ರಾಂಚಿ, ನ.30: ದಕ್ಷಿಣ ಆಫ್ರಿಕಾ(IND vs SA) ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ(Virat Kohli) ಮತ್ತು ರೋಹಿತ್ ಶರ್ಮ(Rohit Sharma) ಅವರು ದಿಗ್ಗಜರಾದ ಸಚಿನ್ ತೆಂಡುಲ್ಕರ್‌ ಮತ್ತು ರಾಹುಲ್ ದ್ರಾವಿಡ್ ಅವರ ಮಹತ್ವದ ದಾಖಲೆಯೊಂದನ್ನು ಮುರಿದ್ದಾರೆ. ಭಾರತ ಪರ ಅತ್ಯಧಿಕ(392*) ಪಂದ್ಯಗಳನ್ನು ಜತೆಯಾಗಿ ಆಡಿದ ದಾಖಲೆ ಬರೆದಿದ್ದಾರೆ. ಸಚಿನ್-ದ್ರಾವಿಡ್ 391 ಪಂದ್ಯಗಳನ್ನು ಜತೆಯಾಗಿ ಆಡಿದ್ದರು.
ವಿರಾಟ್ ಮತ್ತು ರೋಹಿತ್ ಶರ್ಮ ಜತೆಯಾಗಿ ಟೆಸ್ಟ್‌ನಲ್ಲಿ 60, ಏಕದಿನದಲ್ಲಿ 226, ಟಿ20ಯಲ್ಲಿ 106 ಪಂದ್ಯಗಳನ್ನು ಆಡಿದ್ದಾರೆ. ಸಚಿನ್ ಮತ್ತು ದ್ರಾವಿಡ್ 146 ಟೆಸ್ಟ್‌ ಮತ್ತು 245 ಏಕದಿನ ಪಂದ್ಯಗಳನ್ನು ಆಡಿದ್ದರು. 2008 ರಲ್ಲಿ ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡುವ ಒಂದು ವರ್ಷದ ಮೊದಲು, ಅಂದರೆ 2007 ರಲ್ಲಿ ರೋಹಿತ್ ಭಾರತ ಪರ ಪದಾರ್ಪಣೆ ಮಾಡಿದ್ದರು. ಇಬ್ಬರು ಭಾರತೀಯ ಶ್ರೇಷ್ಠ ಆಟಗಾರರು 2024 ರವರೆಗೆ ಮೂರು ಸ್ವರೂಪಗಳನ್ನು ಒಟ್ಟಿಗೆ ಆಡಿದರು, 2024 ರ T20 ವಿಶ್ವಕಪ್‌ನಲ್ಲಿ ಜಯಗಳಿಸಿದ ನಂತರ ಜಂಟಿಯಾಗಿ T20I ಗಳಿಂದ ನಿವೃತ್ತರಾದರು. ಈ ವರ್ಷ ಟೆಸ್ಟ್‌ಗೂ ನಿವೃತ್ತಿ ಹೇಳಿದ್ದರು. ಈಗ ಏಕದಿನ ಮಾದರಿಯಲ್ಲಿ ಮಾತ್ರ ಆಡುತ್ತಿದ್ದಾರೆ.
ಇದನ್ನೂ ಓದಿ IND vs SA 1st ODI: ಟಾಸ್‌ ಗೆದ್ದು ಬೌಲಿಂಗ್‌ ಆಯ್ದುಕೊಂಡ ದಕ್ಷಿಣ ಆಫ್ರಿಕಾ; ಗಾಯಕ್ವಾಡ್‌ಗೆ ಅವಕಾಶ
ಒಟ್ಟಾರೆಯಾಗಿ, ಶ್ರೀಲಂಕಾದ ದಂತಕಥೆಗಳಾದ ಮಹೇಲ ಜಯವರ್ಧನ ಮತ್ತು ಕುಮಾರ್ ಸಂಗಕ್ಕಾರ ಒಟ್ಟಿಗೆ ಅತಿ ಹೆಚ್ಚು ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ ವಿಶ್ವ ದಾಖಲೆ ಹೊಂದಿದ್ದಾರೆ. ಅವರು 550 ಪಂದ್ಯಗಳಲ್ಲಿ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದಾರೆ. ಮಹೇಲ ಜಯವರ್ಧನೆ ಮತ್ತು ತಿಲಕರತ್ನೆ ದಿಲ್ಶನ್(426), ಕುಮಾರ್ ಸಂಗಕ್ಕಾರ ಮತ್ತು ತಿಲಕರತ್ನೆ ದಿಲ್ಶನ್(418) ಪಂದ್ಯಗಳಲ್ಲಿ ಜತೆಯಾಗಿ ಆಡಿದ್ದಾರೆ.
ಭಾರತ ಪರ ಅತಿ ಹೆಚ್ಚು ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ ಜೋಡಿ
ವಿರಾಟ್ ಕೊಹ್ಲಿ / ರೋಹಿತ್ ಶರ್ಮಾ – 392 ಪಂದ್ಯಗಳು
ಸಚಿನ್ ತೆಂಡೂಲ್ಕರ್ / ರಾಹುಲ್ ದ್ರಾವಿಡ್ – 391 ಪಂದ್ಯಗಳು
ರಾಹುಲ್ ದ್ರಾವಿಡ್ / ಸೌರವ್ ಗಂಗೂಲಿ – 369 ಪಂದ್ಯಗಳು
ಸಚಿನ್ ತೆಂಡೂಲ್ಕರ್ / ಅನಿಲ್ ಕುಂಬ್ಳೆ – 367 ಪಂದ್ಯಗಳು
ಸಚಿನ್ ತೆಂಡೂಲ್ಕರ್ / ಸೌರವ್ ಗಂಗೂಲಿ – 341 ಪಂದ್ಯಗಳು
ವಿರಾಟ್ ಕೊಹ್ಲಿ / ರವೀಂದ್ರ ಜಡೇಜಾ – 309 ಪಂದ್ಯಗಳು
ಪಂದ್ಯದಲ್ಲಿ ಅಬ್ಬರದ ಬ್ಯಾಟಿಂಗ್‌ ನಡೆಸುತ್ತಿರುವ ವಿರಾಟ್ ಮತ್ತು ರೋಹಿತ್ ಅರ್ಧಶತಕ ಪೂರ್ತಿಗೊಳಿಸಿ ಶತಕದತ್ತ ಮುನ್ನುಗ್ಗುತ್ತಿದ್ದಾರೆ. ಜಿದ್ದಿಗೆ ಬಿದ್ದವರಂತೆ ಸಿಕ್ಸರ್‌ ಮತ್ತು ಬೌಂಡರಿಗಳ ಸುರಿಮಳೆ ಸುರಿಸುತ್ತಿದ್ದಾರೆ.