ಇರಾನ್ ವಿರುದ್ಧ ಯುದ್ಧ ಮಾಡಲು ಮೂವರು ಅಮೆರಿಕ ಮಾಜಿ ಅಧ್ಯಕ್ಷರ ಬಳಿ ಬೇಡಿಕೆ ಇಟ್ಟಿದ್ದ ನೆತನ್ಯಾಹು! ಅಧಿಕಾರಿ ಹೇಳಿದ್ದೇನು?

ವಾಷಿಂಗ್ಟನ್‌: ಇಸ್ರೇಲ್ (Israel) ಪ್ರಧಾನಿ ಬೆಂಜಮಿನ್ ನೆತನ್ಯಾಹು (Benjamin Netanyahu) ಅವರು ಇರಾನ್ (Iran) ಮೇಲೆ ಯುದ್ಧ ಹೂಡುವ ಪ್ರಸ್ತಾವನೆಯನ್ನು ಈ ಹಿಂದಿನ ಅಮೆರಿಕ ಅಧ್ಯಕ್ಷರ ಮುಂದೆಯೂ ಇಟ್ಟಿದ್ದರು, ಆದರೆ ಅವರೆಲ್ಲರೂ ಅದನ್ನು ತಿರಸ್ಕರಿಸಿದ್ದರು ಎಂದು ಮಾಜಿ ವಿದೇಶಾಂಗ ಕಾರ್ಯದರ್ಶಿ ಜಾನ್ ಕೆರ್ರಿ ಹೇಳಿದ್ದಾರೆ. ‘ದಿ ಲೇಟ್ ಶೋ ವಿತ್ ಸ್ಟೀಫನ್ ಕೋಲ್ಬರ್ಟ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಕೆರ್ರಿ, "ಒಬಾಮಾ ಬುಷ್ ಮತ್ತು ಬೈಡನ್ ಎಲ್ಲರೂ ‘ಬೇಡ’ ಎಂದಿದ್ದರು. ಆ ಮಾತುಕತೆಗಳ ಭಾಗವಾಗಿ ನಾನಿದ್ದೆ," ಎಂದು ಹೇಳಿದ್ದಾರೆ.

ಶಾಂತಿಯುತ ಮಾರ್ಗಕ್ಕೆ ಆದ್ಯತೆ

ಅಮೆರಿಕದ ಈ ಹಿಂದಿನ ಅಧ್ಯಕ್ಷರು ಯುದ್ಧಕ್ಕೆ ಒಪ್ಪಿಗೆ ನೀಡದಿರಲು ಕಾರಣವೆಂದರೆ, ಅವರು ಶಾಂತಿಯುತ ಪ್ರಕ್ರಿಯೆಯ ಎಲ್ಲಾ ಪರಿಹಾರಗಳನ್ನು ಇನ್ನೂ ಪೂರ್ಣವಾಗಿ ಬಳಸಿಕೊಂಡಿರಲಿಲ್ಲ. ವಿಯೆಟ್ನಾಂ ಯುದ್ಧದ ಅನುಭವ ಹೊಂದಿರುವ ಕೆರ್ರಿ, "ವಿಯೆಟ್ನಾಂ ಮತ್ತು ಇರಾಕ್ ಯುದ್ಧಗಳ ಪಾಠವೆಂದರೆ ಸಾರ್ವಜನಿಕರಿಗೆ ಸುಳ್ಳು ಹೇಳಬಾರದು ಎಂಬುದು. ಜನರಿಗೆ ಸುಳ್ಳು ಹೇಳಿ ಅವರ ಮಕ್ಕಳನ್ನು ಯುದ್ಧಕ್ಕೆ ಕಳುಹಿಸುವುದು ತಪ್ಪು," ಎಂದು ಎಚ್ಚರಿಸಿದ್ದಾರೆ. ನೆತನ್ಯಾಹು ಅವರ ಆಡಳಿತ ಬದಲಾವಣೆಯ ಭವಿಷ್ಯವಾಣಿಗಳು ಸುಳ್ಳಾಗಿವೆ ಎಂದು ಇರಾನ್‌ನ ಪ್ರೆಸ್ ಟಿವಿ ಕೂಡ ಲೇವಡಿ ಮಾಡಿದೆ.

ಶಾಂತಿ ಮಾತುಕತೆ ಇರಾನ್ ಅಸಹಕಾರ: ಇಸ್ಲಾಮಾಬಾದ್ ಪ್ರವಾಸ ಮುಂದೂಡಿದ ಅಮೆರಿಕ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್

ಟ್ರಂಪ್ ಹಸಿರು ನಿಶಾನೆ

ಆದರೆ, ನ್ಯೂಯಾರ್ಕ್ ಟೈಮ್ಸ್ ವರದಿಯ ಪ್ರಕಾರ, ಡೊನಾಲ್ಡ್ ಟ್ರಂಪ್ ಅವರು ನೆತನ್ಯಾಹು ಅವರ ‘ಹಾರ್ಡ್ ಸೆಲ್’ಗೆ ಮಣಿದಿದ್ದರು. ಫೆಬ್ರವರಿ 11 ರಂದು ನಡೆದ ಸಭೆಯಲ್ಲಿ ಇರಾನ್‌ನಲ್ಲಿ ಆಡಳಿತ ಬದಲಾವಣೆಗೆ ಇದು ಸಕಾಲ ಎಂದು ನೆತನ್ಯಾಹು ಮನವರಿಕೆ ಮಾಡಿಕೊಟ್ಟಾಗ, ಟ್ರಂಪ್ "ಇದು ನನಗೆ ಸರಿ ಎನಿಸುತ್ತದೆ" ಎಂದು ಹೇಳಿ ಜಂಟಿ ಕಾರ್ಯಾಚರಣೆಗೆ ಹಸಿರು ನಿಶಾನೆ ನೀಡಿದ್ದರು.

ಜೆಡಿ ವ್ಯಾನ್ಸ್ ಕಿಡಿ

ಇತ್ತೀಚೆಗೆ ಯುಎಸ್ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಮತ್ತು ನೆತನ್ಯಾಹು ನಡುವೆ ತೀವ್ರ ವಾಗ್ವಾದ ನಡೆದಿದೆ ಎಂದು ‘ಆಕ್ಸಿಯೋಸ್’ ವರದಿ ಮಾಡಿದೆ. ಯುದ್ಧದ ಬಗ್ಗೆ ನೆತನ್ಯಾಹು ಹೊಂದಿದ್ದ ಅತಿಯಾದ ಆತ್ಮವಿಶ್ವಾಸ ಮತ್ತು ಆಡಳಿತ ಬದಲಾವಣೆಯ ಬಗ್ಗೆ ನೀಡಿದ್ದ ಗುಲಾಬಿ ಚಿತ್ರಣವನ್ನು ವ್ಯಾನ್ಸ್ ಕಟುವಾಗಿ ಟೀಕಿಸಿದ್ದಾರೆ. "ಯುದ್ಧಕ್ಕೆ ಮುನ್ನ ಬಿಬಿ (ನೆತನ್ಯಾಹು) ಇದನ್ನು ತುಂಬಾ ಸುಲಭ ಎಂದು ಬಿಂಬಿಸಿದ್ದರು, ಆದರೆ ವಾಸ್ತವ ಹಾಗಿಲ್ಲ," ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ. ಆಡಳಿತ ಬದಲಾವಣೆಯ ಆಸೆ ತೋರಿಸಿ ಟ್ರಂಪ್ ಅವರನ್ನು ಒಪ್ಪಿಸಿದ್ದ ನೆತನ್ಯಾಹು ನಡೆ ಈಗ ಚರ್ಚೆಗೆ ಗ್ರಾಸವಾಗಿದೆ.