Coffee Price hike: ಚಳಿಗಾಲದಲ್ಲಿ ತುಟಿ ಜೊತೆ ಜೇಬೂ ಸುಡಲಿದೆ ಕಾಫಿ!

ಬೆಂಗಳೂರು, ನ.11: ಈಗಾಗಲೇ ಚಳಿಗಾಲ (Winter) ಆರಂಭವಾಗಿದೆ. ಮುಂಜಾನೆ ಅಥವಾ ಸಂಜೆ ಚುಮುಚುಮು ಚಳಿಯಲ್ಲಿ ಒಂದು ಕಪ್​ ಬಿಸಿ ಕಾಫಿ ಕುಡಿಯುವುದು ಬೆಂಗಳೂರಿಗರ (bengaluru) ರೂಢಿ. ಆದರೆ ಈ ಬಿಸಿ ಕಾಫಿ ಇನ್ನು ಮುಂದೆ ನಿಮ್ಮ ನಾಲಿಗೆಯನ್ನಷ್ಟೇ ಅಲ್ಲ, ಜೇಬನ್ನೂ ಸುಡಲಿದೆ. ಕಾಫಿಪುಡಿ (Coffee powder) ಬೆಲೆ ಒಂದು ಕೆಜಿಗೆ ಸಾವಿರ ರೂಪಾಯಿ ಗಡಿಯನ್ನು ದಾಟಿದ್ದು, ಕಾಫಿ ಪ್ರಿಯರಿಗೆ ಬಿಗ್ ಶಾಕ್ ನೀಡಿದೆ. ದರ 1200 ರೂ.ವರೆಗೂ ಹೋಗುವ ನಿರೀಕ್ಷೆ ಇದೆ. ಇದನ್ನನುಸರಿಸಿ ಹೋಟೆಲ್‌ಗಳಲ್ಲಿ ಕೂಡ ಕಾಫಿ ದರ (Coffee Price hike) ಏರಿಕೆಯಾಗುವ ಸಾಧ್ಯತೆ ಇದೆ.

2022ರಲ್ಲಿ ಕೆಜಿಗೆ‌ 300-400 ರೂಪಾಯಿ ಇದ್ದ ಕಾಫಿಪುಡಿ ಬೆಲೆ ಇದೀಗ ಏಕಾಏಕಿ ಏರಿಕೆಯಾಗಿದೆ. ಕಳೆದ ಒಂದೇ ವರ್ಷದಲ್ಲಿ ಕೆಜಿ ಕಾಫಿಪುಡಿ ಬೆಲೆ 200 ರೂಪಾಯಿವರೆಗೆ ಹೆಚ್ಚಳವಾಗಿದೆ. ಮುಂದಿನ ತಿಂಗಳು ಮತ್ತೆ ಕೆಜಿಗೆ 150-200 ರೂಪಾಯಿ ವರೆಗೆ ಕಾಫಿಪುಡಿ ಬೆಲೆಯಲ್ಲಿ ಏರಿಕೆ ಆಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಕಾಫಿಪುಡಿ ಬೆಲೆ ಏರಿಕೆ ಕೇವಲ ವ್ಯಾಪಾರಸ್ಥರಿಗೆ ಮಾತ್ರ ತಲೆನೋವು ತಂದಿದ್ದಲ್ಲ, ಕಾಫಿ ಪ್ರಿಯರಿಗೂ ಇದರ ಬಿಸಿ ತಟ್ಟಿದೆ. ಒಂದು ಕಾಫಿಯನ್ನು ಬೈಟೂ ಮಾಡುವ ಬದಲಿಗೆ ಬೈತ್ರೀ ಮಾಡಿಕೊಂಡು ಕುಡಿಯುವ ಸಂಕಷ್ಟ ತಲೆದೋರಿದೆ ಎಂದು ಕೆಲವರು ಗೊಣಗಿದ್ದಾರೆ.

ಕಾಫಿಪುಡಿ ಬೆಲೆ ಏರಿಕೆಗೆ ಇಲ್ಲಿದೆ ಕಾರಣ

ಕಾಫಿಯನ್ನು ಅತೀ ಹೆಚ್ಚು ಬೆಳೆಯುವ ಬ್ರೆಜಿಲ್, ವಿಯೆಟ್ನಾಂಗಳಲ್ಲಿ ಕಾಫಿ ಬೆಳೆ ಕುಂಠಿತವಾಗಿರುವುದು

ರಾಜ್ಯದಲ್ಲಿ ಅತಿ ಹೆಚ್ಚಿನ ಮಳೆಯಾಗಿ ಕಾಫಿ ಹೂವುಗಳು ಉದುರಿದ್ದು ಕಾಫಿ ಬೀಜಗಳ ಅಭಾವ

ಕಾಫಿ ಬೆಳೆಗಾರರು ಎದುರಿಸುತ್ತಿರುವ ಕೆಲಸಗಾರರ ಸಮಸ್ಯೆಯಿಂದ ಇಳುವರಿ ಮೇಲೆ ಪರಿಣಾಮ

ಹೋಟೆಲ್​ಗಳಲ್ಲಿ ಕಾಫಿ ದರ ಏರಿಕೆ?

ಕಾಫಿಪುಡಿ ದರ ನಿರಂತರವಾಗಿ ಏರಿಕೆ ಆಗುತ್ತಿರುವುದರಿಂದ ಹೋಟೆಲ್ ಉದ್ಯಮಕ್ಕೆ ದೊಡ್ಡ ಹೊಡೆತ ಬೀಳಲಿದೆ. ಕಳೆದ ಕೆಲವು ತಿಂಗಳ ಹಿಂದೆ ಹಾಲಿನ ದರ ಏರಿಕೆಯಾದ ಪರಿಣಾಮ ಕಾಫಿ ಬೆಲೆಗಳಲ್ಲಿ ತುಸು ವ್ಯತ್ಯಾಸ ಆಗಿತ್ತು. ಇದೀಗ ಕಾಫಿಪುಡಿ ದರ ಇದೇ ರೀತಿ ಏರಿಕೆ ಆಗುತ್ತಿದ್ದರೆ, ಅನಿವಾರ್ಯವಾಗಿ ಕಾಫಿ ದರವೂ ಹೆಚ್ಚಳವಾಗಲಿದೆ. ಈಗಾಗಲೇ ಹೋಟೆಲ್ ಮತ್ತು ಕ್ಯಾಂಟೀನ್‌ಗಳಲ್ಲಿ ಒಂದು ಕಾಫಿ ಬೆಲೆ 12ರಿಂದ 15 ರೂಪಾಯಿ, 15ರಿಂದ 17 ರೂಪಾಯಿ, 18ರಿಂದ 20 ರೂಪಾಯಿ ವರೆಗೆ ಏರಿಕೆ ಆಗಿದೆ. ಮತ್ತೆ ಕಾಫಿ ಪುಡಿ ದರ ಏರಿಕೆ ಆದರೆ 15ರಿಂದ 25 ರೂಪಾಯಿವರೆಗೆ ದರ ಏರಿಕೆ ಆಗುವ ಸಾಧ್ಯತೆಗಳಿವೆ.

ಇದನ್ನೂ ಓದಿ: Side Effect Of Coffee : ಎನರ್ಜಿ ಬೂಸ್ಟ್ ಮಾಡೋಕೆ ಕಾಫಿ ಕುಡಿಯುತ್ತಿದ್ದೀರಾ? ಸೈಡ್‌ ಎಫೆಕ್ಟ್‌ ಬಗ್ಗೆ ಡಾಕ್ಟರ್ ಏನು ಹೇಳುತ್ತಿದ್ದಾರೆ ನೋಡಿ