ಚೆನ್ನೈ, ಮಾ.13: ಎಂಎಸ್ ಧೋನಿ(MS Dhoni) ಇಲ್ಲದೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಅಪೂರ್ಣ, ಆದರೆ ಈ ಬಾರಿಯ ಟೂರ್ನಿ ಅವರಿಗೆ ಕೊನೆಯದ್ದಾಗಿದೆ ಎಂದು ಮಾಜಿ ಆಟಗಾರ ಇರ್ಫಾನ್ ಪಠಾಣ್ (Irfan Pathan)ಹೇಳಿದರು. 19ನೇ ಸೀಸನ್(IPL 2026) ಆಡಲು ಧೋನಿ ಸಜ್ಜಾಗುತ್ತಿರುವಾಗಲೇ ಇರ್ಫಾನ್ ಅವರ ಈ ಹೇಳಿಕೆ ಧೋನಿ ಅಭಿಮಾನಿಗಳಿಗೆ ಬೇಸರ ಮೂಡಿಸಿದೆ.
ಜಿಯೋಹಾಟ್ಸ್ಟಾರ್ ಜತೆ ಮಾತನಾಡಿದ ಪಠಾಣ್, ಧೋನಿ ಇಲ್ಲದೆ ಸಿಎಸ್ಕೆ ಮತ್ತು ಐಪಿಎಲ್ ಅನ್ನು ಊಹಿಸಿಕೊಳ್ಳುವುದು ಕಷ್ಟ ಮತ್ತು ತಂಡದಲ್ಲಿ ಎಲ್ಲರನ್ನೂ ಒಟ್ಟಿಗೆ ಸೇರಿಸುವುದು ಅವರ ಪಾತ್ರವಾಗಿರುತ್ತದೆ ಎಂದು ಹೇಳಿದರು. ಸಂಜು ಸ್ಯಾಮ್ಸನ್ ಮತ್ತು ಋತುರಾಜ್ ಅವರನ್ನು ಫ್ರಾಂಚೈಸಿಯ ಭವಿಷ್ಯದ ನಾಯಕರನ್ನಾಗಿ ರೂಪಿಸಲು ಧೋನಿ ಸಹಾಯ ಮಾಡುತ್ತಾರೆ ಎಂದು ಮಾಜಿ ಆಲ್ರೌಂಡರ್ ಅಭಿಪ್ರಾಯಪಟ್ಟಿದ್ದಾರೆ.
"ಎಂಎಸ್ ಧೋನಿ ಇಲ್ಲದೆ ಸಿಎಸ್ಕೆ ಅಪೂರ್ಣ. ಈ ಋತುವಿನಲ್ಲಿ ನಾವು ಅವರನ್ನು ಹಳದಿ ಜೆರ್ಸಿಯಲ್ಲಿ ನೋಡುವ ಕೊನೆಯ ಸಮಯವಾಗಿರಬಹುದು ಮತ್ತು ಅವರಿಲ್ಲದೆ ಸಿಎಸ್ಕೆ ಮತ್ತು ಐಪಿಎಲ್ ಅನ್ನು ಊಹಿಸಿಕೊಳ್ಳುವುದು ಕಷ್ಟ. ಅವರು ಈ ಬಾರಿ ಎಷ್ಟು ಪಂದ್ಯಗಳನ್ನು ಆಡುತ್ತಾರೆ ಎಂದು ನನಗೆ ಖಚಿತವಿಲ್ಲ. ಆದರೆ ಡ್ರೆಸ್ಸಿಂಗ್ ಕೋಣೆಯಲ್ಲಿ ಅವರ ಉಪಸ್ಥಿತಿಯು ಬಹಳಷ್ಟು ಸಹಾಯ ಮಾಡುತ್ತದೆ. ಸಂಜು ನಾಯಕತ್ವದ ಗುಂಪಿನ ಭಾಗವಾಗಿರುವುದರಿಂದ ಅವರು ಸಹ ಪ್ರಯೋಜನ ಪಡೆಯುತ್ತಾರೆ" ಎಂದು ಹೇಳಿದರು.
"ಧೋನಿ ಆರಂಭದಿಂದಲೂ ಸಿಎಸ್ಕೆ ಪರ ಆಡುತ್ತಿದ್ದಾರೆ. ಅವರು ಖಂಡಿತವಾಗಿಯೂ ತಮ್ಮ ಆರನೇ ಐಪಿಎಲ್ ಟ್ರೋಫಿಯನ್ನು ಎತ್ತುವ ಮೂಲಕ ಪರಿಪೂರ್ಣ ವಿದಾಯ ಹೇಳಲಿದ್ದಾರೆ" ಎಂದು ಪಠಾಣ್ ಹೇಳಿದರು.
ಐಪಿಎಲ್ನಲ್ಲಿ ಧೋನಿ 278 ಪಂದ್ಯಗಳನ್ನು ಆಡಿದ್ದು, 5439 ರನ್ ಗಳಿಸಿದ್ದಾರೆ. ಭಾರತದ ಮಾಜಿ ನಾಯಕ, 2024 ರ ಋತುವಿಗೆ ಮುಂಚಿತವಾಗಿ ನಾಯಕತ್ವ ತ್ಯಜಿಸುವ ಮೊದಲು ಫ್ರಾಂಚೈಸಿಯನ್ನು ಐದು ಬಾರಿ ಚಾಂಪಿಯನ್ ಮಾಡಿದ್ದರು. ಕಳೆದ ಆವೃತ್ತಿಯಲ್ಲಿ ಗಾಯದ ಕಾರಣದಿಂದಾಗಿ ಋತುರಾಜ್ ಗಾಯಕ್ವಾಡ್ ಹೊರಗುಳಿದ ಕಾರಣ ಧೋನಿ ನಾಯಕತ್ವವಹಿಸಿದ್ದರು. ಆದರೆ ನಿರೀಕ್ಷಿತ ಪ್ರದರ್ಶನ ಕಂಡು ಬಂದಿರಲಿಲ್ಲ.
ಈ ಬಾರಿಯ ಐಪಿಎಲ್ ಋತುವಿನಲ್ಲಿ ಧೋನಿ ಭಾಗವಹಿಸುವಿಕೆಯ ಬಗ್ಗೆ ಸಂದೇಹಗಳಿದ್ದವು. ಆದರೆ ಸಿಎಸ್ಕೆ ಸಿಇಒ ಕಾಸಿ ವಿಶ್ವನಾಥನ್ ಬಲವಾದ ಹೇಳಿಕೆಯೊಂದಿಗೆ ಎಲ್ಲಾ ಅನುಮಾನಗಳನ್ನು ತೆರವುಗೊಳಿಸಿದರು. ಧೋನಿ ಎಲ್ಲಾ ಪಂದ್ಯಗಳನ್ನು ಆಡುತ್ತಾರೆ, ಆದರೆ ಅವರ ಪಾತ್ರವನ್ನು ತಂಡದ ಆಡಳಿತ ಮಂಡಳಿ ನಿರ್ಧರಿಸುತ್ತದೆ ಎಂದು ಸಿಎಸ್ಕೆ ಮುಖ್ಯಸ್ಥರು ಹೇಳಿದರು.