ಲಂಡನ್, ಜೂ.24: ಇಂಗ್ಲೆಂಡ್ ತಂಡದ ಮುಖ್ಯ ಕೋಚ್ ಬ್ರೆಂಡನ್ ಮೆಕಲಮ್(Brendon McCullum), ಬೆನ್ ಸ್ಟೋಕ್ಸ್(Ben Stokes) ಜೊತೆಗಿನ ಭಿನ್ನಾಭಿಪ್ರಾಯದ ಬಗ್ಗೆ ಬಂದಿರುವ ವರದಿಗಳನ್ನು ತಳ್ಳಿಹಾಕಿದ್ದು, ಸ್ಟೋಕ್ಸ್ ಒಳ್ಳೆಯ ಸ್ನೇಹಿತ ಆಗಿ ಉಳಿದಿದ್ದಾರೆ ಎಂದು ಹೇಳಿದ್ದಾರೆ. ಟ್ರೆಂಟ್ ಬ್ರಿಡ್ಜ್ನಲ್ಲಿ ನ್ಯೂಜಿಲೆಂಡ್ ವಿರುದ್ಧದ ನಿರ್ಣಾಯಕ ಮೂರನೇ ಟೆಸ್ಟ್ಗೆ ಆತಿಥೇಯರು ತಯಾರಿ ನಡೆಸುತ್ತಿರುವಾಗ ಮೆಕಲಮ್ ಈ ಹೇಳಿಕೆ ನೀಡಿದ್ದಾರೆ.
ಓವಲ್ನಲ್ಲಿ ನಡೆದ ಎರಡನೇ ಟೆಸ್ಟ್ನಲ್ಲಿ ಇಂಗ್ಲೆಂಡ್ 253 ರನ್ಗಳ ಹೀನಾಯ ಸೋಲು ಅನುಭವಿತ್ತು. ಸರಣಿ 1-1ರಿಂದ ಸಮಬಲಗೊಂಡ ಬಳಿಕ ಮೆಕಲಮ್ ಮತ್ತು ಸ್ಟೋಕ್ಸ್ ನಡುವಿನ ಸಂಬಂಧದ ಬಗ್ಗೆ ಪ್ರಶ್ನೆಗಳು ಮತ್ತೆ ಉದ್ಭವಿಸಿದವು.
ಲಾರ್ಡ್ಸ್ನಲ್ಲಿ ನಡೆದ ಮೊದಲ ಟೆಸ್ಟ್ನಲ್ಲಿ ಇಂಗ್ಲೆಂಡ್ ಜಯಗಳಿಸಿದ ನಂತರ ತಂಡದ ಶಿಸ್ತು ಉಲ್ಲಂಘಿಸಿದ್ದಕ್ಕಾಗಿ ಅಮಾನತುಗೊಂಡ ನಂತರ ಸ್ಟೋಕ್ಸ್ ಮತ್ತು ವೇಗದ ಬೌಲರ್ ಗಸ್ ಅಟ್ಕಿನ್ಸನ್ ಎರಡನೇ ಪಂದ್ಯವನ್ನು ತಪ್ಪಿಸಿಕೊಂಡರು. ಲಂಡನ್ನಲ್ಲಿ ನಡೆದ ಘಟನೆಯಲ್ಲಿ ಇಂಗ್ಲೆಂಡ್ನ ಭದ್ರತಾ ಸಿಬ್ಬಂದಿಯೊಬ್ಬರಿಗೆ ಸ್ಯಾರಸೆನ್ಸ್ನ ರಗ್ಬಿ ಆಟಗಾರ ಹೊಡೆದ ಘಟನೆಯಲ್ಲೂ ಈ ಜೋಡಿ ಹಾಜರಿದ್ದರು.
ಶಿಸ್ತಿನ ವಿಚಾರಣೆಯ ನಂತರ, ಇಬ್ಬರೂ ಆಟಗಾರರಿಗೆ ಮೂರನೇ ಟೆಸ್ಟ್ಗೆ ಮರಳಲು ಅನುಮತಿ ನೀಡಲಾಗಿದೆ. ಆದರೆ ಸ್ಟೋಕ್ಸ್ ಜೊತೆಗಿನ ತಮ್ಮ ಸಂಬಂಧ ಹದಗೆಟ್ಟಿದೆ ಎಂಬ ವರದಿಗಳನ್ನು ಮೆಕಲಮ್ ಪಂದ್ಯಕ್ಕೂ ಮುನ್ನ ನಡೆದ ಪತ್ರಿಕಾಗೋಷ್ಠಿಯಲ್ಲಿ ತಳ್ಳಿಹಾಕಿದರು.
ಮೂರನೇ ಟೆಸ್ಟ್ಗೆ ಆಡುವ ಬಳಗ ಪ್ರಕಟಿಸಿದ ಇಂಗ್ಲೆಂಡ್; ನಾಯಕನಾಗಿ ಜೋ ರೂಟ್ ಮುಂದುವರಿಕೆ
"ಬೆನ್ ಅವರನ್ನು ಅವರ ನಾಯಕತ್ವದ ಅವಧಿಯಲ್ಲಿ ನೋಡಿದ ಮತ್ತು ಅವರೊಂದಿಗೆ ನಿಕಟವಾಗಿ ಕೆಲಸ ಮಾಡಿದ ಪ್ರತಿಯೊಬ್ಬರೂ ಅವರ ಬಗ್ಗೆ ಅಪಾರ ಗೌರವವನ್ನು ಹೊಂದಿದ್ದಾರೆ, ನನ್ನನ್ನೂ ಒಳಗೊಂಡಂತೆ. ನಾವಿಬ್ಬರು ಉತ್ತಮ ಸ್ನೇಹಿತರು. ನಮ್ಮಿಬ್ಬರ ಸಂಬಂಧವನ್ನು ಹಾಳು ಮಾಡಬೇಡಿ" ಎಂದರು.
ಜೂನ್ 25 ರಿಂದ ನಾಟಿಂಗ್ಹ್ಯಾಮ್ನ ಟ್ರೆಂಟ್ ಬ್ರಿಡ್ಜ್ನಲ್ಲಿ ನಡೆಯಲಿರುವ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಎರಡೂ ತಂಡಗಳು ತಮ್ಮ ಅತ್ಯುತ್ತಮ ಪ್ರದರ್ಶನ ನೀಡಿ ಸರಣಿಯನ್ನು ವಶಪಡಿಸಿಕೊಳ್ಳುವ ವಿಶ್ವಾಸದಲ್ಲಿವೆ. ಇಂಗ್ಲೆಂಡ್ ಪಂದ್ಯಕ್ಕೂ ಮುನ್ನವೇ ತನ್ನ ಆಡುವ ಬಳಗವನ್ನು ಪ್ರಕಟಿಸಿದೆ.
ಮೂರನೇ ಇಂಗ್ಲೆಂಡ್ ಆಡುವ XI: ಎಮಿಲಿಯೊ ಗೇ, ಬೆನ್ ಡಕೆಟ್, ಜಾಕೋಬ್ ಬೆಥೆಲ್, ಜೋ ರೂಟ್ (ನಾಯಕ), ಹ್ಯಾರಿ ಬ್ರೂಕ್, ಜೇಮಿ ಸ್ಮಿತ್, ಬೆನ್ ಸ್ಟೋಕ್ಸ್, ಗಸ್ ಅಟ್ಕಿನ್ಸನ್, ಜೋಫ್ರಾ ಆರ್ಚರ್, ಜೋಶ್ ಟಂಗ್, ಶೋಯೆಬ್ ಬಶೀರ್.