ನವದೆಹಲಿ, ಮೇ 7: ಭಾರತೀಯ ಕುಸ್ತಿ ಒಕ್ಕೂಟದ ಇತ್ತೀಚಿನ ಅರ್ಹತಾ ಮಾನದಂಡಗಳ ಅಡಿಯಲ್ಲಿ ಆಯ್ಕೆ ಟ್ರಯಲ್ಸ್(Asian Games 2026 selection trials )ನಿಂದ ಹೊರಗುಳಿದ ನಂತರ ಕುಸ್ತಿಪಟು ವಿನೇಶ್ ಫೋಗಟ್(Vinesh Phogat) ಅವರನ್ನು 2026 ರ ಏಷ್ಯನ್ ಕ್ರೀಡಾಕೂಟದಿಂದ ಕೈಬಿಡಲಾಗಿದೆ. ಹೊಸ ನಿಯಮಗಳ ಪ್ರಕಾರ, 2025 ಮತ್ತು 2026 ರ ಸ್ಪರ್ಧೆಗಳ ಪದಕ ವಿಜೇತರಿಗೆ ಮಾತ್ರ ಆಯ್ಕೆ ಟ್ರಯಲ್ಸ್ನಲ್ಲಿ ಭಾಗವಹಿಸಲು ಅವಕಾಶವಿರುತ್ತದೆ. ಫೋಗಟ್ 2024 ರ ಪ್ಯಾರಿಸ್ ಒಲಿಂಪಿಕ್ಸ್ ಬಳಿಕ ಯಾವುದೇ ವೃತ್ತಿಪರ ಸ್ಪರ್ಧೆಯಲ್ಲಿ ಸ್ಪರ್ಧಿಸಿಲ್ಲ.
ದೇಶೀಯ ಸರ್ಕ್ಯೂಟ್ಗೆ ಮರಳುವುದನ್ನು ತಡೆಯಲು ಭಾರತೀಯ ಕುಸ್ತಿ ಒಕ್ಕೂಟ ಪ್ರಯತ್ನಿಸುತ್ತಿದೆ ಎಂದು ಫೋಗಟ್ ಎರಡು ದಿನಗಳ ಈ ಹಿಂದೆ ಕಳವಳ ವ್ಯಕ್ತಪಡಿಸಿದ್ದರು. ರಾಷ್ಟ್ರೀಯ ಮುಕ್ತ ರ್ಯಾಂಕಿಂಗ್ ಟೂರ್ನಮೆಂಟ್ಗೆ ನೋಂದಾಯಿಸಲು ಆರಂಭದಲ್ಲಿ ಪ್ರಯತ್ನಿಸಿದಾಗ ಫೆಡರೇಶನ್ ಪ್ರತಿಕ್ರಿಯಿಸಲಿಲ್ಲ ಎಂದು ಅವರು ಹೇಳಿಕೊಂಡಿದ್ದಾರೆ.
"ನಾನು ರಾಷ್ಟ್ರೀಯ ಮುಕ್ತ ರ್ಯಾಂಕಿಂಗ್ ಟೂರ್ನಮೆಂಟ್ನಲ್ಲಿ ಮತ್ತೆ ಸ್ಪರ್ಧಿಸುವ ಭರವಸೆ ಹೊಂದಿದ್ದೇನೆ. ಇದಕ್ಕಾಗಿ ನೋಂದಣಿ ಏಪ್ರಿಲ್ 30 ರವರೆಗೆ ತೆರೆದಿತ್ತು. ಆದರೆ, ನಾನು ನೋಂದಾಯಿಸಲು ಪ್ರಯತ್ನಿಸಿದಾಗ, ಪೋರ್ಟಲ್ ಮುಚ್ಚಲಾಗಿದೆ" ಎಂದು ಅವರು ಹೇಳಿದ್ದರು.
ಫೆಡರೇಶನ್ ಕಪ್ಗೂ ಮುನ್ನ ತಾನು ಇದೇ ರೀತಿಯ ಸಮಸ್ಯೆಗಳನ್ನು ಎದುರಿಸಿದ್ದೆ ಎಂದು ಫೋಗಟ್ ಆರೋಪಿಸಿದ್ದಾರೆ. "ನಾನು ಅಲ್ಲಿಯೂ ಸ್ಪರ್ಧಿಸಲು ಉದ್ದೇಶಿಸಿದ್ದೆ, ಆದರೆ ತಂಡದ ಆಯ್ಕೆಯ ಮಾನದಂಡಗಳನ್ನು ಕೊನೆಯ ಕ್ಷಣದಲ್ಲಿ ಬದಲಾಯಿಸಲಾಯಿತು, ಆದ್ದರಿಂದ ನಾನು ಭಾಗವಹಿಸಲು ಸಾಧ್ಯವಾಗಲಿಲ್ಲ" ಎಂದು ಅವರು ಹೇಳಿದರು.
"ಇದು ಏಷ್ಯನ್ ಗೇಮ್ಸ್ ಮತ್ತು ವಿಶ್ವ ಚಾಂಪಿಯನ್ಶಿಪ್ ಆಯ್ಕೆ ಟ್ರಯಲ್ಸ್ಗೆ ಸ್ಪರ್ಧೆಯಲ್ಲಿ ಉಳಿಯಲು ಪ್ರಮುಖ ಪಂದ್ಯಾವಳಿಯಾಗಿರುವುದರಿಂದ, ನಾನು ಸ್ಪರ್ಧಿಸುವುದನ್ನು ತಡೆಯಲು ಉದ್ದೇಶಪೂರ್ವಕ ಪ್ರಯತ್ನವಾಗಿದೆ" ಎಂದು ಫೋಗಟ್ ಆರೋಪಿಸಿದ್ದಾರೆ.
IPL 2026 Points Table: ಅಂಕಪಟ್ಟಿಯಲ್ಲಿ ಮಹತ್ವದ ಬದಲಾವಣೆ; ಅಗ್ರಸ್ಥಾನ ಕಳೆದುಕೊಂಡ ಪಂಜಾಬ್
WFI ಯ ಇತ್ತೀಚಿನ ಪ್ರಕಟಣೆಯು ಅವರ ಕಳವಳಗಳನ್ನು ಬಲಪಡಿಸುವಂತೆ ತೋರುತ್ತಿದೆ. ಫೆಡರೇಶನ್ 2025 ಮತ್ತು 2026 ರ ಆಯ್ದ ಈವೆಂಟ್ಗಳಿಂದ ಪದಕ ವಿಜೇತರಿಗೆ ಅರ್ಹತೆಯನ್ನು ಸೀಮಿತಗೊಳಿಸಿದೆ ಮತ್ತು ಹಿಂದಿನ ಪ್ರದರ್ಶನಗಳನ್ನು ಪರಿಗಣಿಸಲಾಗುವುದಿಲ್ಲ ಎಂದು ಸ್ಪಷ್ಟವಾಗಿ ಹೇಳಿದೆ.
ಏಷ್ಯನ್ ಗೇಮ್ಸ್ ಆಯ್ಕೆ ಟ್ರಯಲ್ಸ್ಗೆ ಅರ್ಹತಾ ಮಾನದಂಡಗಳು
ಡಿಸೆಂಬರ್ 12 ರಿಂದ 14, 2025 ರವರೆಗೆ ಗುಜರಾತ್ನ ಅಹಮದಾಬಾದ್ನಲ್ಲಿ ನಡೆದ 2025 ರ ಸೀನಿಯರ್ ರಾಷ್ಟ್ರೀಯ ಕುಸ್ತಿ ಚಾಂಪಿಯನ್ಶಿಪ್ನ ಎಲ್ಲಾ ಪದಕ ವಿಜೇತರು.
ಫೆಬ್ರವರಿ 12 ರಿಂದ 14, 2026 ರವರೆಗೆ ಉತ್ತರ ಪ್ರದೇಶದ ಗಾಜಿಯಾಬಾದ್ನಲ್ಲಿ ನಡೆದ 2026 ರ ಸೀನಿಯರ್ ಫೆಡರೇಶನ್ ಕಪ್ನ ಎಲ್ಲಾ ಪದಕ ವಿಜೇತರು.
2026 ರ ಏಪ್ರಿಲ್ 10 ರಿಂದ 12 ರವರೆಗೆ ಛತ್ತೀಸ್ಗಢದ ಭಿಲಾಯಿಯಲ್ಲಿ ನಡೆದ 20 ವರ್ಷದೊಳಗಿನವರ ರಾಷ್ಟ್ರೀಯ ಕುಸ್ತಿ ಚಾಂಪಿಯನ್ಶಿಪ್ನ ಎಲ್ಲಾ ಪದಕ ವಿಜೇತರು.
ಮಹಿಳಾ ಕುಸ್ತಿ ಟ್ರಯಲ್ಸ್ ಮೇ 30 ರಂದು ನವದೆಹಲಿಯ ಇಂದಿರಾ ಗಾಂಧಿ ಕ್ರೀಡಾಂಗಣದಲ್ಲಿ ನಡೆಯಲಿದ್ದು, ಫ್ರೀಸ್ಟೈಲ್ ಮತ್ತು ಗ್ರೀಕೋ ರೋಮನ್ ಟ್ರಯಲ್ಸ್ ಮೇ 31 ರಂದು ಲಕ್ನೋದ ಎಸ್ಎಐ ಪ್ರಾದೇಶಿಕ ಕೇಂದ್ರದಲ್ಲಿ ನಡೆಯಲಿವೆ.