Health Tips: ಅರಿಶಿನದ ಹಾಲಿನ ಸೇವನೆ: ಅತಿಯಾದರೆ ಅಮೃತವೂ ವಿಷ; ಈ ಆರೋಗ್ಯ ಸಮಸ್ಯೆ ಇರುವವರು ಎಚ್ಚರ!
ಅರಿಶಿನದ ಹಾಲು (Golden Milk) ಆರೋಗ್ಯಕ್ಕೆ ಅನೇಕ ಲಾಭಗಳನ್ನು ನೀಡುತ್ತದೆ ಎಂದು ಹೇಳಲಾಗುತ್ತದೆ. ಇದು ರೋಗನಿರೋಧಕ ಶಕ್ತಿ ಹೆಚ್ಚಿಸುವುದು, ಜ್ವರ-ಸಡ್ಡು ಕಡಿಮೆ ಮಾಡುವುದು ಹಾಗೂ ದೇಹದ ಉರಿಯನ್ನು ತಗ್ಗಿಸುವುದಕ್ಕೆ ಸಹಾಯಕ. ಆದರೆ ಅತಿಯಾಗಿ ಸೇವಿಸಿದರೆ ಅದು ಕೆಲವರಿಗೆ ಹಾನಿಕಾರಕವಾಗಬಹುದು.
ಅರಿಶಿಣ ಹಾಲು -
ಬೆಂಗಳೂರು: ನಮ್ಮ ಭಾರತೀಯ ಪರಂಪರೆಯಲ್ಲಿ ಅರಿಶಿನಕ್ಕೆ(Turmeric) ಅತ್ಯಂತ ಪವಿತ್ರ ಮತ್ತು ಔಷಧೀಯ ಸ್ಥಾನವಿದೆ. ಆಯುರ್ವೇದದ ಪ್ರಕಾರ, ಹಾಲಿಗೆ ಅರಿಶಿನ ಬೆರೆಸಿ(Turmeric Milk) ಕುಡಿಯುವುದು ದೇಹದ ರೋಗನಿರೋಧಕ(Immunity Power) ಶಕ್ತಿಯನ್ನು ಹೆಚ್ಚಿಸುತ್ತದೆ, ಗಾಯಗಳನ್ನು ಗುಣಪಡಿಸುತ್ತದೆ ಮತ್ತು ಆಯಾಸವನ್ನು ದೂರ ಮಾಡುತ್ತದೆ. ಆದರೆ, ನಾಣ್ಯಕ್ಕೆ ಎರಡು ಮುಖಗಳಿರುವಂತೆ, ಅರಿಶಿನದ ಹಾಲು ಎಲ್ಲರಿಗೂ ವರದಾನವಾಗುವುದಿಲ್ಲ. ಕೆಲವು ನಿರ್ದಿಷ್ಟ ಆರೋಗ್ಯ ಸಮಸ್ಯೆ ಇರುವವರಿಗೆ ಇದು ಹಾನಿಕಾರಕವಾಗಬಹುದು. ಆ ವ್ಯಕ್ತಿಗಳು ಯಾರು ಮತ್ತು ಏಕೆ ಕುಡಿಯರಬಾರದು ಎಂಬ ಆರೋಗ್ಯ ಸಲಹೆ(Health Tips) ಎಂಬ ವಿವರ ಇಲ್ಲಿದೆ:
1. ಕಡಿಮೆ ರಕ್ತದ ಸಕ್ಕರೆ ಅಂಶ ಇರುವವರು
ಯಾರಿಗೆ ಈಗಾಗಲೇ ರಕ್ತದಲ್ಲಿ ಸಕ್ಕರೆಯ ಅಂಶ ಕಡಿಮೆ ಇದೆಯೋ, ಅಂತಹವರು ಅರಿಶಿನದ ಹಾಲಿನಿಂದ ದೂರವಿರುವುದು ಒಳ್ಳೆಯದು. ಅರಿಶಿನದಲ್ಲಿರುವ 'ಕರ್ಕ್ಯುಮಿನ್' ಎಂಬ ಅಂಶವು ರಕ್ತದ ಸಕ್ಕರೆಯ ಮಟ್ಟವನ್ನು ಮತ್ತಷ್ಟು ಕುಗ್ಗಿಸಬಹುದು. ಇದು ತಲೆಸುತ್ತು ಅಥವಾ ಅತಿಯಾದ ಸುಸ್ತು ಕಾಣಿಸಿಕೊಳ್ಳಲು ಕಾರಣವಾಗಬಹುದು.
2. ಪುರುಷರಲ್ಲಿ ಬಂಜೆತನ
ಅರಿಶಿನದ ಅತಿಯಾದ ಸೇವನೆಯು ಪುರುಷರಲ್ಲಿ 'ಟೆಸ್ಟೋಸ್ಟೆರಾನ್' ಹಾರ್ಮೋನ್ ಮಟ್ಟವನ್ನು ಕಡಿಮೆ ಮಾಡಬಹುದು ಎಂದು ಕೆಲವು ಸಂಶೋಧನೆಗಳು ಹೇಳುತ್ತವೆ. ಇದು ವೀರ್ಯಾಣುಗಳ ಚಲನೆಯ ಮೇಲೆ ಪ್ರಭಾವ ಬೀರಬಹುದು. ಹಾಗಾಗಿ, ದಂಪತಿಗಳು ಮಗುವನ್ನು ಪಡೆಯಲು ಪ್ರಯತ್ನಿಸುತ್ತಿರುವ ಸಮಯದಲ್ಲಿ ಪುರುಷರು ಅರಿಶಿನವನ್ನು ಮಿತವಾಗಿ ಬಳಸುವುದು ಸೂಕ್ತ.
Health Tips: ಚಳಿಗಾಲದಲ್ಲಿ ಮೊಸರು ತಿನ್ನುವುದರಿಂದ ಆರೋಗ್ಯಕ್ಕೆ ಹಾನಿಯಾಗುತ್ತಾ? ಇಲ್ಲಿದೆ ನೋಡಿ ಮಾಹಿತಿ
3. ಕಿಡ್ನಿ ಸ್ಟೋನ್ ಸಮಸ್ಯೆ
ಮೂತ್ರಪಿಂಡದಲ್ಲಿ ಸ್ಟೋನ್ ಸಮಸ್ಯೆ ಇರುವವರು ಅರಿಶಿನದ ಹಾಲನ್ನು ಕುಡಿಯಬಾರದು. ಅರಿಶಿನದಲ್ಲಿ 'ಆಕ್ಸಲೇಟ್' ಎಂಬ ಅಂಶವಿರುತ್ತದೆ. ಈ ಆಕ್ಸಲೇಟ್ ದೇಹದಲ್ಲಿರುವ ಕ್ಯಾಲ್ಸಿಯಂ ಜೊತೆ ಸೇರಿ ಕಿಡ್ನಿ ಸ್ಟೋನ್ ಮತ್ತಷ್ಟು ದೊಡ್ಡದಾಗಲು ಅಥವಾ ಹೊಸ ಸ್ಟೋನ್ ಸೃಷ್ಟಿಯಾಗಲು ಪ್ರಚೋದನೆ ನೀಡುತ್ತದೆ.
4. ಜೀರ್ಣಕ್ರಿಯೆಯ ತೊಂದರೆಗಳು
ಅರಿಶಿನವು ಉಷ್ಣ ಗುಣವನ್ನು ಹೊಂದಿದೆ. ಹೀಗಾಗಿ, ಅತಿಯಾದ ಎದೆಯುರಿ, ಆಸಿಡ್ ರಿಫ್ಲಕ್ಸ್, ಗ್ಯಾಸ್ಟ್ರಿಕ್ ಅಥವಾ ಪದೇ ಪದೇ ಹೊಟ್ಟೆ ಉಬ್ಬರಿಸುವ ಸಮಸ್ಯೆ ಇರುವವರಿಗೆ ಅರಿಶಿನದ ಹಾಲು ಹೊಟ್ಟೆಯ ಕಿರಿಕಿರಿಯನ್ನು ಹೆಚ್ಚಿಸಬಹುದು. ಇದು ಜೀರ್ಣಾಂಗ ವ್ಯೂಹದ ಒಳಪದರದ ಮೇಲೆ ಪ್ರಭಾವ ಬೀರಿ ಅಜೀರ್ಣಕ್ಕೆ ಕಾರಣವಾಗಬಹುದು.
5. ಕಬ್ಬಿಣದ ಅಂಶದ ಕೊರತೆ
ದೇಹದಲ್ಲಿ ಕಬ್ಬಿಣದಂಶದ ಕೊರತೆ ಅಥವಾ ಅನಿಮಿಯಾ (ರಕ್ತಹೀನತೆ) ಇರುವವರು ಜಾಗರೂಕರಾಗಿರಬೇಕು. ಅರಿಶಿನವು ದೇಹವು ಕಬ್ಬಿಣಾಂಶವನ್ನು ಹೀರಿಕೊಳ್ಳುವ ಪ್ರಕ್ರಿಯೆಗೆ ಅಡ್ಡಿಪಡಿಸುತ್ತದೆ. ಇದರಿಂದಾಗಿ ನೀವು ಎಷ್ಟೇ ಪೌಷ್ಟಿಕ ಆಹಾರ ಸೇವಿಸಿದರೂ ದೇಹಕ್ಕೆ ರಕ್ತದ ಕೊರತೆ ನೀಗುವುದಿಲ್ಲ.
6. ಶಸ್ತ್ರಚಿಕಿತ್ಸೆಯ ಸಮಯ
ಅರಿಶಿನವು ರಕ್ತವನ್ನು ತೆಳುಗೊಳಿಸುವ ಗುಣವನ್ನು ಹೊಂದಿದೆ. ಇದು ರಕ್ತ ಹೆಪ್ಪುಗಟ್ಟುವಿಕೆಯನ್ನು ವಿಳಂಬಗೊಳಿಸುತ್ತದೆ. ಆದ್ದರಿಂದ, ಯಾವುದೇ ಶಸ್ತ್ರಚಿಕಿತ್ಸೆಗೆ ಒಳಗಾಗುವ ಎರಡು ವಾರಗಳ ಮೊದಲು ಅರಿಶಿನ ಸೇವನೆಯನ್ನು ನಿಲ್ಲಿಸಬೇಕು. ಇಲ್ಲದಿದ್ದರೆ ಶಸ್ತ್ರಚಿಕಿತ್ಸೆಯ ಸಮಯದಲ್ಲಿ ಅತಿಯಾದ ರಕ್ತಸ್ರಾವವಾಗುವ ಅಪಾಯವಿರುತ್ತದೆ.
ಆರೋಗ್ಯವಂತ ವ್ಯಕ್ತಿಗಳು ಕೂಡ ಅರಿಶಿನದ ಹಾಲು ತಯಾರಿಸುವಾಗ ಕೇವಲ ಒಂದು ಚಿಟಿಕೆ ಅರಿಶಿನ ಬಳಸಿದರೆ ಸಾಕು. ಅತಿಯಾದ ಅರಿಶಿನ ಬಳಕೆಯು ಲಾಭಕ್ಕಿಂತ ನಷ್ಟವನ್ನೇ ಹೆಚ್ಚು ಮಾಡುತ್ತದೆ. ಯಾವುದೇ ದೀರ್ಘಕಾಲದ ಕಾಯಿಲೆ ಇರುವವರು ವೈದ್ಯರ ಸಲಹೆ ಪಡೆದೇ ಇದನ್ನು ರೂಢಿಸಿಕೊಳ್ಳುವುದು ಉತ್ತಮ.