ನಗೋಯಾ, ಅ.21: ಗುರುವಾರ ನಡೆದ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ, ಮಹಿಳೆಯರ F54 ಡಿಸ್ಕಸ್ ಥ್ರೋ (ಚಕ್ರ ಎಸೆತ) ಸ್ಪರ್ಧೆಯಲ್ಲಿ ಭಾರತದ ಸುವರ್ಣ ರಾಜ್ ಅವರು 15.66 ಮೀಟರ್‌ಗಳ ಅತ್ಯುತ್ತಮ ಸಾಧನೆಯೊಂದಿಗೆ ಚಿನ್ನದ ಪದಕವನ್ನು ಗೆದ್ದುಕೊಂಡರು.
ಸುವರ್ಣ ಸ್ಥಿರವಾದ ಪ್ರದರ್ಶನ ನೀಡಿದರು. ತಮಗೆ ಲಭ್ಯವಿದ್ದ ಆರು ಪ್ರಯತ್ನಗಳಲ್ಲಿ ನಾಲ್ಕು ಬಾರಿ ಅವರು 15 ಮೀಟರ್‌ಗಿಂತಲೂ ದೂರಕ್ಕೆ ಎಸೆತಗಳನ್ನು ದಾಖಲಿಸಿದರು. ಐದನೇ ಪ್ರಯತ್ನದಲ್ಲಿ ಅವರು ತೋರಿದ ಅತ್ಯುತ್ತಮ ಪ್ರದರ್ಶನವು ಅವರಿಗೆ ಚಿನ್ನದ ಪದಕವನ್ನು ತಂದುಕೊಟ್ಟಿತು.
ಇರಾನ್‌ನ ಶಹ್ಲಾ ಹದಿಡಿ 15.45 ಮೀಟರ್‌ಗಳೊಂದಿಗೆ ಎರಡನೇ ಸ್ಥಾನ ಪಡೆದರೆ, ವಿಯೆಟ್ನಾಂನ ಥಿ ಎನ್ಗೊಕ್ ಥುಯ್ ನ್ಗುಯೆನ್ 14.65 ಮೀಟರ್‌ಗಳೊಂದಿಗೆ ಕಂಚಿನ ಪದಕವನ್ನು ಗೆದ್ದುಕೊಂಡರು.
ಸೆಮಿಫೈನಲ್‌ನಲ್ಲಿ ಇಂಡೋನೇಷ್ಯಾದ ರೀನಾ ಮಾರ್ಲಿನಾ ಮತ್ತು ಸುಭಾನ್ ವಿರುದ್ಧ ಸೋತ ನಂತರ, ಕೃಷ್ಣ ನಗರ ಮತ್ತು ನಿತ್ಯಾ ಶ್ರೀ ಅವರು ಬ್ಯಾಡ್ಮಿಂಟನ್‌ ಮಿಶ್ರ ಡಬಲ್ಸ್ (SH6) ವಿಭಾಗದಲ್ಲಿ ಕಂಚಿನ ಪದಕವನ್ನು ಪಡೆದರು. ಇಂಡೋನೇಷ್ಯಾದ ಎದುರಾಳಿಗಳ ವಿರುದ್ಧ ಭಾರತೀಯ ಜೋಡಿಯು ಗೆಲುವು ಸಾಧಿಸಲು ವಿಫಲವಾದ್ದರಿಂದ, ಅವರ ಅಭಿಯಾನವು ಸೆಮಿಫೈನಲ್ ಹಂತದಲ್ಲೇ ಕೊನೆಗೊಂಡಿತು.
'ಡ್ರಾ'ದಲ್ಲಿ ಅಂತ್ಯ ಕಂಡ ಕರ್ನಾಟಕ-ಸೌರಾಷ್ಟ್ರ ರಣಜಿ ಪಂದ್ಯ
ಸ್ವರ್ಣ ಪದಕಕ್ಕಾಗಿ ನಡೆದ ಪಂದ್ಯದಲ್ಲಿ ಚೀನಾದ ಸೆನ್ ಮೆಂಗ್‌ಕಾನ್ ವಿರುದ್ಧ 4-6 ಅಂತರದಲ್ಲಿ ಸೋತ ಭಾರತದ ಸ್ವಾತಿ ಚೌಧರಿ, ಮಹಿಳೆಯರ ಆರ್ಚರಿ W1 ವಿಭಾಗದಲ್ಲಿ ಬೆಳ್ಳಿ ಪದಕವನ್ನು ಗೆದ್ದುಕೊಂಡರು.
ಭಾರತಕ್ಕೆ ಮುಜುಗರ ತಂದ ಮೊಹಮ್ಮದ್ ಶಮ್ಸ್ ಆಲಂ
ನಾಗೋಯಾದಲ್ಲಿ ನಡೆಯುತ್ತಿರುವ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಭಾರತ ಉತ್ತಮ ಪದಕ ಸಾಧನೆ ಮಾಡುತ್ತಿರುವ ಬೆನ್ನಲ್ಲೇ ಭಾರತೀಯ ತಂಡಕ್ಕೆ ಮುಜುಗರದ ಸನ್ನಿವೇಶವೊಂದು ಎದುರಾಗಿದೆ. ಪ್ಯಾರಾ ಈಜುಪಟು ಮೊಹಮ್ಮದ್ ಶಮ್ಸ್ ಆಲಂ ಶೇಖ್, ಹೋಟೆಲ್ ಮಹಿಳಾ ಉದ್ಯೋಗಿಯೊಬ್ಬರಿಗೆ ಲೈಂಗಿಕ ಕಿರುಕುಳ ನೀಡಿದ ಮತ್ತು ಅನುಚಿತವಾಗಿ ವರ್ತಿಸಿದ ಆರೋಪದ ಮೇಲೆ ಜಪಾನ್ ಪೊಲೀಸರಿಂದ ವಶಕ್ಕೆ ಪಡೆದರು. ಈ ಘಟನೆ ನಡೆದ ಮರುದಿನವೇ, ಅಂದರೆ ಮಂಗಳವಾರ ಭಾರತಕ್ಕೆ ವಾಪಸ್ ಕಳುಹಿಸಲಾಗಿದೆ. ಅಲ್ಲದೆ, ಇವರ ವಿರುದ್ಧ ಭಾರತೀಯ ಪ್ಯಾರಾಲಿಂಪಿಕ್ ಸಮಿತಿಯು (PCI) ಜೀವಮಾನದ ನಿಷೇಧ ಹೇರುವ ಸಾಧ್ಯತೆಯೂ ಇದೆ.