ವಿಶಾಖಪಟ್ಟಣ, ಫೆ.9: ಐಷಾರಾಮಿ ಜೀವನಶೈಲಿಗೆ ಹೆಚ್ಚಿನ ದುಡ್ಡು ಬೇಕಿದ್ದುದರಿಂದ ಟೆಕ್ಕಿಯೊಬ್ಬ ಕಳ್ಳತನಕ್ಕಿಳಿದ ಘಟನೆ ಆಂಧ್ರಪ್ರದೇಶದಲ್ಲಿ ನಡೆದಿದೆ. ವಿಶಾಖಪಟ್ಟಣ ಮತ್ತು ಆಂಧ್ರಪ್ರದೇಶದ (Andhra Pradesh) ಇತರ ಭಾಗಗಳಲ್ಲಿ ಸರಣಿ ಮನೆಗಳ್ಳತನ ನಡೆಸುತ್ತಿದ್ದ 27 ವರ್ಷದ ಮಾಜಿ ಐಟಿ ಉದ್ಯೋಗಿಯನ್ನು (Techie arrested) ಬಂಧಿಸಲಾಗಿದೆ. ರಾತ್ರಿ ವೇಳೆ ಕಳ್ಳತನದ ದೂರುಗಳು ಪದೇ ಪದೇ ಬಂದ ಹಿನ್ನೆಲೆಯಲ್ಲಿ, ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದ್ದರು. ಕಳ್ಳತನದ ಬೆನ್ನಟ್ಟಿದ ಪೊಲೀಸರು ಸನ್ನಿ ಎಂದೂ ಕರೆಯಲ್ಪಡುವ ಅಚ್ಚಿ ಮಹೇಶ್ ರೆಡ್ಡಿ ಎಂಬ ವ್ಯಕ್ತಿಯನ್ನು ಬಂಧಿಸಿದರು.
ಹೈದರಾಬಾದ್ನ ಪ್ರತಿಷ್ಠಿತ ಐಟಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಸ್ನಾತಕೋತ್ತರ ಪದವೀಧರ ಸನ್ನಿ, ಹಲವಾರು ಕಳ್ಳತನವನ್ನು ಮಾಡುತ್ತಿದ್ದ ಎಂಬುದು ತಿಳಿದಾಗ ತನಿಖಾಧಿಕಾರಿಗಳು ಆಘಾತಕ್ಕೊಳಗಾದರು. ಈತ ಕಾಕಿನಾಡದ ಸನ್ನಿಯು ವೈಜಾಗ್ನ ಮಾಧವಧಾರ ಪ್ರದೇಶದಲ್ಲಿ ವಾಸಿಸುತ್ತಿದ್ದ. ಐಟಿ ವಲಯದಲ್ಲಿ ಔಪಚಾರಿಕ ಶಿಕ್ಷಣ ಮತ್ತು ಉದ್ಯೋಗದ ಹೊರತಾಗಿಯೂ, ಐಷಾರಾಮಿ ಬಿಎಂಡಬ್ಲ್ಯು ಕಾರು ಹೊಂದಿದ್ದ. ಅಲ್ಲದೆ, ಹಲವು ಬಾರಿ ವಿದೇಶ ಪ್ರವಾಸ ಮಾಡುವುದು ಸೇರಿದಂತೆ ದುಬಾರಿ ಜೀವನವನ್ನು ನಡೆಸಲು ಅಪರಾಧದಲ್ಲಿ ತೊಡಗಿದ್ದ ಎಂದು ಪೊಲೀಸರು ಹೇಳಿದ್ದಾರೆ.
Crime news: ಪ್ರಿಯಕರನಿಗೆ ತಾಯಿ, ಸಂಬಂಧಿಯ ಖಾಸಗಿ ಫೋಟೋ ಕಳಿಸಿದ ಪಾಪಿ ಮಗಳು!
ಅವನ ಬಂಧನದ ನಂತರ, ವೈಜಾಗ್ ಪೊಲೀಸರು ನಗರದ ವಿವಿಧ ಭಾಗಗಳಲ್ಲಿ, ಗಾಜುವಾಕ, ಅರಿಲೋವಾ, ಮಲ್ಕಪುರಂ, ಪೆಂಡುರ್ತಿ ಮತ್ತು ದುವ್ವಾಡ ವ್ಯಾಪ್ತಿಗಳಲ್ಲಿ 26 ಮನೆ ಕಳ್ಳತನ ಪ್ರಕರಣಗಳನ್ನು ಭೇದಿಸಿದ್ದಾರೆ. ಈ ಪ್ರಕರಣಗಳಲ್ಲಿ, ಕಳ್ಳ ಸುಮಾರು 24.66 ಲಕ್ಷ ರೂ. ಮೌಲ್ಯದ ಆಭರಣ ಮತ್ತು ನಗದನ್ನು ಕದ್ದಿದ್ದಾನೆ. ಇದರಲ್ಲಿ 1,084 ಗ್ರಾಂ ಚಿನ್ನ, 6,300 ಗ್ರಾಂಗೂ ಹೆಚ್ಚು ಬೆಳ್ಳಿ ಮತ್ತು 40,500 ರೂ. ನಗದು ಸೇರಿವೆ.
ಆತನ ಬಂಧನದ ಸಮಯದಲ್ಲಿ, ಪೊಲೀಸರು ಸುಮಾರು 699 ಗ್ರಾಂ ಚಿನ್ನಾಭರಣಗಳು ಮತ್ತು 3.8 ಕೆಜಿ ಬೆಳ್ಳಿ ಆಭರಣಗಳು, ಕದ್ದ ಹಣದಿಂದ ಖರೀದಿಸಿದ ಐಷಾರಾಮಿ ಬಿಎಂಡಬ್ಲ್ಯು ವಾಹನ, ನಂಬರ್ಪ್ಲೇಟ್ ಇಲ್ಲದ ಸ್ಕೂಟರ್ ಮತ್ತು ಕಳ್ಳತನಕ್ಕೆ ಬಳಸುತ್ತಿದ್ದ ಉಪಕರಣಗಳನ್ನು ವಶಪಡಿಸಿಕೊಂಡಿದ್ದಾರೆ.
ವಶಪಡಿಸಿಕೊಂಡ ಎಲ್ಲಾ ಆಸ್ತಿಯ ಮೌಲ್ಯ 15.63 ಲಕ್ಷ ರೂ.ಗಳಿಗೂ ಹೆಚ್ಚು ಎಂದು ಅಂದಾಜಿಸಲಾಗಿದೆ. ವಿಶಾಖಪಟ್ಟಣ ಪೊಲೀಸ್ ಆಯುಕ್ತ ಶಂಕ ಬ್ರಾತ ಬಾಗ್ಚಿ ಅವರ ಪ್ರಕಾರ, ಸನ್ನಿ ತನ್ನ ಹದಿಹರೆಯದಿಂದಲೂ ಕಳ್ಳತನ ಮಾಡುತ್ತಾ ಬಂದಿದ್ದ ಎಂದು ಹೇಳಿದ್ದಾರೆ. 15ನೇ ವಯಸ್ಸಿನಲ್ಲಿ, ಪಿಎಂ ಪಾಲೆಮ್ ಪ್ರದೇಶದ ಮನೆಗಳಿಗೆ ಕಳ್ಳತನ ಮಾಡುವಾಗ ಸಿಕ್ಕಿಬಿದ್ದ ಅವನನ್ನು ಬಾಲಾಪರಾಧಿ ಮನೆಗೆ ಕಳುಹಿಸಲಾಯಿತು.
Bengaluru Crime News: ಸರಗಳ್ಳರಿಂದ ಬಿಡಿಸಿಕೊಳ್ಳಲು ಹೋಗಿ ಬಿದ್ದು ಮಹಿಳೆ ಸಾವು
ಬಾಲಾಪರಾಧಿ ಸೆರೆಮನೆಯಿಂದ ಬಿಡುಗಡೆಯಾದ ನಂತರ, ಅವನು ಕಾಕಿನಾಡ, ಸರಪವರಂ, ರಾಮಚಂದ್ರಪುರಂ, ಇಂದ್ರಪಾಲಂ ಮತ್ತು ರಾಜಮಂಡ್ರಿ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಕಳ್ಳತನ ಮಾಡುವುದನ್ನು ಮುಂದುವರೆಸಿದ. ರಾಜಮಂಡ್ರಿ ಕೇಂದ್ರ ಕಾರಾಗೃಹದಲ್ಲಿ 14 ತಿಂಗಳುಗಳ ಕಾಲ ಶಿಕ್ಷೆ ಅನುಭವಿಸಿದನು. ರಾಜ್ಯಾದ್ಯಂತ 60ಕ್ಕೂ ಹೆಚ್ಚು ಕಳ್ಳತನ ಪ್ರಕರಣಗಳಲ್ಲಿ ಅವನು ಭಾಗಿಯಾಗಿದ್ದನು ಎಂದು ಪೊಲೀಸ್ ದಾಖಲೆಗಳು ಸೂಚಿಸುತ್ತವೆ.
ಮನೆಗಳಿಗೆ ನುಗ್ಗಲು ಸನ್ನಿಯು ಮಾಸ್ಕ್, ಕ್ಯಾಪ್ಗಳು, ಕೈಗವಸುಗಳು ಮತ್ತು ಸುತ್ತಿಗೆಗಳು, ಸ್ಕ್ರೂಡ್ರೈವರ್ಗಳು ಮತ್ತು ಡ್ರಿಲ್ಲಿಂಗ್ ಯಂತ್ರಗಳಂತಹ ಸಾಧನಗಳನ್ನು ಬಳಸಿದ್ದಾನೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಪೊಲೀಸರು ಆತನ ವಿರುದ್ಧ ಎಲ್ಲಾ ಸಂಬಂಧಿತ ಪ್ರಕರಣಗಳಲ್ಲಿ ಕೇಸ್ ದಾಖಲಿಸಿದ್ದು, ಮತ್ತಷ್ಟು ತನಿಖೆ ಮುಂದುವರೆಸಿದ್ದಾರೆ.