ರಾಜಸ್ಥಾನ,ಆ.7: ಇಂದು ನಗರ ಪ್ರದೇಶಗಳು ಎಷ್ಟೇ ಅಭಿವೃದ್ಧಿಯಾದರೂ ಕೆಲವೊಂದು ಹಳ್ಳಿ ಪ್ರದೇಶಗಳಲ್ಲಿ ಮೂಲಭೂತ ಸೌಕರ್ಯಗಳ ಕೊರತೆ ಹೆಚ್ಚಾಗಿ ಕಾಡುತ್ತಿದೆ. ನೀರು,ವಿದ್ಯುತ್, ಸಾರಿಗೆ ಸೌಕರ್ಯ ಹೀಗೆ ಹಲವು ಸಮಸ್ಯೆಯಿಂದ ಬಳಲುತ್ತಿವೆ. ಇದಕ್ಕೆ ಸಾಕ್ಷಿ ಅನ್ನುವಂತೆ ರಾಜಸ್ಥಾನದ ದೂರದ ಹಳ್ಳಿಯೊಂದಕ್ಕೆ ಇದುವರೆಗೆ ಸರಕಾರಿ ಬಸ್ ನ ಸೌಲಭ್ಯ ಇರಲಿಲ್ಲ, ಸ್ವಾತಂತ್ರ್ಯ ಸಿಕ್ಕಿ ಹಲವು ವರ್ಷಗಳೇ ಕಳೆದರೂ ಸಾರ್ವಜನಿಕ ಸಾರಿಗೆ ಸೌಲಭ್ಯ ವಂಚಿತವಾಗಿದ್ದ ಗ್ರಾಮಕ್ಕೆ ಕೊನೆಗೂ ಬಸ್ ನ ಆಗಮನವಾಗಿದೆ. ಸ್ವಾತಂತ್ರ್ಯ ಪಡೆದು 79 ವರ್ಷಗಳ ನಂತರ ತಮ್ಮ ಪ್ರದೇಶದಲ್ಲಿ ಮೊದಲ ಸರ್ಕಾರಿ ಬಸ್ ಅನ್ನು ಗ್ರಾಮದ ನಿವಾಸಿಗಳು ಸ್ವಾಗತ ಮಾಡಿದ್ದಾರೆ. ಈ ದೃಶ್ಯ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ (Viral News) ಆಗುತ್ತಿದೆ.
ರಾಜಸ್ಥಾನದ ಅಜ್ಮೀರ್ ಜಿಲ್ಲೆಯ ಕುರ್ತಾಲ್ ಗ್ರಾಮಕ್ಕೆ ಮೊದಲ ಸರಕಾರಿ ಬಸ್ ನ ಆಗಮನವಾಗಿದೆ. ತಮ್ಮ ಮೊದಲ ಬಸ್ ಅನ್ನು ಸಾರ್ವಜನಿಕರು ಸ್ವಾಗತಿಸುತ್ತಿರುವ ವೀಡಿಯೊ ವೈರಲ್ ಆಗಿದೆ. ಗ್ರಾಮಸ್ಥರು ಡೋಲು ಬಾರಿಸಿ ಕುಣಿದು ಕುಪ್ಪಳಿಸಿದ್ದು ಸಂಪ್ರದಾಯಿಕವಾಗಿ ಸ್ವಾಗತ ಕೋರಿದ್ದಾರೆ. ಬಸ್ ತಮ್ಮ ಪ್ರದೇಶಕ್ಕೆ ಬರುವುದನ್ನು ವೀಕ್ಷಿಸಲು ಮಳೆಯ ಹೊರತಾಗಿಯೂ ಗ್ರಾಮಸ್ಥರು ರಸ್ತೆಬದಿಯಲ್ಲಿ ಜಮಾಯಿಸಿರುವುದನ್ನು ಕಾಣಬಹುದು
ವಿಡಿಯೋ ನೋಡಿ:
ಬಸ್ ಅನ್ನು ಚೆಂಡು ಹೂವಿನ ಮಾಲೆಗಳಿಂದ ಅಲಂಕರಿಸಲಾಗಿತ್ತು. ವಿವಿಧ ಆಚರಣೆಗಳೊಂದಿಗೆ ಬಸ್ ಗೆ ಪೂಜೆಯನ್ನು ಸಲ್ಲಿಕೆ ಮಾಡಿ ಸಿಹಿ ತಿಂಡಿಯನ್ನು ಹಂಚಲಾಯಿತು. ಇಷ್ಟು ದಿನ ಸಾರಿಗೆ ಸಂಪರ್ಕದ ಕೊರತೆಯಿಂದ ಶಾಲಾ ಮಕ್ಕಳು, ಉದ್ಯೋಗಿಗಳಿಗೆ ತೊಂದರೆ ಎದುರಾಗಿತ್ತು. ಈ ಹೊಸ ಬಸ್ ಸೇವೆಯಿಂದಾಗಿ ಗ್ರಾಮಸ್ಥರಿಗೆ ಅನುಕೂಲಕರವಾಗಿದೆ.
ಬಸ್ ತಮ್ಮ ಪ್ರದೇಶಕ್ಕೆ ಬರುತ್ತಿದ್ದಂತೆ ಗ್ರಾಮಸ್ಥರು ರಸ್ತೆಬದಿಯಲ್ಲಿ ಜಮಾಯಿಸಿದ್ದಾರೆ. ಅನೇಕರು ಹರ್ಷೋದ್ಗಾರ, ಡ್ಯಾನ್ಸ್ ಮಾಡುತ್ತಾ ತಮ್ಮ ಮೊಬೈಲ್ ಫೋನ್ಗಳಲ್ಲಿ ಕ್ಷಣವನ್ನು ರೆಕಾರ್ಡ್ ಮಾಡುತ್ತಿದ್ದಾರೆ.ಈ ಸಂದರ್ಭವನ್ನು ಹಬ್ಬದಂತಹ ಕಾರ್ಯಕ್ರಮವನ್ನಾಗಿ ಗ್ರಾಮಸ್ಥರು ಆಚರಣೆ ಮಾಡಿದ್ದಾರೆ. ಈ ವೀಡಿಯೊ ಆನ್ಲೈನ್ನಲ್ಲಿ ಎಲ್ಲರ ಗಮನ ಸೆಳೆದಿದೆ.
ಬಳಕೆದಾರರೊಬ್ಬರು ಇವು ಎಲ್ಲರ ಮೂಲಭೂತ ಹಕ್ಕುಗಳು ಗ್ರಾಮಸ್ಥರ ಮುಗ್ಧತೆಯನ್ನು ಪ್ರೀತಿಸುತ್ತೇನೆ,ಆದರೆ ಇದಕ್ಕಾಗಿ ಅವರು ಇಷ್ಟು ದಿನ ಕಾಯಬೇಕಾಗಿಲ್ಲ ಎಂದು ಬೇಸರ ವ್ಯಕ್ತ ಪಡಿಸಿದ್ದಾರೆ. ಮತ್ತೊಬ್ಬರು ಈ ಹಳ್ಳಿ ಮತ್ತಷ್ಟು ಅಭಿವೃದ್ಧಿಯಾಗಲಿ ಎಂದು ಕಾಮೆಂಟ್ ಮಾಡಿದ್ದಾರೆ.