ನವದೆಹಲಿ: ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ರಾಷ್ಟ್ರೀಯ ಆಯ್ಕೆ ಸಮಿತಿಯಲ್ಲಿ ದೊಡ್ಡ ಬದಲಾವಣೆ ಮಾಡಲು ಮುಂದಾಗಿದ್ದು, ಮಾಜಿ ಟೆಸ್ಟ್ ಕ್ರಿಕೆಟಿಗ ಹಾಗೂ ಹಿರಿಯ ಆಯ್ಕೆಗಾರ ಆಕಿಬ್ ಜಾವೆದ್ ಅವರನ್ನು ಸಮಿತಿಯಿಂದ ತೆಗೆದುಹಾಕುವ ಸಾಧ್ಯತೆಯಿದೆ ಎಂದು ಮಂಡಳಿಗೆ ಆಪ್ತವಾಗಿರುವ ಮೂಲವೊಂದು ತಿಳಿಸಿದೆ. ಪಿಸಿಬಿ ತೆರೆಮರೆಯಲ್ಲಿ ನಡೆಸುತ್ತಿರುವ ವ್ಯಾಪಕ ‘ಕ್ಲೀನ್-ಅಪ್’ ಕಾರ್ಯಾಚರಣೆಯ ಭಾಗವಾಗಿ ಈ ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ. ಹಿರಿಯ ಆಟಗಾರರಾದ ಮೊಹಮ್ಮದ್ ರಿಝ್ವಾನ್ (Mohammad Rizwan), ಇಮಾಮ್-ಉಲ್-ಹಕ್ ಮತ್ತು ಸಲ್ಮಾನ್ ಅಲಿ ಆಘಾ ಅವರನ್ನು ಇಂಗ್ಲೆಂಡ್ನಿಂದ ವಾಪಸ್ ಕಳುಹಿಸಿದ ಕೆಲವೇ ದಿನಗಳ ಬಳಿಕ ಈ ಬೆಳವಣಿಗೆ ನಡೆದಿದೆ. ಈ ನಿರ್ಧಾರವು ತಂಡದ ಆಯ್ಕೆ ನೀತಿ ಹಾಗೂ ತಂಡದ ನಿರ್ವಹಣೆ ಕುರಿತು ಹಲವು ಊಹಾಪೋಹಗಳಿಗೆ ಕಾರಣವಾಗಿದೆ.
“ಆಕಿಬ್ ಜಾವೆದ್ ಅವರನ್ನು ಲಾಹೋರ್ ಹೈ ಪರ್ಫಾರ್ಮೆನ್ಸ್ ಸೆಂಟರ್ನ ಡೈರೆಕ್ಟರ್ ಡೆವಲಪ್ಮೆಂಟ್ ಹುದ್ದೆಯತ್ತ ಮಾತ್ರ ಗಮನಹರಿಸುವಂತೆ ಸೂಚಿಸುವ ಸಾಧ್ಯತೆಯಿದೆ,” ಎಂದು ವಿಶ್ವಾಸಾರ್ಹ ಮೂಲ ತಿಳಿಸಿದೆ.
ರಿಜ್ವಾನ್, ಇಮಾಮ್ ಮತ್ತು ಸಲ್ಮಾನ್ ಅವರನ್ನು ವಾಪಸ್ ಕಳುಹಿಸಿರುವುದು ಪಿಸಿಬಿಯ ದೊಡ್ಡ ಮಟ್ಟದ ಯೋಜನೆಯ ಭಾಗವಾಗಿದೆ ಎಂದು ಮೂಲ ಹೇಳಿದೆ. ಮೊದಲು ಇಬ್ಬರನ್ನು ಕೇವಲ ಕಳಪೆ ಫಾರ್ಮ್ ಕಾರಣಕ್ಕಾಗಿ ತಂಡದಿಂದ ಕೈಬಿಡಲಾಗಿಲ್ಲ. ಡ್ರೆಸ್ಸಿಂಗ್ ರೂಮ್ನಲ್ಲಿನ ಅವರ ವರ್ತನೆಯೂ ಇದಕ್ಕೆ ಕಾರಣವಾಗಿದೆ ಎಂದು ತಿಳಿಸಲಾಗಿದೆ.
“ವಾಪಸ್ ಕಳುಹಿಸಲಾದ ಉಳಿದ ಆಟಗಾರರ ವಿಚಾರದಲ್ಲಿ ಮಧ್ಯಂತರ ರೆಡ್-ಬಾಲ್ ಮುಖ್ಯ ಕೋಚ್ ಮೈಕ್ ಹೇಸನ್ ಅವರ ಶಿಫಾರಸು ಪ್ರಮುಖವಾಗಿತ್ತು. ವೈಟ್-ಬಾಲ್ ಶಿಬಿರದಲ್ಲಿ ತಮ್ಮೊಂದಿಗೆ ಕೆಲಸ ಮಾಡಿದ್ದ ಕೆಲವು ಆಟಗಾರರಿಗೆ ಅವಕಾಶ ನೀಡಲು ಅವರು ಬಯಸಿದ್ದರು,” ಎಂದು ಮೂಲ ಮಾಹಿತಿ ನೀಡಿದೆ.
IPL 2027: ಇಂಪ್ಯಾಕ್ಟ್ ಪ್ಲೇಯರ್ ನಿಯಮವನ್ನು ತೆಗೆಯಬೇಕೆಂದ ಸುರೇಶ್ ರೈನಾ!
ವೆಸ್ಟ್ ಇಂಡೀಸ್ ಮತ್ತು ಇಂಗ್ಲೆಂಡ್ ಪ್ರವಾಸಗಳ ವೇಳೆ ನಡೆದ ಕೆಲವು ಘಟನೆಗಳಿಗೆ ಸಂಬಂಧಿಸಿದಂತೆ ರಿಝ್ವಾನ್, ಇಮಾಮ್ ಮತ್ತು ಸಲ್ಮಾನ್ ತಮ್ಮ ವರ್ತನೆಯ ಬಗ್ಗೆ ವಿವರಣೆ ನೀಡಲು ಸಮಿತಿಯ ಮುಂದೆ ಹಾಜರಾಗಬೇಕಾಗಬಹುದು ಎಂದು ಮೂಲ ಮತ್ತಷ್ಟು ತಿಳಿಸಿದೆ. ಪಿಸಿಬಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ತಂಡದಲ್ಲಿ ‘ಕ್ಲೀನ್-ಅಪ್’ ಮಾಡಲು ಉತ್ಸುಕರಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಆಯ್ಕೆ ಸಮಿತಿಯೇ ಮುಂದಿನ ಬದಲಾವಣೆಯ ಕ್ಷೇತ್ರವಾಗಬಹುದು ಎಂದು ಮೂಲ ಹೇಳಿದೆ.
“ಅಧ್ಯಕ್ಷರ ಆಪ್ತರೆಂದು ಪರಿಗಣಿಸಲ್ಪಡುವ ಆಕಿಬ್ ಜಾವೆದ್ ಅವರಿಗೂ ರಾಷ್ಟ್ರೀಯ ಆಯ್ಕೆ ಸಮಿತಿಯ ಜವಾಬ್ದಾರಿಯಿಂದ ಹಿಂದೆ ಸರಿದು, ಲಾಹೋರ್ ಹೈ ಪರ್ಫಾರ್ಮೆನ್ಸ್ ಸೆಂಟರ್ನ ಡೈರೆಕ್ಟರ್ ಡೆವಲಪ್ಮೆಂಟ್ ಹುದ್ದೆಯತ್ತ ಮಾತ್ರ ಗಮನಹರಿಸುವಂತೆ ಸೂಚಿಸುವ ಸಾಧ್ಯತೆಯಿದೆ,” ಎಂದು ಮೂಲ ತಿಳಿಸಿದೆ.
2027ರ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಗೆ ಸಂಜು ಸ್ಯಾಮ್ಸನ್ ಬೇಡ ಎಂದ ವಾಸೀಮ್ ಜಾಫರ್!
ಮಿಸ್ಬಾ-ಉಲ್-ಹಕ್ ಕೂಡ ರಾಜೀನಾಮೆ ನೀಡಲು ಸಿದ್ಧ
ಮತ್ತೊಬ್ಬ ಆಯ್ಕೆಗಾರ ಹಾಗೂ ಪಾಕಿಸ್ತಾನದ ಮಾಜಿ ನಾಯಕ ಮಿಸ್ಬಾ-ಉಲ್-ಹಕ್ ಈಗಾಗಲೇ ತಮ್ಮ ಹುದ್ದೆಯಿಂದ ಕೆಳಗಿಳಿಯಲು ಸಿದ್ಧತೆ ವ್ಯಕ್ತಪಡಿಸಿದ್ದಾರೆ ಎಂದು ಮೂಲ ತಿಳಿಸಿದೆ. ಒಟ್ಟಿನಲ್ಲಿ, ಆಟಗಾರರ ಆಯ್ಕೆ, ಡ್ರೆಸ್ಸಿಂಗ್ ರೂಮ್ನಲ್ಲಿನ ಶಿಸ್ತು ಹಾಗೂ ತಂಡದ ನಿರ್ವಹಣೆ ಕುರಿತು ಪಿಸಿಬಿ ತನ್ನ ಕಾರ್ಯವೈಖರಿಯಲ್ಲಿ ಮಹತ್ವದ ಬದಲಾವಣೆಗಳನ್ನು ಮಾಡಲು ಮುಂದಾಗಿರುವ ಸೂಚನೆಗಳು ಕಾಣಿಸುತ್ತಿವೆ.
ಹೊಸ ಆಯ್ಕೆ ಸಮಿತಿ ರಚನೆ?
ಇಂಗ್ಲೆಂಡ್ ಪ್ರವಾಸಕ್ಕೆ ಇಮಾಮ್-ಉಲ್-ಹಕ್ ಮತ್ತು ಮೊಹಮ್ಮದ್ ರಿಝ್ವಾನ್ ಅವರನ್ನು ಆಯ್ಕೆ ಮಾಡಿದ್ದಕ್ಕೆ ಹಾಗೂ ಆಯ್ಕೆ ನೀತಿಯನ್ನು ರೂಪಿಸುವಾಗ ಅನುಸರಿಸಲಾದ ಮಾನದಂಡಗಳ ಕುರಿತು ವಿವರಣೆ ನೀಡುವಂತೆ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ಆಯ್ಕೆ ಸಮಿತಿ ಮತ್ತು ಸಲಹಾ ಸಮಿತಿಯ ಸದಸ್ಯರಿಗೆ ನೋಟಿಸ್ ಜಾರಿ ಮಾಡಿದೆ. “ಇಂಗ್ಲೆಂಡ್ ಪ್ರವಾಸದ ಬಳಿಕ ಹೊಸ ಆಯ್ಕೆ ಸಮಿತಿಯನ್ನು ಘೋಷಿಸುವ ಸಾಧ್ಯತೆಯಿದೆ,” ಎಂದು ಮೂಲ ತಿಳಿಸಿದೆ.
ಆಕಿಬ್ ಜಾವೆದ್ ಅವರು ಬಹುಕಾಲದಿಂದಲೂ ಪಿಸಿಬಿಯ ಅತ್ಯಂತ ಪ್ರಭಾವಶಾಲಿ ವ್ಯಕ್ತಿಗಳಲ್ಲಿ ಒಬ್ಬರೆಂದು ಪರಿಗಣಿಸಲ್ಪಟ್ಟಿದ್ದಾರೆ. ಆಟಗಾರರ ಆಯ್ಕೆ ಸೇರಿದಂತೆ ತಂಡಕ್ಕೆ ಸಂಬಂಧಿಸಿದ ಹಲವು ಪ್ರಮುಖ ವಿಚಾರಗಳಲ್ಲಿ ಅವರು ಮಹತ್ವದ ಪ್ರಭಾವ ಹೊಂದಿದ್ದಾರೆ ಎನ್ನಲಾಗಿದೆ.