ನವದೆಹಲಿ, ಅ.28: ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಮೂರು ಬಾರಿ ಚಿನ್ನದ ಪದಕ ಗೆದ್ದಿದ್ದ ಕ್ರೀಡಾಪಟು ನೀರಜ್ ಯಾದವ್ ಅವರು ಮಂಗಳವಾರ ರಾತ್ರಿ ಫ್ಲಾಟ್ ಒಂದರಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಈ ಘಟನೆಯು ಭಾರತೀಯ ಪ್ಯಾರಾ-ಅಥ್ಲೆಟಿಕ್ಸ್ ವಲಯವನ್ನು ಆಘಾತಕ್ಕೀಡುಮಾಡಿದೆ. F55 ವಿಭಾಗದಲ್ಲಿ ಸ್ಪರ್ಧಿಸುತ್ತಿದ್ದ 42 ವರ್ಷದ ನೀರಜ್ ಯಾದವ್, ವಿಷ ಸೇವಿಸಿರಬಹುದು ಎಂದು ಶಂಕಿಸಲಾಗಿದೆ.
ನೀರಜ್ ಯಾದವ್ ಅವರ ಸಾವಿಗೆ ಕಾರಣವಾದ ಸನ್ನಿವೇಶಗಳು ಇನ್ನೂ ತಿಳಿದುಬಂದಿಲ್ಲ. ಭಾರತದ ಮುಖ್ಯ ಪ್ಯಾರಾ-ಅಥ್ಲೆಟಿಕ್ಸ್ ತರಬೇತುದಾರ ಎಸ್. ಸತ್ಯನಾರಾಯಣ ಅವರು ಈ ಬೆಳವಣಿಗೆಯನ್ನು ಟೈಮ್ಸ್‌ ಆಫ್‌ ಇಂಡಿಯಾಗೆ ದೃಢಪಡಿಸಿದ್ದು, ಯಾದವ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂಬ ವಿಷಯ ತಮಗೆ ತಿಳಿದುಬಂದಿದೆ ಎಂದು ತಿಳಿಸಿದ್ದಾರೆ.
"ಹೌದು, ನೀರಜ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ನನಗೂ ಇದೇ ವಿಷಯ ತಿಳಿದುಬಂದಿದೆ. ನಿನ್ನೆ ರಾತ್ರಿ ಅವರು ತಮ್ಮ ಫ್ಲಾಟ್‌ನಲ್ಲಿ ವಿಷ ಸೇವಿಸಿದ್ದಾರೆ ಎಂದು ನನಗೆ ತಿಳಿಸಲಾಗಿದೆ. ಇದು ಅತ್ಯಂತ ದುರದೃಷ್ಟಕರ ಮತ್ತು ದುರಂತ ಸಂಗತಿ," ಎಂದು ಸತ್ಯನಾರಾಯಣ ಹೇಳಿದರು.
ಡೋಪಿಂಗ್ ನಿಷೇಧದ ಕಾರಣದಿಂದಾಗಿ ಐಚಿ-ನಗೋಯಾ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಭಾಗವಹಿಸಲು ಸಾಧ್ಯವಾಗದಿದ್ದರಿಂದ, ಯಾದವ್ ಭಾವನಾತ್ಮಕ ಸಂಕಷ್ಟಕ್ಕೆ ಒಳಗಾಗಿರಬಹುದು ಎಂದು ಕೋಚ್ ಅಭಿಪ್ರಾಯಪಟ್ಟಿದ್ದಾರೆ. ಆದಾಗ್ಯೂ, ಅವರ ಸಾವಿಗೆ ಕಾರಣವಾದ ಸನ್ನಿವೇಶಗಳು ಇನ್ನೂ ಖಚಿತಪಟ್ಟಿಲ್ಲ.
“ನೀರಜ್ ನಗೋಯಾ ಕ್ರೀಡಾಕೂಟದಲ್ಲಿ ಭಾಗವಹಿಸಲು ಎದುರು ನೋಡುತ್ತಿದ್ದರು. ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಪದಕಗಳನ್ನು ಗೆದ್ದರೆ, ಸರ್ಕಾರದಿಂದ ಗಣನೀಯ ನಗದು ಬಹುಮಾನಗಳು ಮತ್ತು ಸುಸ್ಥಿರ ಉದ್ಯೋಗಾವಕಾಶಗಳು ಸಿಗುತ್ತದೆ. ಆದರೆ, ಅವರ ಮೇಲಿದ್ದ ಅಮಾನತು ತೆರವಾಗದಿದ್ದರಿಂದ ಅವರಿಗೆ ಸ್ಪರ್ಧಿಸಲು ಸಾಧ್ಯವಾಗಲಿಲ್ಲ. ಇದು ಅವರ ಮೇಲೆ ತೀವ್ರ ಪರಿಣಾಮ ಬೀರಿದ್ದಿರಬಹುದು, ಆದರೆ ಅವರು ಯಾವ ಮಾನಸಿಕ ಸ್ಥಿತಿಯಲ್ಲಿದ್ದರು ಎಂಬುದನ್ನು ಖಚಿತವಾಗಿ ಹೇಳಲು ಸಾಧ್ಯವಿಲ್ಲ” ಎಂದು ಸತ್ಯನಾರಾಯಣ ಹೇಳಿದರು.
ಸತತ ದ್ವಿಶತಕ ಬಾರಿಸಿ ಕೊಹ್ಲಿ, ಗಂಭೀರ್‌ ಜತೆ ಎಲೈಟ್‌ ಪಟ್ಟಿ ಸೇರಿದ ಆಯುಷ್ ಬದೋನಿ
ಉತ್ತರ ಪ್ರದೇಶದವರಾದ ಯಾದವ್, ಭಾರತದ ನಿಪುಣ ಪ್ಯಾರಾ-ಕ್ರೀಡಾಪಟುಗಳಲ್ಲಿ ಒಬ್ಬರಾಗಿದ್ದರು. ಏಳನೇ ವಯಸ್ಸಿನಲ್ಲಿ ಪೋಲಿಯೋ ನಂತರದ ಪಾರ್ಶ್ವವಾಯು ಇರುವುದು ಪತ್ತೆಯಾಗಿದ್ದರೂ, ಅವರು ತಮ್ಮ ಕ್ರೀಡಾ ಆಕಾಂಕ್ಷೆಗಳನ್ನು ಮುಂದುವರಿಸಿದರು. ಅವರು 2005 ಮತ್ತು 2012ರ ನಡುವೆ ವೀಲ್‌ಚೇರ್ ಟೆನ್ನಿಸ್ ಆಡಿದರು, ನಂತರ ಪ್ಯಾರಾ-ಅಥ್ಲೆಟಿಕ್ಸ್‌ಗೆ (ಪ್ಯಾರಾ-ಕ್ರೀಡೆಗಳಿಗೆ) ಬದಲಾದರು.
2015ರ ದೆಹಲಿ ರಾಜ್ಯ ಅಥ್ಲೆಟಿಕ್ಸ್ ಕೂಟದಲ್ಲಿ ಅವರಿಗೆ ದೊಡ್ಡ ಯಶಸ್ಸು ಸಿಕ್ಕಿತು. ಅಲ್ಲಿ ಅವರು ಶಾಟ್ ಪುಟ್, ಜಾವೆಲಿನ್ ಮತ್ತು ಡಿಸ್ಕಸ್ ಎಸೆತ ಸ್ಪರ್ಧೆಗಳಲ್ಲಿ ಚಿನ್ನದ ಪದಕಗಳನ್ನು ಗೆದ್ದರು.