ಡಾ.ಲೋಕೇಶ್ ಎಲ್.ವಿ., ಹಿರಿಯ ಗ್ಯಾಸ್ಟ್ರೋಎಂಟರಾಲಜಿಸ್ಟ್, ಸ್ಪರ್ಶ್ ಆಸ್ಪತ್ರೆ, ಬೆಂಗಳೂರು
ಹೆಪಟೈಟಿಸ್ ಎಂದರೆ ಯಕೃತ್ತಿನಲ್ಲಿ ಉಂಟಾಗುವ ಉರಿಯೂತ. ಇದು ವೈರಲ್ ಸೋಂಕುಗಳು, ಅತಿಯಾದ ಮದ್ಯಪಾನ, ಕೆಲವು ಔಷಧಿಗಳ ಬಳಕೆ, ಸ್ವಯಂಪ್ರತಿರಕ್ಷಣಾ (ಆಟೋಇಮ್ಯೂನ್) ಕಾಯಿಲೆಗಳು ಅಥವಾ ವಿಷಕಾರಿ ಪದಾರ್ಥಗಳ ಸಂಪರ್ಕದಿಂದ ಉಂಟಾಗಬಹುದು. ಕೆಲವು ವಿಧದ ಹೆಪಟೈಟಿಸ್ ಸ್ವಯಂವಾಗಿ ಗುಣಮುಖವಾಗಬಹುದು. ಆದರೆ, ವಿಶೇಷವಾಗಿ ಹೆಪಟೈಟಿಸ್ ಬಿ ಮತ್ತು ಸಿ ಸೋಂಕುಗಳು ಯಾವುದೇ ಸ್ಪಷ್ಟ ಲಕ್ಷಣಗಳಿಲ್ಲದೆ ಹಲವು ವರ್ಷಗಳ ಕಾಲ ದೇಹದಲ್ಲೇ ಉಳಿಯ ಬಹುದು. ಈ ಮೌನಗತಿಯ ಕಾರಣದಿಂದ ರೋಗದ ಪತ್ತೆ ಮತ್ತು ಚಿಕಿತ್ಸೆ ವಿಳಂಬವಾಗುತ್ತದೆ. ಪರಿಣಾಮವಾಗಿ, ಯಕೃತ್ತಿಗೆ ನಿಧಾನವಾಗಿ ಹಾನಿಯಾಗುತ್ತಾ ಹೋಗುತ್ತದೆ.
ಉರಿಯೂತದಿಂದ ಶಾಶ್ವತ ಯಕೃತ್ತಿನ ಹಾನಿವರೆಗೆ
ಯಕೃತ್ತಿನಲ್ಲಿ ನಿರಂತರವಾಗಿ ಉರಿಯೂತ ಮುಂದುವರಿದರೆ ಫೈಬ್ರೋಸಿಸ್ (Fibrosis) ಎಂಬ ಸ್ಥಿತಿ ಉಂಟಾಗಬಹುದು. ಇದರಲ್ಲಿ ಆರೋಗ್ಯಕರ ಯಕೃತ್ತಿನ ಅಂಗಾಂಶವು ಗಾಯದ (ಸ್ಕಾರ್) ಅಂಗಾಂಶ ದಿಂದ ಬದಲಾಗುತ್ತದೆ. ಕಾಲಕ್ರಮೇಣ ಇದು ಸಿರೋಸಿಸ್ (Cirrhosis) ಗೆ ತಿರುಗಬಹುದು. ಇದು ಯಕೃತ್ತಿನಲ್ಲಿ ತೀವ್ರ ಪ್ರಮಾಣದ ಗಾಯದ ಸ್ಥಿತಿಯಾಗಿದ್ದು, ಯಕೃತ್ತಿನ ಪ್ರಮುಖ ಕಾರ್ಯಗಳನ್ನು ನಿರ್ವಹಿಸುವ ಸಾಮರ್ಥ್ಯವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ. ಸಿರೋಸಿಸ್ ಇರುವವರಿಗೆ ಯಕೃತ್ತಿನ ವೈಫಲ್ಯ, ಹೊಟ್ಟೆಯಲ್ಲಿ ದ್ರವ ಸಂಗ್ರಹವಾಗುವುದು, ಆಂತರಿಕ ರಕ್ತಸ್ರಾವ ಮತ್ತು ಮರುಕಳಿಸುವ ಸೋಂಕುಗಳ ಅಪಾಯ ಹೆಚ್ಚಿರುತ್ತದೆ. ಸಮಯಕ್ಕೆ ಚಿಕಿತ್ಸೆ ಪಡೆಯದಿದ್ದರೆ ಇವು ಜೀವಕ್ಕೆ ಅಪಾಯಕಾರಿಯಾಗಬಹುದು.
ಇದನ್ನೂ ಓದಿ: World Hepatitis Day: ಇಂದು ವಿಶ್ವ ಹೆಪಟೈಟಿಸ್ ದಿನ- ಯಕೃತ್ನ ಕಾಳಜಿ ಏಕೆ ಮಾಡಬೇಕು?
ಯಕೃತ್ತಿನ ಕ್ಯಾನ್ಸರ್ ಅಪಾಯ ಹೆಚ್ಚಾಗುತ್ತದೆ
ಚಿಕಿತ್ಸೆ ಪಡೆಯದ ಹೆಪಟೈಟಿಸ್ನ ಅತ್ಯಂತ ಗಂಭೀರ ದೀರ್ಘಕಾಲೀನ ಪರಿಣಾಮಗಳಲ್ಲಿ ಯಕೃತ್ತಿನ ಕ್ಯಾನ್ಸರ್ ಪ್ರಮುಖವಾಗಿದೆ. ದೀರ್ಘಕಾಲದ ಹೆಪಟೈಟಿಸ್ ಬಿ ಮತ್ತು ಸಿ ಸೋಂಕುಗಳು ಹೆಪಾಟೊಸೆಲ್ಲ್ಯುಲರ್ ಕಾರ್ಸಿನೋಮಾ (Hepatocellular Carcinoma) ಎಂಬ ಅತ್ಯಂತ ಸಾಮಾನ್ಯ ಯಕೃತ್ತಿನ ಕ್ಯಾನ್ಸರ್ಗೆ ಪ್ರಮುಖ ಕಾರಣಗಳಾಗಿವೆ. ಆರಂಭಿಕ ಹಂತದಲ್ಲೇ ರೋಗ ಪತ್ತೆ ಮಾಡಿ ಸೂಕ್ತ ಚಿಕಿತ್ಸೆ ಪಡೆದರೆ ಈ ಅಪಾಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದು ಹಾಗೂ ದೀರ್ಘಕಾಲೀನ ಆರೋಗ್ಯ ಫಲಿತಾಂಶಗಳನ್ನು ಸುಧಾರಿಸಬಹುದು.
ಯಕೃತ್ತಿನಾಚೆಯೂ ಪರಿಣಾಮಗಳು
ಚಿಕಿತ್ಸೆ ಪಡೆಯದ ಹೆಪಟೈಟಿಸ್ ಯಕೃತ್ತಿನಷ್ಟೇ ಅಲ್ಲದೆ ದೇಹದ ಒಟ್ಟಾರೆ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ. ಅನೇಕರು ನಿರಂತರ ಆಯಾಸ, ಹಸಿವಿನ ಕೊರತೆ, ಕಾರಣವಿಲ್ಲದ ತೂಕ ಇಳಿಕೆ ಮತ್ತು ಶಕ್ತಿಯ ಕುಂಠಿತತೆಯನ್ನು ಅನುಭವಿಸುತ್ತಾರೆ. ಕೆಲವು ಸಂದರ್ಭಗಳಲ್ಲಿ ದೀರ್ಘ ಕಾಲದ ಹೆಪಟೈಟಿಸ್ ಮೂತ್ರಪಿಂಡದ ಕಾಯಿಲೆ, ಕೀಲುಗಳು, ಚರ್ಮ ಹಾಗೂ ರಕ್ತನಾಳಗಳಿಗೆ ಸಂಬಂಧಿಸಿದ ತೊಂದರೆಗಳಿಗೂ ಕಾರಣವಾಗಿ ಜೀವನದ ಗುಣಮಟ್ಟವನ್ನು ಹದಗೆಡಿಸಬಹುದು.
ಆರಂಭಿಕ ಪತ್ತೆ ಜೀವ ಉಳಿಸಬಹುದು
ಒಳ್ಳೆಯ ವಿಷಯವೆಂದರೆ ಹೆಪಟೈಟಿಸ್ ಅನ್ನು ಬಹುಮಟ್ಟಿಗೆ ತಡೆಗಟ್ಟಲು ಮತ್ತು ಪರಿಣಾಮ ಕಾರಿಯಾಗಿ ಚಿಕಿತ್ಸೆ ನೀಡಲು ಸಾಧ್ಯವಾಗಿದೆ. ಹೆಪಟೈಟಿಸ್ ಎ ಮತ್ತು ಬಿ ವಿರುದ್ಧ ಲಸಿಕೆಗಳು ರಕ್ಷಣೆ ನೀಡುತ್ತವೆ. ಪರಿಣಾಮಕಾರಿ ಆಂಟಿವೈರಲ್ ಚಿಕಿತ್ಸೆಗಳ ಮೂಲಕ ಹೆಚ್ಚಿನ ಹೆಪಟೈಟಿಸ್ ಸಿ ಸೋಂಕುಗಳನ್ನು ಸಂಪೂರ್ಣವಾಗಿ ಗುಣಪಡಿಸಬಹುದು ಹಾಗೂ ಹೆಪಟೈಟಿಸ್ ಬಿ ಸೋಂಕನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಬಹುದು. ಅಪಾಯದ ಅಂಶಗಳಿರುವವರು ನಿಯಮಿತ ತಪಾಸಣೆ ಮಾಡಿಸಿಕೊಳ್ಳುವುದು ಮತ್ತು ಸಮಯಕ್ಕೆ ಸರಿಯಾಗಿ ವೈದ್ಯಕೀಯ ಚಿಕಿತ್ಸೆ ಪಡೆಯು ವುದು ಗಂಭೀರ ತೊಂದರೆಗಳನ್ನು ತಡೆಗಟ್ಟುವುದರ ಜೊತೆಗೆ ದೀರ್ಘಕಾಲದ ಯಕೃತ್ತಿನ ಆರೋಗ್ಯ ಕಾಪಾಡಲು ಸಹಕಾರಿಯಾಗಿದೆ.