ಹಾವೇರಿ: ಜೈನ ಧರ್ಮದ ಅತ್ಯಂತ ಪವಿತ್ರ ತೀರ್ಥಕ್ಷೇತ್ರಗಳಲ್ಲಿ ಒಂದಾದ ಸಮ್ಮೇದ ಶಿಖರ್ಜಿಯ ದರ್ಶನ ಪಡೆಯಲು ಹಾವೇರಿಯ ಜೈನ ಸಮುದಾಯದ 50 ಭಕ್ತರು ಸೋಮವಾರ ರೈಲಿನ ಮೂಲಕ ಪವಿತ್ರ ಯಾತ್ರೆ ಕೈಗೊಂಡರು.
ಯಾತ್ರೆ ಕೈಗೊಂಡ ಭಕ್ತರಿಗೆ ಜೈನ ಮಿಲನ್‌ನ ಮುಖಂಡ ಭರತರಾಜ ಹಜಾರಿ, ಕಾರ್ಯಕಾರಿಣಿ ಸದಸ್ಯ ವಜ್ರಕುಮಾರ, ಉದ್ಯಮಿ ಮಲ್ಲೇಶ ಬಣಕಾರ, ವಿಮಲ ಬೀಗಾರ, ಈರಣ್ಣ ದಿನಕರ, ಧನಂಜಯ ಕಳಸೂರ ಹಾಗೂ ಮದನಕುಮಾರ ಹಜಾರಿ ಅವರು ಹಾರ ಹಾಕಿ ಶುಭ ಹಾರೈಸಿದರು. ಭಕ್ತರ ಯಾತ್ರೆ ಸುಖಕರವಾಗಿರಲಿ, ಎಲ್ಲರಿಗೂ ಭಗವಂತನ ದರ್ಶನದ ಪುಣ್ಯ ಲಭಿಸಲಿ ಎಂದು ಹಾರೈಸಿದರು.
ಇದನ್ನೂ ಓದಿ: Haveri News: ಪ.ಪದವೀಧರ ಕ್ಷೇತ್ರದ ಕೈ ಗೆಲುವು ಖಚಿತ: ಉಸ್ತುವಾರಿ ಮಿನಿಸ್ಟರ್ ಆರ್.ಲಮಾಣಿ
ಮೋಕ್ಷಭೂಮಿಗೆ ಭಕ್ತಿಯ ನಡಿಗೆ: ಜಾರ್ಖಂಡ್ ರಾಜ್ಯದ ಗಿರಿಡಿಹ್ ಜಿಲ್ಲೆಯಲ್ಲಿರುವ ಪಾರಸನಾಥ ಬೆಟ್ಟಗಳ ಮೇಲೆ ನೆಲೆಸಿರುವ ಸಮ್ಮೇದ ಶಿಖರ್ಜಿ ಜೈನ ಧರ್ಮದ ಪ್ರಮುಖ ಯಾತ್ರಾಸ್ಥಳವಾಗಿದೆ. ಸಮುದ್ರ ಮಟ್ಟದಿಂದ ಸುಮಾರು 1,350 ಮೀಟರ್ ಎತ್ತರದಲ್ಲಿರುವ ಈ ಬೆಟ್ಟವು ಜೈನರ ಪಾಲಿಗೆ ಅಪಾರ ಧಾರ್ಮಿಕ ಮಹತ್ವ ಹೊಂದಿದೆ.
ಜೈನ ಧರ್ಮದ 24 ತೀರ್ಥಂಕರರಲ್ಲಿ 20 ತೀರ್ಥಂಕರರು ಇದೇ ಪವಿತ್ರ ಕ್ಷೇತ್ರದಲ್ಲಿ ಮೋಕ್ಷ ಹೊಂದಿದ್ದಾರೆ ಎಂಬುದು ಜೈನ ಸಮುದಾಯದ ಅಚಲ ನಂಬಿಕೆ. ಅದರಲ್ಲೂ 23ನೇ ತೀರ್ಥಂಕರ ರಾದ ಭಗವಾನ್ ಪಾರ್ಶ್ವನಾಥರು ಇಲ್ಲಿ ನಿರ್ವಾಣ ಹೊಂದಿದ ಹಿನ್ನೆಲೆಯಲ್ಲಿ ಈ ಬೆಟ್ಟಕ್ಕೆ ಪಾರಸನಾಥ ಬೆಟ್ಟ ಎಂಬ ಹೆಸರು ಬಂದಿದೆ ಎಂದು ನಂಬಲಾಗಿದೆ.
27 ಕಿ.ಮೀ. ಕಠಿಣ ಹಾದಿಯಲ್ಲಿ ವಂದನೆ: ಸಮ್ಮೇದ ಶಿಖರ್ಜಿಗೆ ತೆರಳುವ ಭಕ್ತರು ಬೆಟ್ಟದ ತಪ್ಪಲಿನಲ್ಲಿರುವ ಮಧುಬನ್‌ನಿಂದ ಯಾತ್ರೆ ಆರಂಭಿಸುತ್ತಾರೆ. ಸುಮಾರು 27 ಕಿ.ಮೀ. ಉದ್ದದ ಬೆಟ್ಟದ ಹಾದಿಯಲ್ಲಿ ಕಾಲ್ನಡಿಗೆಯಲ್ಲಿ ಸಾಗುವ ಭಕ್ತರು, ತೀರ್ಥಂಕರರ ಮೋಕ್ಷಸ್ಥಳಗಳನ್ನು ಪ್ರತಿನಿಧಿಸುವ ಟೋಂಕ್‌ಗಳಿಗೆ ಭೇಟಿ ನೀಡಿ ಪ್ರಾರ್ಥನೆ ಸಲ್ಲಿಸುತ್ತಾರೆ. ದಿಗಂಬರ ಮತ್ತು ಶ್ವೇತಾಂಬರ ಪಂಥಗಳ ಜೈನರು ಈ ಕ್ಷೇತ್ರವನ್ನು ಸಮಾನ ಭಕ್ತಿಯಿಂದ ಆರಾಧಿಸುತ್ತಾರೆ.
ಹಾವೇರಿಯಿಂದ ತೆರಳಿರುವ 50 ಭಕ್ತರ ಈ ಯಾತ್ರೆಯು ಧಾರ್ಮಿಕ ಶ್ರದ್ಧೆ, ಆಧ್ಯಾತ್ಮಿಕ ಚಿಂತನೆ ಹಾಗೂ ಜೈನ ಸಮುದಾಯದ ಒಗ್ಗಟ್ಟಿನ ಸಂಕೇತವಾಗಿದೆ.