ಬೆಂಗಳೂರು: ಕ್ರೆಡಿಟ್ ಕಾರ್ಡ್ (credit card)ಗಳಿಂದ ಸಾಕಷ್ಟು ಲಾಭವಿದೆ. ಆದರೆ ಅದನ್ನು ಸರಿಯಾಗಿ ಬಳಸಿಕೊಳ್ಳುವುದು ಮುಖ್ಯ. ಇದಕ್ಕಾಗಿ ನಾವು ಕ್ರೆಡಿಟ್ ಕಾರ್ಡ್ (Credit card management) ಬಳಕೆಯ ಲಾಭ ಮತ್ತು ನಷ್ಟಗಳ ಬಗ್ಗೆ ಸರಿಯಾಗಿ ತಿಳಿದುಕೊಂಡಿರಬೇಕು ಎಂದು ಹಣಕಾಸು ತಜ್ಞ ಪ್ರಕಾಶ್ ಆರ್.ಎಸ್. ಹೇಳಿದ್ದಾರೆ. 'ವಿಶ್ವವಾಣಿ ಮನಿ' (Vishwavani money) ಯೂಟ್ಯೂಬ್‌ ಚಾನಲ್‌ನಲ್ಲಿ ಕೇಶವ ಪ್ರಸಾದ್ ಅವರೊಂದಿಗಿನ ಸಂದರ್ಶನದಲ್ಲಿ ಮಾತನಾಡಿದ ಅವರು, ಕ್ರೆಡಿಟ್ ಕಾರ್ಡ್ ಎಂದರೆ ಈಗ ತಗೊಳ್ಳಿ ಮತ್ತೆ ಪಾವತಿಸಿ, ಅದೇ ಡೆಬಿಟ್ ಕಾರ್ಡ್ ಈಗ ತಗೊಳ್ಳಿ, ಈಗಲೇ ಪಾವತಿಸಿ ಎಂಬುದಾಗಿದೆ. ಇದಕ್ಕಾಗಿ ಇರುವ ನಿಯಮಗಳನ್ನು ಅರಿತು ಬಳಸಬೇಕು ಎಂದು ಹೇಳಿದರು.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ನಿವೃತ್ತ ಅಧಿಕಾರಿ , ಸೆಬಿಯ ನೋಂದಾಯಿತ ಸದಸ್ಯರಾಗಿರುವ ಪ್ರಕಾಶ್ ತಮ್ಮ ಮಾತನ್ನು ಮುಂದುವರಿಸಿ, ಕ್ರೆಡಿಟ್ ಕಾರ್ಡ್ ಅನ್ನು ಪ್ಲಾಸ್ಟಿಕ್ ಮನಿ ಎಂದು ಕೂಡ ಕರೆಯಲಾಗುತ್ತದೆ. ಇದರ ಬಹುದೊಡ್ಡ ಪ್ರಯೋಜನವೆಂದರೆ ದೊಡ್ಡ ಮೊತ್ತದ ಹಣವನ್ನು ನಗದು ರೂಪದಲ್ಲಿ ಎಲ್ಲಿಗೂ ತೆಗೆದುಕೊಂಡು ಹೋಗಬೇಕಿಲ್ಲ ಎಂದರು.
ಕ್ರೆಡಿಟ್ ಕಾರ್ಡ್ ಕುರಿತಾದ ಮಾಹಿತಿ ಇಲ್ಲಿದೆ:
ಸಾಮಾನ್ಯವಾಗಿ ಕ್ರೆಡಿಟ್ ಕಾರ್ಡ್ ಬಳಕೆದಾರರಿಗೆ ಬಡ್ಡಿ ರಹಿತವಾಗಿ 40ರಿಂದ 50 ದಿನಗಳ ಅವಧಿಯ ಸಾಲ ಸೌಲಭ್ಯ ನೀಡಲಾಗುತ್ತದೆ. ಆದರೆ ಇದನ್ನು ಜವಾಬ್ದಾರಿಯುತವಾಗಿ ಬಳಸುವುದು ಮುಖ್ಯ. ಇದರಿಂದ ಮಧ್ಯಮ ವರ್ಗದ ಜನರಿಗೆ ಸಾಕಷ್ಟು ಅನುಕೂಲವಾಗಿದೆ ಎಂದು ಅವರು ತಿಳಿಸಿದರು.
ಕ್ರೆಡಿಟ್ ಕಾರ್ಡ್ ಬಳಕೆದಾರರಿಗೆ ಸಿಗುವ ಮತ್ತೊಂದು ವಿಶಿಷ್ಟ ಪ್ರಯೋಜನವೆಂದರೆ ಉಚಿತ ವಿಮೆ. ಕ್ರೆಡಿಟ್ ಕಾರ್ಡ್ ಬಳಸಿ ಖರೀದಿ ಮಾಡುವ ವಸ್ತುಗಳಿಗೆ ಉಚಿತ ವಿಮೆ ಸೌಲಭ್ಯಗಳಿರುತ್ತದೆ. ಇದು ಗ್ರಾಹಕರಿಗೆ ಲಾಭದಾಯಕವಾಗಿದೆ. ಇನ್ನು ಕ್ರೆಡಿಟ್ ಕಾರ್ಡ್ ಬಳಕೆ ಮಾಡುವವರಿಗೆ ಆಡ್ ಆನ್ ಕಾರ್ಡ್ ಕೂಡ ಸಿಗುತ್ತದೆ. ಇದರಿಂದ ಕುಟುಂಬ ಸದಸ್ಯರು ಪ್ರತ್ಯೇಕವಾಗಿ ಬೇರೆಬೇರೆ ಕಾರ್ಡ್ ಗಳನ್ನು ಬಳಸಬಹುದಾಗಿದೆ ಎಂದರು.
ಭಾರತದ ಎರಡನೇ ತ್ರೈಮಾಸಿಕ ಜಿಡಿಪಿ ಬೆಳವಣಿಗೆ 8.2% ಕ್ಕೆ ಏರಿಕೆ!
ಇನ್ನು ಮೆಂಬರ್ ಶಿಪ್ ಕಾರ್ಡ್, ರಿವಾರ್ಡ್ ಪಾಯಿಂಟ್‌ಗಳು ಕೂಡ ಕ್ರೆಡಿಟ್ ಕಾರ್ಡ್ ಬಳಕೆದಾರರಿಗೆ ದೊರೆತ ಮತ್ತೊಂದು ಪ್ಲಸ್‌ ಪಾಯಿಂಟ್. ಸಾಮಾನ್ಯವಾಗಿ ಕ್ರೆಡಿಟ್ ಕಾರ್ಡ್ ಅನ್ನು ಗ್ರಾಹಕ ಕ್ರೆಡಿಟ್ ಹಿಸ್ಟರಿ ನೋಡಿ ಕೊಡಲಾಗುತ್ತದೆ. ಇದನ್ನು ಪಡೆದ ಮೇಲೂ ಉತ್ತಮವಾಗಿ ಕ್ರೆಡಿಟ್ ಹಿಸ್ಟರಿ ಇಟ್ಟುಕೊಳ್ಳಬೇಕು. ಹಾಗಿದ್ದಾಗ ಮಾತ್ರ ಇದು ಪ್ರಯೋಜನಕಾರಿ. ಇದು ಸಾಮಾನ್ಯವಾಗಿ ಸಾಲ ಬಳಕೆ ಮತ್ತು ಸಾಲ ಮರುಪಾವತಿಯ ಸಂಪೂರ್ಣ ದಾಖಲೆಯನ್ನು ಒದಗಿಸುತ್ತದೆ ಎಂದು ಅವರು ತಿಳಿಸಿದರು.
ಕ್ರೆಡಿಟ್ ಕಾರ್ಡ್ ಪಡೆದ ಮೇಲೆ ಅದರಲ್ಲಿ ಪಡೆಯುವ ಸಾಲವನ್ನು ಪ್ರಾಮಾಣಿಕವಾಗಿ ಮರುಪಾವತಿ ಮಾಡಬೇಕು. ಇದರಿಂದ ನಮ್ಮ ಸಿಬಿಲ್ ಸ್ಕೋರ್ ಚೆನ್ನಾಗಿರುತ್ತದೆ. ಕ್ರೆಡಿಟ್ ಕಾರ್ಡ್ ಅನ್ನು ದಕ್ಷವಾಗಿ ಬಳಸುವುದನ್ನು ಕಲಿಯಬೇಕು. ಕ್ರೆಡಿಟ್ ಕಾರ್ಡ್‌ನಿಂದಾಗಿ ನಾವು ಎಷ್ಟು ಸಾಲ ಪಡೆಯಬೇಕು, ಎಷ್ಟು ಹಣ ಖರ್ಚು ಮಾಡಬೇಕು, ಎಷ್ಟು ಮರು ಪಾವತಿ ಮಾಡಬೇಕು ಎನ್ನುವ ಸ್ಪಷ್ಟ ಚಿತ್ರಣ ಸಿಗುತ್ತದೆ. ಇದು ನಮಗೆ ಹಣಕಾಸು ನಿರ್ವಹಣೆಯ ಶಿಸ್ತನ್ನು ಕಲಿಸುತ್ತದೆ ಎಂದು ಹೇಳಿದರು.
ಕ್ರೆಡಿಟ್ ಕಾರ್ಡ್ ನಮಗೆ ತುರ್ತು ಸಂದರ್ಭದಲ್ಲಿ ಸಹಾಯಕ್ಕೆ ಬರುತ್ತದೆ. ಇದು ಹೆಚ್ಚು ಅನುಕೂಲವನ್ನು ಒದಗಿಸುತ್ತದೆ. ಇದರಲ್ಲಿ ಅನಿವಾರ್ಯವಲ್ಲದ ಹೊರತು ನಗದು ಪಡೆಯದೇ ಇರುವುದು ಉತ್ತಮ. ನಗದು ಪಡೆಯುವುದರಿಂದ ಮರುಪಾವತಿ ವೇಳೆ ಬಡ್ಡಿ ಹೆಚ್ಚಾಗುವುದು ಎಂದು ಅವರು ತಿಳಿಸಿದರು.
ಕ್ರೆಡಿಟ್ ಕಾರ್ಡ್ ಬಡ್ಡಿ ರಹಿತ ಸಾಲವನ್ನು ಒಡಗಿಸುವುದರಿಂದ ಇದನ್ನು ಜವಾಬ್ದಾರಿಯುತವಾಗಿ ಬಳಸಿಕೊಂಡರೆ ಸಾಕಷ್ಟು ಲಾಭದಾಯಕವಾಗಿದೆ. ನಿರ್ದಿಷ್ಟ ದಿನದೊಳಗೆ ಪಾವತಿಸಬೇಕಾಗುತ್ತದೆ. ಒಂದು ವೇಳೆ ಪಾವತಿಸದೇ ಇದ್ದರೆ ಬಹುದೊಡ್ಡ ಹೊರೆಯಾಗಿ ಪರಿಣಮಿಸುತ್ತದೆ. ಇದರಲ್ಲಿ ಬಡ್ಡಿಯನ್ನು ಮಾಸಿಕವಾಗಿ ವಿಧಿಸಲಾಗುತ್ತದೆ. ತಿಂಗಳಿಗೆ ಕನಿಷ್ಠ ಶೇ. 2-3ರಷ್ಟು ಬಡ್ಡಿ ಇದ್ದರೂ ಇದು ವಾರ್ಷಿಕವಾಗಿ ಶೇ. 36 ಆಗುವುದು ಎನ್ನುವ ನೆನಪಿರಲಿ. ಇದನ್ನು ಹೊರುವುದು ಮಧ್ಯಮ ವರ್ಗದವರಿಗೆ ತುಂಬಾ ಕಷ್ಟ ಎನ್ನುವುದು ಪ್ರಕಾಶ್ ಮಾತು.
ಎರಡು ಮೂರು ಕಾರ್ಡ್ ಬಳಸುವುದು ಲಾಭದಾಯಕವೇನಲ್ಲ. ಇದರಿಂದ ಹೆಚ್ಚಿನ ಬಡ್ಡಿ ಪಾವತಿ ಮಾಡಬೇಕಾಗುತ್ತದೆ. ಇಲ್ಲಿ ಸಾಲ ಒಂದು ಕಂಪನಿಯಿಂದ ಇನ್ನೊಂದು ಕಂಪನಿಗೆ ವರ್ಗಾವಣೆಯಾಗುತ್ತದೆಯೇ ಹೊರತು ನಮ್ಮ ಜವಾಬ್ದಾರಿ ಕಡಿಮೆ ಆಗುವುದಿಲ್ಲ. ಅಲ್ಲದೇ ಆಮಿಷಕ್ಕೆ ಒಳಗಾಗಿ ಹೆಚ್ಚಿನ ಕಾರ್ಡ್ ಬಳಸಬೇಡಿ ಎಂದಿರುವ ಪ್ರಕಾಶ್, ಸಾಮಾನ್ಯವಾಗಿ ಒಂದು ಕಾರ್ಡ್ ಕೊಡುವಾಗಲೇ ಅದು ನಮ್ಮ ಸಾಮರ್ಥ್ಯದ ಆಧಾರದಲ್ಲಿ ನೀಡಲಾಗಿರುತ್ತದೆ. ಒಂದೇ ಕಾರ್ಡ್ ಬಳಸುವುದು ಒಳ್ಳೆಯದು ಎಂದು ಅವರು ಹೇಳಿದರು.
ಶೇರು ಮಾರುಕಟ್ಟೆಯಲ್ಲಿ ಎಐ ತಂತ್ರಜ್ಞಾನ ಪ್ರಭಾವ ಬೀರುತ್ತಾ? ವಿಶೇಷ ಸಂದರ್ಶನ ಇಲ್ಲಿದೆ
ಕ್ರೆಡಿಟ್ ಕಾರ್ಡ್‌ಗಳಿಂದ ರಿವಾರ್ಡ್ ಪಾಯಿಂಟ್ ಮಾತ್ರವಲ್ಲ ವಿಮಾನ ಪ್ರಯಾಣದ ವೇಳೆ ಸಿಗುವ ಹಲವು ವಿಶೇಷ ಸೌಲಭ್ಯಗಳನ್ನು ಕೇವಲ 2 ರೂ.ಯಲ್ಲಿ ಪಡೆಯಬಹುದಾಗಿದೆ. ಇದು ಸಾಕಷ್ಟು ಮಂದಿಗೆ ಪ್ರಯೋಜನಕಾರಿ. ಇನ್ನು ಬಳಕೆದಾರರಿಗೆ ವಾರ್ಷಿಕವಾಗಿ ನಿರ್ವಹಣೆ ಶುಲ್ಕವಾಗಿ 500ರಿಂದ 1,000 ರೂ. ಶುಲ್ಕ ವಿಧಿಸಲಾಗುತ್ತದೆ. ಇದರ ಬಗ್ಗೆ ಕೂಡ ತಿಳಿದಿರಲಿ. ಕ್ರೆಡಿಟ್ ಕಾರ್ಡ್ ಮೂಲಕ ಪಡೆದಿರುವ ಸಾಲವನ್ನು ಸಮಯಕ್ಕೆ ಸರಿಯಾಗಿ ಪಾವತಿಸುವುದು ಮುಖ್ಯ. ಇಲ್ಲವಾದರೆ ಅದರ ವಸೂಲಿಗೆ ಕಂಪನಿಗಳು ನಿರ್ದಿಷ್ಟ ಕ್ರಮಗಳನ್ನು ಕೈಗೊಳ್ಳುತ್ತದೆ. ಇದು ಗ್ರಾಹಕರನ್ನು ತೊಂದರೆಗೀಡು ಮಾಡುವುದು ಎಂದು ಅವರು ಹೇಳಿದ್ದಾರೆ.