ಅಂಕರಾ: ಶ್ವಾನ ಕಚ್ಚಿದರೆ ಚುಚ್ಚುಮದ್ದು ನೀಡಬೇಕು. ಇಲ್ಲದಿದ್ದರೆ ರೇಬಿಸ್ ಹರಡುತ್ತದೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ಆದರೆ, ಮನುಷ್ಯ ಕಚ್ಚಿದರೆ ಏನಾಗಲ್ಲ ಎಂದು ಅಸಡ್ಡೆ ಮಾಡುವವರೇ ಹೆಚ್ಚು. ಟರ್ಕಿ (Turkey)ಯಲ್ಲಿ ನಡೆದ ವಿಚಿತ್ರ ವೈದ್ಯಕೀಯ ಪ್ರಕರಣವೊಂದರಲ್ಲಿ, ಮಾನವ ಕಡಿತವು ಜೀವಕ್ಕೆ ಅಪಾಯಕಾರಿ ಸೋಂಕು ತರುತ್ತದೆ ಎಂದು ಬಹಿರಂಗಪಡಿಸಿದೆ. ಇದು ವೈದ್ಯರು ಮತ್ತು ಸಾರ್ವಜನಿಕರನ್ನು ದಿಗ್ಭ್ರಮೆಗೊಳಿಸಿದೆ. ಒಂದು ವರ್ಷದ ಹಿಂದೆ ಇಸ್ತಾನ್‌ಬುಲ್‌ (Istanbul) ನಲ್ಲಿ ನಡೆದ ಈ ಘಟನೆಯಲ್ಲಿ, ದರೋಡೆಯ ಸಮಯದಲ್ಲಿ 60 ವರ್ಷದ ವ್ಯಾಪಾರಿ ಮೇಲೆ ದಾಳಿ ಕಳ್ಳನೊಬ್ಬ ಕಚ್ಚಿದ್ದ. ಆರಂಭದಲ್ಲಿ ಸಣ್ಣ ಗಾಯವೆಂದು ತೋರುತ್ತಿದ್ದ ಗಾಯವು ತೀವ್ರವಾದ ಸೋಂಕಾಗಿ ಬದಲಾಯಿತು. ಇದು ಸಾಮಾನ್ಯ ಪ್ರಾಣಿಗಳ ಕಡಿತಕ್ಕಿಂತ ಹೆಚ್ಚು ಅಪಾಯಕಾರಿಯಾಗಿದೆ. ಇದೀಗ ಈ ಸುದ್ದಿ ಭಾರಿ ವೈರಲ್ (Viral News) ಆಗಿದೆ.
ವರದಿಗಳ ಪ್ರಕಾರ, ಕಳ್ಳತನದ ಉದ್ದೇಶದಿಂದ ಇಬ್ಬರು ವ್ಯಕ್ತಿಗಳು ಅಂಗಡಿಯೊಳಗೆ ಪ್ರವೇಶಿಸಿದ್ದಾರೆ. ಮಾಲೀಕರು ಎದುರಾದಾಗ, ವಾಗ್ವಾದ ಪ್ರಾರಂಭವಾಯಿತು. ತಪ್ಪಿಸಿಕೊಳ್ಳುವ ಪ್ರಯತ್ನದಲ್ಲಿ, ದರೋಡೆಕೋರರಲ್ಲಿ ಒಬ್ಬ ವ್ಯಾಪಾರಿಯ ತೋಳನ್ನು ಗಟ್ಟಿಯಾಗಿ ಕಚ್ಚಿದ್ದಾನೆ. ಅದು ಆಳವಾದ ಗಾಯವನ್ನು ಉಂಟುಮಾಡಿತು. ಆರಂಭದಲ್ಲಿ, ಸ್ಥಳೀಯ ಚಿಕಿತ್ಸಾಲಯದಲ್ಲಿ ಪ್ರಾಥಮಿಕ ಚಿಕಿತ್ಸೆ ನೀಡಿದ ನಂತರ ವ್ಯಾಪಾರಿಯನ್ನು ಮನೆಗೆ ಕಳುಹಿಸಲಾಯಿತು.
ಇದನ್ನೂ ಓದಿ: Viral News: ಆಹಾರ ಸೇವಿಸದೆ ಕೇವಲ ನೀರು, ಸೂರ್ಯನ ಬೆಳಕಿನಿಂದ 411 ದಿನ ಬದುಕುಳಿದಿದ್ದ ವ್ಯಕ್ತಿ: ವಿಜ್ಞಾನಕ್ಕೇ ಸವಾಲು
ಸ್ವಲ್ಪ ಸಮಯದವರೆಗೆ, ಅವರು ಚೇತರಿಸಿಕೊಳ್ಳುವಂತೆ ತೋರುತ್ತಿತ್ತು. ಆದರೆ ಮೂರು ತಿಂಗಳ ನಂತರ ಅವರ ಸ್ಥಿತಿ ಹದಗೆಟ್ಟಿತು. ಅವರಿಗೆ ತೀವ್ರ ಜ್ವರ, ನಡುಕ ಮತ್ತು ತೋಳಿನಲ್ಲಿ ತೀವ್ರ ಊತ ಕಾಣಿಸಿಕೊಂಡಿತು. ಅವರು ಆಸ್ಪತ್ರೆಗೆ ತಲುಪುವ ಹೊತ್ತಿಗೆ, ಗಾಯವು ಅಪಾಯಕಾರಿ ಬ್ಯಾಕ್ಟೀರಿಯಾದ ಸೋಂಕಾಗಿ ಮಾರ್ಪಟ್ಟಿದೆ ಎಂದು ವೈದ್ಯರು ಚಿಕಿತ್ಸೆ ವೇಳೆ ತಿಳಿಸಿದ್ದಾರೆ. ಅವರ ತೋಳು ಅದರ ಸಾಮಾನ್ಯ ಗಾತ್ರಕ್ಕಿಂತ ಎರಡು ಪಟ್ಟು ಊದಿಕೊಂಡಿತ್ತು ಮತ್ತು ಚರ್ಮವು ಬಣ್ಣ ಬದಲಾಯಿಸಿತ್ತು.
ವೈದ್ಯಕೀಯ ತಂಡವು ವಿವಿಧ ಚಿಕಿತ್ಸೆಗಳನ್ನು ಪ್ರಯತ್ನಿಸಿತು. ಆದರೆ ಸೋಂಕು ಬೇಗನೆ ಸುಧಾರಿಸಲಿಲ್ಲ. ಅಂತಿಮವಾಗಿ, ವೈದ್ಯರು ಹೈಪರ್‌ಬೇರಿಕ್ ಆಮ್ಲಜನಕ ಚಿಕಿತ್ಸೆಯನ್ನು ಆಶ್ರಯಿಸಿದರು. ಇದು ಸೋಂಕುಗಳ ವಿರುದ್ಧ ಹೋರಾಡಲು ಮತ್ತು ಗಾಯವನ್ನು ಗುಣಪಡಿಸುವಿಕೆಗೆ ಸಹಕಾರಿಯಾಗಿದೆ. ಹಾಗೆಯೇ ಒತ್ತಡದ ವಾತಾವರಣದಲ್ಲಿ ಶುದ್ಧ ಆಮ್ಲಜನಕವನ್ನು ನೀಡುವ ವಿಶೇಷ ಚಿಕಿತ್ಸೆಯಾಗಿದೆ. ಮೂರು ತಿಂಗಳ ಚಿಕಿತ್ಸೆಯ ನಂತರ ರೋಗಿ ಗುಣಮುಖರಾಗಿದ್ದಾರೆ.
ಈ ಪ್ರಕರಣವನ್ನು ನಂತರ ವೈಜ್ಞಾನಿಕ ಜರ್ನಲ್‌ನಲ್ಲಿ ದಾಖಲಿಸಲಾಯಿತು. ಇದು ಮಾನವ ಕಡಿತದ ಅಪಾಯಗಳನ್ನು ಹೆಚ್ಚಾಗಿ ಕಡೆಗಣಿಸುವುದರತ್ತ ಗಮನ ಸೆಳೆಯಿತು. ನಾಯಿ ಅಥವಾ ಪ್ರಾಣಿಗಳ ಕಡಿತಕ್ಕಿಂತ ಭಿನ್ನವಾಗಿ, ಮಾನವ ಕಡಿತವು ಹಾನಿಕಾರಕ ಬ್ಯಾಕ್ಟೀರಿಯಾವನ್ನು ನೇರವಾಗಿ ರಕ್ತಪ್ರವಾಹಕ್ಕೆ ಹರಡುತ್ತದೆ. ಇದು ಚಿಕಿತ್ಸೆ ನೀಡಲು ಅತ್ಯಂತ ಕಷ್ಟಕರವಾದ ಸೋಂಕುಗಳಿಗೆ ಕಾರಣವಾಗುತ್ತದೆ ಎಂದು ಹೇಳಲಾಗಿದೆ. ಮನುಷ್ಯರು ಕಚ್ಚಿದರೂ ಅದನ್ನು ಗಂಭೀರವಾಗಿ ಪರಿಗಣಿಸಬೇಕು. ಏಕೆಂದರೆ ಅದನ್ನು ನಿರ್ಲಕ್ಷಿಸುವುದರಿಂದ ಗಂಭೀರ ತೊಡಕುಗಳು ಉಂಟಾಗಬಹುದು ಎಂದು ವೈದ್ಯರು ಎಚ್ಚರಿಸಿದ್ದಾರೆ.