ಶಶಿಧರ ಹಾಲಾಡಿ
ದೇಶವೊಂದು ಮುಂದುವರಿಯಬೇಕಾದರೆ ಜನರಲ್ಲಿ ಓದುವ ಸಂಸ್ಕೃತಿ ಬೆಳೆಯಬೇಕು ಮತ್ತು ಅದಕ್ಕೆ ಪೂರಕವಾಗಿ ಉತ್ತಮ ವಾಚನಾಲಯಗಳು ಇರಬೇಕು ಎಂಬ ಮಾತಿದೆ. ಜನರು ಜ್ಞಾನಿ ಗಳಾದರೆ, ಅದುವೇ ದೇಶದ ಶಕ್ತಿ. ನಾಲೆಜ್ ಈಸ್ ಪವರ್ ಎಂಬ ಮಾತೇ ಇದೆಯಲ್ಲ! ಜಗತ್ತಿನ ಹೆಚ್ಚಿನ ದೇಶಗಳಲ್ಲಿ ಸರಕಾರವು ಉತ್ತಮ ವಾಚನಾಲಯಗಳನ್ನು ಒದಗಿಸುತ್ತಿದೆ. ಕೆಲವು ಕಡೆ ದಾನಿಗಳು ಮತ್ತು ಕೆಲವು ಸಂಸ್ಥೆಗಳು ಗ್ರಂಥಾಲಯಗಳನ್ನು ಅಭಿವೃದ್ಧಿಪಡಿಸಿ, ಹೆಚ್ಚು ಹೆಚ್ಚು ನಾಗರಿಕರು ಅದರ ಸದುಪಯೋಗ ಪಡೆಯುವಂತೆ ಮಾಡುತ್ತಾರೆ. ಜಗತ್ತಿನ ಮುಂದುವರಿದ ದೇಶವೊಂದರ ಗ್ರಂಥಾಲಯಕ್ಕೆ ಭೇಟಿ ಕೊಟ್ಟು, ಅದರ ಉಪಯೋಗ ಪಡೆದ ಅನುಭವವೊಂದು ಇಲ್ಲಿದೆ. ನಿಮ್ಮ ಪ್ರತಿಕ್ರಿಯೆಗೆ ಸ್ವಾಗತ.
ಆ ದೂರದೇಶದಲ್ಲಿ ಸುಮಾರು ಮೂರು ತಿಂಗಳುಗಳ ಕಾಲ ವಾಸಿಸಿದ್ದಾಗ, ನಾವು ಅತಿ ಹೆಚ್ಚು ಬಾರಿ ಭೇಟಿ ನೀಡಿದ ಸ್ಥಳವೆಂದರೆ, ಅಲ್ಲಿದ್ದ ವಾಚನಾಲಯ! ನಿಜ, ದಿನನಿತ್ಯ ಬೇಕಾದ ತರಕಾರಿ, ದಿನಸಿ ಸಾಮಾನುಗಳನ್ನು ತರಲು ಮಾಲ್ ಮತ್ತು ಇಂಡಿಯನ್ ಸ್ಟೋರ್‌ಗೆ ಆಗಾಗ ಹೋಗಿದ್ದನ್ನು ಹೊರತುಪಡಿಸಿದರೆ, ನಾವು ಹೆಚ್ಚು ಬಾರಿ ಭೇಟಿ ನೀಡಿದ್ದು ಅಲ್ಲಿದ್ದ ಸುಸಜ್ಜಿತ ವಾಚನಾಲಯಕ್ಕೆ. ಹಲವು ಕ್ಷೇತ್ರಗಳಲ್ಲಿ ಮುಂದುವರಿದಿರುವ ಅಮೆರಿಕ (ಯುಎಸ್) ದೇಶದಲ್ಲಿ ವಾಚನಾಲಯಗಳು ನಿಜಕ್ಕೂ ಚೆನ್ನಾಗಿವೆ, ಸುಸಜ್ಜಿತವಾಗಿವೆ.
ಒಂದು ಉಚಿತ ವಾಚನಾಲಯ ಏನೆಲ್ಲಾ ಸೇವೆ ನೀಡಬಹುದು ಎಂದು ನಿರೀಕ್ಷಿಸಿದ್ದಕ್ಕಿಂತ, ಇನ್ನೂ ಹೆಚ್ಚಿನ ಮತ್ತು ನಾವು ಅಂದರೆ ಭಾರತೀಯರು ಊಹಿಸಲೂ ಆಗದಂತಹ ಸೇವೆಗಳನ್ನು ಅಲ್ಲಿನ ವಾಚನಾಲಯಗಳು ನೀಡುತ್ತವೆ!
ಆ ದೊಡ್ಡ ದೇಶದ ಉತ್ತರ ತುದಿಯಲ್ಲಿರುವ ಮಿಶಿಗನ್ ರಾಜ್ಯದ ಫಾರ್ಮಿಂಗ್‌ಟನ್ ಹಿಲ್ಸ್ ಎಂಬ ಪಟ್ಟಣದಲ್ಲಿ ನಾವು ಸುಮಾರು ೧೦ ವಾರಗಳ ಕಾಲ ವಾಸವಿದ್ದೆವು. ಫಾರ್ಮಿಂಗ್‌ಟನ್ ಹಿಲ್ಸ್ ಪಟ್ಟಣದ ಜನಸಂಖ್ಯೆ ಸುಮಾರು ಒಂದು ಲಕ್ಷ. ನಾವಿದ್ದದ್ದು ಮಗಳ ಮನೆಯಲ್ಲಿ; ಅಲ್ಲಿಂದ ಸುಮಾರು ನಾಲ್ಕು ಮೈಲು ದೂರದಲ್ಲಿದ್ದ ಆ ಚಂದದ ವಾಚನಾಲಯಕ್ಕೆ ಹೋಗಲು, ಕಾರು ಅಗತ್ಯ ಬೇಕು; ಏಕೆಂದರೆ, ಆ ದೊಡ್ಡ ದೇಶದ ಹೆಚ್ಚಿನ ಭಾಗಗಳಲ್ಲಿ, ಸಾರ್ವಜನಿಕ ಸಾರಿಗೆ ವ್ಯವಸ್ಥೆ ಅಷ್ಟಕ್ಕಷ್ಟೆ ತಾನೆ!
ಇದನ್ನೂ ಓದಿ: Shashidhara Halady Column: ಸರಕಾರಿ ಶಾಲೆಯ ಹಾದಿಯಲ್ಲಿ ಕಲ್ಲುಮುಳ್ಳುಗಳು !
ನಮ್ಮ ವಸತಿ ಸಂಕೀರ್ಣದ ಮುಂಭಾಗದ ವಿಶಾಲವಾದ ರಸ್ತೆಯಲ್ಲಿ ಬಸ್ಸುಗಳು ಬರುತ್ತವಾದರೂ, ಕೆಲವೇ ಕೆಲವು; ಅಂದರೆ ದಿನಕ್ಕೆ ನಾಲ್ಕಾರು ಮಾತ್ರ. ಆದ್ದರಿಂದ, ನಮ್ಮ ಮಗಳು ಕಚೇರಿಯಿಂದ ವಾಪಸು ಬರುವುದನ್ನೇ ಕಾದು ಕುಳಿತಿದ್ದು, ಸಂಜೆಯ ಹೊತ್ತಿನಲ್ಲಿ ವಾರಕ್ಕೆ ಒಂದೆರಡು ಬಾರಿಯಾ ದರೂ ವಾಚನಾಲಯಕ್ಕೆ ಭೇಟಿ ನೀಡುವುದು, ಅಲ್ಲಿನ ಸೋಜಿಗಳನ್ನು ಗಮನಿಸುವುದು ನಮ್ಮ ಹವ್ಯಾಸ ಎನಿಸಿತು. ನಮ್ಮಲ್ಲಿ ಎಲ್ಲರಿಗೂ ಓದುವ ಹವ್ಯಾಸವಿದ್ದುದರಿಂದ, ವಾಚನಾಲಯಕ್ಕೆ ಭೇಟಿ ಎಂದರೆ ಬೇಸರದ ಸಂಗತಿ ಎನಿಸುವುದೇ ಇಲ್ಲ!
ಸಂಜೆ ಆರರಸಮಯದಲ್ಲಿ ವಾಚನಾಲಯಕ್ಕೆ ಹೊರಟರೆ, ಕಾರಿನಲ್ಲಿ ಸುಮಾರು ಹತ್ತು ನಿಮಿಷಗಳ ದಾರಿ; ವಿಶಾಲವಾದ ರಸ್ತೆ; ಒಂದರ ಹಿಂದೆ ಒಂದರಂತೆ ಚಲಿಸುವ ಕಾರುಗಳು; ಬಹುಪಾಲು ಎಲ್ಲರೂ ರಸ್ತೆ ನಿಮಯವನ್ನು ಪಾಲಿಸುವುದನ್ನು ಕಂಡು ಮೊದಮೊದಲಿಗೆ ಅಚ್ಚರಿ, ನಂತರ, ಅದು ಅಲ್ಲಿ ಬೆಳೆದುಬಂದಿರುವ ಶಿಸ್ತು ಎಂದು ತಿಳಿಯಿತು. ರಸ್ತೆಯುದ್ದಕ್ಕೂ ಅಲ್ಲಲ್ಲಿ ಹೂಬಿಟ್ಟಿದ್ದ ಮರಗಳ ಸಾಲು; ಸಂಜೆಯ ಬಿಸಿಲು - ಇವೆಲ್ಲಾ ವಾಚನಾಲಯದ ದಾರಿಯ ನೋಟಗಳು.
ಬೇಸಗೆಯ ದಿನಗಳಲಿ ಅಲ್ಲಿ ಸಂಜೆ ಏಳಾದರೂ ಬಿಸಿಲು ಇರುತ್ತದೆ; ಆದ್ದರಿಂದ ಅಲ್ಲಿನ ಭೂದೃಶ್ಯ ಗಳನ್ನು ನೋಡಲು ಚಂದ, ರಸ್ತೆ ಬದಿಯ ಹೂಗಿಡಗಳ ಬಳಿ ನಿಂತು ಫೋಟೋ ಕ್ಲಿಕ್ಕಿಸುವುದು ಇನ್ನೂ ಅಂದದ ಅನುಭವ. ವಿಶಿಷ್ಟ ವಾಸ್ತು ವಿನ್ಯಾಸದ ವಿಶಾಲವಾದ ಕಟ್ಟಡದಲ್ಲಿ, ಅಲ್ಲಿನ ವಾಚನಾಲಯವಿದೆ; ಅದರ ಎದುರು, ನೀರಿನ ಕಾರಂಜಿಯ ನಡುವೆ ನಿಂತ ಜಲಕನ್ಯೆಯ, ಮೂರು ಅಡಿ ಎತ್ತರದ ಸುಂದರವಾದ ಶಿಲ್ಪ ಕಲಾಕೃತಿ! ಆಕೆಯ ಕಾಲಬಳಿ ಒಂದು ಮೀನು, ಕೈಯಲ್ಲೂ ಒಂದು ಮೀನು; ಆ ಮೀನುಗಳೇ ಆ ಜಲಕನ್ಯೆಯ ಉಡುಗೆ! ಕಟ್ಟಡದ ಎದುರು ಸುಮಾರು 40 ಕಾರು ಗಳನ್ನು ನಿಲ್ಲಿಸುವಷ್ಟು ವಿಶಾಲವಾದ ಪಾರ್ಕಿಂಗ್ ಜಾಗ.
ವಾಚನಾಲಯ ಪ್ರವೇಶಿಸಿದ ತಕ್ಷಣ, ಒಳಭಾಗದಲ್ಲೂ ಒಂದೆರಡು ಲೋಕ ಕಲಾಕೃತಿಗಳಿವೆ. ವಿಶಾಲ ಒಳಾಂಗಣ; ಸಾಲಾಗಿ ಇರಿಸಿರುವ ಟೇಬಲ್, ಕುರ್ಚಿಗಳು, ಅಲ್ಲಲ್ಲಿ ಕಂಪ್ಯೂಟರುಗಳು, ಒಂದೆಡೆ ಸಿಬ್ಬಂದಿ ಕುಳಿತಿರುವ ಜಾಗ. ಸಿಬ್ಬಂದಿಯ ಬಳಿಸಾಗಿ, ಪುಸ್ತಕದ ಕುರಿತು ವಿಚಾರಿಸಿದಾಗ, ಚುರುಕಾಗಿ ತಮ್ಮ ಸ್ಥಾನದಿಂದ ಎದ್ದು ಬಂದು, ಪುಸ್ತಕ ಎಲ್ಲಿದೆ ಎಂದು ತೋರಿಸುವ ಕಾಯಕನಿಷ್ಠೆ. ಸಾವಿರಾರು ಪುಸ್ತಕಗಳನ್ನು ಜೋಡಿಸಿರುವ ರ‍್ಯಾಕ್‌ಗಳು, ಕಪಾಟುಗಳು.
‘ಇಲ್ಲಿ ಕನ್ನಡ ಪುಸ್ತಕಗಳಿವೆಯೆ?’ ಎಂದು ಮಗಳನ್ನು ಕೇಳಿದೆ. ವಾಚನಾಲಯದ ಮೊದಲ ಭೇಟಿಯ ಬೆರಗಿನ ನಡುವೆ ನನ್ನಲ್ಲಿ ಮೂಡಿಬಂದ ಪ್ರಶ್ನೆ ಅದು. ‘ಒಂದು ರ‍್ಯಾಕ್ ಇದೆ’ ಎಂದು ಆ ಜಾಗಕ್ಕೆ ಕರೆದೊಯ್ದಳು. ಸಾಕಷ್ಟು ಕನ್ನಡ ಪುಸ್ತಕಗಳಿದ್ದವು; ಕೆಲವು ಕಾದಂಬರಿಗಳು ಮತ್ತು ಇತರ ಪುಸ್ತಕ ಗಳು. ಕನ್ನಡ ಪುಸ್ತಕಗಳ ಸಾಲಿನ ಪಕ್ಕದಲ್ಲೇ ತೆಲುಗು, ಒರಿಯಾ ಮೊದಲಾದ ಭಾರತೀಯ ಭಾಷೆಗಳ ಪುಸ್ತಕಗಳಿದ್ದವು; ಜತೆಗೆ ಕೊರಿಯನ್ ಮತ್ತಿತರ ವಿದೇಶಿ ಭಾಷೆಯ ಪುಸ್ತಕಗಳೂ ಇದ್ದವು.
ನಾನಾ ರೀತಿಯ, ವಿಷಯಗಳ ಕುರಿತಾದ ಸಾವಿರಾರು ಪುಸ್ತಕಗಳು ಅಲ್ಲಿವೆ; ನಾವು ಅಲ್ಲಿದ್ದಷ್ಟೂ ಕಾಲ ಹಲವು ಪುಸ್ತಕಗಳನ್ನು ಎರವಲು ತಂದು ಓದಿದೆವು; ಮಗಳು ಚಂದಾದಾರಳಾಗಿದ್ದಳು; ಆದ್ದರಿಂದ ಆ ವಾಚನಾಲಯದ ಕನ್ನಡ ಪುಸ್ತಕಗಳು ಮತ್ತು ಇತರ ಪುಸ್ತಕಗಳನ್ನೂ ಓದುವ ಅವಕಾಶ.
ಪುಸ್ತಕಗಳ ಸಾಲಿನ ಪಕ್ಕದ ವಿಶಾಲ ಜಾಗದಲ್ಲಿ ಓದಲು ಅನುಕೂಲವಾಗುವಂತೆ ಕುರ್ಚಿ, ಟೇಬಲ್ ಗಳಿದ್ದವು; ಮಕ್ಕಳು, ವಿದ್ಯಾರ್ಥಿಗಳು, ಹಿರಿಯರು ಅಲ್ಲಲ್ಲಿ ಕುಕಳಿತು ಓದುತ್ತಿದ್ದರು. ಇಲ್ಲಿನ ಶಾಲೆ ಗಳಲ್ಲಿ ವಿದ್ಯಾರ್ಥಿಗಳಿಗೆ ಪುಸ್ತಕಗಳನ್ನು ಓದುವ ಅಸೈನ್‌ಮೆಂಟ್‌ಗೆ ಸಾಕಷ್ಟು ಪ್ರಾಮುಖ್ಯತೆ ಇದೆಯಂತೆ; ಆದ್ದರಿಂದ, ಮಕ್ಕಳಾಗಿದ್ದಾಗಲೇ ಪುಸ್ತಕ ಓದುವ ಹವ್ಯಾಸವು ಬೆಳೆಯುತ್ತದೆ. ಪುಸ್ತಕಗಳ ವಿವರ ಬೇಕಿದ್ದರೆ, ಕಂಪ್ಯೂಟರ್‌ನಲ್ಲಿ ಅದನ್ನು ಟಂಕಿಸಿ, ಯಾವ ಕಪಾಟಿನಲ್ಲಿ ಇದೆ ಎಂದು ತಿಳಿಯಬಹುದು.
ಮೂವತ್ತು ಪ್ರತಿಗಳು
ವಿಶೇಷವೆಂದರೆ, ಬಹುಬೇಡಿಕೆಯ ಪುಸ್ತಕಗಳ ಹಲವು ಪ್ರತಿಗಳು ಅಲ್ಲಿವೆ! ನಾನು ಕುತೂಹಲದಿಂದ ‘ಒನ್ ಹಂಡ್ರಡ್ ಇಯರ್ಸ್ ಆಫ್ ಸಾಲಿಟ್ಯೂಡ್’ ಕಾದಂಬರಿಯನ್ನು ಹುಡುಕಿ, ಅದಿರುವ ಕಪಾಟಿನ ಬಳಿ ಹೋದೆ. ಆ ನೊಬೆಲ್ ಪ್ರಶಸ್ತಿ ವಿಜೇತ ಕಾದಂಬರಿಯ ಸುಮಾರು ಮೂವತ್ತು ಪ್ರತಿಗಳು ಅಲ್ಲಿದ್ದವು!
ಪ್ರಸಿದ್ಧ ಪುಸ್ತಕಗಳ ಹಲವು ಪ್ರತಿಗಳನ್ನು ತಂದಿಟ್ಟು, ಹೆಚ್ಚು ಓದುಗರಿಗೆ ಬೇಗನೆ ತಲುಪಿಸುವ ವ್ಯವಸ್ಥೆ ಅದು. ಗ್ರಂಥಾಲಯದ ಇನ್ನೊಂದು ವಿಶಾಲವಾದ ಭಾಗದಲ್ಲಿ, ವಿಡಿಯೋ ಮತ್ತು ಸಿಡಿ ಲೈಬ್ರರಿ ಇತ್ತು. ಜನಪ್ರಿಯ ಚಲನಚಿತ್ರಗಳನ್ನು ಸಹ ಅಲ್ಲಿ ಎರವಲು ಪಡೆಯಬಹುದಿತ್ತು. ಅಲ್ಲೇ ಇನ್ನೊಂದು ಭಾಗದಲ್ಲಿ ನಾಲ್ಕಾರು ಕ್ಯೂಬಿಕಲ್‌ಗಳು; ಅಲ್ಲಿ ವಿದ್ಯಾರ್ಥಿಗಳು ಅಥವಾ ಸಂಶೋ ಧಕರು ನಾಲ್ಕು ಜನ ಕುಳಿತು, ಗಾಜಿನ ಬಾಗಿಲು ಮುಚ್ಚಿ, ಚರ್ಚೆ ಮತ್ತು ಗ್ರೂಪ್ ಸ್ಟಡಿ ಮಾಡುವ ಅವಕಾಶ.
ಚಂದಾದಾರು ಒಮ್ಮೆಗೇ ಹಲವು ಪುಸ್ತಕಗಳನ್ನು ಪಡೆಯುವ ಅವಕಾಶ; ಪುಸ್ತಕ ಹಿಂದಿರುಗಿಸ ಬೇಕಾದರೆ, ಅಲ್ಲಿರುವ ಕಿಂಡಿಯಲ್ಲಿ ಹಾಕಿದರಾಯಿತು; ಪುಸ್ತಕದ ಹಿಂಭಾಗದಲ್ಲಿ ಅಂಟಿಸಿರುವ ಕೋಡ್ ಮೂಲಕ, ಎರವಲು ಹಿಂದಿರಿಗಿಸುವ ವಿವರ ದಾಖಲಾಗುತ್ತದೆ. ಹೊಸ ಪುಸ್ತಕಗಳ ವಿಭಾಗ, ಮಕ್ಕಳ ಪುಸ್ತಕಗಳ ವಿಭಾಗ, ಮಕ್ಕಳಿಗೆ ಆಟವಾಡುವ ಜಾಗ ಇಂತಹ ಹಲವು ವೈಶಿಷ್ಟ್ಯಗಳು, ಫಾರ್ಮಿಂಗ್‌ಟನ್‌ಹಿಲ್ಸ್ ನ ಆ ವಾಚನಾಲಯದಲ್ಲಿತ್ತು. ಅಲ್ಲಿನ ಪುಸ್ತಕಗಳನ್ನು ನೋಡುತ್ತಾ, ಓದುತ್ತಾ ಕುಳಿತರೆ ಹೊತ್ತು ಹೋಗಿದ್ದೇ ಗೊತ್ತಾಗದು ಎನ್ನಬಹುದು.
ಈ ಗ್ರಂಥಾಲಯದಲ್ಲಿ ಒಂದು ಪುಟ್ಟ ಸಭಾಂಗಣ ಇದೆ; ಅಲ್ಲಿ ಆಗಾಗ ಕಾರ್ಯಕ್ರಮಗಳಿರುತ್ತವೆ. ಆ ಕಾರ್ಯಕ್ರಮಗಳ ವಿವರಗಳನ್ನು ಮುದ್ರಿಸಿ, ಓದುಗರಿಗೆ ನೀಡಲಾಗುತ್ತದೆ. ಶಿಕಾಗೋದ ಗ್ರಂಥಾಲ ಯದ ಸಭಾಂಗಣ ಅಮೆರಿಕದ ಗ್ರಂಥಾಲಯಗಳ ಇನ್ನಷ್ಟು ಸೇವೆಗಳನ್ನು ನೋಡುವ ಅವಕಾಶ ದೊರಕದ್ದು ಶಿಕಾಗೋದಲ್ಲಿ. ಅಲ್ಲಿನ ವಿದ್ಯಾರಣ್ಯ ಕನ್ನಡ ಕೂಟದವರ ವಾರ್ಷಿಕ ಸಾಹಿತ್ಯೋತ್ಸವ ದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸುವ ಅವಕಾಶ ದೊರಕಿತ್ತು. ಆ ನಗರದ ಗ್ರಂಥಾಲಯ ಇನ್ನೂ ಬೃಹತ್ ಮತ್ತು ವೈವಿಧ್ಯಮಯ.
ಪುಸ್ತಕಗಳನ್ನು ಓದುವ ಜಾಗ ಇನ್ನಷ್ಟು ವಿಶಾಲ, ಆಕರ್ಷಕ. ಗ್ರಂಥಾಲಯದ ಮುಂಭಾಗದ ವಿಶಾಲ ಜಾಗದಲ್ಲಿ, ಅಲ್ಲಲ್ಲಿ ಕೆಲವು ಲೋಹದ ಕಲಾಕೃತಿಗಳಿವೆ. ಇನ್ನೊಂದು ವಿಶೇಷವೆಂದರೆ, ಉಚಿತ ಕಾಫಿ ನೀಡುವ ವ್ಯವಸ್ಥೆ ಅಲ್ಲಿದೆ! (ಸೀಮಿತ ಸಂಖ್ಯೆಯ ಓದುಗರಿಗೆ; ಇದು ದಾನಿಗಳು ನೀಡಿದ ಕೊಡುಗೆ ಯಂತೆ). ಹಗಲಿಡೀ ಅಲ್ಲಿ ಕುಳಿತು ಓದುವವರು ಮತ್ತು ಅಧ್ಯಯನ ಮಾಡುವವರು, ವಾಚನಾಲ ಯದ ಒಳಗೆ ಅಳವಡಿಸಿರುವ ಯಂತ್ರದಿಂದ ಕೂಲ್‌ಡ್ರಿಂಕ್ಸ್ ಮತ್ತು ಸ್ನ್ಯಾಕ್ಸ್ ಖರೀದಿಸಬಹುದು.
ವಿದ್ಯಾರಣ್ಯ ಕನ್ನಡಕೂಟದ ಸಾಹಿತ್ಯೋತ್ಸವ ನಡೆದ ಸಭಾಂಗಣವು ಸೆಲ್ಲಾರ್‌ನಲ್ಲಿದೆ. ಆ ಸಭಾಂ ಗಣಕ್ಕೆ ಹೊಂದಿಕೊಂಡಂತೆ ಅಡುಗೆಮನೆಯೂ ಇದೆ! ಬೆಳಗ್ಗೆ ೧೧ ರಿಂದ ಸಂಜೆ ೫ರ ತನಕ ಸಾಹಿತ್ಯೋತ್ಸವ, ಮಧ್ಯಾಹ್ನದ ಊಟ, ಚಹಾ ಸೇವನೆ ಎಲ್ಲವೂ ನಡೆಯಿತು. ಸರಿಯಾಗಿ ೫ ಗಂಟೆಗೆ, ಗ್ರಂಥಾಲಯದ ಸಿಬ್ಬಂದಿ ಬಂದು, ಬಾಗಿಲ ಬಳಿ ನಿಂತರು; ನಮ್ಮ ಕಾರ್ಯಕ್ರಮವೂ ಅಲ್ಲಿಗೆ ಮುಗಿಯಿತು ಎಂದರ್ಥ, ಮುಗಿಯಲೇಬೇಕು. ಅಲ್ಲಿ ಸಮಯಪಾಲನೆಗೆ ಮಹತ್ವ.
‘ಈ ಸುಸಜ್ಜಿತ ಸಭಾಂಗಣವನ್ನು ಸಾಹಿತ್ಯ ಕಾರ್ಯಕ್ರಮ, ವಿಚಾರಗೋಷ್ಠಿ ಮೊದಲಾದವುಗಳಿಗೆ ಪಡೆಯಬಹುದು. ಬಹಳ ಅನುಕೂಲ’ ಎಂದು, ವಿದ್ಯಾರಣ್ಯ ಕನ್ನಡಕೂಟದ ಪದಾಧಿಕಾರಿ, ಅಂಕಣಕಾರ ಶಿಶಿರ್ ಹೆಗಡೆ ವಿವರಿಸಿದರು. ಅದಕ್ಕೆ ಬಾಡಿಗೆ ಎಷ್ಟು? ಎಂದು ಕೇಳಿದೆ. ‘ಬಹುಮಟ್ಟಿಗೆ ಬಾಡಿಗೆ ಇಲ್ಲ, ವಾಪಸ್ ಪಡೆಯಬಹುದಾದ ಅಡ್ವಾನ್ಸ್ ಮಾತ್ರ’ ಎಂದರು ಅವರು.
ಇಂತಹ ಒಂದು ವ್ಯವಸ್ಥೆಯಿಂದಾಗಿ, ಇಂತಹ ಚಟುವಟಿಕೆಗಳನ್ನು ನಡೆಸುವವರಿಗೆ ಹೆಚ್ಚಿನ ಪ್ರೋತ್ಸಾಹ ನೀಡಿದಂತಾಗುತ್ತದೆ ಎಂಬುದಂತೂ ನಿಜ. ಶಿಕಾಗೋದ ಆ ಗ್ರಂಥಾಲಯದಲ್ಲಿ ಒಮ್ಮೆಗೆ ನೂರು ಪುಸ್ತಕಗಳನ್ನು ಸಹ ಎರವಲು ಪಡೆಯಬಹುದಂತೆ! ಇಂತಹ ವ್ಯವಸ್ಥೆಯು ಅಸೈನ್‌ ಮೆಂಟ್‌ಗಾಗಿ ಪುಸ್ತಕ ಓದುವ ಮಕ್ಕಳಿಗೆ, ವಿದ್ಯಾರ್ಥಿಗಳಿಗೆ, ಸಂಶೋಧನಾರ್ಥಿಗಳಿಗೆ ಬಹಳ ಅನುಕೂಲ.
ಓದುವ ಸಂಸ್ಕೃತಿ ಬೆಳೆಸುವಲ್ಲಿ ಗ್ರಂಥಾಲಯಗಳ ಪಾತ್ರ ಹಿರಿದು. ಹಾಗೆಂದೇ, ಜಗತ್ತಿನ ಹೆಚ್ಚಿನ ದೇಶಗಳಲ್ಲಿ ಗ್ರಂಥಾಲಯಗಳಿಗೆ ಬಹಳ ಪ್ರಾಮುಖ್ಯತೆ ನೀಡಲಾಗಿದೆ. ಅಮೆರಿಕದಂತಹ ದೇಶವು ಸಶಕ್ತವಾಗಿ ಬೆಳೆಯಲು, ಅಲ್ಲಿನ ಗ್ರಂಥಾಲಯಗಳ ಕೊಡುಗೆಯೂ ಇದೆ ಎಂದು ಅಲ್ಲಿನ ಗ್ರಂಥಾಲಯಗಳನ್ನು ನೋಡಿದಾಗ ಅನಿಸಿದರೆ, ಅಚ್ಚರಿಯಿಲ್ಲ!
ಉಚಿತ ಡಾಂಗಲ್!
ಓದುಗರು ಆನ್‌ಲೈನ್ ಪುಸ್ತಕಗಳನ್ನು ಓದಲು, ಡೌನ್ ಲೋಡ್ ಮಾಡಿಕೊಳ್ಳಲು, ಫಾರ್ಮಿಂಗ್‌ ಟನ್‌ಹಿಲ್ಸ್ ವಾಚನಾಲಯವು ಉಚಿತವಾಗಿ ಇಂಟರ್ನೆಟ್ ಡಾಟಾ ಮತ್ತು ಡಾಂಗಲ್ ನೀಡುತ್ತದೆ ಎಂದು ತಿಳಿದು ನನಗಾದ ಅಚ್ಚರಿ ಅಷ್ಟಿಷ್ಟಲ್ಲ. ಪ್ರಯಾಣ ಮಾಡುವಾಗಲೂ ನಮ್ಮ ಮೊಬೈಲ್‌ನಲ್ಲಿ ಇಂಟರ್ನೆಟ್ ಡಾಟಾ ಬಳಸಲು ಆ ಡಾಂಗಲ್ ಪಯೋಗಿಸಬಹುದು! ಹದಿನೈದು ದಿನಗಳ ಮಟ್ಟಿಗೆ, ಉಚಿತ ಡಾಟಾ ಒದಗಿಸುವ ಆ ಡಾಂಗಲ್‌ನ್ನು ಎರವಲು ಪಡೆಬಹುದು; ಮತೆ ಬೇಕಿದ್ದರೆ, ಮತ್ತೊಂದು ಅವಧಿಗೂ ಪಡೆಯಬಹುದು. ಆ ವಾಚನಾಲಯದ ದಾನಿಗಳ ಸಹಾಯದಿಂದ, ಅಂತಹ ಡಾಂಗಲ್‌ಗಳನ್ನು ಓದುಗರಿಗೆ ನೀಡುತ್ತಿದ್ದಾರಂತೆ.