ಗಾಜಿಯಾಬಾದ್: ಸಾಕುನಾಯಿಯೊಂದು (Pet Dog) ಲಿಫ್ಟ್‌ಗಾಗಿ ಕಾಯುತ್ತಿದ್ದ ಮನೆಕೆಲಸದಾಕೆಯ ಮೇಲೆ ದಾಳಿ ಮಾಡಿ ಕಾಲಿಗೆ ಕಚ್ಚಿರುವ ಆತಂಕಕಾರಿ ಘಟನೆ ಉತ್ತರ ಪ್ರದೇಶದ ಗಾಜಿಯಾಬಾದ್‌ನಲ್ಲಿ ನಡೆದಿದೆ. ಶ್ವಾನದ ಮಾಲೀಕರ ಸಮ್ಮುಖದಲ್ಲೇ ಈ ಘಟನೆ ನಡೆದಿದ್ದು, ಸಿಸಿ ಕ್ಯಾಮರಾದಲ್ಲಿ ದೃಶ್ಯ ಸೆರೆಯಾಗಿದೆ. ಈ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು (Viral Video), ಮಹಿಳೆ ನೋವಿನಿಂದ ಗೋಳಾಡುತ್ತಾ ಅತ್ತಿದ್ದಾಳೆ.
ವೈರಲ್ ಆಗಿರುವ ವಿಡಿಯೊದಲ್ಲಿ, ಸಂಜೆ 7:13 ಕ್ಕೆ ಒಬ್ಬ ವ್ಯಕ್ತಿಯು ಮಹಿಳೆಯೊಂದಿಗೆ (ಅವನ ತಾಯಿ ಎಂದು ತೋರುತ್ತದೆ) ತಮ್ಮ ಸಾಕು ನಾಯಿಯೊಂದಿಗೆ ಲಿಫ್ಟ್‌ಗೆ ಪ್ರವೇಶಿಸುತ್ತಾನೆ. 27 ಸೆಕೆಂಡುಗಳ ನಂತರ, ಲಿಫ್ಟ್ ನಿಲ್ಲುತ್ತದೆ. ಬಾಗಿಲು ತೆರೆದ ತಕ್ಷಣ, ನಾಯಿ ಓಡಿಹೋಗಿ ಲಿಫ್ಟ್‌ಗಾಗಿ ಕಾಯುತ್ತಿದ್ದ ಮಹಿಳೆಯ ಮೇಲೆ ಎರಗುತ್ತದೆ. ಆ ವ್ಯಕ್ತಿ ಹೊರಬರುತ್ತಿದ್ದಂತೆ, ನಾಯಿ ಮೆಟ್ಟಿಲುಗಳ ಕಡೆಗೆ ಓಡಿ, ನಂತರ ಲಿಫ್ಟ್ ಒಳಗೆ ಹಿಂತಿರುಗುತ್ತದೆ. ಗಾಯಗೊಂಡ ಮಹಿಳೆಗೆ ಯಾವುದೇ ಸಹಾಯವನ್ನು ನೀಡದೆ ಆ ವ್ಯಕ್ತಿ ಲಿಫ್ಟ್ ಹತ್ತಿದ್ದಾನೆ.
ಲಿಫ್ಟ್ ಒಳಗಿದ್ದ ಮಹಿಳೆ ನಾಯಿಯ ತಲೆಗೆ ಮೆತ್ತಗೆ ಹೊಡೆದಿದ್ದಾಳೆ. ಆ ವ್ಯಕ್ತಿ ಕೂಡ ನಾಯಿಯ ತಲೆಯ ಮೇಲೆ ಹೊಡೆದಿದ್ದಾನೆ. ನಂತರ ಮಹಿಳೆ (ವ್ಯಕ್ತಿಯ ತಾಯಿ) ನಾಯಿಯ ಮುಂದೆ ನಡೆದುಕೊಂಡು ಹೋಗಿದ್ದಾಳೆ. ಲಿಫ್ಟ್ ನಿಂತ ತಕ್ಷಣ ಅದು ಮತ್ತೆ ಹೊರಗೆ ಹೋಗದಂತೆ ನೋಡಿಕೊಳ್ಳುತ್ತಾ, ಅದರ ದಾರಿಯನ್ನು ತಡೆದಿದ್ದಾಳೆ.
ವಿಡಿಯೊ ವೀಕ್ಷಿಸಿ:
ಈ ಮಧ್ಯೆ, ನಾಯಿ ಕಚ್ಚಿ ಗಾಯಗೊಂಡ ಮಹಿಳೆ ನೋವಿನಿಂದ ಕುಂಟುತ್ತಾ ಅಳುತ್ತಿರುವುದು ಸಿಸಿಟಿವಿ ದೃಶ್ಯಗಳಲ್ಲಿ ಕಂಡುಬಂದಿದೆ. ನಾಯಿ ಬೊಗಳುವುದು ಮತ್ತು ಮಹಿಳೆಯೊಬ್ಬರು ಅಳುವುದನ್ನು ಕೇಳಿ ನೆರೆಹೊರೆಯವರು ವಿಚಾರಿಸಲು ಹೊರಗೆ ಬಂದಿದ್ದಾರೆ. ಮಹಿಳೆ ತನ್ನ ಚಪ್ಪಲಿಯನ್ನು ಎತ್ತಿಕೊಂಡು ಫೋನ್ ಮಾಡಿ ಮತ್ತೊಂದು ಲಿಫ್ಟ್ ಹತ್ತಿದರು. ಲಿಫ್ಟ್ ಒಳಗೆ, ಅವಳು ತನ್ನ ತೊಡೆಯನ್ನು ಒತ್ತಿ ನರಳುತ್ತಿರುವುದು ಕಂಡುಬಂದಿದೆ.
ಇನ್ನು ನಾಯಿ ದಾಳಿಗೆ ಒಳಗಾದ ಮಹಿಳೆಯನ್ನು ಕಲ್ಪನಾ ಎಂದು ಗುರುತಿಸಲಾಗಿದ್ದು, ಅವರು ಇಂದಿರಾಪುರಂನ ಅಮ್ರಪಾಲಿ ಗ್ರಾಮ ಸಂಘದ ಸಿಎಂ ಟವರ್‌ನಲ್ಲಿ ಮನೆ ಸಹಾಯಕಿಯಾಗಿ ಕೆಲಸ ಮಾಡುತ್ತಿದ್ದಾರೆ. ಮಹಿಳೆಯ ಮೇಲೆ ದಾಳಿ ಮಾಡಿದ ನಾಯಿಯ ಮಾಲೀಕರು ಕೂಡ ಅಲ್ಲೇ ವಾಸಿಸುತ್ತಿದ್ದಾರೆ. ದೆಹಲಿ-ಎನ್‌ಸಿಆರ್ ಪ್ರದೇಶದಲ್ಲಿರುವ ಎಲ್ಲಾ ಬೀದಿ ನಾಯಿಗಳನ್ನು ಸ್ಥಳಾಂತರಿಸುವಂತೆ ಸುಪ್ರೀಂ ಕೋರ್ಟ್‌ನ ತೀರ್ಪಿನ ಕುರಿತು ನಡೆಯುತ್ತಿರುವ ಚರ್ಚೆಯ ಬೆನ್ನಲ್ಲೇ ಈ ಘಟನೆ ನಡೆದಿದೆ.
ಇದನ್ನೂ ಓದಿ: Viral Video: ಬೀದಿ ನಾಯಿಯನ್ನು ಎತ್ತಿಕೊಂಡು ಉಗ್ರ ಪ್ರತಿಭಟನೆ- ಇಲ್ಲಿದೆ ನೋಡಿ ವಿಡಿಯೊ