ನವದೆಹಲಿ: ಭಾರತ ಟೆಸ್ಟ್ ತಂಡದಲ್ಲಿ ಭವಿಷ್ಯದ ದೃಷ್ಟಿಕೋನದಲ್ಲಿ ಮೂರನೇ ಕ್ರಮಾಂಕಕ್ಕೆ ಸಾಯಿ ಸುದರ್ಶನ್‌ (Sai Sudarshan) ಅಥವಾ ವಾಷಿಂಗ್ಟನ್‌ ಸುಂದರ್‌ (Washingon Sundar) ಅವರಲ್ಲಿ ಒಬ್ಬರನ್ನು ಪರಿಗಣಿಸಬೇಕೆಂದು ಗೌತಮ್‌ ಗಂಭೀರ್‌ ಮಾರ್ಗದರ್ಶನದ ಟೀಮ್‌ ಮ್ಯಾನೇಜ್‌ಮೆಂಟ್‌ಗೆ ಮಾಜಿ ಬ್ಯಾಟ್ಸ್‌ಮನ್‌ ಅಜಿಂಕ್ಯ ರಹಾನೆ (Ajinya Rahane) ಆಗ್ರಹಿಸಿದ್ದಾರೆ. ದಕ್ಷಿಣ ಆಫ್ರಿಕಾ ವಿರುದ್ಧ ಮೊದಲನೇ ಟೆಸ್ಟ್ ಪಂದ್ಯದಲ್ಲಿ ಸಾಯಿ ಸುದರ್ಶನ್‌ಗೆ ಅವಕಾಶ ನೀಡಲಾಗಿರಲಿಲ್ಲ. ಆ ಮೂಲಕ ಮೂರನೇ ಕ್ರಮಾಂಕದಲ್ಲಿ ವಾಷಿಂಗ್ಟನ್‌ ಸುಂದರ್‌ಗೆ ಅವಕಾಶ ನೀಡಲಾಗಿತ್ತು. ಈ ಪಂದ್ಯದ ಎರಡೂ ಇನಿಂಗ್ಸ್‌ಗಳಲ್ಲಿ ವಾಷಿಂಗ್ಟನ್‌ ಸುಂದರ್‌ ಗಮನ ಸೆಳೆದರೂ ಭಾರತ ತಂಡ 30 ರನ್‌ಗಳಿಂದ ಸೋಲು ಅನುಭವಿಸಿತ್ತು.
ಗೌತಮ್‌ ಗಂಭೀರ್‌ ಭಾರತ ತಂಡದ ಹೆಡ್‌ ಕೋಚ್‌ ಆದ ಬಳಿಕಬ ಟೆಸ್ಟ್ ತಂಡದ ಪ್ಲೇಯಿಂಗ್‌ XIನಲ್ಲಿನ ಮೂರನೇ ಕ್ರಮಾಂಕದಲ್ಲಿ ಹಲವು ಬದಲಾವಣೆಗಳನ್ನು ಮಾಡಲಾಗುತ್ತಿದೆ. ಸಾಯಿ ಸುದರ್ಶನ್‌, ಕರುಣ್‌ ನಾಯರ್‌ ಹಾಗೂ ಶುಭಮನ್‌ ಗಿಲ್‌ ಅವರನ್ನು ಪ್ರಯತ್ನಿಸಲಾಗಿತ್ತು. ಇದೀಗ ವಾಷಿಂಗ್ಟನ್‌ ಸುಂದರ್‌ ಅವರನ್ನು ಆಡಿಸಲಾಗಿದೆ. ಆದರೂ ಇನ್ನೂ ಯಾವುದೇ ಆಟಗಾರ ಮೂರನೇ ಕ್ರಮಾಂಕವನ್ನು ಭದ್ರಪಡಿಸಿಕೊಂಡಿಲ್ಲ. ಆದರೆ, ವಾಷಿಂಗ್ಟನ್‌ ಸುಂದರ್‌ ಕೋಲ್ಕತಾ ಟೆಸ್ಟ್‌ನ ಎರಡೂ ಇನಿಂಗ್ಸ್‌ಗಳಲ್ಲಿ 30ಕ್ಕೂ ಅಧಿಕ ರನ್ ನೀಡಿ ಎಲ್ಲರ ಭರವಸೆ ಮೂಡಿಸಿದ್ದಾರೆ.
IND vs SA: ದಕ್ಷಿಣ ಆಫ್ರಿಕಾ ತಂಡಕ್ಕೆ ಆಘಾತ, ಎರಡನೇ ಟೆಸ್ಟ್‌ನಿಂದಲೂ ಕಗಿಸೊ ರಬಾಡ ಔಟ್‌!
ಮೂರನೇ ಕ್ರಮಾಂಕಕ್ಕೆ ಸಾಯಿ ಸುದರ್ಶನ್‌ ಸೂಕ್ತ
ಆರ್‌ ಅಶ್ವಿನ್‌ ಅವರ ಯುಟ್ಯೂಬ್‌ ಚಾನೆಲ್‌ನಲ್ಲಿ ಮಾತನಾಡಿದ ಅಜಿಂಕ್ಯ ರಹಾನೆ, "ನಾನು ಸಾಯಿ ಸುದರ್ಶನ್‌ ಅವರ ಹೆಸರನ್ನು ತೆಗೆದುಕೊಳ್ಳುತ್ತೇನೆ. ಅವರು 87 ಮತ್ತು 39 ರನ್ ಗಳಿಸುವ ಮೂಲಕ ಉತ್ತಮ ಪ್ರದರ್ಶನವನ್ನು ತೋರಿದ್ದಾರೆ. 6 ಅಥವಾ 7ನೇ ಕ್ರಮಾಂಕಗಳಿಗೆ ಹೋಲಿಕೆ ಮಾಡಿದರೆ, ನಿಮಗೆ ಮೂರನೇ ಕ್ರಮಾಂಕಕ್ಕೆ ಸಂಪೂರ್ಣ ವಿಭಿನ್ನ ಕೌಶಲ ಇರುವ ಬ್ಯಾಟ್ಸ್‌ಮನ್‌ ನಿಮಗೆ ಅಗತ್ಯವಿದೆ. ವಾಷಿಂಗ್ಟನ್‌ ಸುಂದರ್‌ ಅದ್ಭುತ ಪ್ರತಿಭೆ, ಆದರೆ ಮೂರನೇ ಕ್ರಮಾಂಕ ಅವರನ್ನು ಗಲಿಬಿಲಿಗೊಳಿಸುತ್ತದೆ. ತಾನು ಹೇಗೆ ಆಟಕ್ಕೆ ಹೊಂದಿಕೊಳ್ಳಬೇಕೆಂದು ವಾಷಿಂಗ್ಟನ್‌ ಯೋಚಿಸುತ್ತಿರಬೇಕು, ಆದರೆ ಅವರು ಆಲ್‌ರೌಂಡರ್‌ ಎಂದು ನಾನು ಭಾವಿಸುತ್ತೇನೆ," ಎಂದು ಹೇಳಿದ್ದಾರೆ.
ಆಟಗಾರರಿಗೆ ಭದ್ರತೆಯ ಭಾವನೆ ಮೂಡಿಸುವುದು ಮುಖ್ಯ
"ಅವರು ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡಬೇಕಾದರೆ, ಅವರು ವಿಭಿನ್ನವಾಗಿ ತಯಾರಿ ನಡೆಸಬೇಕು ಮತ್ತು ಸಮಯ ನೀಡಬೇಕು. ಕ್ರಮಾಂಕದಲ್ಲಿ ಕೆಳಮಟ್ಟದಲ್ಲಿ ಬ್ಯಾಟ್‌ ಮಾಡಲು ವಿಭಿನ್ನ ಕೌಶಲ ಮತ್ತು ಮನಸ್ಥಿತಿ ಬೇಕಾಗುತ್ತದೆ. ಅದು ವಾಷಿಂಗ್ಟನ್‌ ಆಗಿರಲಿ ಅಥವಾ ಸಾಯಿ ಆಗಿರಲಿ, ಭದ್ರತೆ ನೀಡುವುದು ಅತ್ಯಂತ ಮುಖ್ಯ," ಎಂದು ಸಲಹೆ ನೀಡಿದ್ದಾರೆ.
IND vs SA: ಗುವಾಹಟಿಯ ನಿಗೂಢ ಪಿಚ್‌ನಲ್ಲಿ ಭಾರತಕ್ಕೆ ಟೆಸ್ಟ್ ಗೆಲ್ಲುವ ಸವಾಲು
ಈ ವರ್ಷದ ಆರಂಭದಲ್ಲಿ ಆಂಡರ್ಸನ್-ತೆಂಡೂಲ್ಕರ್ ಟ್ರೋಫಿ ಟೆಸ್ಟ್ ಸರಣಿಯಲ್ಲಿ ಸಾಯಿ ಸುದರ್ಶನ್‌ ತಮ್ಮ ಚೊಚ್ಚಲ ಟೆಸ್ಟ್ ಪಂದ್ಯವನ್ನು ಆಡಿದ್ದರು ಆದರೆ ಉತ್ತಮ ಆರಂಭವನ್ನು ಪಡೆಯಲಿಲ್ಲ. ಆದಾಗ್ಯೂ, ಅವರ ಕೊನೆಯ ಟೆಸ್ಟ್ ಪಂದ್ಯದಲ್ಲಿ ಅವರು ವೆಸ್ಟ್ ಇಂಡೀಸ್ ವಿರುದ್ಧ 87 ರನ್ ಗಳಿಸಿದ್ದರು. ಆ ಮೂಲಕ ದಕ್ಷಿಣ ಆಫ್ರಿಕಾ ವಿರುದ್ಧವೂ ಅವರು ಆಡಬಹುದೆಂದು ನಿರೀಕ್ಷೆ ಮಾಡಲಾಗಿತ್ತು.
ಸಾಯಿ ಸುದರ್ಶನ್‌ಗೂ ದೀರ್ಘಾವಧಿ ಚಾನ್ಸ್‌ ನೀಡಬೇಕು
"ತಂಡದ ಟೀಮ್‌ ಮ್ಯಾನೇಜ್‌ಮೆಂಟ್ ಸಾಯಿ ಸುದರ್ಶನ್‌ ಅವರನ್ನು ದೀರ್ಘಾವಧಿಯ ಮೂರನೇ ಕ್ರಮಾಂಕ ಎಂದು ನೋಡುತ್ತಿದ್ದರೆ, ಅವರಿಗೆ ವಾಷಿಂಗ್ಟನ್‌ ಸುಂದರ್‌ ಅವರಂತೆಯೇ ದೀರ್ಘಾವಧಿ ನೀಡಬೇಕು. ಆಟಗಾರನ ವೃತ್ತಿಜೀವನವು ಅಂಚಿನಲ್ಲಿದೆ ಮತ್ತು ನೀವು ಸ್ಥಿರತೆಯನ್ನು ಬಯಸಿದರೆ, ನೀವು ಅವರಿಗೆ ಸ್ಥಿರವಾದ ಅವಕಾಶಗಳನ್ನು ನೀಡಬೇಕು," ಎಂದು ಅಜಿಂಕ್ಯ ರಹಾನೆ ತಿಳಿಸಿದ್ದಾರೆ.