ಮುಂಬಯಿ, ಸೆ. 19: ಬಿಸಿಸಿಐ (BCCI) ತನ್ನ ಅಂಪೈರ್ ವರ್ಗೀಕರಣವನ್ನು ಪುನರ್ರಚಿಸಿ ಅವರ ದೈನಂದಿನ ಸಂಭಾವನೆಯನ್ನು ಗಣನೀಯವಾಗಿ ಹೆಚ್ಚಿಸಿದೆ. ಜೊತೆಗೆ ಪಂದ್ಯದ ರೆಫರಿಗಳ ಸಂಭಾವನೆ ಪಾವತಿ ವಿಧಾನವನ್ನೂ ಪರಿಷ್ಕರಿಸಿದೆ. ಮಾತ್ರವಲ್ಲದೆ ಅಂಪೈರ್ಗಳಿಗಾಗಿ ಅರ್ಹತೆ ಆಧಾರಿತ ಬಡ್ತಿ ಮತ್ತು ಕೆಳದರ್ಜೆಗೆ ಇಳಿಸುವ ವ್ಯವಸ್ಥೆಯನ್ನು ಮಂಡಳಿಯು ಪರಿಚಯಿಸಿದೆ ಎಂದು ಕಾರ್ಯದರ್ಶಿ ದೇವಜಿತ್ ಸೈಕಿಯಾ ತಿಳಿಸಿದರು.
ಕಳೆದ ಸುಮಾರು ಒಂದು ದಶಕದಿಂದ ಅಂಪೈರ್ಗಳು ಮತ್ತು ಪಂದ್ಯದ ರೆಫರಿಗಳ ಸಂಭಾವನೆಯಲ್ಲಿ ಯಾವುದೇ ಪರಿಷ್ಕರಣೆ ಮಾಡಲಾಗಿರಲಿಲ್ಲ, ಅದನ್ನು ಈಗ ಮಾಡಲಾಗಿದೆ ಎಂದು ಸೈಕಿಯಾ ಹೇಳಿದರು.
ಹೊಸ ವ್ಯವಸ್ಥೆಯಡಿ, ಅಂಪೈರ್ಗಳನ್ನು ಎ, ಬಿ, ಸಿ ಮತ್ತು ಡಿ ಎಂಬ ನಾಲ್ಕು ಶ್ರೇಣಿಗಳಾಗಿ ವಿಂಗಡಿಸಲಾಗುವುದು ಮತ್ತು ಅವರಿಗೆ ಕ್ರಮವಾಗಿ ದಿನಕ್ಕೆ 60,000, 50,000, 40,000 ಹಾಗೂ 35,000 ರೂಪಾಯಿಗಳನ್ನು ಪಾವತಿಸಲಾಗುವುದು.
"2017-18 ರಿಂದ ಸುಮಾರು 10 ವರ್ಷಗಳ ಕಾಲ ಅಂಪೈರ್ಗಳ ಸಂಭಾವನೆಯಲ್ಲಿ ಯಾವುದೇ ಪರಿಷ್ಕರಣೆ ನಡೆದಿರಲಿಲ್ಲ, ಹಾಗಾಗಿ ನಾವು ಅವರ ವರ್ಗಗಳನ್ನು ಪುನರ್ರಚಿಸಿದ್ದೇವೆ" ಎಂದು ಶುಕ್ರವಾರ ನಡೆದ ಬಿಸಿಸಿಐ (BCCI) ವಾರ್ಷಿಕ ಸಾಮಾನ್ಯ ಸಭೆಯ (AGM) ನಂತರ ಸೈಕಿಯಾ ಸುದ್ದಿಗಾರರಿಗೆ ತಿಳಿಸಿದರು.
ಏಷ್ಯನ್ ಗೇಮ್ಸ್; ಹಾಲಿ ಚಾಂಪಿಯನ್ ಭಾರತಕ್ಕೆ ಸವಾಲೊಡ್ಡೀತೇ ಬಾಂಗ್ಲಾ?
"ಹಿಂದೆ A+, A, B ಮತ್ತು C ಎಂಬ ನಾಲ್ಕು ವರ್ಗಗಳಿದ್ದವು. ಈಗ ನಾವು ಅವುಗಳನ್ನು A, B, C ಮತ್ತು D ಎಂದು ಪುನರ್ವಿಂಗಡಿಸಿದ್ದೇವೆ. ದೈನಂದಿನ ಶುಲ್ಕಗಳನ್ನು ಗಣನೀಯವಾಗಿ ಹೆಚ್ಚಿಸಲಾಗಿದೆ. ಜೊತೆಗೆ, ಪಂದ್ಯದ ರೆಫರಿಗಳ ಶುಲ್ಕವನ್ನೂ ಹೆಚ್ಚಿಸಿ, ಅವರ ಶುಲ್ಕ ರಚನೆಯನ್ನು ಪರಿಷ್ಕರಿಸಿದ್ದೇವೆ" ಎಂದು ಅವರು ಹೇಳಿದರು.
ಅಂಪೈರ್ಗಳ ಕಾರ್ಯಕ್ಷಮತೆಯನ್ನು ಮೌಲ್ಯಮಾಪನ ಮಾಡಿ, ಅವರ ಅರ್ಹತೆಯ ಆಧಾರದ ಮೇಲೆ ಕರ್ತವ್ಯಗಳನ್ನು ನಿರ್ಧರಿಸಲು 'ಅಂಪೈರ್ಗಳ ಮಂಡಳಿ'ಯನ್ನು ರಚಿಸಲಾಗುವುದು ಎಂದು ಬಿಸಿಸಿಐ ಕಾರ್ಯದರ್ಶಿ ತಿಳಿಸಿದ್ದಾರೆ. ಪ್ರತಿ ದೇಶೀಯ ಋತುವಿನ ಅಂತ್ಯದಲ್ಲಿ ಅಂಪೈರ್ಗಳಿಗೆ ಬಡ್ತಿ ಅಥವಾ ಹಿಂಬಡ್ತಿ ನೀಡಲಾಗುತ್ತದೆ.