ನವದೆಹಲಿ: ತನ್ನ ಭಾರತೀಯ ಪಾಸ್‌ಪೋರ್ಟ್ (Indian Passport) ಅನ್ನು ಮಾನ್ಯವೆಂದು ಗುರುತಿಸಲು ನಿರಾಕರಿಸಿದ ನಂತರ, ಚೀನಾದ ಅಧಿಕಾರಿಗಳು ಶಾಂಘೈ ವಿಮಾನ ನಿಲ್ದಾಣದಲ್ಲಿ ತನ್ನನ್ನು ಬಂಧಿಸಿ ಕಿರುಕುಳ ನೀಡಿದ್ದಾರೆ ಎಂದು ಅರುಣಾಚಲ ಪ್ರದೇಶದ (Arunachal Pradesh) ಮಹಿಳೆಯೊಬ್ಬರು ಆರೋಪಿಸಿದ್ದಾರೆ. ಎಕ್ಸ್‌ನಲ್ಲಿ ಸರಣಿ ಪೋಸ್ಟ್‌ ಮಾಡಿದ ಪೆಮಾ ವಾಂಗ್ ಥೋಂಗ್‌ಡಾಕ್, ಶಾಂಘೈ ಪುಡಾಂಗ್ ವಿಮಾನ ನಿಲ್ದಾಣದ ವಲಸೆ ಅಧಿಕಾರಿಗಳು ನವೆಂಬರ್ 21ರಂದು ತನ್ನನ್ನು ಹದಿನೆಂಟು ಗಂಟೆಗಳ ಕಾಲ ಬಂಧಿಸಿದ್ದಾರೆ. ತನ್ನ ಜನ್ಮಸ್ಥಳವಾದ ಅರುಣಾಚಲ ಪ್ರದೇಶವು ಚೀನಾದ (China) ಭಾಗವಾಗಿರುವುದರಿಂದ ಅವರ ಪಾಸ್‌ಪೋರ್ಟ್ ಅಮಾನ್ಯ ಎಂದು ಹೇಳಿದ್ದಾಗಿ ತಿಳಿಸಿದ್ದಾರೆ.
ನವೆಂಬರ್ 21ರಂದು ಲಂಡನ್‌ನಿಂದ ಜಪಾನ್‌ಗೆ ಪ್ರಯಾಣಿಸುತ್ತಿದ್ದಾಗ ಥಾಂಗ್‌ಡಾಕ್ ಮೂರು ಗಂಟೆಗಳ ಕಾಲ ಶಾಂಘೈನಲ್ಲಿ ತಂಗಿದ್ದರು. ʼʼಚೀನಾ ವಲಸೆ ಮತ್ತು ಚೀನಾ ಈಸ್ಟರ್ನ್ ಏರ್‌ಲೈನ್ಸ್‌ ಕಾರ್ಪೊರೇಷನ್ ಲಿಮಿಟೆಡ್ ಆರೋಪದ ಮೇರೆಗೆ ನನ್ನನ್ನು ಶಾಂಘೈ ವಿಮಾನ ನಿಲ್ದಾಣದಲ್ಲಿ 18 ಗಂಟೆಗಳಿಗೂ ಹೆಚ್ಚು ಕಾಲ ಬಂಧಿಸಲಾಗಿತ್ತು. ನನ್ನ ಜನ್ಮಸ್ಥಳ ಅರುಣಾಚಲ ಪ್ರದೇಶ, ಅದು ಚೀನಾದ ಪ್ರದೇಶ ಎಂದು ಅವರು ಹೇಳಿಕೊಂಡಿದ್ದರಿಂದ ನನ್ನ ಭಾರತೀಯ ಪಾಸ್‌ಪೋರ್ಟ್ ಅನ್ನು ಅಮಾನ್ಯ ಎಂದು ಕರೆದರುʼʼ ಎಂದು ಅವರು ಎಕ್ಸ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.
ಮಾಜಿ ಕೈದಿಗಳ ಜೊತೆಗೂಡಿ ವೈದ್ಯನ ಖೋಟಾ ನೋಟ್‌ ದಂಧೆ- ಬೃಹತ್‌ ರಾಕೆಟ್‌ ಬಯಲಿಗೆ!
ಮತ್ತೊಂದು ಪೋಸ್ಟ್‌ನಲ್ಲಿ, ನಾನು ಅರುಣಾಚಲ ಪ್ರದೇಶದಲ್ಲಿ ಜನಿಸಿದ್ದರಿಂದ ನನ್ನ ಭಾರತೀಯ ಪಾಸ್‌ಪೋರ್ಟ್ ಅಮಾನ್ಯವಾಗಿದೆ ಎಂದು ವಲಸೆ ಅಧಿಕಾರಿಗಳು ಹೇಳಿದ್ದಾರೆ ಎಂದು ಥಾಂಗ್‌ಡಾಕ್ ಹೇಳಿದ್ದಾರೆ. ಅರುಣಾಚಲ ಪ್ರದೇಶ ಚೀನಾದ ಭಾಗ ಎಂದು ಅಧಿಕಾರಿಗಳು ಆಕೆಗೆ ಹೇಳಿದ್ದರು. ಆದರೆ, ಅವರು ಆಕೆಯ ಭಾರತೀಯ ಪೌರತ್ವವನ್ನು ಗುರುತಿಸಲು ನಿರಾಕರಿಸಿದರು. ಆಕೆಯ ಪಾಸ್‌ಪೋರ್ಟ್ ಅನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಯಿತು ಮತ್ತು ಮಾನ್ಯ ಜಪಾನೀಸ್ ವೀಸಾ ಹೊಂದಿದ್ದರೂ ಸಹ ಆಕೆಯನ್ನು ಮುಂದಿನ ವಿಮಾನ ಹತ್ತದಂತೆ ತಡೆಯಲಾಯಿತು.
ಇಲ್ಲಿದೆ ಎಕ್ಸ್‌ ಪೋಸ್ಟ್‌:
ಹಲವು ವಲಸೆ ಅಧಿಕಾರಿಗಳು ಮತ್ತು ಚೀನಾ ಈಸ್ಟರ್ನ್ ಏರ್‌ಲೈನ್ಸ್‌ ಸಿಬ್ಬಂದಿ ಅವರನ್ನು ಅವಹೇಳನ ಮಾಡಿ ಅಪಹಾಸ್ಯ ಮಾಡಿದ್ದಾರೆ ಮತ್ತು ಚೀನಿ ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸಬೇಕು ಎಂದು ಸೂಚಿಸಿದ್ದಾರೆ ಎಂದು ಥಾಂಗ್‌ಡಾಕ್ ಹೇಳಿದ್ದಾರೆ. ಅವರಿಗೆ ಆಹಾರ, ವಿಮಾನ ನಿಲ್ದಾಣದ ಸೌಲಭ್ಯಗಳು ಸೇರಿದಂತೆ ಯಾವುದೇ ಅಧಿಕೃತ ಮಾಹಿತಿಗಳನ್ನು ಪಡೆಯಲು ಅವಕಾಶ ನಿರಾಕರಿಸಲಾಯಿತು.
ಅವರು ಜಪಾನ್‌ಗೆ ಹೋಗುವ ನಿಗದಿತ ವಿಮಾನ ಹತ್ತದಂತೆ ತಡೆಯಲಾಯಿತು. ಚೀನಾ ಈಸ್ಟರ್ನ್ ಏರ್‌ಲೈನ್ಸ್‌ನಲ್ಲಿ ಪ್ರತ್ಯೇಕವಾಗಿ ಹೊಸ ಟಿಕೆಟ್ ಖರೀದಿಸಲು ಒಪ್ಪಿಕೊಂಡಾಗ ಮಾತ್ರ ಅವರ ಪಾಸ್‌ಪೋರ್ಟ್ ಅನ್ನು ಹಿಂತಿರುಗಿಸಲಾಯಿತು ಎಂದು ವರದಿಯಾಗಿದೆ. ಇದರಿಂದಾಗಿ ವಿಮಾನ ತಪ್ಪಿಹೋಯಿತು ಮತ್ತು ಹೋಟೆಲ್ ಬುಕಿಂಗ್‌ಗಳಿಂದ ಆರ್ಥಿಕ ನಷ್ಟ ಉಂಟಾಯಿತು ಎಂದು ವರದಿಯಾಗಿದೆ.
ವಿಮಾನ ನಿಲ್ದಾಣದ ಸಾರಿಗೆ ಪ್ರದೇಶಕ್ಕೆ ಸೀಮಿತವಾಗಿದ್ದರಿಂದ, ಥಾಂಗ್‌ಡಾಕ್‌ಗೆ ಟಿಕೆಟ್‌ಗಳನ್ನು ಮರು ಬುಕ್ ಮಾಡಲು ಅಥವಾ ಮುಕ್ತವಾಗಿ ಚಲಿಸಲು ಸಾಧ್ಯವಾಗಲಿಲ್ಲ. ಕೊನೆಗೆ ಅವರು ಇಂಗ್ಲೆಂಡ್‌ನಲ್ಲಿರುವ ಸ್ನೇಹಿತನ ಮೂಲಕ ಶಾಂಘೈನಲ್ಲಿರುವ ಭಾರತೀಯ ದೂತಾವಾಸವನ್ನು ಸಂಪರ್ಕಿಸಬೇಕಾಯಿತು. ಕಾನ್ಸುಲರ್ ಹಸ್ತಕ್ಷೇಪದಿಂದ, ಅವರು ಅಂತಿಮವಾಗಿ ತಡರಾತ್ರಿ ವಿಮಾನ ನಿಲ್ದಾಣದಿಂದ ಹೊರಟು ತನ್ನ ಪ್ರಯಾಣವನ್ನು ಪುನರಾರಂಭಿಸಿದರು.
ಇದನ್ನು ಭಾರತದ ಸಾರ್ವಭೌಮತ್ವಕ್ಕೆ ಅವಮಾನ ಎಂದು ಕರೆದಿರುವ ಥಾಂಗ್‌ಡಾಕ್, ಈ ವಿಷಯವನ್ನು ಬೀಜಿಂಗ್‌ ಜತೆ ಪ್ರಸ್ತಾಪಿಸುವಂತೆ ಪ್ರಧಾನಿ ನರೇಂದ್ರ ಮೋದಿ ಮತ್ತು ಭಾರತೀಯ ಅಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ. ವಿದೇಶಗಳಿಗೆ ಪ್ರಯಾಣಿಸುವಾಗ ಅರುಣಾಚಲ ಪ್ರದೇಶದ ಎಲ್ಲ ಭಾರತೀಯರನ್ನು ಇದೇ ರೀತಿಯ ತಾರತಮ್ಯದಿಂದ ರಕ್ಷಿಸಬೇಕೆಂದು ಅವರು ಒತ್ತಾಯಿಸಿದ್ದಾರೆ.
ಇನ್ನು ಝಂಗ್ನಾನ್ ಅಥವಾ ಟಿಬೆಟ್‌ನ ದಕ್ಷಿಣ ಭಾಗ ಎಂದು ಉಲ್ಲೇಖಿಸುವ ಅರುಣಾಚಲ ಪ್ರದೇಶದ ಕೆಲವು ಸ್ಥಳಗಳನ್ನು ಮರುನಾಮಕರಣ ಮಾಡುವ ಚೀನಾದ ವ್ಯರ್ಥ ಮತ್ತು ಅಸಂಬದ್ಧ ಪ್ರಯತ್ನಗಳನ್ನು ಭಾರತ ಪದೇ ಪದೆ ತಿರಸ್ಕರಿಸಿದೆ.