ನವದೆಹಲಿ, ಅ.27: ಫುಟ್ಬಾಲ್ ಜಗತ್ತಿನ ಅತ್ಯಂತ ಪ್ರತಿಷ್ಠಿತ ಬ್ಯಾಲನ್ ಡಿ'ಓರ್ ಪ್ರಶಸ್ತಿ ಗೆದ್ದ ಇಂಗ್ಲೆಂಡ್ ನಾಯಕ ಹ್ಯಾರಿ ಕೇನ್ ಅವರಿಗೆ ಭಾರತ ಕ್ರಿಕೆಟ್‌ ತಂಡದ ಸ್ಟಾರ್‌ ಆಟಗಾರ ವಿರಾಟ್ ಕೊಹ್ಲಿ ಅಭಿನಂದನೆ ಸಲ್ಲಿಸಿದ್ದಾರೆ. ಕೊಹ್ಲಿ ತಮ್ಮ ಸ್ನೇಹಿತನಿಗಾಗಿ ಹೃದಯಸ್ಪರ್ಶಿ ಸಂದೇಶವೊಂದನ್ನು ಹಂಚಿಕೊಂಡಿದ್ದು, ಫುಟ್ಬಾಲ್ ವೃತ್ತಿಜೀವನದ ಉದ್ದಕ್ಕೂ ಕೇನ್ ತೋರಿದ ಕಠಿಣ ಪರಿಶ್ರಮ, ಪ್ರಾಮಾಣಿಕತೆ ಮತ್ತು ದೃಢನಿಶ್ಚಯವನ್ನು ಶ್ಲಾಘಿಸಿದ್ದಾರೆ.
33ನೇ ವಯಸ್ಸಿನ ಕೇನ್, 2001ರಲ್ಲಿ ಮೈಕೆಲ್ ಓವನ್ ನಂತರ ಈ ಪ್ರಶಸ್ತಿ ಗೆದ್ದ ಮೊದಲ ಇಂಗ್ಲಿಷ್ ಫುಟ್ಬಾಲ್ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದರೊಂದಿಗೆ ಪ್ರಶಸ್ತಿಗಾಗಿ ಇಂಗ್ಲೆಂಡ್ನ 25 ವರ್ಷಗಳ ಕಾಯುವಿಕೆಯನ್ನು ಕೊನೆಗೊಳಿಸಿದ್ದಾರೆ. ಓಟ್ಟಾರೆ ಈ ಸಾಧನೆ ಮಾಡಿದ ಐದನೇ ಇಂಗ್ಲಿಷ್ ಆಟಗಾರ ಎನಿಸಿಕೊಂಡಿದ್ದಾರೆ. ಇದಕ್ಕೂ ಮೊದಲು ಸರ್ ಸ್ಟಾನ್ಲಿ ಮ್ಯಾಥ್ಯೂಸ್, ಸರ್ ಬಾಬಿ ಚಾರ್ಲ್ಟನ್, ಕೆವಿನ್ ಕೀಗನ್ ಮತ್ತು ಮೈಕೆಲ್ ಓವನ್ ಬ್ಯಾಲನ್ ಡಿ'ಓರ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದರು.
ಪ್ರತಿಷ್ಠಿತ ಬ್ಯಾಲನ್ ಡಿ'ಓರ್ ಗೌರವಕ್ಕೆ ಪಾತ್ರರಾದ ಹ್ಯಾರಿ ಕೇನ್
ಕಳೆದ ಋತುವಿನಲ್ಲಿ ಕ್ಲಬ್ ಮತ್ತು ದೇಶಕ್ಕಾಗಿ 65 ಪಂದ್ಯಗಳನ್ನು ಆಡಿದ್ದ ಹ್ಯಾರಿ ಕೇನ್ 73 ಗೋಲುಗಳನ್ನು ಗಳಿಸಿದ್ದರು. ಕೊಹ್ಲಿ ಸಾಮಾಜಿಕ ಜಾಲತಾಣದಲ್ಲಿ ಸುಂದರವಾದ ಪೋಸ್ಟ್ ಒಂದನ್ನು ಮಾಡುವ ಮೂಲಕ ಕೇನ್ ಅವರನ್ನು ಅಭಿನಂದಿಸಿದರು.
"ಹ್ಯಾರಿ, ನನ್ನ ಸ್ನೇಹಿತನೇ! ಉನ್ನತ ಮಟ್ಟದಲ್ಲಿ ಫುಟ್ಬಾಲ್ ಆಡುವಾಗ ಇಷ್ಟು ವರ್ಷಗಳ ಕಾಲ ನೀನು ತೋರಿದ ದೃಢತೆ, ಕಠಿಣ ಪರಿಶ್ರಮ ಮತ್ತು ಪ್ರಾಮಾಣಿಕತೆಗೆ ಈ ಪ್ರಶಸ್ತಿ ನಿನಗೆ ಸಂಪೂರ್ಣವಾಗಿ ಸಲ್ಲುತ್ತದೆ. ನಿನ್ನ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ದೇವರು ನಿನಗೆ ಮತ್ತು ನಿನ್ನ ಕುಟುಂಬಕ್ಕೆ ಆಶೀರ್ವದಿಸಲಿ. ನಿನ್ನ ಈ ಪಯಣದ ಬಗ್ಗೆ ನಿನಗೆ ಎಷ್ಟು ಹೆಮ್ಮೆ ಇದೆಯೋ, ನಿನ್ನ ಕುಟುಂಬದವರಿಗೂ ನಿನ್ನ ಬಗ್ಗೆ ಅಷ್ಟೇ ಹೆಮ್ಮೆ ಇರುತ್ತದೆ. ನಿನಗೆ ಯಾವಾಗಲೂ ನನ್ನ ಶುಭಾಶಯಗಳು. ಅಭಿನಂದನೆಗಳು" ಎಂದು ಕೊಹ್ಲಿ ಬರೆದಿದ್ದಾರೆ.
ಪುರುಷರ ಪ್ರಶಸ್ತಿಗಾಗಿ ನಡೆದ ಮತದಾನದಲ್ಲಿ, ಲಮಿನ್ ಯಮಾಲ್, ಕೈಲಿಯನ್ ಎಂಬಾಪೆ ಮತ್ತು ಲಿಯೋನೆಲ್ ಮೆಸ್ಸಿ ಸೇರಿದಂತೆ ಹಲವು ಅಗ್ರಗಣ್ಯ ಆಟಗಾರರನ್ನು ಹಿಂದಿಕ್ಕಿ ಕೇನ್ ಪ್ರಶಸ್ತಿ ಗೆದ್ದರು.
ಕಿವೀಸ್‌ ಸರಣಿಗೆ ಸಜ್ಜಾಗುತ್ತಿರುವ ಕೊಹ್ಲಿ
ವಿರಾಟ್ ಕೊಹ್ಲಿ ಅವರು ನ್ಯೂಜಿಲೆಂಡ್ ವಿರುದ್ಧದ ಮುಂಬರುವ ಐದು ಪಂದ್ಯಗಳ ಏಕದಿನ ಸರಣಿಗೆ ತಯಾರಿ ನಡೆಸುತ್ತಿದ್ದಾರೆ. ಸೆಪ್ಟೆಂಬರ್‌ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿಯಲ್ಲಿ ಮೂರು ಪಂದ್ಯಗಳಲ್ಲಿ 84ರ ಸರಾಸರಿ ಮತ್ತು 155.55ರ ಸ್ಟ್ರೈಕ್ ರೇಟ್‌ನೊಂದಿಗೆ 168 ರನ್‌ಗಳನ್ನು ಗಳಿಸಿದ್ದರು. ತಿರುವನಂತಪುರಂನಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಅವರು ಕೇವಲ 88 ಎಸೆತಗಳಲ್ಲಿ ಅಜೇಯ 139 ರನ್ ಗಳಿಸಿದ್ದರು.