ್ ವರ್ಷದಲ್ಲಿ ಭಾರತೀಯ ಬ್ಯಾಟರ್ ಒಬ್ಬರು ಬಾರಿಸಿದ ಅತಿ ಹೆಚ್ಚು ಸಿಕ್ಸರ್‌ಗಳಾಗಿವೆ. ಇನ್ನು 5 ಸಿಕ್ಸರ್ ಬಾರಿಸಿದರೆ ತನ್ನದ ದಾಖಲೆಯನ್ನು ಮುರಿಯಲಿದ್ದಾರೆ. 2025ರಲ್ಲಿ ಅವರು 108 ಸಿಕ್ಸರ್ ಬಾರಿಸಿದ್ದರು.
ಏಷ್ಯನ್ ಗೇಮ್ಸ್‌ ಗಾಲ್ಫ್‌ನಲ್ಲಿ ಐತಿಹಾಸಿಕ ಚಿನ್ನ ಗೆದ್ದ ಕನ್ನಡತಿ ಪ್ರಣವಿ ಯಾರು?
ಪವರ್‌ಪ್ಲೇ ಅವಧಿಯಲ್ಲಿ ಭಾರತ ಹೊಸ ದಾಖಲೆಯನ್ನೂ ನಿರ್ಮಿಸಿತು. ತಂಡವು ಮೊದಲ ಆರು ಓವರ್‌ಗಳಲ್ಲಿ 81/2 ರನ್ ಗಳಿಸಿತು. ಇದು ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಪಾಕಿಸ್ತಾನದ ವಿರುದ್ಧ ಭಾರತದ ಅತ್ಯಧಿಕ ಪವರ್‌ಪ್ಲೇ ಸ್ಕೋರ್ ಆಗಿದೆ.
ದುಬೈನಲ್ಲಿ ನಡೆದ ಏಷ್ಯಾ ಕಪ್ 2025ರ 'ಸೂಪರ್ ಫೋರ್ಸ್' ಪಂದ್ಯದಲ್ಲಿ ಗಳಿಸಿದ್ದ 69/0 ಭಾರತದ ಹಿಂದಿನ ಅತ್ಯುತ್ತಮ ಸ್ಕೋರ್ ಆಗಿತ್ತು. ಆ ಪವರ್‌ಪ್ಲೇನಲ್ಲೂ ಅಭಿಷೇಕ್ ಅವರದ್ದೇ ಪ್ರಮುಖ ಪಾತ್ರವಿತ್ತು. ಆ ಪಂದ್ಯದಲ್ಲಿ ಅವರು 24 ಎಸೆತಗಳಲ್ಲಿ 50 ರನ್ ಗಳಿಸಿದ್ದರು. ಇದು ಆ ಸಮಯದಲ್ಲಿ ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಪಾಕಿಸ್ತಾನದ ವಿರುದ್ಧ ಭಾರತದ ಪರವಾಗಿ ಅತಿ ವೇಗದ ಅರ್ಧಶತಕವಾಗಿತ್ತು.