ನವದೆಹಲಿ, ಮೇ 17: ವಯಸ್ಸು ಅನ್ನೋದು ಕೇವಲ ನಂಬರ್ ಅಷ್ಟೇ. ಶ್ರಮ ಪಟ್ಟರೆ, ಮನಸ್ಸು ಮಾಡಿದರೆ ತಮ್ಮ ಕನಸನ್ನು ಕೂಡ ಈಡೇರಿಸಿಕೊಳ್ಳಬಹುದು ಎನ್ನುವುದಕ್ಕೆ ಈ ಘಟನೆಯೇ ಸಾಕ್ಷಿ. 84 ವರ್ಷದ ವೃದ್ಧೆಯೊಬ್ಬರು ಮೊದಲ ವಿಮಾನ ಪ್ರಯಾಣವನ್ನು ಅನುಭವಿಸಿದ ಹೃದಯಸ್ಪರ್ಶಿ ವಿಡಿಯೊ (Viral News) ಎಲ್ಲರ ಹೃದಯ ಗೆದ್ದಿದೆ. 84ನೇ ವಯಸ್ಸಿನಲ್ಲಿ ಅಜ್ಜಿ ಮೊದಲ ಬಾರಿಗೆ ವಿಮಾನದಲ್ಲಿ ಪ್ರಯಾಣಿಸಿದ್ದು, ಅಜ್ಜಿಯ ಆಸೆಯನ್ನು ಈಡೇರಿಸಲು ಮೊಮ್ಮಗ ಸಾಥ್ ನೀಡಿದ್ದಾನೆ. ಸದ್ಯ ಈ ವಿಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದೆ.
ಕೆಲವು ದಶಕಗಳಿಂದ ಅಜ್ಜಿಗೆ ವಿಮಾನದಲ್ಲಿ ಪ್ರಯಾಣ ಮಾಡಬೇಕು ಎನ್ನುವ ಆಸೆ ಇತ್ತು. ಈ ಕನಸನ್ನು ಕೊನೆಗೂ ಅವರ ಮೊಮ್ಮಗ ಅರ್ನಬ್ ಈಡೇರಿಸಿದ್ದಾನೆ. ಈ ಮರೆಯಲಾಗದ ಕ್ಷಣವನ್ನು ಅನರ್ಬ್ ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿದ್ದಾನೆ. ವಿಡಿಯೊದ ಆರಂಭದಲ್ಲಿ ಅಜ್ಜಿ ಏರ್ಪೋರ್ಟ್ನಲ್ಲಿ ನಿಂತಿರುವುದು ಕಂಡು ಬಂದಿದೆ. ಆದರೆ ಮುಂದೆ ಇಷ್ಟು ದೊಡ್ಡ ಸರ್ಪ್ರೈಸ್ ಇದೆ ಎಂದು ಅಜ್ಜಿಗೆ ತಿಳಿದಿರಲಿಲ್ಲ.
ವಿಡಿಯೊ ನೋಡಿ:
ವಿಡಿಯೊಕ್ಕೆ ʼʼಅಜ್ಜಿಯ ಕನಸು ಈಡೇರಿಸಲು 22 ವರ್ಷ ಬೇಕಾಯ್ತುʼʼ ಎಂದು ಶೀರ್ಷಿಕೆ ನೀಡಲಾಗಿದೆ. ಅಜ್ಜಿ ಮೆಲ್ಲಗೆ ವಿಮಾನದ ಮೆಟ್ಟಿಲು ಹತ್ತುತ್ತಿರುವ ದೃಶ್ಯ ಇದೆ. ಆದರೆ ಫ್ಲೈಟ್ ಹತ್ತುವಾಗ ಯಾವುದೇ ಆತಂಕ ಹಾಗೂ ಭಯ ಅವರಿಗೆ ಕಾಡಿಲ್ಲ.
ಅವರು ವಿಮಾನ ಟೇಕ್-ಆಫ್ಗಾಗಿ ಕಾಯುತ್ತಿರುವಾಗ ಆರಾಮವಾಗಿ ಮಖಾನಾ ಸೇವಿಸಿದ್ದಾರೆ. ವಿಮಾನವು ಆಕಾಶಕ್ಕೆ ಜಿಗಿಯುತ್ತಿದ್ದಂತೆ, ಅವರು ಕಿಟಕಿಯ ಮೂಲಕ ಹೊರಗಿನ ದೃಶ್ಯ ಆನಂದಿಸಿದ್ದಾರೆ. ಅಜ್ಜಿ ವಿಮಾನದ ಬಳಿ ಆತ್ಮವಿಶ್ವಾಸದಿಂದ ನಗುತ್ತಾ, ಹೆಮ್ಮೆಯಿಂದ ಪೋಸ್ ನೀಡಿದ್ದಾರೆ. ಈ ಬಗ್ಗೆ ನೆಟ್ಟಿಗರು ಕೂಡ ನಾನಾ ಬಗೆಯ ಕಮೆಂಟ್ ಮಾಡಿದ್ದಾರೆ. ಒಬ್ಬರು "ಇದನ್ನು ನೋಡಿದ ನಂತರ ನಾನು ನನ್ನ ಅಜ್ಜಿಯನ್ನು ಮಿಸ್ ಮಾಡಿಕೊಳ್ಳುತ್ತೇನೆ" ಎಂದು ಬರೆದುಕೊಂಡಿದ್ದಾರೆ. ಮತ್ತೊಬ್ಬರು, ʼʼಅದೃಷ್ಟಶಾಲಿ ಅಜ್ಜಿʼʼ ಎಂದು ಹೇಳಿದ್ದಾರೆ.