ನಗೋಯಾ, ಸೆ.21: ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಸೋಮವಾರ ಭಾರತದ ಭರ್ಜರಿ ಪದಕ ಬೇಟೆ ಮುಂದುವರಿದಿದೆ. ಒಂದೇ ದಿನ ಎರಡು ಬೆಳ್ಳಿ, ಎರಡು ಕಂಚು ಸೇರಿ ಒಟ್ಟು ನಾಲ್ಕು ಪದಕ ತನ್ನದಾಗಿಸಿಕೊಂಡಿದೆ. ಭಾರತದ ಹಿಮಾಂಶು ಧಿಲ್ಲೋನ್ ಮತ್ತು ರುದ್ರಾಂಕ್ಷ್ ಪಾಟೀಲ್ ಶೂಟಿಂಗ್ ವಿಭಾಗದಲ್ಲಿ ಕ್ರಮವಾಗಿ ವೈಯಕ್ತಿಕ ಬೆಳ್ಳಿ ಮತ್ತು ಕಂಚಿನ ಪದಕಗಳನ್ನು ಗೆದ್ದುಕೊಂಡರು. ಕೆಲವೇ ಗಂಟೆಳ ಹಿಂದೆ ನಡೆದಿದ್ದ ಪುರುಷರ 10 ಮೀಟರ್ ಏರ್ ರೈಫಲ್ ತಂಡ ಸ್ಪರ್ಧೆಯಲ್ಲಿ ಭಾರತಕ್ಕೆ ಬೆಳ್ಳಿ ಪದಕ ತಂದುಕೊಡುವಲ್ಲಿಯೂ ಇವರು ಪ್ರಮುಖ ಪಾತ್ರವಹಿಸಿದ್ದರು.
ಏಳು ಸರಣಿಗಳ ಫೈನಲ್ನಲ್ಲಿ ಹಿಮಾಂಶು ಸಂಯಮ ಕಾಯ್ದುಕೊಂಡು 252.4 ಅಂಕಗಳೊಂದಿಗೆ ಎರಡನೇ ಸ್ಥಾನ ಪಡೆದರೆ, ರುದ್ರಾಂಕ್ಷ್ 230.9 ಅಂಕಗಳೊಂದಿಗೆ ಕಂಚಿನ ಪದಕವನ್ನು ಗೆದ್ದುಕೊಂಡರು. ಚೀನಾದ ಹಾಲಿ ಒಲಿಂಪಿಕ್ ಚಾಂಪಿಯನ್ ಶೆಂಗ್ ಲಿಹಾವೊ 254.2 ಅಂಕಗಳೊಂದಿಗೆ ಚಿನ್ನದ ಪದಕವನ್ನು ಗೆದ್ದರು. ಅವರು ಹಿಮಾಂಶುಗಿಂತ 1.8 ಅಂಕಗಳ ಮುನ್ನಡೆಯನ್ನು ಕಾಯ್ದುಕೊಂಡರು.
ಪುರುಷರ 10 ಮೀಟರ್ ಏರ್ ರೈಫಲ್ ತಂಡದ ಸ್ಪರ್ಧೆಯಲ್ಲಿ ರುದ್ರಾಂಕ್ಷ್, ಹಿಮಾಂಶು ಮತ್ತು ಪಾರ್ಥ್ ಮಾನೆ ಒಟ್ಟಾಗಿ 1890.1 ಅಂಕಗಳನ್ನು ಗಳಿಸಿ ಬೆಳ್ಳಿ ಪದಕ ಗೆದ್ದ ಕೆಲವೇ ಗಂಟೆಗಳ ನಂತರ ಈ ವೈಯಕ್ತಿಕ ಪದಕಗಳು ಲಭಿಸಿದವು.
ಬೆಳಿಗ್ಗೆ ನಡೆದ ಅರ್ಹತಾ ಸುತ್ತಿನಲ್ಲಿ ಉತ್ತಮ ಅಂಕಗಳನ್ನು ಗಳಿಸುವ ಮೂಲಕ ಈ ಇಬ್ಬರೂ ಭಾರತೀಯರು ಎಂಟು ಮಂದಿ ಸ್ಪರ್ಧಿಗಳನ್ನೊಳಗೊಂಡ ಫೈನಲ್ ಹಂತಕ್ಕೆ ಪ್ರವೇಶಿಸಿದ್ದರು. ಅರ್ಹತಾ ಸುತ್ತಿನಲ್ಲಿ ರುದ್ರಾಕ್ಷ್ 631.8 ಅಂಕಗಳೊಂದಿಗೆ ಮೂರನೇ ಸ್ಥಾನ ಪಡೆದರೆ, ಹಿಮಾಂಶು 630.0 ಅಂಕಗಳೊಂದಿಗೆ ಏಳನೇ ಸ್ಥಾನ ಗಳಿಸಿದರು. ಅವರ ಈ ಅರ್ಹತಾ ಸುತ್ತಿನ ಪ್ರದರ್ಶನವು ವೈಯಕ್ತಿಕ ಫೈನಲ್ನಲ್ಲಿ ಅವರ ಸ್ಥಾನವನ್ನು ಖಚಿತಪಡಿಸುವುದರ ಜೊತೆಗೆ, ಭಾರತಕ್ಕೆ ತಂಡ ವಿಭಾಗದ ಬೆಳ್ಳಿ ಪದಕವನ್ನೂ ತಂದುಕೊಡಲು ನೆರವಾಯಿತು.
ಹ್ಯಾಂಗ್ಝೌ ಕ್ರೀಡಾಕೂಟದಲ್ಲಿ ಭಾರತದ ಪುರುಷರ 10 ಮೀಟರ್ ಏರ್ ರೈಫಲ್ ತಂಡವು ಚಿನ್ನದ ಪದಕ ಗೆದ್ದಾಗ ಅದರ ಭಾಗವಾಗಿದ್ದ ರುದ್ರಾಂಕ್ಷ್ ಅವರಿಗೆ, ಈ ಕಂಚಿನ ಪದಕವು ಅವರ ಏಷ್ಯನ್ ಗೇಮ್ಸ್ ಪದಕಗಳ ಸಂಗ್ರಹಕ್ಕೆ ಮತ್ತೊಂದು ಪದಕವನ್ನು ಸೇರಿಸಿದೆ. ಇದಕ್ಕೂ ಮುನ್ನ, ಈ ವರ್ಷದ ಆರಂಭದಲ್ಲಿ ನವದೆಹಲಿಯಲ್ಲಿ ನಡೆದ ಏಷ್ಯನ್ ರೈಫಲ್/ಪಿಸ್ತೂಲ್ ಚಾಂಪಿಯನ್ಶಿಪ್ನಲ್ಲಿ ಅವರು ವೈಯಕ್ತಿಕ ವಿಭಾಗದಲ್ಲಿ ಚಿನ್ನದ ಪದಕವನ್ನು ಗೆದ್ದಿದ್ದರು.
ಕಂಚು ಗೆದ್ದ ಸುಚಿಕಾ ತರಿಯಾಲ್
ಇದಕ್ಕೂ ಮುನ್ನ ನಡೆದಿದ್ದ ಮಹಿಳೆಯರ ಮಿಶ್ರ ಮಾರ್ಷಿಯಲ್ ಆರ್ಟ್ಸ್ (ಎಂಎಂಎ) 60 ಕೆಜಿ ವಿಭಾಗದ ಸೆಮಿಫೈನಲ್ನಲ್ಲಿ ಸುಚಿಕಾ ತರಿಯಾಲ್ ಅವರು 2-0 ಅಂತರದಿಂದ ಸೋಲುವ ಮೂಲಕ ಕಂಚಿನ ಪದಕಕ್ಕೆ ತೃಪ್ತಿಪಟ್ಟರು. ಸೆಮಿಫೈನಲ್ ಹಣಾಹಣಿಯಲ್ಲಿ ಸಿಂಗಾಪುರದ ಟಿಯೊ ಹುಯಿ ಹೂನ್ ವಿರುದ್ಧ ಸೆಣಸಿದ ತರಿಯಾಲ್, ಫೈನಲ್ ತಲುಪುವಲ್ಲಿ ವಿಫಲರಾದರು. ಆದರೆ ಭಾರತಕ್ಕಾಗಿ ಐತಿಹಾಸಿಕ ಕಂಚಿನ ಪದಕವನ್ನು ಗೆದ್ದರು. ಸದ್ಯ ಭಾರತ ಈವರೆಗೆ ಒಟ್ಟಾರೆ 4 ಬೆಳ್ಳಿ 2 ಕಂಚು ಸೇರಿ 6 ಪದಕ ತನ್ನದಾಗಿಸಿಕೊಂಡಿದೆ.