ನವದೆಹಲಿ, ಅ.16: ಅಧಿಕೃತ ವರ್ಚುವಲ್ ಸಭೆಯೊಂದರ ವೇಳೆ, ಜಮ್ಮು ಮತ್ತು ಕಾಶ್ಮೀರ ಆಡಳಿತ ಸೇವೆಯ (JKAS) ಮಹಿಳಾ ಅಧಿಕಾರಿಯೊಬ್ಬರನ್ನು ಭಾರತೀಯ ಆಡಳಿತ ಸೇವೆಯ (IAS) ಹಿರಿಯ ಅಧಿಕಾರಿಯೊಬ್ಬರು ನಿಂದಿಸಿದ್ದಾರೆ ಎನ್ನಲಾದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಇದು ಭಾರೀ ವಿವಾದಕ್ಕೆ ಹಾಗೂ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಈ ಅಧಿಕಾರಿಯನ್ನು ಜಮ್ಮು ಮತ್ತು ಕಾಶ್ಮೀರದ ಕಾರ್ಮಿಕ ಮತ್ತು ಉದ್ಯೋಗ ಇಲಾಖೆಯ ಕಾರ್ಯದರ್ಶಿ ಕುಮಾರ್ ರಾಜೀವ್ ರಂಜನ್ ಎಂದು ಗುರುತಿಸಲಾಗಿದೆ. ಮಹಿಳಾ ಅಧಿಕಾರಿಯನ್ನು ಉದ್ಯೋಗ ಇಲಾಖೆಯ ಸಹಾಯಕ ನಿರ್ದೇಶಕಿ ಹಾಗೂ ಜೆ.ಕೆ.ಎ.ಎಸ್. (JKAS) ಅಧಿಕಾರಿ ಬೀನಿಶ್ ವಾನಿ ಎಂದು ಗುರುತಿಸಲಾಗಿದೆ.
ಮೂಲಗಳ ಪ್ರಕಾರ, ರಾಷ್ಟ್ರೀಯ ಗ್ರಾಮೀಣ ಅಭಿಯಾನದ (NRLM) ಪ್ರಗತಿಯನ್ನು ಮೌಲ್ಯಮಾಪನ ಮಾಡಲು ಕರೆದಿದ್ದ 'ಮಿಷನ್ ಯುವ' (Mission YUVA) ಪರಿಶೀಲನಾ ಸಭೆಯ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ.
Ramayana Movie: ಒಡೆಯುವ ಕೆಲಸ ಬೇಡ; ಕನ್ನಡಿಗರಲ್ಲಿ ವಿಶೇಷ ಮನವಿ ಮಾಡಿದ ಯಶ್
ಇದೀಗ ವ್ಯಾಪಕವಾಗಿ ಹರಿದಾಡುತ್ತಿರುವ ಈ ವಿಡಿಯೋದಲ್ಲಿ, ರಂಜನ್ ಅವರು ತಾಳ್ಮೆ ಕಳೆದುಕೊಂಡು ವಾನಿ ಅವರ ಮೇಲೆ ಕೂಗಾಡುವುದನ್ನು ಕೇಳಬಹುದು. ಮತ್ತು "ಬ್ಲಡಿ ಶಿಟ್" (bloody shit), ನಾನೇ ನಿನ್ನ ಬಾಸ್. ನಾನು ಯಾವಾಗಲೂ ನಿಮ್ಮೊಂದಿಗೆ ಹೀಗೆಯೇ ಮಾತನಾಡಬಲ್ಲೆ ಎಂದು ಹೇಳಿರುವುದು ಕಂಡುಬಂದಿದೆ. ಈ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಆಡಳಿತಾರೂಢ ನ್ಯಾಷನಲ್ ಕಾನ್ಫರೆನ್ಸ್‌ನಿಂದ ಹಿಡಿದು ಭಾರತೀಯ ಜನತಾ ಪಕ್ಷದವರೆಗಿನ ರಾಜಕೀಯ ಪಕ್ಷಗಳು ಈ ಐಎಎಸ್ ಅಧಿಕಾರಿಯ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿವೆ.
ಈ ಘಟನೆ ನಡೆದಿರುವುದನ್ನು ವಾನಿ ದೃಢಪಡಿಸಿದ್ದು ವಿಡಿಯೋವನ್ನು ಮಾರ್ಪಡಿಸಲಾಗಿಲ್ಲ (ಮಾರ್ಫ್ ಮಾಡಲಾಗಿಲ್ಲ) ಅಥವಾ ಕೃತಕ ಬುದ್ಧಿಮತ್ತೆ (AI) ಬಳಸಿ ಸೃಷ್ಟಿಸಲಾಗಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು. ತಮ್ಮ ಕಾಲಿಗೆ ಮೂಳೆ ಮುರಿತ ಉಂಟಾಗಿ ರಜೆಯಲ್ಲಿದ್ದರೂ, ಮನೆಯಿಂದಲೇ ವರ್ಚುವಲ್ ಮಾಧ್ಯಮದ ಮೂಲಕ ಸಭೆಯಲ್ಲಿ ಭಾಗವಹಿಸಿದ್ದಾಗಿ ಅವರು ತಿಳಿಸಿದರು.
ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರಂಜನ್, ಆವೇಶದ ಭರದಲ್ಲಿ ತಾನು ಏನಾದರೂ ಹೇಳಿದ್ದರೆ ಅದಕ್ಕಾಗಿ ಕ್ಷಮೆಯಾಚಿಸುವುದಾಗಿ ತಿಳಿಸಿದರು. ಮಹಿಳಾ ಅಧಿಕಾರಿಗೆ ಪದೇಪದೇ ಸುಮ್ಮನಿರುವಂತೆ ಹೇಳಿದರೂ, ಅವರು ತಮ್ಮನ್ನು ಪ್ರಚೋದಿಸುವುದನ್ನು ಮುಂದುವರಿಸಿದರು ಎಂದು ಅವರು ಹೇಳಿದರು.
"ನಾವು ಅಧಿಕಾರಿಗಳನ್ನೇ ಪ್ರಶ್ನಿಸದಿದ್ದರೆ, ಇನ್ನು ನಾವು ಹೇಗೆ ಪರಿಶೀಲನಾ ಸಭೆಗಳನ್ನು ನಡೆಸಿ ಜವಾಬ್ದಾರಿಯನ್ನು ನಿಗದಿಪಡಿಸಲು ಸಾಧ್ಯ?" ಎಂದು ಅವರು ಪ್ರಶ್ನಿಸಿದರು.
ವಾನಿ ವಿರುದ್ಧ ಆರೋಪ ಮಾಡಿರುವ ರಂಜನ್, ಅವರು "ನಿಮಗೆ ನರಕವೇ ಗತಿ" ಎಂಬಂತಹ ಪದಗಳನ್ನು ಬಳಸಿದ್ದರು ಎಂದು ಹೇಳಿದರು.
"ಹೇಳಿ, ಇಂತಹ ಪರಿಸ್ಥಿತಿಯಲ್ಲಿ, ಒಬ್ಬ ಕಿರಿಯ ಅಧಿಕಾರಿ ನಿಮ್ಮೊಂದಿಗೆ ಇಂತಹ ಭಾಷೆಯನ್ನು ಬಳಸಲು ಪ್ರಾರಂಭಿಸಿದರೆ, ಅಲ್ಲಿನ ಶ್ರೇಣಿವ್ಯವಸ್ಥೆ ಹೇಗೆ ಕಾರ್ಯನಿರ್ವಹಿಸುತ್ತದೆ?" ಎಂದು ರಂಜನ್ ಪ್ರಶ್ನಿಸಿದರು. ಜೊತೆಗೆ, ಈ ತೀವ್ರ ವಾಗ್ವಾದದ ಸಂಪೂರ್ಣ ಸನ್ನಿವೇಶವನ್ನು ಅರ್ಥಮಾಡಿಕೊಳ್ಳಲು, ಯಾವುದೇ ತೀರ್ಮಾನಕ್ಕೆ ಬರುವ ಮೊದಲು ದಯವಿಟ್ಟು ಒಂದು ಗಂಟೆಯ ಸಭೆಯ ಸಂಪೂರ್ಣ ವೀಡಿಯೊವನ್ನು ಪರಿಶೀಲಿಸಿ ಎಂದು ಅವರು ಹೇಳಿದರು.