ಭಾರತ ವಿರುದ್ದ ಆಡಿಲ್ಲವಾದ್ರೆ ಪಾಕಿಸ್ತಾನವನ್ನು ಬ್ಯಾನ್‌ ಮಾಡಬೇಕೆಂದ ಅನುರಾಗ್‌ ಠಾಕೂರ್‌!

ನವದೆಹಲಿ: ಭಾರತ ಹಾಗೂ ಶ್ರೀಲಂಕಾ ಸಹ-ಆಯೋಜನೆಯಲ್ಲಿ ನಡೆಯಲಿರುವ 2026ರ ಐಸಿಸಿ ಪುರುಷರ ಟಿ20 ವಿಶ್ವಕಪ್ ಟೂರ್ನಿಯ (ICC T20 World Cup 2026) ಗುಂಪು ಹಂತದಲ್ಲಿ ಭಾರತ ವಿರುದ್ಧ ಆಡಲು ಪಾಕಿಸ್ತಾನ ನಿರಾಕರಿಸಿರುವ ಹಿನ್ನೆಲೆಯಲ್ಲಿ, ಭಾರತದ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (ಬಿಸಿಸಿಐ) ಮಾಜಿ ಅಧ್ಯಕ್ಷ ಹಾಗೂ ಬಿಜೆಪಿ ಸಂಸದ ಅನುರಾಗ್ ಠಾಕೂರ್ (Anurag Thakur) ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್‌ (ICC) ಪಾಕಿಸ್ತಾನದ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.

ಪಾಕಿಸ್ತಾನ ತಂಡ, ಭಾರತ ವಿರುದ್ಧ ಮೈದಾನಕ್ಕೆ ಇಳಿಯುವುದಿಲ್ಲ ಎಂದು ಸ್ಪಷ್ಟಪಡಿಸಿರುವುದರ ನಡುವೆಯೂ, ಭಾರತ ತಂಡ ನಿಗದಿತ ವೇಳಾಪಟ್ಟಿಯಂತೆ ಮುಂದುವರಿಯಲು ತೀರ್ಮಾನಿಸಿದೆ. ಇದರಲ್ಲಿ ಕೊಲಂಬೊಗೆ ಪ್ರಯಾಣಿಸುವುದು, ಅಭ್ಯಾಸ ನಡೆಸುವುದು ಹಾಗೂ ಕಡ್ಡಾಯ ಪತ್ರಿಕಾಗೋಷ್ಠಿ ಸೇರಿದಂತೆ ಎಲ್ಲಾ ಪಂದ್ಯ ಪೂರ್ವ ಪ್ರಕ್ರಿಯೆಗಳಲ್ಲಿ ಭಾಗವಹಿಸುವುದು ಸೇರಿದ್ದು, ಅಂತಿಮ ನಿರ್ಧಾರಕ್ಕಾಗಿ ಪಂದ್ಯ ರೆಫರಿಯ ತೀರ್ಪನ್ನು ಕಾಯಲಾಗುತ್ತದೆ.

ಈ ವಿಚಾರದ ಕುರಿತು ಮಾತನಾಡಿದ ಅನುರಾಗ್ ಠಾಕೂರ್, ಪ್ರಮುಖ ಅಂತಾರಾಷ್ಟ್ರೀಯ ಟೂರ್ನಿಗಳಿಗೆ ಆತಿಥ್ಯ ವಹಿಸುವಲ್ಲಿ ಭಾರತ ಹೊಂದಿರುವ ದೀರ್ಘಕಾಲದ ಪಾತ್ರವನ್ನು ಹಾಗೂ ಹಣಕಾಸು ಮತ್ತು ಆಡಳಿತಾತ್ಮಕ ಎರಡೂ ಮಟ್ಟಗಳಲ್ಲಿ ವಿಶ್ವ ಕ್ರಿಕೆಟ್‌ಗೆ ನೀಡಿರುವ ಭಾರತದ ಕೊಡುಗೆಯನ್ನು ಒತ್ತಿ ಹೇಳಿದರು.

T20 World Cup: ಅಗತ್ಯಬಿದ್ದರೆ ಬಾಬರ್‌ ಆಝಮ್‌ರನ್ನು ತೆಗೆಯುತ್ತೇವೆ: ಸಲ್ಮಾನ್‌ ಅಲಿ ಆಘಾ!

“ಅವರ ವಿರುದ್ಧ ಐಸಿಸಿ ಕಠಿಣ ನಿಲುವು ತೆಗೆದುಕೊಳ್ಳಬೇಕು. ಭಾರತ ಆತಿಥ್ಯ ವಹಿಸಿರುವ ಎಲ್ಲಾ ಟೂರ್ನಿಗಳಲ್ಲೂ ಅತ್ಯುತ್ತಮ ಸೌಲಭ್ಯಗಳನ್ನು ಒದಗಿಸಿದೆ,” ಎಂದು ಅನುರಾಗ್ ಠಾಕೂರ್ ತಿಳಿಸಿದರು.

ವಿಶ್ವದಾದ್ಯಂತ ಕ್ರಿಕೆಟ್ ಕ್ರೀಡೆಯನ್ನು ಉಳಿಸಿ ಬೆಳೆಸುವಲ್ಲಿ ಭಾರತದ ಪಾತ್ರವನ್ನೂ ಅವರು ಉಲ್ಲೇಖ ಮಾಡಿದರು. “ಹಣಕಾಸಿನ ದೃಷ್ಟಿಯಿಂದಲೂ ಹಾಗೂ ಕ್ರೀಡೆಯ ದೃಷ್ಟಿಯಿಂದಲೂ ಜಾಗತಿಕ ಕ್ರಿಕೆಟ್ ಸಮುದಾಯಕ್ಕೆ ಭಾರತ ಮಹತ್ವದ ಕೊಡುಗೆ ನೀಡುತ್ತಿದೆ,” ಎಂದು ಅವರು ಮತ್ತಷ್ಟು ಹೇಳಿದರು.

“ಇಂದು ಭಾರತಕ್ಕೆ ಬರಲು ಇಚ್ಛಿಸದೇ ನೆಪಗಳನ್ನು ಹಾಕಿ ರಾಜಕಾರಣ ಮಾಡುತ್ತಿದ್ದರೆ, ಅವರ (ಬಾಂಗ್ಲಾದೇಶ) ವಿರುದ್ಧ ಕೂಡ ಕಠಿಣ ನಿಲುವು ಕೈಗೊಳ್ಳಬೇಕು. ಅವರ ಅನುದಾನಗಳನ್ನು ನಿಲ್ಲಿಸಬೇಕು ಮತ್ತು ಕೆಲ ವರ್ಷಗಳ ಕಾಲ ನಿಷೇಧ ಹೇರಬೇಕು, ಹೀಗಾಗಿ ಅವರು ಯಾವುದೇ ಇತರ ದೇಶಗಳ ವಿರುದ್ಧವೂ ಆಡಲು ಸಾಧ್ಯವಾಗದಂತೆ ಮಾಡಬೇಕು,” ಎಂದು ಅನುರಾಗ್ ಠಾಕೂರ್ ಐಸಿಸಿಗೆ ಆಗ್ರಹಿಸಿದ್ದಾರೆ.

T20 World Cup: ಭಾರತ ತಂಡದಲ್ಲಿ ಗಾಯಾಳು ಹರ್ಷಿತ್‌ ರಾಣಾ ಸ್ಥಾನಕ್ಕೆ ಮೊಹಮ್ಮದ್‌ ಸಿರಾಜ್!

ಭಾರತದ ಪಂದ್ಯವನ್ನು ಪಾಕ್‌ ಏಕೆ ಬಾಯ್ಕಟ್‌ ಮಾಡಿದೆ?

ಪಾಕಿಸ್ತಾನ ಸರ್ಕಾರ ಈ ಹಿಂದೆ ಸಾಮಾಜಿಕ ಮಾಧ್ಯಮದಲ್ಲಿ ಅಧಿಕೃತ ಪ್ರಕಟಣೆಯನ್ನು ಹೊರಡಿಸಿ, ತಂಡವು ಟೂರ್ನಿಯಲ್ಲಿ ಭಾಗವಹಿಸುವುದಾಗಿ ದೃಢಪಡಿಸಿದ್ದರೂ, ಫೆಬ್ರವರಿ 15ರಂದು ಕೊಲಂಬೊದಲ್ಲಿ ನಡೆಯಬೇಕಿರುವ ಗುಂಪು ಹಂತದ ಭಾರತ ವಿರುದ್ಧದ ಪಂದ್ಯದಲ್ಲಿ ಮೈದಾನಕ್ಕೆ ಇಳಿಯುವುದಿಲ್ಲ ಎಂದು ತಿಳಿಸಿತ್ತು.

ನಿಗದಿತ ಪಂದ್ಯಗಳಿಗಾಗಿ ಭಾರತಕ್ಕೆ ಪ್ರಯಾಣಿಸಲು ನಿರಾಕರಿಸಿದ ಹಿನ್ನೆಲೆಯಲ್ಲಿ ಬಾಂಗ್ಲಾದೇಶವನ್ನು ಟೂರ್ನಿಯಿಂದ ಹೊರಗಿಟ್ಟ ನಂತರ ಹಾಗೂ ಅವರ ಸ್ಥಾನಕ್ಕೆ ಸ್ಕಾಟ್ಲೆಂಡ್ ಅನ್ನು ಸೇರಿಸಿದ ಹಿನ್ನೆಲೆಯಲ್ಲಿ ಪಾಕಿಸ್ತಾನದ ಈ ನಿರ್ಧಾರವನ್ನು ತೆಗೆದುಕೊಂಡಿದೆ. ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ಐಸಿಸಿಗೆ ಪತ್ರ ಬರೆದು, ಬಿಸಿಸಿಐ ನಿರ್ದೇಶನದ ಮೇರೆಗೆ ಮುಸ್ತಾಫಿಝುರ್ ರೆಹಮಾನ್ ಅವರನ್ನು ಇಂಡಿಯನ್ ಪ್ರೀಮಿಯರ್ ಲೀಗ್‌ನಿಂದ ಕೈಬಿಟ್ಟ ಬಳಿಕ ಭದ್ರತಾ ಆತಂಕಗಳು ಉಂಟಾಗಿವೆ ಎಂದು ಉಲ್ಲೇಖಿಸಿತ್ತು.