ಲಂಡನ್, ಜು.8: ಬುಧವಾರ ನಡೆದ ವಿಂಬಲ್ಡನ್ ಜೂನಿಯರ್ಸ್ ಬಾಲಕರ ಸಿಂಗಲ್ಸ್ನಲ್ಲಿ ಐಟಿಎಫ್ ಜೂನಿಯರ್ ವಿಶ್ವ ನಂ. 19 ರ ಅರ್ನವ್ ಪಾಪಾರ್ಕರ್(Arnav Paparkar), ಜಪಾನ್ನ ರಿಯೊ ಟಬಾಟಾ ವಿರುದ್ಧ 6-2, 6-1 ಅಂತರದಲ್ಲಿ ಜಯಗಳಿಸುವ ಮೂಲಕ 36 ವರ್ಷಗಳಲ್ಲಿ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
1990 ರಲ್ಲಿ ಲಿಯಾಂಡರ್ ಪೇಸ್ ಭಾರತೀಯ ಟೆನಿಸ್ ಇತಿಹಾಸದಲ್ಲಿ ಈ ಹಂತವನ್ನು ತಲುಪಿದ ಕೊನೆಯ ಆಟಗಾರ ಎನಿಸಿದ್ದರು. ಇದೀಗ 18 ವರ್ಷದ ಅರ್ನವ್ ಈ ಸಾಧನೆಗೈದಿದ್ದಾರೆ. ಇದಕ್ಕೂ ಮೊದಲು, ಜೂನಿಯರ್ ವಿಶ್ವ ನಂ. 3, ಅಮೆರಿಕದ ಕೀಟನ್ ಹ್ಯಾನ್ಸ್ ವಿರುದ್ಧ 6-2, 6-3 ಅಂತರದಲ್ಲಿ ಜಯಗಳಿಸುವ ಮೂಲಕ ಅರ್ನವ್ ಹುಬ್ಬೇರಿಸಿದ್ದರು.
ತರಬೇತುದಾರ ಪ್ರೊಸೊನ್ಜಿತ್ ಪಾಲ್ ಅವರ ಮಾರ್ಗದರ್ಶನದಲ್ಲಿ ಹೇಮಂತ್ ಬೆಂಡ್ರೆ ಟೆನಿಸ್ ಅಕಾಡೆಮಿಯಲ್ಲಿ ತರಬೇತಿ ಪಡೆದ ಅರ್ನವ್, ಮಹಾರಾಷ್ಟ್ರ ರಾಜ್ಯ ಲಾನ್ ಟೆನಿಸ್ ಅಸೋಸಿಯೇಷನ್ (MSLTA) ಮತ್ತು ಮಹಾಟೆನಿಸ್ ಫೌಂಡೇಶನ್ನಿಂದ ಬೆಂಬಲಿತರಾಗಿದ್ದಾರೆ.
ಕ್ರೀಡೆಗಳಲ್ಲಿ ಆಸಕ್ತಿ ಇಲ್ಲದ ಕುಟುಂಬದಲ್ಲಿ ಜನಿಸಿದ ಅರ್ನವ್ ಅವರಿಗೆ ಟೆನಿಸ್ ಬಗ್ಗೆ ಅಪಾರ ಪ್ರೀತಿ ಮೂಡಿದ್ದು ವರದಾನವಾಗಿ. "ನನಗೆ ಕ್ರೀಡೆ ತುಂಬಾ ಇಷ್ಟ. ನಾನು ಟೇಬಲ್ ಟೆನಿಸ್, ಈಜು, ಕ್ರಿಕೆಟ್, ಫುಟ್ಬಾಲ್ ಆಡುತ್ತಿದ್ದೆ" ಎಂದು ಅವರು ಹೇಳಿರುವುದಾಗಿ ಟೈಮ್ಸ್ ಆಫ್ ಇಂಡಿಯಾ ವರದಿ ಮಾಡಿದೆ. "ನಾನು ಈಜಲು ಹೋಗುತ್ತಿದ್ದ ಸ್ಥಳದ ಪಕ್ಕದಲ್ಲಿಯೇ ಟೆನಿಸ್ ಕೋರ್ಟ್ ಇತ್ತು, ನಾನು ಸುತ್ತಾಡುತ್ತಾ ಟೆನಿಸ್ ನೋಡುತ್ತಿದ್ದೆ. ನಂತರ, ನಾನು 6 ವರ್ಷದವನಿದ್ದಾಗ, ಕೋಚ್ ನನಗೆ ಟೆನಿಸ್ ಸೇರಲು ಹೇಳಿದರು ಮತ್ತು ನಾನು ಟೆನಿಸ್ ಆಡಲು ಪ್ರಾರಂಭಿಸಿದೆ" ಎಂದರು.
ಲಾರ್ಡ್ಸ್ನಲ್ಲಿ ಇಂಗ್ಲೆಂಡ್ ವಿರುದ್ಧದ ಐತಿಹಾಸಿಕ ಟೆಸ್ಟ್ನಿಂದ ಹೊರಬಿದ್ದ ಪ್ರತೀಕಾ ರಾವಲ್
ಕ್ರೀಡೆಯ ಮೇಲಿನ ಉತ್ಸಹಾ ಕಂಡು ಮತ್ತು ಪ್ರತಿಭೆಯನ್ನು ಗುರುತಿಸಿ, ಅರ್ನವ್ನ ಪೋಷಕರು ಅವನ ಬೆಳವಣಿಗೆಯಲ್ಲಿ ಹೆಚ್ಚಿನ ಹೂಡಿಕೆ ಮಾಡಿದರು, ಅವನ ಅಂತರರಾಷ್ಟ್ರೀಯ ಟೂರ್ನಮೆಂಟ್ ಪ್ರಯಾಣಕ್ಕೆ ಹಣಕಾಸು ಒದಗಿಸಿದರು ಮತ್ತು ಜಾಗತಿಕ ಮಾನದಂಡಗಳಿಗೆ ಸಿದ್ಧಪಡಿಸಲು ಸ್ಪೇನ್ನಲ್ಲಿ ತರಬೇತಿ ನೀಡಿದರು.
ದೊಡ್ಡ ಫುಟ್ಬಾಲ್ ಅಭಿಮಾನಿಯಾಗಿರುವ 2008 ರಲ್ಲಿ ಜನಿಸಿದ ಅರ್ನವ್ ತನ್ನ ಎದುರಾಳಿಗಳನ್ನು ಹತ್ತಿರದಿಂದ ಅಧ್ಯಯನ ಮಾಡುವುದಕ್ಕೆ ಹೆಸರುವಾಸಿಯಾಗಿದ್ದಾನೆ. 2023 ರಲ್ಲಿ ಮೆಲ್ಬೋರ್ನ್ನಲ್ಲಿ ನಡೆದ ಪ್ರತಿಷ್ಠಿತ ಆಸ್ಟ್ರೇಲಿಯನ್ ಓಪನ್ ಅಂಡರ್-14 ಏಷ್ಯಾ-ಪೆಸಿಫಿಕ್ ಎಲೈಟ್ ಟ್ರೋಫಿಯಲ್ಲಿ ಪಾಪರ್ಕರ್ಗೆ ಮೊದಲ ಬ್ರೇಕ್ ಸಿಕ್ಕಿತು. ಆ ವರ್ಷದ ನಂತರ, ಅವರು ಕೊಲ್ಹಾಪುರದಲ್ಲಿ ವೈಲ್ಡ್ಕಾರ್ಡ್ ಅರ್ಹತಾ ಸುತ್ತಿನ ಮೂಲಕ ಪ್ರವೇಶಿಸುವ ಮೂಲಕ ರಾಷ್ಟ್ರೀಯ ಅಂಡರ್-16 ಚಾಂಪಿಯನ್ ಆದರು. ಬಹ್ರೇನ್ನಲ್ಲಿ ನಡೆದ ITF J60 ಮನಾಮ ಮತ್ತು 2025 ರಲ್ಲಿ J200 ಕೌಲಾಲಂಪುರ್ ಸೇರಿದಂತೆ ತಮ್ಮ ಮೊದಲ ಪ್ರಮುಖ ಅಂತರರಾಷ್ಟ್ರೀಯ ಜೂನಿಯರ್ ಪ್ರಶಸ್ತಿಗಳನ್ನು ಗೆದ್ದರು.
ಜನವರಿಯಲ್ಲಿ ಅವರು AITA ಬಾಯ್ಸ್ ಅಂಡರ್-18 ರಾಷ್ಟ್ರೀಯ ನಂ. 1 ಆಟಗಾರನಾಗಿ ಕಿರೀಟವನ್ನು ಪಡೆದರು, ಸತತ 21 ವಾರಗಳ ಕಾಲ ತಮ್ಮ ಅಗ್ರಸ್ಥಾನವನ್ನು ಕಾಯ್ದುಕೊಂಡರು. ಅವರು 2026 ರ ರೋಲ್ಯಾಂಡ್ ಗ್ಯಾರೋಸ್ ಜೂನಿಯರ್ ಚಾಂಪಿಯನ್ಶಿಪ್ನ 3 ನೇ ಸುತ್ತನ್ನು ತಲುಪಿದರು, ಇದು ಅವರನ್ನು ಜಾಗತಿಕ ಟಾಪ್ 20 ಗೆ ಕರೆದೊಯ್ಯಿತು.