ಅಮೆರಿಕಕ್ಕೂ ಶೀಘ್ರದಲ್ಲಿಯೇ ಯುಪಿಐ ಎಂಟ್ರಿ: ಭಾರತದ ಡಿಜಿಟಲ್ ಶಕ್ತಿಗೆ ಮತ್ತೊಂದು ಜಾಗತಿಕ ಮೈಲುಗಲ್ಲು!

ವಾಷಿಂಗ್ಟನ್‌: ಗಡಿಗಳನ್ನು ಮೀರಿ ಡಿಜಿಟಲ್ ಪಾವತಿ ಕ್ಷೇತ್ರದಲ್ಲಿ ವಿಶ್ವದಲ್ಲೇ ಹೊಸ ಕ್ರಾಂತಿ ಸೃಷ್ಟಿಸಿರುವ ಭಾರತದ 'ಯುಪಿಐ' (UPI) ವ್ಯವಸ್ಥೆಯು ಇದೀಗ ಅಮೆರಿಕಕ್ಕೂ ಪ್ರವೇಶಿಸಲು ಸಜ್ಜಾಗಿದೆ. ಕೃತಕ ಬುದ್ಧಿಮತ್ತೆ ಹಾಗೂ ತಂತ್ರಜ್ಞಾನ ವಲಯದಲ್ಲಿ ಭಾರತದ ಹೆಜ್ಜೆಯು ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡುತ್ತಿರುವ ಬೆನ್ನಲ್ಲೇ, ಅಮೆರಿಕದ ಜನಪ್ರಿಯ 'ಝೆಲ್' (Zelle) ಪಾವತಿ ಜಾಲದೊಂದಿಗೆ ಯುಪಿಐ ಅನ್ನು ಜೋಡಿಸುವ ಪ್ರಸ್ತಾಪ ಮುನ್ನೆಲೆಗೆ ಬಂದಿದೆ. ಈ ನೂತನ ತಂತ್ರಜ್ಞಾನ ಸೇತುವೆಯು ಭಾರತೀಯ ಮೂಲದ ಅನಿವಾಸಿಗಳು (NRIs), ವಿದ್ಯಾರ್ಥಿಗಳು ಮತ್ತು ಉದ್ಯೋಗಿಗಳಿಗೆ ಗಡಿಯಾಚೆಗಿನ ಹಣಕಾಸು ವಹಿವಾಟನ್ನು ಅತ್ಯಂತ ಸರಳಗೊಳಿಸಲಿದೆ.

ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಜಾಗತಿಕ ಮಟ್ಟದಲ್ಲಿ ಯುಪಿಐ ವಿಸ್ತರಿಸುವ ನಿಟ್ಟಿನಲ್ಲಿ ಅಮೆರಿಕದ ಪ್ರಮುಖ ಬ್ಯಾಂಕಿಂಗ್ ಆಧಾರಿತ ಪಾವತಿ ಜಾಲವಾದ 'ಝೆಲ್' ಜೊತೆ ಮಾತುಕತೆ ನಡೆಸುತ್ತಿದೆ. ಈ ಹೊಸ ವ್ಯವಸ್ಥೆ ಜಾರಿಗೆ ಬಂದರೆ, ವಿದೇಶದಲ್ಲಿರುವ ಭಾರತೀಯರು ತಮ್ಮ ಹಣವನ್ನು ಭಾರತಕ್ಕೆ ಕಳುಹಿಸಲು ಅಥವಾ ಅಮೆರಿಕದಲ್ಲಿ ಹಣಕಾಸು ವಹಿವಾಟು ನಡೆಸಲು ಅನುಕೂಲವಾಗಲಿದೆ.

ಝೆಲ್-ಯುಪಿಐ ಜೋಡಣೆಯ ಪ್ರಮುಖ ಲಾಭಗಳು

ಪ್ರಸ್ತುತ ಅಮೆರಿಕದಿಂದ ಭಾರತಕ್ಕೆ ಹಣ ಕಳುಹಿಸಲು ಭಾರಿ ಸೇವಾ ಶುಲ್ಕ ತೆರಬೇಕಿದ್ದು, ಹಣ ತಲುಪಲು 2 ರಿಂದ 3 ದಿನ ಬೇಕಾಗುತ್ತದೆ. ಈ ನೂತನ ಜೋಡಣೆಯಿಂದ ಕೆಲವೇ ಸೆಕೆಂಡುಗಳಲ್ಲಿ, ಅತ್ಯಂತ ಕಡಿಮೆ ವೆಚ್ಚದಲ್ಲಿ ಹಣ ವರ್ಗಾಯಿಸಬಹುದು.

ಅಮೆರಿಕದಲ್ಲಿ ನೆಲೆಸಿರುವ ಲಕ್ಷಾಂತರ ಭಾರತೀಯ ಉದ್ಯೋಗಿಗಳು ಹಾಗೂ ಉನ್ನತ ಶಿಕ್ಷಣಕ್ಕಾಗಿ ತೆರಳಿರುವ ಲಕ್ಷಾಂತರ ಭಾರತೀಯ ವಿದ್ಯಾರ್ಥಿಗಳಿಗೆ ತಂದೆ-ತಾಯಂದಿರು ಅಥವಾ ಕುಟುಂಬಸ್ಥರೊಂದಿಗೆ ತಕ್ಷಣ ಹಣ ವಹಿವಾಟು ನಡೆಸಲು ಇದು ಸುಲಭವಾಗಲಿದೆ.

ಭಾರತದಲ್ಲಿ ಮೊಬೈಲ್ ಸಂಖ್ಯೆ ಅಥವಾ ಯುಪಿಐ ಐಡಿ ಬಳಸಿ ಹಣ ಕಳುಹಿಸುವಷ್ಟೇ ಸರಳವಾಗಿ, ಅಮೆರಿಕದಲ್ಲೂ ಹಣ ಕಳುಹಿಸಲು ಸಾಧ್ಯವಾಗಲಿದೆ.

ಅಮೆರಿಕದಲ್ಲಿ ಯುಪಿಐ ಪ್ರವೇಶದ ಮಹತ್ವ

ಈಗಾಗಲೇ ಸಿಂಗಾಪುರ (PayNow), ಯುಎಇ (PayPro), ಶ್ರೀಲಂಕಾ, ಮಾರಿಷಸ್, ಫ್ರಾನ್ಸ್ ಮತ್ತು ನೇಪಾಳ ಸೇರಿದಂತೆ ಹಲವು ದೇಶಗಳಲ್ಲಿ ಭಾರತದ ಯುಪಿಐ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ಆದರೆ, ವಿಶ್ವದ ಅತ್ಯಂತ ದೊಡ್ಡ ಆರ್ಥಿಕತೆಯಾದ ಅಮೆರಿಕದ 'ಝೆಲ್' ನೆಟ್‌ವರ್ಕ್‌ನೊಂದಿಗೆ ಯುಪಿಐ ಸೇತುವೆ ನಿರ್ಮಾಣವಾದರೆ, ಇದು ಜಾಗತಿಕ ಡಿಜಿಟಲ್ ಪಾವತಿ ವ್ಯವಸ್ಥೆಯಲ್ಲಿ ಭಾರತ ಸಾಧಿಸುವ ಅತಿದೊಡ್ಡ ಮೈಲಿಗಲ್ಲಾಗಲಿದೆ. ಪ್ರಸ್ತುತ ಎರಡೂ ದೇಶಗಳ ನಿಯಂತ್ರಣ ಸಂಸ್ಥೆಗಳು ಹಾಗೂ ಬ್ಯಾಂಕಿಂಗ್ ನಾಯಕರ ಮಟ್ಟದಲ್ಲಿ ತಾಂತ್ರಿಕ ಮತ್ತು ಕಾನೂನು ಚೌಕಟ್ಟಿನ ಮಾತುಕತೆಗಳು ನಡೆಯುತ್ತಿದ್ದು, ಶೀಘ್ರದಲ್ಲೇ ಅಧಿಕೃತ ಪ್ರಕಟಣೆ ಹೊರಬೀಳುವ ನಿರೀಕ್ಷೆಯಿದೆ.

“11 ದೇಶಗಳಲ್ಲಿ ಯುಪಿಐ ಕಾರ್ಯನಿರ್ವಹಿಸುತ್ತಿದೆ”: ಜಾಗತಿಕ ವ್ಯಾಪ್ತಿ ಮತ್ತಷ್ಟು ಹೆಚ್ಚಳ ಎಂದ ಪ್ರಧಾನಿ ಮೋದಿ

ಈಗಾಗಲೇ ಯುಪಿಐ ವ್ಯವಸ್ಥೆಯನ್ನು 'ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ' ನಿರ್ವಹಿಸುತ್ತದೆ. ಇನ್ನು 'ಅರ್ಲಿ ವಾರ್ನಿಂಗ್' ಸಂಸ್ಥೆಯು ಅಮೆರಿಕದ ಪ್ರಮುಖ ಏಳು ಹಣಕಾಸು ಸಂಸ್ಥೆಗಳ ಒಡೆತನದಲ್ಲಿದ್ದು, ಇವುಗಳಲ್ಲಿ ಬ್ಯಾಂಕ್ ಆಫ್ ಅಮೆರಿಕ, ಕ್ಯಾಪಿಟಲ್ ಒನ್, ಜೆಪಿಮೋರ್ಗನ್ ಚೇಸ್, ಪಿಎನ್‌ಸಿ ಬ್ಯಾಂಕ್, ಟ್ರೂಯಿಸ್ಟ್, ಯು.ಎಸ್. ಬ್ಯಾಂಕ್ ಹಾಗೂ ವೆಲ್ಸ್ ಫಾರ್ಗೋ ಸೇರಿವೆ.