ಮುಂಬಯಿ, ನ.12: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) 2027ರ ಮಿನಿ ಹರಾಜು ಪ್ರಕ್ರಿಯೆ ಹತ್ತಿರವಾಗುತ್ತಿದ್ದಂತೆ, ಫ್ರಾಂಚೈಸಿಗಳು ತಾವು ಉಳಿಸಿಕೊಳ್ಳುವ ಮತ್ತು ಕೈಬಿಡುವ ಆಟಗಾರರ ಪಟ್ಟಿಯನ್ನು ಅಂತಿಮಗೊಳಿಸುವ ಕೆಲಸದಲ್ಲಿ ನಿರತವಾಗಿವೆ. ಕೆಲವು ತಂಡಗಳು ಆಟಗಾರರ ವಿನಿಮಯದ ಸಾಧ್ಯತೆಗಳ ಕುರಿತು ಇತರ ಫ್ರಾಂಚೈಸಿಗಳೊಂದಿಗೆ ಮಾತುಕತೆ ನಡೆಸುತ್ತಿವೆ. ಆಟಗಾರರ ವಿನಿಮಯದ ವಿಷಯವಾಗಿ ಹಲವು ಫ್ರಾಂಚೈಸಿಗಳೊಂದಿಗೆ ಚರ್ಚೆ ನಡೆಸುತ್ತಿರುವ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಇದೀಗ ದೊಡ್ಡ ತಲೆನೋವು ಎದುರಾಗಿದೆ. ವರದಿಗಳ ಪ್ರಕಾರ, ತಂಡದ ನಾಯಕ ಅಕ್ಷರ್ ಪಟೇಲ್ ಅವರು ನಾಯಕತ್ವವನ್ನು ಮುಂದುವರಿಸಲು ಹಿಂದೇಟು ಹಾಕುತ್ತಿದ್ದು, ಇದರಿಂದಾಗಿ ತಂಡದ ಆಡಳಿತ ಮಂಡಳಿ ಗೊಂದಲದ ಸ್ಥಿತಿಯಲ್ಲಿದೆ.
'ದಿ ಟೈಮ್ಸ್ ಆಫ್ ಇಂಡಿಯಾ' ವರದಿಯ ಪ್ರಕಾರ, ಡೆಲ್ಲಿ ಕ್ಯಾಪಿಟಲ್ಸ್ ಆಡಳಿತ ಮಂಡಳಿಯು ಅಕ್ಷರ್ ಅವರನ್ನು ನಾಯಕನನ್ನಾಗಿ ಮುಂದುವರಿಸಲು ನಿರ್ಧರಿಸಿದೆ. ಆದರೆ, ಅಕ್ಷರ್ ನಾಯಕತ್ವದಲ್ಲಿ ಮುಂದುವರಿಯಲು ಆಸಕ್ತಿ ಹೊಂದಿಲ್ಲ ಎನ್ನಲಾಗಿದೆ.
ಅಕ್ಷರ್ ಅವರ ನಾಯಕತ್ವದಲ್ಲಿ ದೆಹಲಿ ತಂಡದ ಪ್ರದರ್ಶನವು ಏರುಪೇರಿನಿಂದ ಕೂಡಿದ್ದು, ಕಳೆದ ಎರಡು ಸೀಸನ್‌ಗಳಲ್ಲಿ ತಂಡವು ಪ್ಲೇಆಫ್‌ಗೆ ಪ್ರವೇಶಿಸಲು ವಿಫಲವಾಗಿದೆ. ನಾಯಕತ್ವದ ಹೊರೆಯು ಅಕ್ಷರ್ ಅವರ ಬ್ಯಾಟಿಂಗ್ ಮತ್ತು ಬೌಲಿಂಗ್ ಪ್ರದರ್ಶನದ ಮೇಲೆ ಪರಿಣಾಮ ಬೀರಿದಂತಿದೆ. 2026ರ ಐಪಿಎಲ್‌ನಲ್ಲಿ, ಅವರು ಆಡಿದ 14 ಪಂದ್ಯಗಳಲ್ಲಿ ಕೇವಲ 173 ರನ್‌ಗಳನ್ನು ಗಳಿಸಿ, 11 ವಿಕೆಟ್‌ಗಳನ್ನು ಪಡೆದರು.
ಅಕ್ಷರ್ ಅವರನ್ನು ಒಳಗೊಂಡ ವಿನಿಮಯ ಒಪ್ಪಂದಕ್ಕಾಗಿ ಹಲವು ಫ್ರಾಂಚೈಸಿಗಳು ದೆಹಲಿ ತಂಡವನ್ನು ಸಂಪರ್ಕಿಸಿದ್ದವು, ಆದರೆ ಆಡಳಿತ ಮಂಡಳಿಯು ಆ ಎಲ್ಲಾ ಪ್ರಸ್ತಾಪಗಳನ್ನು ಅದರಲ್ಲಿ ಕೆಲವು ಅತ್ಯಂತ ಲಾಭದಾಯಕವಾಗಿದ್ದವುಗಳನ್ನೂ ಒಳಗೊಂಡಂತೆ ತಿರಸ್ಕರಿಸಿತು.
ಡಿ.16ಕ್ಕೆ ಐಪಿಎಲ್‌ ಮಿನಿ ಹರಾಜು; ಟ್ರೇಡಿಂಗ್ ವಿಂಡೋ ನ. 15ಕ್ಕೆ ಮುಕ್ತಾಯ
"ನಾಯಕನಾಗಿ ಮುಂದುವರಿಯಲು ಅಕ್ಷರ್ ಹೆಚ್ಚು ಆಸಕ್ತಿ ಹೊಂದಿಲ್ಲ. ಅವರನ್ನು ಒಪ್ಪಿಸಲು ಆಡಳಿತ ಮಂಡಳಿ ಪ್ರಯತ್ನಿಸುತ್ತಿದೆ. ಫ್ರಾಂಚೈಸಿಗೆ ಅಕ್ಷರ್ ಅತ್ಯಂತ ಪ್ರಮುಖ ಆಟಗಾರ. ಈ ಋತುವಿನಲ್ಲಿ 'ಕ್ಯಾಪಿಟಲ್ಸ್' ತಂಡವು ಅವರಿಗೆ ಬಂದಿದ್ದ ಹಲವು ಲಾಭದಾಯಕ 'ಟ್ರೇಡ್' (ಆಟಗಾರರ ವಿನಿಮಯ) ಪ್ರಸ್ತಾಪಗಳನ್ನು ತಿರಸ್ಕರಿಸಿದೆ. ಹರಾಜು ಪ್ರಕ್ರಿಯೆ ಮುಗಿಯುವವರೆಗೂ ನಾಯಕನ ಆಯ್ಕೆಯನ್ನು ಅಂತಿಮಗೊಳಿಸದಿರಲು ಆಡಳಿತ ಮಂಡಳಿ ನಿರ್ಧರಿಸಿದೆ" ಎಂದು ಮೂಲವೊಂದನ್ನು ಉಲ್ಲೇಖಿಸಿ ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ.
ಮಿನಿ ಹರಾಜಿಗೂ ಮುನ್ನ, ಡೆಲ್ಲಿ ಕ್ಯಾಪಿಟಲ್ಸ್ ತಂಡವು ಪ್ರಮುಖ ಪುನರ್ರಚನೆಗೆ ಒಳಗಾಗಿದೆ. ಸೌರವ್ ಗಂಗೂಲಿ ಅವರು ಮುಖ್ಯ ಕೋಚ್ ಆಗಿ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದರೆ, ಯುವರಾಜ್ ಸಿಂಗ್, ಚಮಿಂಡಾ ವಾಸ್ ಮತ್ತು ಅಮಿತ್ ಮಿಶ್ರಾ ಅವರಂತಹವರು ಸಹಾಯಕ ಸಿಬ್ಬಂದಿಯಾಗಿ ತಂಡವನ್ನು ಸೇರಿಕೊಂಡಿದ್ದಾರೆ.