ಚೆನ್ನೈ, ಸೆ.29: ಟೀಮ್ ಇಂಡಿಯಾದ ಮಾಜಿ ಬೌಲರ್ ಮೋಹಿತ್ ಶರ್ಮಾ ಅವರು, ಮುಂದಿನ ಋತುವಿನ ಐಪಿಎಲ್ ಟೂರ್ನಿಯಲ್ಲಿ ಜಹೀರ್ ಖಾನ್ ನೇತೃತ್ವದ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡದ ಸಹಾಯಕ ಸಿಬ್ಬಂದಿ ಬಳಗಕ್ಕೆ ಬೌಲಿಂಗ್ ಕೋಚ್ ಆಗಿ ಸೇರ್ಪಡೆಯಾಗಲಿದ್ದಾರೆ. ಈ ಬೆಳವಣಿಗೆಯನ್ನು ಸಿಎಸ್ಕೆ (CSK) ಸಿಇಒ ಕಾಶಿ ವಿಶ್ವನಾಥನ್ ಖಚಿತಪಡಿಸಿದ್ದಾರೆ.
"ಮೋಹಿತ್ ನಮ್ಮ ಹೊಸ ಬೌಲಿಂಗ್ ಕೋಚ್ ಆಗಿ ಸಿಎಸ್ಕೆ ತಂಡವನ್ನು ಸೇರಿಕೊಳ್ಳಲಿದ್ದಾರೆ. ನಮ್ಮ ಮುಖ್ಯ ಕೋಚ್ ಜಹೀರ್ ಖಾನ್ ಅವರು ಇವರ ಹೆಸರನ್ನು ಶಿಫಾರಸು ಮಾಡಿದ್ದರು. ಆಟಗಾರನಾಗಿದ್ದಾಗಲೂ ಮೋಹಿತ್ ನಮ್ಮ ತಂಡದ ಪರ ಅತ್ಯುತ್ತಮ ಪ್ರದರ್ಶನ ನೀಡಿದ್ದರು. ಅವರು ಬೌಲಿಂಗ್ ಕೋಚ್ ಆಗಿಯೂ ಉತ್ತಮ ಕೆಲಸ ಮಾಡಲಿದ್ದಾರೆ ಎಂದು ನಾವು ಭಾವಿಸುತ್ತೇವೆ" ಎಂದು ವಿಶ್ವನಾಥನ್ 'ಟೈಮ್ಸ್ ಆಫ್ ಇಂಡಿಯಾ ಡಾಟ್ ಕಾಮ್'ಗೆ ತಿಳಿಸಿದ್ದಾರೆ.
ಮೋಹಿತ್ ಅವರು ಕೊನೆಯದಾಗಿ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಆಡಿದ್ದರು. ಆದರೆ ಇದಕ್ಕೂ ಮೊದಲು ಸಿಎಸ್ಕೆ (CSK) ತಂಡದೊಂದಿಗೆ ನಾಲ್ಕು ಋತುಗಳ ಕಾಲ ಎರಡು ಅವಧಿಯಲ್ಲಿ ಕೆಲಸ ಮಾಡಿದ್ದರು. ಅವರು ಬೌಲಿಂಗ್ ಕೋಚ್ ಆಗಿ ಎರಿಕ್ ಸಿಮ್ಮನ್ಸ್ ಅವರ ಸ್ಥಾನವನ್ನು ತುಂಬಲಿದ್ದಾರೆ.
38 ವರ್ಷದ ಮೋಹಿತ್ ಐಪಿಎಲ್ನಲ್ಲಿ 120 ಪಂದ್ಯಗಳನ್ನು ಆಡಿದ್ದು, 134 ವಿಕೆಟ್ಗಳನ್ನು ಪಡೆದಿದ್ದಾರೆ. ಗುಜರಾತ್ ಟೈಟಾನ್ಸ್ ತಂಡದಲ್ಲಿದ್ದಾಗ ಅವರ ವೃತ್ತಿಜೀವನಕ್ಕೆ ಹೊಸ ಚೈತನ್ಯ ಸಿಕ್ಕಂತಾಯಿತು. ಅಲ್ಲಿ ತಮ್ಮ ಬೌಲಿಂಗ್ ವೈವಿಧ್ಯತೆಯಿಂದ ತಂಡದ ಪರ ನಿರಂತರವಾಗಿ ವಿಕೆಟ್ ಪಡೆಯುವ ಬೌಲರ್ ಆಗಿ ಹೊರಹೊಮ್ಮಿದರು. ಜಿಟಿ (GT) ತಂಡದಲ್ಲಿದ್ದ ಎರಡು ಋತುಗಳಲ್ಲಿ ಶರ್ಮಾ 41 ವಿಕೆಟ್ಗಳನ್ನು ಕಬಳಿಸಿದರು. ಅವರು 2016 ರಿಂದ 2018 ರವರೆಗೆ ಪಂಜಾಬ್ ಕಿಂಗ್ಸ್ ತಂಡವನ್ನೂ ಪ್ರತಿನಿಧಿಸಿದ್ದರು.
ಗುವಾಹಟಿಯಲ್ಲಿ ರೋಹಿತ್ ಶರ್ಮಾ ಏಕದಿನ ದಾಖಲೆ ಹೇಗಿದೆ?
ಹರಿಯಾಣದ ಈ ಬೌಲರ್ ಕಳೆದ ವರ್ಷದ ಡಿಸೆಂಬರ್ನಲ್ಲಿ ವೃತ್ತಿಪರ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ್ದರು. ಭಾರತೀಯ ತಂಡದೊಂದಿಗಿನ ಅವರ ಪಯಣವು ಎಂ.ಎಸ್. ಧೋನಿ ಅವರ ನಾಯಕತ್ವದಲ್ಲಿ ನಡೆದ 2015ರ ವಿಶ್ವಕಪ್ನಿಂದಾಗಿ ಸ್ಮರಣೀಯವಾಗಿದೆ. ಆ ಟೂರ್ನಿಯಲ್ಲಿ ಅವರು ಜಂಟಿಯಾಗಿ ಮೂರನೇ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಆಗಿದ್ದರು.
ಐಪಿಎಲ್ ವಿಷಯಕ್ಕೆ ಬಂದರೆ, 2014ರ ಆವೃತ್ತಿಯು ಅವರಿಗೆ ಅತ್ಯುತ್ತಮವಾಗಿತ್ತು. ಅವರು 23 ವಿಕೆಟ್ಗಳನ್ನು ಕಬಳಿಸಿ 'ಪರ್ಪಲ್ ಕ್ಯಾಪ್' ಗೆದ್ದುಕೊಂಡರು ಈ ಸಾಧನೆಯನ್ನು ಅವರು ಸಿಎಸ್ಕೆ (CSK) ತಂಡದ ಪರವಾಗಿ ಮಾಡಿದರು. ಮೋಹಿತ್ ಭಾರತಕ್ಕಾಗಿ 26 ಏಕದಿನ (ODI) ಮತ್ತು ಎಂಟು ಟಿ20 (T20I) ಪಂದ್ಯಗಳನ್ನು ಆಡಿದ್ದು, ಕ್ರಮವಾಗಿ 31 ಮತ್ತು ಆರು ವಿಕೆಟ್ಗಳನ್ನು ಪಡೆದಿದ್ದಾರೆ.