ನಾಗಾಲ್ಯಾಂಡ್, ಅ.19: ಮಿಜೋರಾಂ ತಂಡದ ಬ್ಯಾಟರ್ ಚಿನ್ಮಯ ಸುತಾರ್ ದಾಖಲೆ ಪುಸ್ತಕದಲ್ಲಿ ತಮ್ಮ ಹೆಸರನ್ನು ಬರೆಸಿಕೊಂಡಿದ್ದಾರೆ. ಭಾರತೀಯ ದೇಶೀಯ ಕ್ರಿಕೆಟ್‌ನಲ್ಲಿ 400 (ಕ್ವಾಡ್ರಪಲ್ ಸೆಂಚುರಿ) ರನ್ ಗಳಿಸಿದ ಎರಡನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಸೋವಿಮಾದ ನಾಗಾಲ್ಯಾಂಡ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ರಣಜಿ ಟ್ರೋಫಿ ಪಂದ್ಯದಲ್ಲಿ, ನಾಗಾಲ್ಯಾಂಡ್ ವಿರುದ್ಧದ ಪಂದ್ಯದಲ್ಲಿ ಈ ಎಡಗೈ ಬ್ಯಾಟರ್ ಈ ಮೈಲಿಗಲ್ಲನ್ನು ತಲುಪಿದರು.
ಚಿನ್ಮಯ್ ಸುತಾರ್ ನಾಗಾಲ್ಯಾಂಡ್ ವಿರುದ್ಧ 517 ಎಸೆತಗಳಲ್ಲಿ ಅಜೇಯ 400 ರನ್ ಗಳಿಸಿದರು. ಮಹಾರಾಷ್ಟ್ರದ ಬಿ.ಬಿ. ನಿಂಬಾಳ್ಕರ್ ಅವರು ಈ ಸಾಧನೆ ಮಾಡಿದ ಮೊದಲ ಭಾರತೀಯರಾಗಿದ್ದು, ಅವರು 1948ರಲ್ಲಿ ಪುಣೆಯಲ್ಲಿ ನಡೆದ ಪಂದ್ಯವೊಂದರಲ್ಲಿ ಅಜೇಯ 443 ರನ್ ಗಳಿಸಿದ್ದರು.
ಬ್ರಿಯಾನ್ ಲಾರಾ ಮತ್ತು ಡಾನ್ ಬ್ರಾಡ್‌ಮನ್ ಅವರಂತಹ ದಿಗ್ಗಜರ ಸಾಲಿಗೆ ಸೇರ್ಪಡೆಗೊಂಡ ಸುತಾರ್, ಒಂದೇ ಇನ್ನಿಂಗ್ಸ್‌ನಲ್ಲಿ 400 ರನ್‌ಗಳ ಗಡಿಯನ್ನು ದಾಟಿದ ಬ್ಯಾಟರ್‌ಗಳ ವಿಶೇಷ ಗುಂಪಿನ ಭಾಗವಾಗಿದ್ದಾರೆ. ತಮ್ಮ ರಣಜಿ ಟ್ರೋಫಿ ವೃತ್ತಿಜೀವನಕ್ಕೆ ಭರ್ಜರಿ ಆರಂಭ ನೀಡಿದ ನಂತರ, ಅವರು ಈ ಮಹತ್ವದ ಇನ್ನಿಂಗ್ಸ್ ಆಡಿದರು.
ತಮ್ಮ ಚೊಚ್ಚಲ ಪಂದ್ಯದಲ್ಲಿ, ಸುತಾರ್ ಅವರು ಶತಕ ಬಾರಿಸುವ ಅವಕಾಶವನ್ನು ಕೂದಲೆಳೆಯ ಅಂತರದಲ್ಲಿ ಕಳೆದುಕೊಂಡರು. ಅವರು 'ರನ್ ಔಟ್' ಆಗುವ ಮೂಲಕ 99 ರನ್‌ಗಳಿಗೆ ವಿಕೆಟ್ ಒಪ್ಪಿಸಿದರು. ಮಿಜೋರಾಂ ತಂಡವನ್ನು ಸೇರುವ ಮೊದಲು, ಅವರು ವಿಜಯ್ ಹಜಾರೆ ಟ್ರೋಫಿಯಲ್ಲಿ ಮುಂಬೈ ತಂಡವನ್ನು ಪ್ರತಿನಿಧಿಸಿದ್ದರು.
ಏಷ್ಯನ್ ಪ್ಯಾರಾ ಗೇಮ್ಸ್: ಭಾರತಕ್ಕೆ 2ನೇ ಚಿನ್ನ! ಲಾಂಗ್‌ಜಂಪ್‌ನಲ್ಲಿ ಚಿನ್ನ ಗೆದ್ದ ನಿಶಾದ್ ಕುಮಾರ್
ಸುತಾರ್ ಅವರ ಸುದೀರ್ಘ ಇನ್ನಿಂಗ್ಸ್‌ನಲ್ಲಿ 46 ಬೌಂಡರಿಗಳು ಮತ್ತು ಏಳು ಸಿಕ್ಸರ್‌ಗಳು ಒಳಗೊಂಡಿದ್ದವು. ಕೊನೆಯ ಬ್ಯಾಟರ್ ಆಗಿ ಲಾಲ್‌ರೆಂಪುಯಿಯಾ ಕ್ರೀಸ್‌ಗೆ ಬಂದಾಗ ಸುತಾರ್ 231 ರನ್‌ಗಳಿಸಿದ್ದರು. ಆ ನಂತರವೂ ಅವರು ರನ್‌ಗಳಿಕೆಯನ್ನು ಮುಂದುವರಿಸಿದರು. ಅಂತಿಮವಾಗಿ ಮಿಜೋರಾಂ ತಂಡವು 9 ವಿಕೆಟ್‌ಗೆ 581 ರನ್‌ಗಳಿಸಿದ್ದಾಗ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು. ಸುತಾರ್ 400 ರನ್‌ಗಳೊಂದಿಗೆ ಅಜೇಯರಾಗಿ ಉಳಿದರು.
ರಣಜಿ ಟ್ರೋಫಿ ಇತಿಹಾಸದಲ್ಲಿ ಅತ್ಯಧಿಕ ಮೊತ್ತಗಳು
ಬಾವುಸಾಹೇಬ್ ಬಾಬಾಸಾಹೇಬ್ ನಿಂಬಾಳ್ಕರ್- 443*
ಚಿನ್ಮಯ್ ಸುತಾರ್- 400*
ಪೃಥ್ವಿ ಶಾ-379
ಸಂಜಯ್ ಮಂಜ್ರೇಕರ್- 377
ಎಂ.ವಿ. ಶ್ರೀಧರ್- 366
ತನ್ಮಯ್ ಅಗರ್ವಾಲ್- 366