ನವದೆಹಲಿ: ಪ್ರಸ್ತುತ ಸಾಗುತ್ತಿರುವ 2026ರ ಐಸಿಸಿ ಟಿ20 ವಿಶ್ವಕಪ್ (ICC T20 World Cup 2026) ಟೂರ್ನಿಯ ಪಂದ್ಯದಲ್ಲಿ (AUS vs ZIM) ಜಿಂಬಾಬ್ವೆ ವಿರುದ್ಧ ಬಲಿಷ್ಠ ಆಸ್ಟ್ರೇಲಿಯಾ ತಂಡ 23 ರನ್ಗಳ ಅಚ್ಚರಿ ಸೋಲು ಅನುಭವಿಸಿತು. ಆಡಿದ ಎರಡೂ ಪಂದ್ಯಗಳಲ್ಲಿ ಗೆಲುವು ದಾಖಲಿಸಿದ ಜಿಂಬಾಬ್ವೆ ತಂಡ ಬಿ ಗುಂಪಿನ ಪಾಯಿಂಟ್ಸ್ ಟೇಬಲ್ನಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಹಿಂದಿಕ್ಕಿ ಎರಡನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿದೆ. ಪಂದ್ಯದ ಸೋಲಿನ ಬಳಿಕ ಆರ್ ಪ್ರೇಮದಾಸ ಕ್ರೀಡಾಂಗಣದ ಪಿಚ್ ಅನ್ನು ಆಸ್ಟ್ರೇಲಿಯಾದ ಬ್ಯಾಟ್ಸ್ಮನ್ ಮ್ಯಾಥ್ಯೂ ರೆನ್ಶಾ (Matt Renshaw) ದೂಷಿಸಲಿಲ್ಲ, ಉಪಖಂಡದ ತಂಡಗಳು ಆಸ್ಟ್ರೇಲಿಯಾ ಪ್ರವಾಸ ಮಾಡುವಾಗ ಪಿಚ್ಗಳ ವೇಗ ಮತ್ತು ಬೌನ್ಸ್ ಬಗ್ಗೆ ಎಂದಿಗೂ ದೂರು ನೀಡುವುದಿಲ್ಲ ಎಂದು ಹೇಳಿದರು.
ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ಜಿಂಬಾಬ್ವೆ ತಂಡ, ಬ್ರಿಯಾನ್ ಬೆನೆಟ್ (64 ರನ್) ಅವರ ಅರ್ಧಶತಕದ ಬಲದಿಂದ ತನ್ನ ಪಾಲಿನ 20 ಓವರ್ಗಳಿಗೆ ಎರಡು ವಿಕೆಟ್ ನಷ್ಟಕ್ಕೆ 169 ರನ್ಗಳನ್ನು ಕಲೆ ಹಾಕಿತ್ತು. ಬಳಿಕ 170 ರನ್ಗಳ ಗುರಿಯನ್ನು ಹಿಂಬಾಲಿಸಿದ ಆಸ್ಟ್ರೇಲಿಯಾ ತಂಡ, ಮ್ಯಾಟ್ ರೆನ್ಶಾ (65 ರನ್) ಅರ್ಧಶತಕದ ಹೊರತಾಗಿಯೂ 19.3 ಓವರ್ಗಳಿಗೆ 146 ರನ್ಗಳಿಗೆ ಆಲ್ಔಟ್ ಆಯಿತು. ಆ ಮೂಲಕ 23 ರನ್ಗಳಿಂದ ಸೋಲು ಅನುಭವಿಸಿತು.
IND vs PAK: ಪಾಕ್ ಸ್ಪಿನ್ನರ್ ಉಸ್ಮಾನ್ ತಾರಿಖ್ಗೆ ಕೌಂಟರ್ ನೀಡುವುದೇಗೆಂದು ಸಲಹೆ ನೀಡಿದ ಆರ್ ಅಶ್ವಿನ್!
ಮ್ಯಾಥ್ಯೂ ರೆನ್ಶಾ ಹೇಳಿದ್ದೇನು?
ಪಂದ್ಯದ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಮ್ಯಾಥ್ಯೂ ರೆನ್ಶಾ ಮಾತನಾಡಿ "ಕ್ರಿಕೆಟ್ ಹಾಗೆ. ಉಪಖಂಡ ತಂಡಗಳು ಆಸ್ಟ್ರೇಲಿಯಾಕ್ಕೆ ಬಂದಾಗ ಬೌನ್ಸ್ ಅಥವಾ ಪೇಸ್ ಬಗ್ಗೆ ಎಂದಿಗೂ ದೂರು ನೀಡುವುದಿಲ್ಲ. ಇತ್ತೀಚಿನ ದಿನಗಳಲ್ಲಿ ಕ್ರಿಕೆಟ್ ಹೀಗಿದೆ, ಮತ್ತು ನೀವು ವಿಭಿನ್ನ ಪಿಚ್ಗಳಲ್ಲಿ ಆಡಲು ಸಾಧ್ಯವಾಗುತ್ತದೆ," ಎಂದು ಹೇಳಿದರು.
ಬಿಗ್ ಬ್ಯಾಷ್ ಲೀಗ್ನಲ್ಲಿ ಆಸ್ಟ್ರೇಲಿಯಾದ ಕಠಿಣ ಮತ್ತು ಬೌನ್ಸಿ ಪಿಚ್ಗಳಲ್ಲಿ ಆಡಿದ ನಂತರ ನಿಧಾನಗತಿಯ ಪಿಚ್ಗಳಲ್ಲಿ ಆಡುವುದು ಸಮಸ್ಯೆಯಾಗಿತ್ತು ಎಂಬುದನ್ನು ಅವರು ನಿರಾಕರಿಸಿದರು. "ಬಿಗ್ ಬ್ಯಾಷ್ ಲೀಗ್ನಲ್ಲಿ ಆಸ್ಟ್ರೇಲಿಯಾದ ಪಿಚ್ಗಳು ಸಾಕಷ್ಟು ಬೌನ್ಸ್ ಆಗಿರುತ್ತವೆ. ಬೌಂಡರಿಗಳು ಚಿಕ್ಕದಾಗಿರುವುದರಿಂದ ಭಾರತವು ಹೆಚ್ಚಿನ ಸ್ಕೋರ್ಗಳಿಗೆ ಅವಕಾಶ ನೀಡುವ ವಿಭಿನ್ನ ಪಿಚ್ಗಳನ್ನು ಹೊಂದಿರುತ್ತದೆ," ಎಂದು ಅವರು ತಿಳಿಸಿದರು.
IND vs PAK: ಸಂಜು ಸ್ಯಾಮ್ಸನ್ ಬ್ಯಾಟಿಂಗ್ನಲ್ಲಿ ಮಾಡುತ್ತಿರುವ ತಪ್ಪನ್ನು ತಿಳಿಸಿದ ಸುನೀಲ್ ಗವಾಸ್ಕರ್!
ನಾವು ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಬೇಕು
"ಇಲ್ಲಿ ಬೌಂಡರಿಗಳು ಸಾಕಷ್ಟು ಉದ್ದವಾಗಿವೆ, ಆದರೆ ಇದು ಕ್ರಿಕೆಟ್. ನಾವು ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಬೇಕು. ಆದರೆ ಹೌದು, ನಾವು ಈ ಪರಿಸ್ಥಿತಿಗಳಿಗೆ ಹೇಗೆ ಹೊಂದಿಕೊಳ್ಳಬಹುದು ಎಂಬುದರ ಬಗ್ಗೆ ಪ್ರಯತ್ನಿಸುತ್ತಿದ್ದೇವೆ. ಈ ಪರಿಸ್ಥಿತಿಗಳಿಗೆ ತಲುಪಿದಾಗ ನಮ್ಮ ಆಟದ ಯೋಜನೆ ಸ್ಪಷ್ಟವಾಗಿರಬೇಕು ಮತ್ತು ನಾವು ಇಲ್ಲಿ ಉತ್ತಮವಾಗಿ ಹೊಂದಿಕೊಳ್ಳುವದನ್ನು ಅರಿತುಕೊಳ್ಳಬೇಕು," ಎಂದು ಆಸೀಸ್ ಬ್ಯಾಟರ್ ರೆನ್ಶಾ ತಿಳಿಸಿದ್ದಾರೆ.