2025ರ ವಿಶ್ವ ಮಾಸ್ಟರ್ಸ್ ಓರಿಯಂಟೀರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದ ಸಾಯೀಶ ಶ್ರೀಧರ ಕಿರಣಿ
ಇತಿಹಾಸದಲ್ಲಿ ಇದೇ ಮೊದಲ ಬಾರಿ ವಿಶ್ವ ಮಾಸ್ಟರ್ಸ್ ಓರಿಯಂಟೀರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ (WMOC) ಭಾರತದ ಧ್ವಜವನ್ನು ಹಾರಿಸಲಾಗಿದೆ. ಬೆಂಗಳೂರಿನ ಸಾಯೀಶ ಶ್ರೀಧರ ಕಿರಣಿ ಅವರು ಸ್ಪೇನ್‌ನ ಜಿರೋನಾದಲ್ಲಿ ನಡೆದಿದ್ದ ಈ ಪ್ರತಿಷ್ಠಿತ ಸ್ಪರ್ಧೆಯಲ್ಲಿ ರಾಷ್ಟ್ರವನ್ನು ಪ್ರತಿನಿಧಿಸಿದ್ದಾರೆ.
2025ರ ವಿಶ್ವ ಮಾಸ್ಟರ್ಸ್ ಓರಿಯಂಟಿಯರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದ ಸಾಯೀಶ ಶ್ರೀಧರ ಕಿರಣಿ. -
Ramesh Kote
Sep 2, 2025 11:27 PM
ಬೆಂಗಳೂರು : ಇತಿಹಾಸದಲ್ಲಿ ಇದೇ ಮೊದಲ ಬಾರಿ ವಿಶ್ವ ಮಾಸ್ಟರ್ಸ್ ಒರಿಯಂಟೀರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ (WMOC) ಭಾರತದ ಧ್ವಜವನ್ನು ಹಾರಿಸಲಾಗಿದೆ. ಬೆಂಗಳೂರಿನ ಸಾಯೀಶ ಶ್ರೀಧರ ಕಿರಣಿ ಅವರು ಸ್ಪೇನ್‌ನ ಜಿರೋನಾದಲ್ಲಿ ನಡೆದಿದ್ದ ಈ ಪ್ರತಿಷ್ಠಿತ ಸ್ಪರ್ಧೆಯಲ್ಲಿ ರಾಷ್ಟ್ರವನ್ನು ಪ್ರತಿನಿಧಿಸಿದ್ದಾರೆ. ಈ ಕಾರ್ಯಕ್ರಮವನ್ನು ಕ್ಯಾಟಲಾನ್ ಒರಿಯಂಟೀರಿಂಗ್ ಫೆಡರೇಶನ್ (FCOC) ಆಯೋಜಿಸಿದೆ ಹಾಗೂ ಸ್ವೀಡೆನ್‌ನ ಇಂಟರ್‌ನ್ಯಾಷನಲ್ ಒರಿಯಂಟೀರಿಂಗ್ ಫೆಡರೇಶನ್ (IOF) ಅನುಮೋದಿಸಿದೆ.
50 ದೇಶಗಳಿಂದ ಬಂದ 3,000ಕ್ಕೂ ಹೆಚ್ಚು ಕ್ರೀಡಾಪಟುಗಳ ನಡುವೆ ಸ್ಪರ್ಧಿಸಿದ ಸಾಯೀಶ, ಈ ಶತಮಾನದ ಹಳೆಯ ಕ್ರೀಡೆಯ ವಿಶ್ವ ಮಾಸ್ಟರ್ಸ್ ಚಾಂಪಿಯನ್‌ಷಿಪ್‌ನಲ್ಲಿ ಭಾಗವಹಿಸಿದ ಏಕೈಕ ಮತ್ತು ಮೊದಲ ಭಾರತೀಯ ಕ್ರೀಡಾಪಟುವಾಗಿ ಐತಿಹಾಸಿಕ ಕ್ಷಣವನ್ನು ಸೃಷ್ಟಿಸಿದ್ದಾರೆ. ಈ ಕ್ರೀಡೆಯನ್ನು "ಥಿಂಕಿಂಗ್ ಸ್ಪೋರ್ಟ್" ಎಂದೂ ಕರೆಯಲಾಗುತ್ತದೆ.
ಸುಮಾರು 100 ವರ್ಷಗಳಿಗೂ ಹಿಂದೆ ಸ್ವೀಡೆನ್‌ನಲ್ಲಿ ಉಗಮವಾದ ಒರಿಯಂಟೀರಿಂಗ್ ಕ್ರೀಡೆಯು ವೇಗ, ಸಹಿಷ್ಣುತೆ ಮತ್ತು ತೀಕ್ಷ್ಣವಾದ ನಿರ್ಧಾರ ತೆಗೆದುಕೊಳ್ಳುವ ಕೌಶಲಗಳನ್ನು ಸಂಯೋಜಿಸುತ್ತದೆ. ಕ್ರೀಡಾಪಟುಗಳು ಒಂದು ವಿಶೇಷ ನಕ್ಷೆ ಮತ್ತು ಕಾಂಪಸ್ ಬಳಸಿ ಅಪರಿಚಿತ ಭೂಪ್ರದೇಶದ ಮೂಲಕ ಸಂಚರಿಸುತ್ತಾರೆ. ಕಾಡುಗಳು, ನಗರಗಳು, ಪರ್ವತಗಳು ಅಥವಾ ನೀರು ಮತ್ತು ಹಿಮದ ಮಾರ್ಗದ ಮೂಲಕ ಸಾಗಿ ಸ್ಪರ್ಧಿಸುತ್ತಾರೆ. ಈ ಕ್ರೀಡೆಯು ಹಲವು ವಿಭಾಗಗಳನ್ನು ಒಳಗೊಂಡಿದೆ- ಫೂಟ್-ಒ (ಸ್ಪ್ರಿಂಟ್ ಮತ್ತು ಫಾರೆಸ್ಟ್), ಎಂಟಿಬಿ-ಒ, ಕಯಾಕ್-ಒ, ಮತ್ತು ಸ್ಕೀ-ಒ - 10 ವರ್ಷದೊಳಗಿನವರಿಂದ 100 ವರ್ಷದವರೆಗಿನ ವಯಸ್ಸಿನ ವರ್ಗಗಳೊಂದಿಗೆ ಇರುತ್ತವೆ.
Asia Cup 2025: ಈ ಆಟಗಾರನಿಂದ ಸಂಜು ಸ್ಯಾಮ್ಸನ್‌ಗೆ ಅವಕಾಶ ಇಲ್ಲವೆಂದ ಇರ್ಫಾನ್‌ ಪಠಾಣ್‌!
ಜಾಗತಿಕವಾಗಿ ಗುರುತಿಸಲ್ಪಟ್ಟ ಒರಿಯಂಟೀರಿಂಗ್ ಕ್ರೀಡೆಯು ಅರಿವಿನ ಕೌಶಲಗಳು, ನಾಯಕತ್ವ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯವನ್ನು ಬೆಳೆಸುವಲ್ಲಿ ಪ್ರಸಿದ್ಧವಾಗಿದೆ. ಇದು ವಿಶ್ವ ಕ್ರೀಡಾಕೂಟದ ಭಾಗವಾಗಿದ್ದು, ಒಲಿಂಪಿಕ್ಸ್ ಪ್ರವೇಶಕ್ಕಾಗಿ ಸಿದ್ಧತೆ ನಡೆಸುತ್ತಿದೆ.
ಸಾಯೀಶ ಶ್ರೀಧರ ಕಿರಣಿ ಅವರ ಪಯಣ
"ಸ್ಪೇನ್‌ನಲ್ಲಿ ಏಕೈಕ ಭಾರತೀಯನಾಗಿ ಆರಂಭದ ರೇಖೆಯಲ್ಲಿ ನಿಂತಾಗ ನನಗೆ ರೋಮಾಂಚನವಾಯಿತು," ಎಂದು ಹೇಳಿದ ಸಾಯೀಶಾ ಶ್ರೀಧರ ಕಿರಣಿ "ಈ ಪಯಣವು ನನ್ನ ಬಗ್ಗೆ ಮಾತ್ರವಲ್ಲ- ಇದು ಒರಿಯಂಟೀರಿಂಗ್‌ನಲ್ಲಿ ಭಾರತದ ಕಥೆಯನ್ನು ಬರೆಯುವ ಬಗ್ಗೆ. ಸರಿಯಾದ ವಾತಾವರಣದೊಂದಿಗೆ ನಾವು ಪ್ರತಿಭೆಗಳನ್ನು ಪೋಷಿಸಬಹುದು ಮತ್ತು ಭಾರತೀಯ ಕ್ರೀಡಾಪಟುಗಳಿಗೆ ಜಾಗತಿಕ ವೇದಿಕೆಯಲ್ಲಿ ತಮ್ಮ ಗುರುತು ಮೂಡಿಸಲು ಅವಕಾಶಗಳನ್ನು ಸೃಷ್ಟಿಸಬಹುದು ಎಂದು ನಾನು ನಂಬುತ್ತೇನೆ," ಎಂದು ಹೇಳಿದ್ದಾರೆ.
ಅವರ ನಾಯಕತ್ವದಲ್ಲಿ, ಎನ್ತ್ಅಡ್ವೆಂಚರ್ ಒರಿಯಂಟೀರಿಂಗ್ ಕ್ಲಬ್ ಈ ಕ್ರೀಡೆಯನ್ನು ಮೂಲದಿಂದಲೇ ಬೆಳೆಸುತ್ತಿದೆ - ತರಬೇತಿ, ಕಾರ್ಯಾಗಾರಗಳು, ರೇಸ್‌ಗಳು ಮತ್ತು ಜಾಗೃತಿ ಕಾರ್ಯಕ್ರಮಗಳನ್ನು ನಡೆಸುತ್ತಿದೆ. 2024 ರಲ್ಲಿ ಕ್ಲಬ್ ಇಂಡೋನೇಷ್ಯಾ ಒರಿಯಂಟೀರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಒಂದು ಚಿನ್ನ ಮತ್ತು ಎರಡು ಬೆಳ್ಳಿಯ ಪದಕಗಳನ್ನು ಗೆದ್ದಿತು ಮತ್ತು ಥಾಯ್ಲೆಂಡ್ ಮತ್ತು ಸಿಂಗಾಪುರದಲ್ಲಿ ನಡೆದ ಏಷ್ಯನ್ ಒರಿಯಂಟೀರಿಂಗ್ ಚಾಂಪಿಯನ್‌ಷಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿತ್ತು.
ಭಾರತೀಯ ಒರಿಯಂಟೀರಿಂಗ್ ಪರಿಸರ ವ್ಯವಸ್ಥೆಯ ನಿರ್ಮಾಣ
"ಎನ್ತ್ಅಡ್ವೆಂಚರ್ ಒರಿಯಂಟೀರಿಂಗ್ ಅನ್ನು ಭಾರತಕ್ಕೆ ತರುವಲ್ಲಿ ನಿರಂತರವಾಗಿ ಶ್ರಮಿಸಲಾಗುತ್ತಿದೆ. ಕೇವಲ ಕ್ರೀಡೆಯಾಗಿ ಮಾತ್ರವಲ್ಲ, ಯುವಜನರ ಅಭಿವೃದ್ಧಿ, ಸಾಹಸ ಪ್ರವಾಸೋದ್ಯಮ ಮತ್ತು ಜೀವನ ಕೌಶಲ ತರಬೇತಿಗೆ ಒಂದು ಸಾಧನವಾಗಿದೆ," ಎಂದು ಎನ್ತ್ಅಡ್ವೆಂಚರ್ನ ಸಂಸ್ಥಾಪಕಿ ಅಜಿತಾ ಮದನ್ ಹೇಳಿದ್ದಾರೆ.
"ಸಾಯೀಶ್ ಅವರ ಸಾಧನೆಯು ಒರಿಯಂಟೀರಿಂಗ್‌ನಲ್ಲಿ ಭಾರತ ಅಪಾರ ಸಂಭಾವನೆಯನ್ನು ಹೊಂದಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಈಗ ನಮ್ಮ ಧ್ಯೇಯವು ಮುಂಬರುವ ಏಷ್ಯನ್, ವಿಶ್ವ ಚಾಂಪಿಯನ್‌ಷಿಪ್‌ಗಳು ಮತ್ತು ಇತರ ಜಾಗತಿಕ ಕಾರ್ಯಕ್ರಮಗಳಿಗೆ ಕ್ರೀಡಾಪಟುಗಳನ್ನು ತಯಾರು ಮಾಡುವುದು, ಹಾಗೆಯೇ ಭಾರತದಲ್ಲಿ ಅಂತಾರಾಷ್ಟ್ರೀಯ ಮಾನ್ಯತೆ ಪಡೆದ ಕಾರ್ಯಕ್ರಮಗಳನ್ನು ಆಯೋಜಿಸುವುದು ಮತ್ತು 2029ರ ವಿಶ್ವ ಕ್ರೀಡಾಕೂಟಕ್ಕೆ ಸಿದ್ಧತೆ ನಡೆಸುವುದು. ಸರಕಾರ ಮತ್ತು ಇತರ ಪಾಲುದಾರರಿಂದ ಸರಿಯಾದ ಬೆಂಬಲ ಸಿಕ್ಕರೆ, ಭಾರತವು ಜಾಗತಿಕ ಮಟ್ಟದಲ್ಲಿ ಗಂಭೀರ ಸ್ಪರ್ಧಿಯಾಗಿ ಹೊರಹೊಮ್ಮುವ ಅವಕಾಶವನ್ನು ಹೊಂದಿದೆ," ಎಂದು ತಿಳಿಸಿದ್ದಾರೆ.
ಭಾರತದಲ್ಲಿ ಆರಂಭಿಕ ಹಂತದಲ್ಲಿರುವ ಒರಿಯಂಟೀರಿಂಗ್ ಕ್ರೀಡೆ
ಭಾರತದಲ್ಲಿ ಒರಿಯಂಟೀರಿಂಗ್ ಕ್ರೀಡೆಯು ಇನ್ನೂ ಆರಂಭಿಕ ಹಂತದಲ್ಲಿದೆ. ಆದರೆ ಉತ್ಸಾಹ ಮತ್ತು ಸಂಭಾವನೆಯು ನಿರ್ವಿವಾದವಾಗಿದೆ. ಹೀಗಾಗಿ ಎನ್ತ್ಅಡ್ವೆಂಚರ್ ಸಂಸ್ಥೆಯು ಭಾರತದಲ್ಲಿನ ಶಾಲೆಗಳು, ಶೈಕ್ಷಣಿಕ ಸಂಸ್ಥೆಗಳು, ಕಾರ್ಪೊರೇಟ್ ವಲಯ, ಸರಕಾರಿ ಸಂಸ್ಥೆಗಳು, ಖಾಸಗಿ ಕ್ಲಬ್ಗಳು ಮತ್ತು ಕ್ರೀಡಾಭಿಮಾನಿಗಳನ್ನು ಭಾರತದ ಒರಿಯಂಟೀರಿಂಗ್ ಪಯಣವನ್ನು ರೂಪಿಸಲು ಕೈಜೋಡಿಸುವಂತೆ ಆಹ್ವಾನಿಸುತ್ತದೆ.