ಚಿಕ್ಕಬಳ್ಳಾಪುರ: ಎತ್ತಿನಹೊಳೆ(Ettinahole) ಯೋಜನೆಗೆ ಸಂಬಂಧಿಸಿದಂತೆ ಗೌರಿಬಿದನೂರು ತಾಲ್ಲೂಕಿನ ಕಸಬಾ ಹೋಬಳಿಯ ಗೌಡಸಂದ್ರ, ಬಾದಿಮರಳೂರು ಹಾಗೂ ರಾಮಚಂದ್ರಪುರ ಗ್ರಾಮಗಳಲ್ಲಿ ಭೂಸ್ವಾಧೀನ ಪ್ರಕ್ರಿಯೆಗೆ ಒಳಪಡುವ ಜಮೀನಿಗೆ ಎಕರೆಗೆ 1.15 ಕೋಟಿ ಪರಿಹಾರ ದರ ನಿಗದಿಪಡಿಸಲು ಭೂದರ ನಿರ್ಧರಣಾ ಸಲಹಾ ಸಮಿತಿ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.
ಇದನ್ನೂ ಓದಿ: Chikkaballapur News: ನ.12ರಂದು ರೈತರ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಬೃಹತ್ ಪ್ರತಿಭಟನೆ
ಜಿಲ್ಲಾಧಿಕಾರಿಗಳ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಮೂರು ಗ್ರಾಮಗಳ ರೈತರಿಂದ ಭೂ ಸ್ವಾಧೀನಕ್ಕೆ ಸಂಬಂಧಿಸಿದ ಅಭಿಪ್ರಾಯ ಹಾಗೂ ಸಲಹೆಗಳನ್ನು ಪಡೆಯಲಾಯಿತು. ಈ ಸಂದರ್ಭ ದಲ್ಲಿ ಭೂಸ್ವಾಧೀನಕ್ಕೆ ಒಳಪಡುವ ಪ್ರತಿ ಎಕರೆ ಜಮೀನಿಗೆ 2 ಕೋಟಿ ಪರಿಹಾರ ನೀಡುವಂತೆ ರೈತರು ಮನವಿ ಮಾಡಿದರು.
ರೈತರ ಬೇಡಿಕೆ ಹಾಗೂ ವಿವಿಧ ಅಂಶಗಳ ಕುರಿತು ಚರ್ಚಿಸಿದ ಬಳಿಕ, ಭೂಸ್ವಾಧೀನಕ್ಕೆ ಒಳಪಡುವ ಪ್ರತಿ ಎಕರೆಗೆ 1.15 ಕೋಟಿ ಪರಿಹಾರ ದರ ನಿಗದಿಪಡಿಸುವ ನಿರ್ಧಾರವನ್ನು ಸಮಿತಿ ಕೈಗೊಂಡು ಸಭೆಗೆ ತಿಳಿಸಿತು.
ಮೂರು ಗ್ರಾಮಗಳಲ್ಲಿ ಒಟ್ಟು 810 ಎಕರೆ 36 ಗುಂಟೆ ಜಮೀನು ಗುರುತಿಸಲಾಗಿದ್ದು, ಇದರಲ್ಲಿ 105 ಎಕರೆ 6 ಗುಂಟೆ ಖರಾಬು ಜಮೀನು ಹೊರತುಪಡಿಸಿ 705 ಎಕರೆ 30 ಗುಂಟೆ ಭೂಮಿ ಭೂಸ್ವಾಧೀನಕ್ಕೆ ಒಳಪಡಲಿದೆ.