ಬೆಂಗಳೂರು: ಪ್ರತಿಷ್ಠಿತ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆಯಾದ ಬನ್ನೇರುಘಟ್ಟ ರಸ್ತೆಯ ಅಪೋಲೋ ಆಸ್ಪತ್ರೆಯು, 1,000 ಟ್ರಾನ್ಸ್ ಕ್ರೇನಿಯಲ್ ಡಾಪ್ಲರ್ (ಟಿಸಿಡಿ) ಪ್ರಕ್ರಿಯೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿ ಮಹತ್ವದ ಸಾಧನೆ ಮಾಡಿದೆ. ಪಾರ್ಶ್ವವಾಯು ರೋಗನಿರ್ಣಯ ಮತ್ತು ನ್ಯೂರೋ ಕ್ರಿಟಿಕಲ್ ಕೇರ್ ಮೇಲ್ವಿಚಾರಣೆಯಲ್ಲಿ ಈ ತಂತ್ರಜ್ಞಾನವು ಅತ್ಯಂತ ಪರಿಣಾಮಕಾರಿಯಾಗಿದ್ದು, ಆಸ್ಪತ್ರೆಯ ಈ ಸಾಧನೆಯು ವೈದ್ಯಕೀಯ ಕ್ಷೇತ್ರದಲ್ಲಿ ಮಹತ್ವದ ಮೈಲಿಗಲ್ಲಾಗಿದೆ.
ಈ ಸಾಧನೆಯು ಮೆದುಳು ಮತ್ತು ಪಾರ್ಶ್ವವಾಯು ಸಂಬಂಧಿತ ಸಂಕೀರ್ಣ ಸ್ಥಿತಿ ಇರುವ ರೋಗಿ ಗಳಿಗೆ ವೇಗವಾಗಿ ಚಿಕಿತ್ಸೆ ನೀಡಲು ಸುಧಾರಿತ, ಆಕ್ರಮಣಕಾರಿಯಲ್ಲದ ತಂತ್ರಜ್ಞಾನಗಳನ್ನು ಬಳಸುವಲ್ಲಿ ಆಸ್ಪತ್ರೆಯ ಪರಿಣತಿಯನ್ನು ತೋರಿಸುತ್ತದೆ. 1,000 ಟ್ರಾನ್ಸ್ ಕ್ರೇನಿಯಲ್ ಡಾಪ್ಲರ್ (ಟಿಸಿಡಿ) ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿದ ಸಾಧನೆ ಸಂದರ್ಭದಲ್ಲಿ ಆಯೋಜಿಸಿದ್ದ ಕಾರ್ಯ ಕ್ರಮದಲ್ಲಿ ಸಿಂಗಾಪುರದ ನ್ಯಾಷನಲ್ ಯೂನಿವರ್ಸಿಟಿ ಹಾಸ್ಪಿಟಲ್ ನ ನರವಿಜ್ಞಾನ ವಿಭಾಗದ ಸೀನಿಯರ್ ಕನ್ಸಲ್ಟೆಂಟ್ ಡಾ.ವಿಜಯ್ ಶರ್ಮಾ ಅವರು ವರ್ಚುವಲ್ ಆಗಿ ಭಾಗವಹಿಸಿದ್ದರು.
ನ್ಯೂರೋಕ್ರಿಟಿಕಲ್ ಕೇರ್ ನಲ್ಲಿ ಟಿಸಿಡಿಯ ಬೆಳೆಯುತ್ತಿರುವ ಪಾತ್ರ ಮತ್ತು ಸಮಯದ ಮಿತಿ ಇರುವ ನರವೈಜ್ಞಾನಿಕ ಪರಿಸ್ಥಿತಿಗಳಲ್ಲಿ ರೋಗಿಗಳ ಚೇತರಿಕೆಯ ಫಲಿತಾಂಶಗಳನ್ನು ಸುಧಾರಿಸುವಲ್ಲಿ ಈ ವಿಧಾನದ ಪ್ರಾಮುಖ್ಯತೆಯ ಕುರಿತು ಮಾತನಾಡಿದರು.
ಈ 1,000 ಪ್ರಕ್ರಿಯೆಗಳ ಅವಧಿಯಲ್ಲಿ, ಟಿಸಿಡಿ ತಂತ್ರಜ್ಞಾನವು ಆಸ್ಪತ್ರೆಯಲ್ಲಿ ಸಾಮಾನ್ಯ ಮತ್ತು ಸುಧಾರಿತ ಪಾರ್ಶ್ವವಾಯು ಮೌಲ್ಯಮಾಪನ ಮಾಡಲು ಅನುವು ಮಾಡಿಕೊಟ್ಟಿದೆ. ಇದರಲ್ಲಿ ತೀವ್ರ ಪಾರ್ಶ್ವವಾಯುವಿಗೆ ಒಳಗಾದ 350ಕ್ಕೂ ಹೆಚ್ಚು ರೋಗಿಗಳ ಮೇಲ್ವಿಚಾರಣೆಯನ್ನೂ ಮಾಡಲಾಗಿದೆ. ಈ ತಂತ್ರಜ್ಞಾನವು ಮೆದುಳಿನ ಒಳಗಿನ ರಕ್ತನಾಳಗಳ ಸಂಕುಚಿತಗೊಳ್ಳುವಿಕೆ, ಅಡೆತಡೆಗಳು ಮತ್ತು ರಕ್ತಪರಿಚಲನೆಯ ಅಸಮಾನತೆಯನ್ನು ತ್ವರಿತವಾಗಿ ಗುರುತಿಸಲು ಸಹಾಯ ಮಾಡಿದೆ.
ಇದು ವೈದ್ಯರಿಗೆ ಸಮಯೋಚಿತ ಚಿಕಿತ್ಸಾ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ದ್ವಿತೀಯ ಪಾರ್ಶ್ವವಾಯು ತಡೆಗಟ್ಟುವಿಕೆಗೆ ಮಾರ್ಗದರ್ಶನ ನೀಡಲು ನೆರವಾಗಿದೆ. ಅಲ್ಲದೆ, ಇದು 'ಮೊಯ ಮೊಯಾ' ಕಾಯಿಲೆಯಲ್ಲಿ ಪರ್ಯಾಯ ರಕ್ತಪರಿಚಲನೆಯನ್ನು ಪತ್ತೆಹಚ್ಚಲು ಮತ್ತು ಸಬ್ ಕ್ಲೇವಿಯನ್ ಸ್ಟೀಲ್ ಫಿನಾಮಿನನ್ ನಂತಹ ನಾಳಗಳ ಪರಿಸ್ಥಿತಿಗಳ ಕುರಿತು ರೋಗನಿರ್ಣಯ ಮಾಡಲು ನೆರವು ನೀಡಿದೆ.
ಈ ಸಾಧನೆಯ ಪ್ರಾಮುಖ್ಯತೆಯ ಬಗ್ಗೆ ಮಾತನಾಡಿದ ಬನ್ನೇರುಘಟ್ಟದ ಅಪೋಲೋ ಆಸ್ಪತ್ರೆಯ ಕನ್ಸಲ್ಟೆಂಟ್ ನ್ಯೂರಾಲಜಿಸ್ಟ್ ಡಾ. (ಪ್ರೊ.) ಸೂರ್ಯನಾರಾಯಣ ಶರ್ಮ ಪಿ.ಎಂ. ಅವರು, "ಟಿಸಿಡಿಯನ್ನು ಅಕ್ಷರಶಃ ನರರೋಗ ತಜ್ಞರ 'ಮೆದುಳಿನ ಸ್ಟೆಥಾಸ್ಕೋಪ್' ಎಂದು ಕರೆಯ ಲಾಗುತ್ತದೆ. ಏಕೆಂದರೆ ಇದು ರೋಗಿಯ ಹಾಸಿಗೆಯ ಬಳಿಯೇ ಮೆದುಳಿನ ರಕ್ತಪರಿಚಲನೆಯನ್ನು ನೈಜ ಸಮಯದಲ್ಲಿ ಮೌಲ್ಯಮಾಪನ ಮಾಡಲು ನಮಗೆ ಅವಕಾಶ ನೀಡುತ್ತದೆ.
ಸಾಂಪ್ರದಾಯಿಕ ಇಮೇಜಿಂಗ್ ಗಿಂತ ಭಿನ್ನವಾಗಿ, ಇದು ಮೆದುಳಿನ ಧಮನಿಗಳ ಮೂಲಕ ರಕ್ತವು ನಿಜವಾಗಿ ಹೇಗೆ ಹರಿಯುತ್ತಿದೆ ಎಂಬ ಒಳನೋಟವನ್ನು ನೀಡುತ್ತದೆ. ಇದು ಪಾರ್ಶ್ವವಾಯು ಮೌಲ್ಯಮಾಪನ ಮತ್ತು ನ್ಯೂರೋಕ್ರಿಟಿಕಲ್ ಕೇರ್ ಮೇಲ್ವಿಚಾರಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತದೆ. 1,000 ಪ್ರಕ್ರಿಯೆಗಳ ಈ ಮೈಲಿಗಲ್ಲನ್ನು ತಲುಪಿರುವುದು, ನಮ್ಮ ಸಮಗ್ರ ಪಾರ್ಶ್ವ ವಾಯು ಚಿಕಿತ್ಸೆಯಲ್ಲಿ ಈ ತಂತ್ರಜ್ಞಾನವು ಹೇಗೆ ಅತ್ಯಗತ್ಯ ಭಾಗವಾಗಿದೆ ಎಂಬುದನ್ನು ಸಾರುತ್ತದೆ ಮತ್ತು ರೋಗಿಗಳಿಗೆ ವೇಗವಾಗಿ ಹಾಗೂ ಹೆಚ್ಚು ನಿಖರವಾದ ಚಿಕಿತ್ಸಾ ನಿರ್ಧಾರಗಳನ್ನು ತೆಗೆದು ಕೊಳ್ಳಲು ನಮಗೆ ಸಹಾಯ ಮಾಡುತ್ತದೆ," ಎಂದು ತಿಳಿಸಿದರು.
ಭಾರತದಲ್ಲಿ ಪಾರ್ಶ್ವವಾಯು (ಸ್ಟ್ರೋಕ್) ತಡೆಗಟ್ಟುವಲ್ಲಿ ಟಿಸಿಡಿ ತಂತ್ರಜ್ಞಾನದ ಬಳಕೆಯನ್ನು ಹೆಚ್ಚಿಸುವಲ್ಲಿ ಡಾ. ಸೂರ್ಯನಾರಾಯಣ ಶರ್ಮ ಅವರು ಗಮನಾರ್ಹ ಕೊಡುಗೆ ನೀಡಿದ್ದಾರೆ. ಇವರು ಸಿಕಲ್ ಸೆಲ್ ಕಾಯಿಲೆಯಿಂದ ಬಳಲುತ್ತಿರುವ ಬುಡಕಟ್ಟು ಮಕ್ಕಳ ಮೇಲೆ ಕೇಂದ್ರೀಕರಿಸಿದ ಮೊದಲ ಪ್ರಾಯೋಗಿಕ ಯೋಜನೆಯನ್ನು ನಡೆಸಿ ಅದರ ಅಧ್ಯಯನ ವರದಿಯನ್ನು ಪ್ರಕಟಿಸಿದ್ದಾರೆ. ಈ ಯೋಜನೆಯು ಈಗ ಸರ್ಕಾರಿ ಸಂಸ್ಥೆಗಳು ಮತ್ತು ಹಲವಾರು ಸ್ವಯಂ ಸೇವಾ ಸಂಸ್ಥೆಗಳ ಬೆಂಬಲದೊಂದಿಗೆ ವಿವಿಧ ರಾಜ್ಯಗಳಲ್ಲಿ ಪರಿಚಯಿಸಲ್ಪಟ್ಟಿದೆ. ಇದಲ್ಲದೆ, ರಕ್ತನಾಳಗಳಿಗೆ ಸಂಬಂಧಿಸಿದ ಅಪಾಯಕಾರಿ ಅಂಶಗಳನ್ನು ಹೊಂದಿರುವ ವ್ಯಕ್ತಿಗಳಲ್ಲಿ ಪಾರ್ಶ್ವವಾಯು ತಡೆಗಟ್ಟುವಲ್ಲಿ ವಾಸೋಮೋಟರ್ ರಿಯಾಕ್ಟಿವಿಟಿ ಅಸೆಸ್ ಮೆಂಟ್ ಪ್ರಮುಖ ವಿಧಾನವಾಗಿ ಹೊರಹೊಮ್ಮುತ್ತಿದೆ ಎಂದು ಅವರು ಈ ವೇಳೆ ತಿಳಿಸಿದರು.
ಬನ್ನೇರುಘಟ್ಟದ ಅಪೋಲೋ ಆಸ್ಪತ್ರೆಯ ಕನ್ಸಲ್ಟೆಂಟ್ ನ್ಯೂರಾಲಜಿಸ್ಟ್ ಡಾ. ಗುರುಚರಣ್ ಅಡೂರ್ ಅವರು ಮಾತನಾಡಿ, "ಪಾರ್ಶ್ವವಾಯು ರೋಗನಿರ್ಣಯದ ಹೊರತಾಗಿ, ಟಿಸಿಡಿ ಹಲವಾರು ಸಂಕೀರ್ಣ ನರವೈಜ್ಞಾನಿಕ ಸಮಸ್ಯೆ ಪರಿಹಾರದ ಸಂಬರ್ಭದಲ್ಲಿ ಬಹಳ ಉಪಯುಕ್ತ ವೆಂದು ಸಾಬೀತಾಗಿದೆ. ಸಬರಾಕ್ನಾಯಿಡ್ ಹೆಮರೇಜ್ ಮತ್ತು ಟ್ಯೂಬರ್ಕುಲರ್ ಮೆನಿಂಜೈಟಿಸ್ ರೋಗಿಗಳಲ್ಲಿ ಮೆದುಳಿನ ರಕ್ತನಾಳಗಳ ಸಂಕುಚಿತಗೊಳ್ಳುವಿಕೆಯನ್ನು ಮೇಲ್ವಿಚಾರಣೆ ಮಾಡಲು ಇದು ನಮಗೆ ಸಹಾಯ ಮಾಡಿದೆ. ಸಾಂಪ್ರದಾಯಿಕ ಪರೀಕ್ಷೆಗಳಲ್ಲಿ ಪತ್ತೆಯಾಗದ ಸಮಸ್ಯೆಗಳನ್ನು ಗುರುತಿಸಲು ಸಹ ಇದು ನೆರವಾಗಿದೆ. 'ಬಬಲ್ ಟಿಸಿಡಿ' ಬಳಸುವ ಮೂಲಕ, ನಾವು 'ಪೇಟೆಂಟ್ ಫೋರಾಮೆನ್ ಓವೇಲ್' (ಹೃದಯದ ರಂಧ್ರದ ಸಮಸ್ಯೆ) ಹೊಂದಿರುವ 32 ರೋಗಿಗಳನ್ನು ಗುರುತಿಸಿದ್ದೇವೆ, ಇವರಲ್ಲಿ ಅನೇಕರಿಗೆ ಈ ಹಿಂದೆ ಎಕೋಕಾರ್ಡಿಯೋಗ್ರಫಿಯಲ್ಲಿ ಈ ಸಮಸ್ಯೆ ಪತ್ತೆಯಾಗಿರಲಿಲ್ಲ" ಎಂದು ಮಾಹಿತಿ ನೀಡಿದರು.
ರೋಗನಿರ್ಣಯಕ್ಕೆ ನೆರವಾಗುವ ಜೊತೆಗೆ, ಟಿಸಿಡಿ ತಂತ್ರಜ್ಞಾನವು 30 'ಬ್ರೈನ್ ಡೆತ್' (ಮೆದುಳು ನಿಷ್ಕ್ರಿಯ) ಮೌಲ್ಯಮಾಪನ ಮಾಡಲು ನೆರವು ನೀಡಿದೆ. ಸಮಯದ ಮಿತಿ ಇರುವ ಇಂತಹ ಕ್ಲಿನಿಕಲ್ ಸಂದರ್ಭಗಳಲ್ಲಿ, ಮೆದುಳಿನ ರಕ್ತಪರಿಚಲನೆ ಸ್ಥಗಿತಗೊಂಡಿರುವ ವಿಶಿಷ್ಟ ಮಾದರಿ ಗಳನ್ನು ಪತ್ತೆ ಹಚ್ಚುವ ಮೂಲಕ ಇದು ದೃಢೀಕೃತ ಪುರಾವೆಗಳನ್ನು ಒದಗಿಸಿದೆ. ಹಾಸಿಗೆಯ ಪಕ್ಕದಲ್ಲೇ ಪುನರಾವರ್ತಿಸಬಹುದಾದ ವಿಧಾನವಾಗಿರುವುದರಿಂದ, ಇದು ಉತ್ತಮ ಕ್ಲಿನಿಕಲ್ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ಅಂಗಾಂಗ ದಾನದ ಪ್ರಕ್ರಿಯೆಗಳನ್ನು ಸುಗಮಗೊಳಿಸಲು ಸಹಾಯ ಮಾಡಿದೆ.
ಮುಂದಿನ ದಿನಗಳಲ್ಲಿ, ಪಾರ್ಶ್ವವಾಯುವಿನ ಆರಂಭಿಕ ಪತ್ತೆ ಮತ್ತು ತಡೆಗಟ್ಟುವಿಕೆಯ ತಂತ್ರ ಗಳನ್ನು ಬಲಪಡಿಸಲು ಆಸ್ಪತ್ರೆಯು 'ಪಾರ್ಶ್ವವಾಯು ತಡೆಗಟ್ಟುವಿಕೆ ಕ್ಲಿನಿಕ್' ಗಳಲ್ಲಿ ಟ್ರಾನ್ಸ್ ಕ್ರೇನಿಯಲ್ ಡಾಪ್ಲರ್ ಅನ್ನು ಅಳವಡಿಸಲು ಯೋಜಿಸಿದೆ. ರಕ್ತನಾಳಗಳಲ್ಲಿನ ಅಡೆತಡೆಗಳ ಮೇಲ್ವಿ ಚಾರಣೆ, ಮೆದುಳಿನ ರಕ್ತದ ಹರಿವಿನ ವಿಶ್ಲೇಷಣೆ ಮತ್ತು ಚಿಕಿತ್ಸೆಯ ನಂತರದ ಫಾಲೋ- ಅಪ್ ಗಾಗಿ ಟಿಸಿಡಿಯನ್ನು ನಿಯಮಿತವಾಗಿ ಬಳಸುವುದರಿಂದ, ರೋಗಿಗಳಿಗೆ ಹೆಚ್ಚು ವೈಯಕ್ತಿಕರಿಸಿದ ಪಾರ್ಶ್ವವಾಯು ಅಪಾಯದ ಮೌಲ್ಯಮಾಪನ ಮತ್ತು ಸುಧಾರಿತ ವೈದ್ಯಕೀಯ ಚಿಕಿತ್ಸೆ ಒದಗಿಸಲು ಸಹಕಾರಿಯಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.