ಬೆಂಗಳೂರು: ಗುಲಾಬಿ ಹೂವು(Roses) ಸಾಮಾನ್ಯವಾಗಿ ಪ್ರೀತಿ ಮತ್ತು ಸೌಂದರ್ಯದ ಸಂಕೇತವಾಗಿ ಕಾಣಿಸಿಕೊಂಡರೂ, ವಾಸ್ತುಶಾಸ್ತ್ರದಲ್ಲಿ(Vastu Tips) ಇದಕ್ಕೆ ಇನ್ನೂ ಹೆಚ್ಚಿನ ಮಹತ್ವವಿದೆ. ಗುಲಾಬಿಯನ್ನು ಸಂಪತ್ತು ಮತ್ತು ಯಶಸ್ಸನ್ನು ಆಕರ್ಷಿಸುವ ಶಕ್ತಿಶಾಲಿ ಹೂವು ಎಂದು ಪರಿಗಣಿಸಲಾಗುತ್ತದೆ.
ಹೌದು ವಾಸ್ತು ನಿಯಮಗಳ ಪ್ರಕಾರ, ಮನೆಯಲ್ಲಿ ಗುಲಾಬಿ ಗಿಡವನ್ನು ಇಡುವುದು ಅತ್ಯಂತ ಶುಭಕರ. ಇದು ಮನೆಯ ಸೌಂದರ್ಯವನ್ನು ಹೆಚ್ಚಿಸುವುದರ ಜೊತೆಗೆ ಧನಾತ್ಮಕ ಶಕ್ತಿಯ ಹರಿವನ್ನು ವೃದ್ಧಿಸುತ್ತದೆ. ಜೊತೆಗೆ ಔಷಧೀಯ ಗುಣಗಳನ್ನು ಹೊಂದಿರುವ ಗುಲಾಬಿ ಆರೋಗ್ಯಕರ ಜೀವನಕ್ಕೂ ಸಹಾಯಕವಾಗಿದ್ದು, ನಕಾರಾತ್ಮಕ ಶಕ್ತಿಗಳು ಮನೆಗೆ ಪ್ರವೇಶಿಸದಂತೆ ತಡೆಯುತ್ತದೆ.
ಗುಲಾಬಿ ಹೂವಿನ ವಾಸ್ತು ಮಹತ್ವ
ಗುಲಾಬಿ ಹೂವು ವಾಸ್ತುಶಾಸ್ತ್ರದಲ್ಲಿ ಮಹತ್ವದ ಸ್ಥಾನವನ್ನು ಹೊಂದಿದ್ದು, ಅದರ ಸುಗಂಧ ಮನೆಮಂದಿಯಲ್ಲಿ ಸಕಾರಾತ್ಮಕ ಶಕ್ತಿ ಮತ್ತು ಶಾಂತಿಯ ವಾತಾವರಣವನ್ನು ನಿರ್ಮಿಸುತ್ತದೆ. ಕೆಂಪು ಗುಲಾಬಿಗಳು ಪ್ರೀತಿ, ಆಕರ್ಷಣೆ ಮತ್ತು ಭಾವನಾತ್ಮಕ ಬಾಂಧವ್ಯವನ್ನು ಬಲಪಡಿಸುತ್ತವೆ, ಹಳದಿ ಗುಲಾಬಿಗಳು ಸಂಬಂಧಗಳಲ್ಲಿ ಸೌಹಾರ್ದತೆಯನ್ನು ಹೆಚ್ಚಿಸಿ ವೃತ್ತಿ ಜೀವನದಲ್ಲಿ ಪ್ರಗತಿಗೆ ಸಹಾಯ ಮಾಡುತ್ತವೆ. ಬಿಳಿ ಗುಲಾಬಿ ಶಾಂತಿ, ಸಮತೋಲನ ಹಾಗೂ ಆಧ್ಯಾತ್ಮಿಕ ಶಕ್ತಿಯ ಸಂಕೇತವಾಗಿದ್ದು ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ಈ ಕಾರಣಗಳಿಂದಲೇ ಗುಲಾಬಿಗೆ ಸಂಬಂಧಿಸಿದ ವಾಸ್ತು ಪರಿಹಾರಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡರೆ ಧನಾತ್ಮಕತೆ, ಯಶಸ್ಸು ಮತ್ತು ಸಮೃದ್ಧಿಯನ್ನು ಆಕರ್ಷಿಸಬಹುದು ಎಂಬ ನಂಬಿಕೆ ಇದೆ.
ಸುಖಮಯ ದಾಂಪತ್ಯಕ್ಕಾಗಿ :
ಮಲಗುವ ಕೋಣೆಯ ನೈಋತ್ಯ ದಿಕ್ಕಿನಲ್ಲಿ ಎರಡು ಕೆಂಪು ಗುಲಾಬಿಗಳನ್ನು ಹೂವಿನ ಪಾತ್ರೆಯಲ್ಲಿ ಇಡಿ. ಹೂವುಗಳನ್ನು ನಿಯಮಿತವಾಗಿ ಬದಲಾಯಿಸಿ ಮತ್ತು ಕೋಣೆಯಲ್ಲಿ ಸದಾ ಸುಗಂಧಮಯ ವಾತಾವರಣ ಇರಲಿ. ಇದರಿಂದ ದಾಂಪತ್ಯ ಜೀವನದಲ್ಲಿ ಪ್ರೀತಿ ಮತ್ತು ಪರಸ್ಪರ ಅರ್ಥಮಾಡಿಕೊಳ್ಳುವಿಕೆ ಹೆಚ್ಚಾಗುತ್ತದೆ.
ಧನ ಲಾಭ ಸಮೃದ್ಧಿಗಾಗಿ
ಮನೆಯ ಉತ್ತರ ದಿಕ್ಕಿನಲ್ಲಿ ತಾಮ್ರದ ಪಾತ್ರೆಯಲ್ಲಿ ಹಳದಿ ಗುಲಾಬಿ ದಳಗಳನ್ನು ಇಡಿ. ಅದಕ್ಕೆ ಸ್ವಲ್ಪ ಅರಿಶಿನ ಹಾಗೂ ಒಂದು ನಾಣ್ಯವನ್ನು ಸೇರಿಸುವುದು ಶುಭಕರ. ಈ ವಿಧಾನವು ಆರ್ಥಿಕ ಸ್ಥಿರತೆ ಮತ್ತು ಹಣದ ಹರಿವಿಗೆ ಸಹಾಯ ಮಾಡುತ್ತದೆ ಎಂದು ನಂಬಲಾಗಿದೆ.
ವೃತ್ತಿ ಮತ್ತು ಶಿಕ್ಷಣದಲ್ಲಿನ ಯಶಸ್ಸಿಗೆ:
ಗುಲಾಬಿ ನೀರಿನಲ್ಲಿ ನೆನೆಸಿದ ಬಿಳಿ ಗುಲಾಬಿಯನ್ನು ಅಧ್ಯಯನ ಅಥವಾ ಕೆಲಸದ ಮೇಜಿನ ಮೇಲೆ ಇಡಿ. ಅದರ ಸಮೀಪ ಸ್ಫಟಿಕ ಅಥವಾ ಸಣ್ಣ ಹಿತ್ತಾಳೆ ಗಂಟೆಯನ್ನು ಇಡುವುದು ಲಾಭಕಾರಿ. ಇದರಿಂದ ಏಕಾಗ್ರತೆ ಹೆಚ್ಚಾಗಿ ಸರಿಯಾದ ನಿರ್ಧಾರ ತೆಗೆದುಕೊಳ್ಳಲು ಸಹಾಯವಾಗುತ್ತದೆ.
ನಕಾರಾತ್ಮಕ ಶಕ್ತಿಯಿಂದ ರಕ್ಷಣೆಗೆ:
ಪ್ರತಿ ವಾರ ಮನೆಯ ಮುಖ್ಯ ದ್ವಾರದ ಬಳಿ ಗುಲಾಬಿ ದಳಗಳು ಮತ್ತು ಕರ್ಪೂರವನ್ನು ಬಳಸಿ ಧೂಪ ಹಾಕಿ. ಇದು ದುಷ್ಟ ದೃಷ್ಟಿ, ಕಲಹ ಹಾಗೂ ಅಶುಭ ಶಕ್ತಿಗಳನ್ನು ದೂರ ಮಾಡುತ್ತದೆ.
ಗುಲಾಬಿ ಗಿಡವನ್ನು ನೆಡಲು ಸರಿಯಾದ ದಿಕ್ಕು
ವಾಸ್ತು ಪ್ರಕಾರ, ಗುಲಾಬಿ ಗಿಡಗಳನ್ನು ಮನೆಯ ನೈಋತ್ಯ ಭಾಗದಲ್ಲಿ ಬೆಳೆಸುವುದು ಉತ್ತಮ. ಕೆಂಪು ಗುಲಾಬಿ ಗಿಡಗಳಿಗೆ ದಕ್ಷಿಣ ದಿಕ್ಕು ಹೆಚ್ಚು ಶುಭಕರವಾಗಿದ್ದು, ಇದು ಮನೆಯ ಮಾಲೀಕರ ಗೌರವ ಮತ್ತು ಸಾಮಾಜಿಕ ಸ್ಥಾನವನ್ನು ಹೆಚ್ಚಿಸುತ್ತದೆ ಎಂದು ಹೇಳಲಾಗುತ್ತದೆ.
ಗಮನದಲ್ಲಿರಬೇಕಾದ ಪ್ರಮುಖ ಅಂಶಗಳು
ಒಣಗಿದ ಅಥವಾ ಬಾಡಿದ ಹೂವುಗಳನ್ನು ಮನೆಯಲ್ಲಿ ಇರಿಸಬೇಡಿ.
1–2 ದಿನಗಳಿಗೊಮ್ಮೆ ಹೂವುಗಳನ್ನು ಬದಲಾಯಿಸುವುದು ಅಗತ್ಯ.
ವಾಸ್ತು ಪರಿಹಾರಗಳನ್ನು ಮಾಡುವಾಗ ಶುದ್ಧ ಮನಸ್ಸು ಮತ್ತು ಧನಾತ್ಮಕ ಚಿಂತನೆ ಇರಲಿ.
ಹೂವುಗಳು ಮತ್ತು ಗಿಡಗಳನ್ನು ಇಡುವಾಗ ವಾಸ್ತು ಪ್ರಕಾರ ಸರಿಯಾದ ದಿಕ್ಕನ್ನು ಆಯ್ಕೆಮಾಡಿ.