ಕೃಷಿಕರಿಗೆ ಕೇಂದ್ರದಿಂದ ಗುಡ್‌ನ್ಯೂಸ್‌: ರಾಬಿ ಬೆಳೆಗಳ ಕನಿಷ್ಠ ಬೆಂಬಲ ಬೆಲೆ ಹೆಚ್ಚಳ; ಎಣ್ಣೆ ಬೀಜ ಉತ್ಪಾದನೆಗೆ ಉತ್ತೇಜನ

ನವದೆಹಲಿ, ಸೆ. 30: ಪ್ರಧಾನಿ ನರೇಂದ್ರ ಮೋದಿ (PM Narendra Modi) ಅವರ ಅಧ್ಯಕ್ಷತೆಯಲ್ಲಿ ನಡೆದ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿ (ಸಿಸಿಇಎ) ಬುಧವಾರ 2027-28ರ ಮಾರುಕಟ್ಟೆ ಋತುವಿಗಾಗಿ ರಾಬಿ ಬೆಳೆಗಳಿಗೆ (Rabi crop) (ಬೇಸಗೆಯ ಆರಂಭದಲ್ಲಿ ಕೊಯ್ಲು ಮಾಡುವ ಬೆಳೆಗಳು) ಕನಿಷ್ಠ ಬೆಂಬಲ ಬೆಲೆಗಳನ್ನು (MSP) ಹೆಚ್ಚಿಸಲು ಅನುಮೋದನೆ ನೀಡಿದೆ. ಕುಸುಬೆಗೆ ಅತೀ ಹೆಚ್ಚು ಕ್ವಿಂಟಾಲ್‌ಗೆ 675 ರೂ. ಗರಿಷ್ಠ ಬೆಂಬಲ ಬೆಲೆ ಏರಿಕೆ ಘೋಷಿಸಲಾಗಿದೆ.

ರಾಪ್ಸೀಡ್ ಮತ್ತು ಸಾಸಿವೆಗೆ ಕ್ವಿಂಟಾಲ್‌ಗೆ 413 ರೂ. ಹೆಚ್ಚಿಸಲಾಗಿದೆ. ಅಧಿಕೃತ ಹೇಳಿಕೆಯ ಪ್ರಕಾರ, ದ್ವಿದಳ ಧಾನ್ಯ (ಮಸೂರ್), ಬಾರ್ಲಿ, ಕಡಲೆ ಮತ್ತು ಗೋಧಿಗೆ ಕ್ರಮವಾಗಿ ಕ್ವಿಂಟಾಲ್‌ಗೆ 390 ರೂ., 136 ರೂ., 83 ರೂ. ಮತ್ತು 25 ರೂ. ಅಧಿಕವಾಗಿದೆ.

2027-28ರ ಮಾರುಕಟ್ಟೆ ಋತುವಿನ ರಾಬಿ ಬೆಳೆಗಳಿಗೆ ರೈತರು ತಮ್ಮ ಉತ್ಪನ್ನಗಳಿಗೆ ತಕ್ಕಮಟ್ಟಿನ ಲಾಭದಾಯಕ ಬೆಲೆ ಪಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಸರ್ಕಾರ ಕನಿಷ್ಠ ಬೆಂಬಲ ಬೆಲೆಯನ್ನು ಹೆಚ್ಚಿಸಿದೆ. 2027-28ರ ಮಾರುಕಟ್ಟೆ ಋತುವಿನಲ್ಲಿ ಕಡ್ಡಾಯ ರಾಬಿ ಬೆಳೆಗಳಿಗೆ ಕನಿಷ್ಠ ಬೆಂಬಲ ಬೆಲೆ (MSP) ಹೆಚ್ಚಳವು 2018-19ರ ಕೇಂದ್ರ ಬಜೆಟ್‌ನಲ್ಲಿ ಅಖಿಲ ಭಾರತ ಸರಾಸರಿ ಉತ್ಪಾದನಾ ವೆಚ್ಚದ ಕನಿಷ್ಠ 1.5 ಪಟ್ಟು ಮಟ್ಟದಲ್ಲಿ ಕನಿಷ್ಠ ಬೆಂಬಲ ಬೆಲೆಯನ್ನು ನಿಗದಿಪಡಿಸುವ ಘೋಷಣೆಗೆ ಅನುಗುಣವಾಗಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ರಾಜಕೀಯ ಮರೆತು ಭಜನೆಯಲ್ಲಿ ತೊಡಗಿಸಿಕೊಂಡ ಪ್ರಧಾನಿ ನರೇಂದ್ರ ಮೋದಿ

ಇತ್ತೀಚಿನ ವರ್ಷಗಳಲ್ಲಿ, ಸರ್ಕಾರವು ಧಾನ್ಯಗಳನ್ನು ಹೊರತುಪಡಿಸಿ, ದ್ವಿದಳ ಧಾನ್ಯಗಳು ಮತ್ತು ಎಣ್ಣೆಬೀಜಗಳಂತಹ ಬೆಳೆಗಳಿಗೆ ಹೆಚ್ಚಿನ ಎಂಎಸ್‌ಪಿ ನೀಡುವ ಮೂಲಕ ಇತರ ಬೆಳೆಗಳ ಕೃಷಿಯನ್ನು ಉತ್ತೇಜಿಸುತ್ತಿದೆ. 2004-05ರಿಂದ 2013-14ರವರೆಗಿನ 2,254 ಎಲ್ಎಂಟಿಗೆ ಹೋಲಿಸಿದರೆ 2014-15ರಿಂದ 2025-26ರವರೆಗಿನ ಗೋಧಿ ಸಂಗ್ರಹಣೆಯು 3,715 ಎಲ್ಎಂಟಿಗೆ ಹೆಚ್ಚಾಗಿದೆ.

2014-15ರಿಂದ 2025-26ರ ಅವಧಿಯಲ್ಲಿ ಆರು ರಾಬಿ ಬೆಳೆಗಳ ಖರೀದಿಯು 3,921 LMTಗೆ ಹೆಚ್ಚಾಗಿದೆ. 2004-05ರಿಂದ 2013-14ರ ಅವಧಿಯಲ್ಲಿ 2302 ಎಲ್ಎಂಟಿಗಳಷ್ಟಿತ್ತು. 2014-15ರಿಂದ 2025-26ರ ಅವಧಿಯಲ್ಲಿ ಗೋಧಿ ಬೆಳೆಯುವ ರೈತರಿಗೆ ಪಾವತಿಸಲಾದ ಕನಿಷ್ಠ ಬೆಂಬಲ ಬೆಲೆ ಮೊತ್ತವು 2004-05ರಿಂದ 2013-14 ರ ಅವಧಿಯಲ್ಲಿ 2.56 ಲಕ್ಷ ಕೋಟಿ ರೂ. ಗಳಿಗೆ ಹೋಲಿಸಿದರೆ 7.31 ಲಕ್ಷ ಕೋಟಿ ರೂ.ಗಳಿಗೆ ಹೆಚ್ಚಾಗಿದೆ.

ಇದಲ್ಲದೆ, 2014-15ರಿಂದ 2025-26ರ ಅವಧಿಯಲ್ಲಿ ಆರು ರಾಬಿ ಬೆಳೆಗಳನ್ನು ಬೆಳೆಯುವ ರೈತರಿಗೆ ಪಾವತಿಸಿದ ಎಂಎಸ್‌ಪಿ ಮೊತ್ತವು 2004-05ರಿಂದ 2013-14 ರ ಅವಧಿಯಲ್ಲಿ 2.65 ಲಕ್ಷ ಕೋಟಿ ರೂ.ಗಳಿಗೆ ಹೋಲಿಸಿದರೆ 8.36 ಲಕ್ಷ ಕೋಟಿ ರೂ.ಗೆ ಹೆಚ್ಚಾಗಿದೆ.