ದುಬೈ, ಮಾ.11: ನೂತನ ಮಹಿಳಾ ಏಕದಿನ ಬ್ಯಾಟಿಂಗ್(Womens ODI rankings) ಶ್ರೇಯಾಂಕದಲ್ಲಿ ಭಾರತದ ಸ್ಟಾರ್ ಆರಂಭಿಕ ಬ್ಯಾಟರ್ ಸ್ಮೃತಿ ಮಂಧಾನ(Smriti Mandhana) ಅಗ್ರ ಸ್ಥಾನವನ್ನು ಉಳಿಸಿಕೊಂಡಿದ್ದಾರೆ. ಮಂಧಾನಾ ಅವರೊಂದಿಗೆ ನಾಯಕಿ ಹರ್ಮನ್ಪ್ರೀತ್ ಕೌರ್(Harmanpreet Kaur) ಎಂಟನೇ ಸ್ಥಾನದಲ್ಲಿ ಸ್ಥಿರವಾಗಿ ಉಳಿದರು.
ಆದಾಗ್ಯೂ, ಆಸ್ಟ್ರೇಲಿಯಾ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ವಿಫಲರಾಗಿದ್ದ ಜೆಮಿಮಾ ರೊಡ್ರಿಗಸ್ 12 ನೇ ಸ್ಥಾನಕ್ಕೆ ಕುಸಿದರು. ಜಿಂಬಾಬ್ವೆ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಅಮೋಘ ಆಲ್ರೌಂಡರ್ ಪ್ರದರ್ಶನ ತೋರಿದ ನ್ಯೂಜಿಲೆಂಡ್ ನಾಯಕಿ ಅಮೆಲೀ ಕೆರ್ ಬೌಲರ್ಗಳ ಪಟ್ಟಿಯಲ್ಲಿ ಐದು ಸ್ಥಾನಗಳ ಜಿಗಿತವನ್ನು ಕಂಡು 11 ನೇ ಸ್ಥಾನಕ್ಕೆ ತಲುಪಿದರು. ಆಲ್ರೌಂಡರ್ಗಳ ಪಟ್ಟಿಯಲ್ಲಿ ಒಂದು ಸ್ಥಾನ ಏರಿಕೆಯಾಗಿ ಐದನೇ ಸ್ಥಾನಕ್ಕೆ ತಲುಪಿದರು.
ಸರಣಿಯ ಮೊದಲ ಪಂದ್ಯದಲ್ಲಿ ಕೆರ್ ನಾಲ್ಕು ವಿಕೆಟ್ಗಳನ್ನು ಕಬಳಿಸಿದರು ಮತ್ತು ನಂತರ ಡ್ಯುನೆಡಿನ್ನಲ್ಲಿ ನಡೆದ ಎರಡನೇ ಪಂದ್ಯದಲ್ಲಿ ಏಳು ವಿಕೆಟ್ಗಳನ್ನು ಪಡೆಯುವ ಮೂಲಕ ಮಹಿಳಾ ಏಕದಿನ ಪಂದ್ಯದಲ್ಲಿ ಏಳು ಅಥವಾ ಅದಕ್ಕಿಂತ ಹೆಚ್ಚು ವಿಕೆಟ್ಗಳನ್ನು ಪಡೆದ ಒಟ್ಟಾರೆ ಏಳನೇ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.
ಶ್ರೀಲಂಕಾ ವಿರುದ್ಧ ವೆಸ್ಟ್ ಇಂಡೀಸ್ನ ಮೂರು ಪಂದ್ಯಗಳ ಸರಣಿ ಮುಗಿದ ನಂತರ ಮತ್ತು ಇಂಗ್ಲೆಂಡ್ ಮತ್ತು ವೇಲ್ಸ್ ಆಯೋಜಿಸಿರುವ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ ಆರಂಭವಾಗಿ ಮೂರು ತಿಂಗಳಿಗಿಂತ ಕಡಿಮೆ ಸಮಯ ಉಳಿದಿರುವ ನಂತರ, ಇತ್ತೀಚಿನ ಟಿ20ಐ ಶ್ರೇಯಾಂಕದಲ್ಲಿ ಕೆಲವು ಬದಲಾವಣೆಗಳಿವೆ. ಲಂಕಾದ ಎಡಗೈ ಆಟಗಾರ್ತಿ ಹಸಿನಿ ಪೆರೆರಾ ಬ್ಯಾಟ್ಸ್ಮನ್ಗಳ ಶ್ರೇಯಾಂಕದಲ್ಲಿ 15 ಸ್ಥಾನ ಏರಿಕೆಯಾಗಿ ಒಟ್ಟಾರೆ 28 ನೇ ಸ್ಥಾನಕ್ಕೆ ತಲುಪಿದರು.
ಟಿ20 ವಿಶ್ವಕಪ್ ಮುಗಿದರೂ ಭಾರತದಲ್ಲೇ ಸಿಲುಕಿದ್ದ ದ. ಆಫ್ರಿಕಾ, ವಿಂಡೀಸ್ ತಂಡಗಳಿಂದು ಮರಳಿ ತವರಿಗೆ
ಶ್ರೀಲಂಕಾದ ತಂಡದ ಸಹ ಆಟಗಾರ್ತಿಯರಾದ ಕವಿಶಾ ದಿಲ್ಹಾರಿ ಟಿ20ಐ ಬೌಲರ್ಗಳ ಶ್ರೇಯಾಂಕದಲ್ಲಿ (ಮೂರು ಸ್ಥಾನ ಏರಿಕೆಯಾಗಿ 21ನೇ ಸ್ಥಾನ) ಮತ್ತು ಆಲ್ರೌಂಡರ್ಗಳ ಶ್ರೇಯಾಂಕದಲ್ಲಿ (ಎರಡು ಸ್ಥಾನ ಏರಿಕೆಯಾಗಿ 11ನೇ ಸ್ಥಾನ) ಏರಿಕೆ ಕಂಡಿದ್ದಾರೆ.
ವೆಸ್ಟ್ ಇಂಡೀಸ್ನ ಸ್ಪಿನ್ನರ್ ಅಫಿ ಫ್ಲೆಚರ್ ನಾಲ್ಕು ಸ್ಥಾನ ಏರಿಕೆಯಾಗಿ ಒಟ್ಟಾರೆ ಟಿ20ಐ ಬೌಲರ್ಗಳ ಪಟ್ಟಿಯಲ್ಲಿ ಏಳನೇ ಸ್ಥಾನಕ್ಕೆ ತಲುಪಿದ್ದಾರೆ.
ಏಕದಿನ ಬ್ಯಾಟಿಂಗ್ ಶ್ರೇಯಾಂಕ
ಸ್ಮೃತಿ ಮಂಧಾನ-790
ಲಾರಾ ವೋಲ್ವಾರ್ಡ್-782
ಬೆಥ್ ಮೂನಿ-749
ಆಶ್ಲೀ ಗಾರ್ಡ್ನರ್-724
ನ್ಯಾಟ್ ಸ್ಕಿವರ್-ಬ್ರಂಟ್-714
ಟಿ20 ಬ್ಯಾಟಿಂಗ್ ಶ್ರೇಯಾಂಕ
ಬೆಥ್ ಮೂನಿ-787
ಸೃತಿ ಮಂಧಾನ-770
ಹೇಲಿ ಮ್ಯಾಥ್ಯೂಸ್-765
ಲಾರಾ ವೋಲ್ವಾರ್ಡ್-751
ತಹ್ಲಿಯಾ ಮೆಕ್ಗ್ರಾತ್-735