ನವದೆಹಲಿ, ಸೆ. 5: ಮೆಟಾ ಮಾಲೀಕತ್ವದ ವ್ಯಾಟ್ಸ್ಆ್ಯಪ್ (Meta-owned WhatsApp) ಭಾರತದಲ್ಲಿ ಬಿಲ್ ಪಾವತಿ ಸೇವೆಯನ್ನು (WhatsApp Bill Payments) ಆರಂಭಿಸಿದೆ. ಇದರಿಂದ ಬಳಕೆದಾರರು ಯಾವುದೇ ಬೇರೆ ಆ್ಯಪ್ಗೆ ತೆರಳದೆ ವ್ಯಾಟ್ಸ್ಆ್ಯಪ್ನಲ್ಲೇ ತಮ್ಮ ದೈನಂದಿನ ಮನೆ ಹಾಗೂ ಅಗತ್ಯ ಸೇವೆಗಳ ಬಿಲ್ಗಳನ್ನು (Utility Bills) ಹುಡುಕಿ, ನಿರ್ವಹಿಸಿ ಮತ್ತು ಪಾವತಿಸಬಹುದಾಗಿದೆ. ಭಾರತ್ ಕನೆಕ್ಟ್ (ಬಿಬಿಪಿಎಸ್) ಜಾಲತಾಣದ ಬೆಂಬಲದೊಂದಿಗೆ ಈ ಸೇವೆಯಲ್ಲಿ 30 ವಿಭಾಗಗಳ 22,722 ಬಿಲ್ದಾರರು ಲಭ್ಯವಿರಲಿದ್ದಾರೆ. ವಿದ್ಯುತ್, ಗ್ಯಾಸ್, ನೀರು, ಫಾಸ್ಟ್ಟ್ಯಾಗ್, ವಿಮೆ, ಕ್ರೆಡಿಟ್ ಕಾರ್ಡ್ ಹಾಗೂ ಸಾಲದ ಮರುಪಾವತಿ ಸೇರಿ ಹಲವು ಬಿಲ್ಗಳನ್ನು ವ್ಯಾಟ್ಸ್ಆ್ಯಪ್ ಮೂಲಕ ಪಾವತಿಸಬಹುದು ಎಂದು ಕಂಪನಿ ತಿಳಿಸಿದೆ.
ವ್ಯಾಟ್ಸ್ಆ್ಯಪ್ ಈ ಬಿಲ್ ಪಾವತಿ ಸೇವೆಯನ್ನು ದೇಶಾದ್ಯಂತ ಹಂತ ಹಂತವಾಗಿ ಪರಿಚಯಿಸುತ್ತಿದೆ. ಮುಂದಿನ ಕೆಲವು ವಾರಗಳಲ್ಲಿ ಎಲ್ಲ ಆಂಡ್ರಾಯ್ಡ್ ಮತ್ತು ಐಒಎಸ್ ಬಳಕೆದಾರರಿಗೆ ಈ ಸೌಲಭ್ಯ ಲಭ್ಯವಾಗಲಿದೆ.
ಭಾರತದಲ್ಲಿ ಡಿಜಿಟಲ್ ಪಾವತಿ ವ್ಯವಸ್ಥೆ ಕೆಲವು ವರ್ಷಗಳಲ್ಲಿ ವೇಗವಾಗಿ ವಿಸ್ತರಿಸಿದ್ದು, ಯುಪಿಐ ಬಳಕೆಯ ಹೆಚ್ಚಳ, ಸ್ಮಾರ್ಟ್ಫೋನ್ಗಳ ವ್ಯಾಪಕ ಬಳಕೆ ಹಾಗೂ ದೈನಂದಿನ ವಹಿವಾಟುಗಳು ಆನ್ಲೈನ್ಗೆ ಸ್ಥಳಾಂತರವಾಗಿರುವುದು ಇದಕ್ಕೆ ಪ್ರಮುಖ ಕಾರಣ. ವ್ಯಾಟ್ಸ್ಆ್ಯಪ್ ಪ್ರಕಾರ, ಬಿಲ್ ಪಾವತಿ ಸೇವೆಯ ಮೂಲಕ ಬಳಕೆದಾರರು ಮೆಸೇಜ್ ಕಳುಹಿಸುವಷ್ಟೇ ಸುಲಭವಾಗಿ ತಮ್ಮ ಅಗತ್ಯ ಸೇವೆಗಳ ಬಿಲ್ಗಳನ್ನು ಪಾವತಿಸಬಹುದು. ವ್ಯಾಟ್ಸ್ಆ್ಯಪ್ನ ಹೋಮ್ ಸ್ಕ್ರೀನ್ನ ಮೇಲ್ಭಾಗದಲ್ಲಿರುವ ಆಯ್ಕೆಯನ್ನು ಟ್ಯಾಪ್ ಮಾಡುವ ಮೂಲಕ ಬಿಲ್ ಪಾವತಿ ವಿಭಾಗವನ್ನು ತೆರೆಯಬಹುದು.
ಬಳಕೆದಾರರು ಹಿಂದಿನ ಬಿಲ್ ಪಾವತಿಗಳ ವಿವರಗಳನ್ನು ನೋಡಬಹುದು, ಮುಂಬರುವ ಬಿಲ್ಗಳನ್ನು ಪರಿಶೀಲಿಸಬಹುದು ಹಾಗೂ ಒಂದೇ ಸೇವಾ ಪೂರೈಕೆದಾರರ ಅಡಿಯಲ್ಲಿ ಹಲವು ಖಾತೆಗಳನ್ನು ನಿರ್ವಹಿಸಬಹುದು. ತಮ್ಮ ಆಯ್ಕೆಯ ಪಾವತಿ ವಿಧಾನದ ಮೂಲಕ ಬಿಲ್ ಪಾವತಿಸಲು ಅವಕಾಶವಿದೆ.
ಮೆಟಾ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಅರುಣ್ ಶ್ರೀನಿವಾಸ್, ''ಕೋಟ್ಯಂತರ ಭಾರತೀಯರಿಗೆ ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಸಂಪರ್ಕದಲ್ಲಿರಲು, ವ್ಯವಹಾರಗಳೊಂದಿಗೆ ಸಂವಹನ ನಡೆಸಲು, ನಾಗರಿಕ ಸೇವೆಗಳನ್ನು ಪಡೆಯಲು ಹಾಗೂ ಮೆಟ್ರೋ ಟಿಕೆಟ್ನಿಂದ ವಿಮೆಯವರೆಗೆ ವಿವಿಧ ಸೇವೆಗಳನ್ನು ಪಡೆಯಲು ವ್ಯಾಟ್ಸ್ಆ್ಯಪ್ ಸುಲಭ ವೇದಿಕೆ'' ಎಂದು ಹೇಳಿದ್ದಾರೆ.
ದೆಹಲಿ ಪ್ರತಿಭಟನಾಕಾರರ ಮೇಲೆ ಪೊಲೀಸರಿಂದ ಹಲ್ಲೆ; ನ್ಯಾಯಮೂರ್ತಿ ಉಜ್ಜಲ್ ಭುಯಾನ್ ಕಳವಳ
“ಬಿಲ್ ಪಾವತಿಯ ಮೂಲಕ ಪ್ರತಿಯೊಂದು ಮನೆಯಲ್ಲೂ ನಡೆಯುವ ಸಾಮಾನ್ಯ ಕೆಲಸವನ್ನೂ ಇದೇ ರೀತಿಯ ಸರಳ ಅನುಭವವನ್ನಾಗಿ ಮಾಡಲು ನಾವು ಬಯಸಿದ್ದೇವೆ. ವಿವಿಧ ಆ್ಯಪ್ಗಳನ್ನು ಬಳಸುವ ಅಥವಾ ಬಿಲ್ಗಳ ಕೊನೆಯ ದಿನಾಂಕಗಳನ್ನು ಪ್ರತ್ಯೇಕವಾಗಿ ಗಮನಿಸುವ ಅಗತ್ಯವಿಲ್ಲ,” ಎಂದು ಅವರು ತಿಳಿಸಿದ್ದಾರೆ.
ವ್ಯಾಟ್ಸ್ಆ್ಯಪ್ನ ಬಿಲ್ ಪಾವತಿ ಸೇವೆಯಲ್ಲಿ ಮನೆಯ ಬಿಲ್ಗಳ ಸಾರಾಂಶ ಸೌಲಭ್ಯವೂ ಇರಲಿದೆ. ಬಳಕೆದಾರರು ಹಿಂದೆ ವ್ಯಾಟ್ಸ್ಆ್ಯಪ್ ಮೂಲಕ ಪಾವತಿಸಿರುವ ಬಿಲ್ದಾರರ ವಿವರಗಳು ಪಾವತಿ ವಿಭಾಗದಲ್ಲಿ ಕಾಣಿಸಿಕೊಳ್ಳಲಿದ್ದು, ಮುಂದಿನ ಬಾರಿ ಒಂದೇ ಟ್ಯಾಪ್ನಲ್ಲಿ ಪಾವತಿಸಲು ಸಾಧ್ಯವಾಗಲಿದೆ. ಅಲ್ಲದೆ, ಒಂದೇ ಬಿಲ್ದಾರರ ಅಡಿಯಲ್ಲಿ ಹಲವು ಖಾತೆಗಳನ್ನು ನಿರ್ವಹಿಸುವ ಸೌಲಭ್ಯವಿದ್ದು, ಮನೆ, ಕಚೇರಿ ಹಾಗೂ ಕುಟುಂಬದ ಸದಸ್ಯರ ಬಿಲ್ಗಳನ್ನು ಒಂದೇ ಸ್ಥಳದಲ್ಲಿ ನಿರ್ವಹಿಸಬಹುದು. ಹೆಚ್ಚಾಗಿ ಬಳಸುವ ಬಿಲ್ ವಿಭಾಗಗಳು ಸ್ವಯಂಚಾಲಿತವಾಗಿ ಕಾಣಿಸಿಕೊಳ್ಳಲಿದ್ದು, ‘ಎಲ್ಲವನ್ನೂ ನೋಡಿ’ ಆಯ್ಕೆಯ ಮೂಲಕ 20ಕ್ಕೂ ಹೆಚ್ಚು ವಿಭಾಗಗಳ ಸಂಪೂರ್ಣ ಪಟ್ಟಿಯನ್ನು ವೀಕ್ಷಿಸಬಹುದು.
ಈಗಾಗಲೇ ಜನರು ವ್ಯಾಟ್ಸ್ಆ್ಯಪ್ ಮೂಲಕ ಮೊಬೈಲ್ ರೀಚಾರ್ಜ್, ವಿವಿಧ ನಗರಗಳ ಮೆಟ್ರೋ ಟಿಕೆಟ್ ಬುಕ್ಕಿಂಗ್ ಹಾಗೂ ಸರ್ಕಾರಿ ಚಾಟ್ಬಾಟ್ಗಳ ಮೂಲಕ ನಾಗರಿಕ ಸೇವೆಗಳನ್ನು ಪಡೆಯುತ್ತಿದ್ದಾರೆ. ಇದೀಗ ಬಿಲ್ ಪಾವತಿ ಸೇವೆಯನ್ನೂ ಸೇರಿಸುವ ಮೂಲಕ ದೈನಂದಿನ ಅಗತ್ಯದ ಮತ್ತೊಂದು ಪ್ರಮುಖ ಸೇವೆಯನ್ನು ಒಂದೇ ವೇದಿಕೆಯಲ್ಲಿ ಒದಗಿಸಲು ವ್ಯಾಟ್ಸ್ಆ್ಯಪ್ ಮುಂದಾಗಿದೆ.