Vishweshwar Bhat Column: ದುರಂತಕ್ಕೆ ಸ್ಪಂದಿಸುವ ರೀತಿ
ಅಂದು ಮುಂಜಾನೆ ಸುಮಾರು 8:15ರ ಸಮಯದಲ್ಲಿ, ಕೊಯಿಶಿಕಾವಾದ ಜನನಿಬಿಡ ಪ್ರದೇಶ ದಲ್ಲಿ ಹಳೆಯ ಕಟ್ಟಡವೊಂದರ ತೆರವು ಕಾರ್ಯ ಭರದಿಂದ ಸಾಗಿತ್ತು. ಈ ಕಾರ್ಯಾಚರಣೆಯ ಭಾಗವಾಗಿ, ಒಂದು ದೊಡ್ಡ ಕ್ರೇನ್ ಟ್ರಕ್, ಇನ್ನೊಂದು ಭಾರಿ ಯಂತ್ರವನ್ನು ಎತ್ತಿ ಸ್ಥಳಾಂತರಿಸುವ ಕೆಲಸದಲ್ಲಿ ತೊಡಗಿತ್ತು.
-
ವಿಶ್ವೇಶ್ವರ ಭಟ್‌
Sep 23, 2025 4:00 AM
ಸಂಪಾದಕರ ಸದ್ಯಶೋಧನೆ
ಜಪಾನ್‌ನ ರಾಜಧಾನಿ ಟೋಕಿಯೋ, ದಟ್ಟವಾದ ಜನಸಂಖ್ಯೆ, ಗಗನಚುಂಬಿ ಕಟ್ಟಡಗಳು ಮತ್ತು ನಿರಂತರ ನಿರ್ಮಾಣ ಚಟುವಟಿಕೆಗಳಿಗೆ ಹೆಸರುವಾಸಿ. ಇಲ್ಲಿಯ ನಿರ್ಮಾಣ ಸ್ಥಳ ಗಳಲ್ಲಿ ಸುರಕ್ಷತೆಗೆ ಅತ್ಯಂತ ಹೆಚ್ಚಿನ ಆದ್ಯತೆ ನೀಡಿದರೂ, 2025ರ ಸೆಪ್ಟೆಂಬರ್ 20 ರಂದು, ಈ ಸುರಕ್ಷತಾ ದಾಖಲೆಗೆ ಕಪ್ಪು ಚುಕ್ಕೆಯಿಡುವಂಥ ಘಟನೆಯೊಂದು ನಡೆಯಿತು.
ನಗರದ ಹೃದಯಭಾಗದಲ್ಲಿರುವ ಬುಂಕ್ಯೋ ವಾರ್ಡ್‌ನ ಕೊಯಿಶಿಕಾವಾ ಎಂಬಲ್ಲಿ, ಕಟ್ಟಡವೊಂದರ ತೆರವು ಕಾರ್ಯಾಚರಣೆ ನಡೆಯುತ್ತಿದ್ದ ಸ್ಥಳದಲ್ಲಿ, ಭಾರಿ ಯಂತ್ರವನ್ನು ಎತ್ತುವ ಸಂದರ್ಭದಲ್ಲಿ ಕ್ರೇನ್ ಟ್ರಕ್ ನಿಯಂತ್ರಣ ತಪ್ಪಿ ಪಕ್ಕದ ಕಟ್ಟಡದ ಮೇಲೆ ಉರುಳಿ ಬಿದ್ದಿತು. ಈ ಘಟನೆಯಿಂದ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ ಎಂಬುದು ಸಮಾಧಾನ ಕರ ವಿಷಯವಾದರೂ, ಇದು ನಗರ ನಿರ್ಮಾಣದ ಸುರಕ್ಷತಾ ಕ್ರಮಗಳ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿತು.
ಅಪಘಾತ ನಡೆದಿದ್ದು ಹೇಗೆ? ಅಂದು ಮುಂಜಾನೆ ಸುಮಾರು 8:15ರ ಸಮಯದಲ್ಲಿ, ಕೊಯಿಶಿಕಾವಾದ ಜನನಿಬಿಡ ಪ್ರದೇಶದಲ್ಲಿ ಹಳೆಯ ಕಟ್ಟಡವೊಂದರ ತೆರವು ಕಾರ್ಯ ಭರದಿಂದ ಸಾಗಿತ್ತು. ಈ ಕಾರ್ಯಾಚರಣೆಯ ಭಾಗವಾಗಿ, ಒಂದು ದೊಡ್ಡ ಕ್ರೇನ್ ಟ್ರಕ್, ಇನ್ನೊಂದು ಭಾರಿ ಯಂತ್ರವನ್ನು ಎತ್ತಿ ಸ್ಥಳಾಂತರಿಸುವ ಕೆಲಸದಲ್ಲಿ ತೊಡಗಿತ್ತು.
ಇದನ್ನೂ ಓದಿ: Vishweshwar Bhat Column: ಪಾಸ್‌ ಪೋರ್ಟ್‌ ಪ್ರಬಲ, ಪ್ರಯಾಣ ವಿರಳ
ಕ್ರೇನ್ ಭಾರವಾದ ಯಂತ್ರವನ್ನು ಮೇಲಕ್ಕೆತ್ತುತ್ತಿದ್ದಂತೆಯೇ, ಅದರ ಸಮತೋಲನ ಹಠಾತ್ತನೆ ತಪ್ಪಿತು. ಕ್ಷಣಾರ್ಧದಲ್ಲಿ, ಭಾರಿ ಲೋಹದ ಸದ್ದು ಮತ್ತು ಕಿವಿಗಡಚಿಕ್ಕುವ ಶಬ್ದದೊಂದಿಗೆ, ಕ್ರೇನ್ ಬದಿಗೆ ವಾಲಿಕೊಂಡು, ಪಕ್ಕದಲ್ಲಿದ್ದ ವಸತಿ ಸಮುಚ್ಚಯದ ಮೇಲೆ ಅಪ್ಪಳಿಸಿತು. ಈ ರಭಸಕ್ಕೆ, ಕ್ರೇನ್‌ನ ಬೃಹತ್ ತೋಳು ಕಟ್ಟಡಕ್ಕೆ ಅಪ್ಪಳಿಸಿತಲ್ಲದೇ, ರಸ್ತೆಯ ಮೇಲಿದ್ದ ವಿದ್ಯುತ್ ತಂತಿಗಳನ್ನು ತುಂಡರಿಸಿತು.
ಈ ದೃಶ್ಯವನ್ನು ಕಂಡ ಸ್ಥಳೀಯರು ತೀವ್ರ ಆಘಾತಕ್ಕೊಳಗಾದರು. ‘ಮೊದಲು ಭಾರಿ ಶಬ್ದ ಕೇಳಿಸಿತು, ನಂತರ ದೊಡ್ಡದಾಗಿ ಏನೋ ಬಿದ್ದ ಸದ್ದಾಯಿತು. ನನ್ನದೇ ಅಪಾರ್ಟ್‌ಮೆಂಟ್‌ಗೆ ಹೀಗಾಗಿದೆ ಎಂದು ನಾನು ಊಹಿಸಿರಲಿಲ್ಲ’ ಎಂದು ಹಾನಿಗೊಳಗಾದ ಕಟ್ಟಡದ ನಿವಾಸಿಯೊಬ್ಬರು ತಮ್ಮ ಆತಂಕವನ್ನು ವ್ಯಕ್ತಪಡಿಸಿದರು.
ತಕ್ಷಣವೇ, ಸ್ಥಳೀಯರು ತುರ್ತು ಸೇವೆಗಳಿಗೆ ಕರೆ ಮಾಡಿ ವಿಷಯ ತಿಳಿಸಿದರು. ಅದೃಷ್ಟ ವಶಾತ್, ಈ ಘಟನೆಯಲ್ಲಿ ಯಾರಿಗೂ ಗಾಯಗಳಾಗಲಿಲ್ಲ. ಇದು ಒಂದು ಪವಾಡವೇ ಸರಿ. ಆದರೆ, ಅಪಘಾತದ ಪರಿಣಾಮಗಳು ತೀವ್ರವಾಗಿದ್ದವು. ಕ್ರೇನ್ ವಿದ್ಯುತ್ ತಂತಿಗಳ ಮೇಲೆ ಬಿದ್ದಿದ್ದರಿಂದ, ಕೊಯಿಶಿಕಾವಾ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ವ್ಯಾಪಕ ವಿದ್ಯುತ್ ಕಡಿತ ಸಂಭವಿಸಿತು.
ಆರಂಭದಲ್ಲಿ, ಸುಮಾರು 1300 ಮನೆಗಳು ವಿದ್ಯುತ್ ಸಂಪರ್ಕವನ್ನು ಕಳೆದುಕೊಂಡವು. ಇದರಿಂದಾಗಿ ಜನರ ಮುಂಜಾನೆಯ ದೈನಂದಿನ ಚಟುವಟಿಕೆಗಳಿಗೆ ತೀವ್ರ ಅಡಚಣೆ ಯುಂಟಾಯಿತು.
ಲಿಫ್ಟ್‌ ಗಳು, ಟ್ರಾಫಿಕ್ ಸಿಗ್ನಲ್‌ಗಳು ಮತ್ತು ಮನೆಗಳಲ್ಲಿನ ವಿದ್ಯುತ್ ಉಪಕರಣಗಳು ಸ್ಥಗಿತ ವಾದವು. ವಿಷಯ ತಿಳಿಯುತ್ತಿದ್ದಂತೆ, ಟೋಕಿಯೋ ಇಲೆಕ್ಟ್ರಿಕ್ ಪವರ್ ಕಂಪನಿ ( TEPCO ) ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ, ದುರಸ್ತಿ ಕಾರ್ಯವನ್ನು ತಕ್ಷಣವೇ ಆರಂಭಿಸಿದರು. ಅವರ ತ್ವರಿತ ಕಾರ್ಯಾಚರಣೆಯ ಫಲವಾಗಿ, ಬೆಳಗ್ಗೆ 10:20 ರ ಹೊತ್ತಿಗೆ, ವಿದ್ಯುತ್ ಕಡಿತಕ್ಕೊಳಗಾದ ಮನೆಗಳ ಸಂಖ್ಯೆಯನ್ನು 1300ರಿಂದ ಸುಮಾರು 220ಕ್ಕೆ ಇಳಿಸಲಾಯಿತು.
ಮಧ್ಯಾಹ್ನದ ವೇಳೆಗೆ ಬಹುತೇಕ ಎಲ್ಲ ಮನೆಗಳಿಗೆ ವಿದ್ಯುತ್ ಸಂಪರ್ಕವನ್ನು ಮರು ಸ್ಥಾಪಿಸುವಲ್ಲಿ ಟೆಪ್ಕೋ ಯಶಸ್ವಿಯಾಯಿತು. ಅಪಘಾತದ ಸ್ಥಳಕ್ಕೆ ಪೊಲೀಸರು ಮತ್ತು ಅಗ್ನಿಶಾಮಕ ದಳದ ಸಿಬ್ಬಂದಿ ಕ್ಷಿಪ್ರವಾಗಿ ಆಗಮಿಸಿ, ಪ್ರದೇಶವನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಂಡರು. ಹಾನಿಗೊಳಗಾದ ಕಟ್ಟಡದ ನಿವಾಸಿಗಳ ಸುರಕ್ಷತೆಯನ್ನು ಖಚಿತಪಡಿಸ ಲಾಯಿತು ಮತ್ತು ಕ್ರೇನ್‌ನ ಅವಶೇಷಗಳಿಂದ ಯಾವುದೇ ಹೆಚ್ಚಿನ ಅಪಾಯವಿಲ್ಲ ಎಂದು ಖಾತರಿಪಡಿಸಿಕೊಳ್ಳಲಾಯಿತು.
ಈ ಅಪಘಾತಕ್ಕೆ ಕಾರಣಗಳೇನೇ ಇರಲಿ, ಆ ದುರಂತ ಸಂಭವಿಸಿದ ಮರುಕ್ಷಣದಿಂದ ಅಲ್ಲಿನ ಆಡಳಿತ ವ್ಯವಸ್ಥೆ ತೆಗೆದುಕೊಂಡ ಕ್ರಮಗಳು ಅಚ್ಚರಿ ಮೂಡಿಸುತ್ತವೆ. ಕೇವಲ ಐದು ಗಂಟೆಗಳ ಅವಧಿಯಲ್ಲಿ ಜನಜೀವನವನ್ನು ಮುಂಚಿನ ಸ್ಥಿತಿಗೆ ತರುವುದು ಸಾಮಾನ್ಯ ಸಂಗತಿಯಲ್ಲ. ಈ ಘಟನೆ ಬಿಡಿ, ಭೂಕಂಪದಿಂದ ಜಪಾನ್ ತತ್ತರಿಸಿದಾಗಲೆಲ್ಲ ಅದು ಪುಟಿದೇಳುವ ರೀತಿ ಇಡೀ ಜಗತ್ತಿಗೇ ಮಾದರಿ.
