Mankala Vaidya: "ಆರೋಗ್ಯದ ಕಡೆ ಗಮನ ಕೊಡದೆ ಪತ್ರಕರ್ತರು ಕೆಲಸ ಮಾಡುತ್ತಾರೆ"; ಸಚಿವ ಮಂಕಾಳ ವೈದ್ಯ

ಶಿರಸಿ: ಹಿರಿಯ ಪತ್ರಕರ್ತರು, ಈ ರಂಗದಿಂದ ನಿವೃತ್ತರಾದವರಿಂದ ಇಂದಿನ ಪತ್ರಕರ್ತರು ಕಲಿಯುವ ಅಂಶಗಳು ಜಾಸ್ತಿ ಇರುತ್ತವೆ. ಹಿರಿಯರನ್ನು ಪ್ರೇರಣೆಯಾಗಿಸಿಕೊಳ್ಳಬೇಕು ಎಂದು ಮೀನುಗಾರಿಕೆ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ (Mankala Vaidya) ಹೇಳಿದರು. ಶಿರಸಿ (Sirsi) ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘ ನಗರದ ಟಿಆರ್ ಸಿ ಬ್ಯಾಂಕ್ ಸಭಾಭವನದಲ್ಲಿ ಭಾನುವಾರ ಆಯೋಜಿಸಿದ್ದ ಪತ್ರಿಕಾ ದಿನಾಚರಣೆ ಹಾಗೂ ಮಾಧ್ಯಮ ಶ್ರೀ ಪ್ರಶಸ್ತಿ ಪ್ರಧಾನ ಸಮಾರಂಭದಲ್ಲಿ ಅವರು ಮಾತನಾಡಿದರು. ಎಲ್ಲ ವ್ಯಕ್ತಿಗಳಂತೆ ರಾಜಕಾರಣಿಗಳಾದ ನಮ್ಮಿಂದಲೂ ಲೋಪ ದೋಷಗಳು ಸಂಭವಿಸುತ್ತವೆ. ಆಗ ಬೇಕಾದ ಕೆಲಸವನ್ನು ಪತ್ರಕರ್ತರು ತಮ್ಮ ಲೇಖನಿ ಮೂಲಕ ನಮ್ಮ ಗಮನಕ್ಕೆ ತಂದು ಪುಣ್ಯದ ಕೆಲಸ ಮಾಡುತ್ತಿದ್ದಾರೆ. ಆದರೆ, ಉತ್ತರ ಕನ್ನಡದ ಪತ್ರಕರ್ತರ ಕಾರ್ಯ ವಿಧಾನ ಪ್ರಶಂಸನಾರ್ಹವಾಗಿದೆ. ಆಯಾ ಸಂದರ್ಭಕ್ಕೆ ಸರಿಯಾಗಿ ಹೇಳಿ, ಅಲ್ಲಿಗೇ ಬಿಡುವ ವ್ಯವಸ್ಥೆಯನ್ನು ನಮ್ಮ ಪತ್ರಕರ್ತರು ಅಳವಡಿಸಿಕೊಂಡಿದ್ದಾರೆ. ನಾವು ನಮ್ಮಿಂದಾದ ಲೋಪ ಸರಿಪಡಿಸಿಕೊಂಡ ಬಳಿಕ ಪತ್ರಕರ್ತರೇ ನಮಗೆ ಶುಭಕೋರುವ ವ್ಯವಸ್ಥೆ ನಮ್ಮ ಜಿಲ್ಲೆಯಲ್ಲಿದೆ ಎಂದರು.

ಉತ್ತರ ಕನ್ನಡ ಜಿಲ್ಲೆಯ ಪತ್ರಕರ್ತರು ಉಳಿದ ಜಿಲ್ಲೆಯಂತಲ್ಲ. ತಮ್ಮ ಆರೋಗ್ಯದ ಕಡೆ ಗಮನ ಸಹ ಕೊಡದೇ ಸದಾ ಹೊಸತನದ ಸುದ್ದಿಗಳನ್ನು ಬರೆಯುವ ತುಡಿತ, ಕ್ರಿಯಾಶೀಲತೆ ಹೊಂದಿದ್ದಾರೆ. ಒಳ್ಳೆಯ ಕೆಲಸಗಳು ಆಗಬೇಕು ಎಂಬ ತುಡಿತ ಜಿಲ್ಲೆಯ ಪತ್ರಕರ್ತರಲ್ಲಿದೆಯಲ್ಲದೇ ಸಮಸ್ಯೆಗಳನ್ನು ಎತ್ತಿ ತೋರಿಸಿದ್ದಾರೆ. ಯಾರೋ ಒಬ್ಬಿಬ್ಬರು ಪತ್ರಿಕಾ ರಂಗವನ್ನು ದುರುಪಯೋಗಪಡಿಸಿಕೊಳ್ಳುವವರು ಇದ್ದಿರಬಹುದು, ಆದರೆ, ಇದು ಜಿಲ್ಲೆಯ ನಿಷ್ಠಾವಂತ ಪತ್ರಕರ್ತರ ಮೇಲೆ ಪರಿಣಾಮ ಬೀರಿಲ್ಲ, ಜಿಲ್ಲೆಯ ಪತ್ರಕರ್ತರ ಪ್ರಾಮಾಣಿಕತೆಗೆ ವ್ಯತ್ಯಾಸವಾಗಿಲ್ಲ. ಜಿಲ್ಲೆಯ ಪತ್ರಿಕಾ ಇತಿಹಾಸದಲ್ಲಿ ಅಪಾರ ಅನುಭವ ಹೊಂದಿರುವ ಹಿರಿಯ ಪತ್ರಕರ್ತರ ಸಂಖ್ಯೆ ಅಧಿಕವಿದೆ. ಅವರ ಅನುಭದ ಪ್ರಯೋಜನವನ್ನು ಇಂದಿನ ಪತ್ರಕರ್ತರು ಪಡೆದುಕೊಳ್ಳಬೇಕು ಎಂದರು.

ಮಾಧ್ಯಮಶ್ರೀ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ದೂರದರ್ಶನ ವರದಿಗಾರ್ತಿ ವಿನುತಾ ಹೆಗಡೆ ಮಾತನಾಡಿ, ಮಹಿಳೆಯಾಗಿ ಪತ್ರಿಕೋದ್ಯಮದಲ್ಲಿ ಸಾಧನೆ ಮಾಡಬೇಕೆಂದರೆ ಗಟ್ಟಿತನದ ಅಗತ್ಯತೆ ಇದೆ. ಪ್ರಚಾರದ ಜೊತೆಗೆ ಅಪಪ್ರಚಾರವನ್ನೂ ಆಕೆ ಎದುರಿಸಬೇಕಾಗುತ್ತದೆ. ಆದರೆ, ಅಪಪ್ರಚಾರಗಳಿಗೆ ಎದೆಗುಂದದೇ ನಮ್ಮ ಕಾರ್ಯವನ್ನು ಪ್ರಮಾಣಿಕವಾಗಿ ಮಾಡಿದಾಗ ಜನತೆಯೇ ನಮ್ಮನ್ನು ಗುರುತಿಸುತ್ತಾರೆ. ಮಹಿಳೆಯರು ಕೆಲಸಕ್ಕೆ ಹೋಗಬೇಕಿದ್ರೆ ಗೌರವಯುತ ಉದ್ಯೋಗ ಎಂಬುದನ್ನು ಗಮನಿಸಬೇಕು. ಪತ್ರಿಕೋದ್ಯಮ ಗೌರವಯುತ ಹುದ್ದೆ ಎಂಬ ಉದ್ದೇಶದಿಂದ ಬಂದಿದ್ದೇನೆ. ಪತ್ರಿಕೋದ್ಯಮ ಕ್ಷೇತ್ರಕ್ಕೆ ಕಾಲಿಟ್ಟ ನನಗೆ ಸಚ್ಚಿದಾನಂದ ಹೆಗಡೆ, ವಿಶ್ವೇಶ್ವರ ಭಟ್ ಇತರರು ಸೂಕ್ತ ಮಾರ್ಗದರ್ಶನ ನೀಡಿದ್ದಾರೆ. ಪತ್ರಕರ್ತ ಸಂಶೋಧನಾ ವರದಿಗಳನ್ನು ಹೆಚ್ಚು ಹೆಚ್ಚು ಬರೆದಾಗ ಧೈರ್ಯ ಮತ್ತು ಅನುಭವಗಳು ಜಾಸ್ತಿಯಾಗುತ್ತ ಸಾಗುತ್ತವೆ. ಅವೇ ಮುಂದಿನ ಜೀವನದಲ್ಲಿ ಇನ್ನಷ್ಟು ಗಟ್ಟಿಯಾಗಲು ಶಕ್ತಿ ನೀಡುತ್ತವೆ. ಸಂಶೋಧನಾ ವರದಿಗಳ ಪತ್ರಿಕೋದ್ಯಮ ಇಳಿದಾಗ ಆರಮಭದಲ್ಲಿ ಕಷ್ಟದಾಯಕವಾಗುತ್ತದೆ. ಆದರೆ, ಪತ್ರಿಕೋದ್ಯಮ ದಲ್ಲಿ ಧೈರ್ಯವಾಗಿ ಮುಂದೆ ಬರಬಹುದು. ಹಣ ಗಳಿಸುವ ಉದ್ದೇಶ ಹೊಂದಿದ್ದರೆ ಪತ್ರಿಕೋದ್ಯ ಸೂಕ್ತ ದಾರಿಯಲ್ಲ. ಆದರೆ, ಸಮಾಜದ ಕುಂದು ಕೊರತೆಗಳನ್ನು ನಿಷ್ಠುರವಾಗಿ ಸಮಾಜದ ಮುಂದಿಡಲು , ಸತ್ಯ ಹೊರ ತರಲು ಹೊಸಬರು ಪತ್ರಿಕೋದ್ಯಮ ಕ್ಷೇತ್ರಕ್ಕೆ ಬನ್ನಿ ಎಂದರು.

ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಜಿ ಸುಬ್ರಾಯ ಭಟ್ ಬಕ್ಕಳ ಮಾತನಾಡಿ, ಪತ್ರಿಕೋದ್ಯಮ ಇಂದು ಸಂಕಟದಲ್ಲಿದೆ. ಎಷ್ಟೇ ನೂತನ ವಿನ್ಯಾಸ ಮಾಡಿದರೂ ಜನ ಒಪ್ಪುತ್ತಿಲ್ಲ. ಜನಕ್ಕೆ ಬೇಕಾದುದನ್ಬು ತಲುಪಿಸುವಲ್ಲಿ ನಾವು ವಿಫಲರಾಗಿದ್ದೇವೋ ಎನಿಸುತ್ತಿದೆ. ಕೆಲವೊಮ್ಮೆ ಸೋಲು ಪತ್ರಿಕೆಯೊಂದನ್ನು ಮಯಳುಗಿಸುವ ಹಂತಕ್ಕೂ ತರುತ್ತದೆ. ಪತ್ರಿಕೆ ಉಳಿಯಬೇಕೆಂದರೆ ಜನ ಒಪ್ಪುವ ಮಾದರಿಯಲ್ಲಿ ವಿಶೇಷ ವರದಿಗಳನ್ನು ನೀಡಬೇಕು ಎಂದರು.

ನಗರಸಭೆ ಅಧ್ಯಕ್ಷೆ ಶರ್ಮಿಳಾ ಮಾದನಗೇರಿ ಮಾತನಾಡಿ, ರಾಜಕೀಯ ಕ್ಷೇತ್ರದಲ್ಲಿರುವ ನಮ್ಮನ್ನು ಎಚ್ಚರಿಸುವ ಕೆಲಸವನ್ನು ಶಿರಸಿ ಮಾಧ್ಯಮಗಳು ಮಾಡುತ್ತಿವೆ. ಪ್ರಾಮಾಣಿಕ ವರದಿಗಳ ಮೂಲಕ ಆಗಬೇಕಾದ ಕೆಲಸ ಕಾರ್ಯಗಳ ಬಗ್ಗೆ ತಿಳಿಸುತ್ತಿದ್ದಾರೆ ಎಂದರು. ಶಿರಸಿ ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಸಂದೇಶ ಭಟ್ ಪ್ರಾಸ್ತಾವಿಕ ಮಾತನಾಡಿ, ಕಳೆದ ನಾಲ್ಕು ವರ್ಷಗಳಿಂದ ತಾಲೂಕು ಸಂಘ ಉತ್ತಮ ಕಾರ್ಯ ನಿರ್ವಹಿಸುತ್ತಿದೆ. ಈಗ ಸ್ವಂತ ಕಚೇರಿಯನ್ನೂ ಹೊಂದಿ, ತಾಲೂಕಿನ ಪತ್ರಕರ್ತರ ಶ್ರೇಯೋಭಿವೃದ್ಧಿಗಾಗಿ ಶ್ರಮಿಸುತ್ತಿದೆ. ಸಾಧನೆ ಮಾಡಿದ ಪತ್ರಕರ್ತರನ್ನು ಗುರುತಿಸಿ ಸನ್ಮಾನಿಸುವ ಕಾರ್ಯ ಮಾಡುತ್ತಿದ್ದೇವೆ ಎಂದರು. ಜಿಲ್ಲಾ ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಪ್ರಾಧಿಕಾರದ ಅಧ್ಯಕ್ಷ ಸತೀಶ ನಾಯ್ಕ ಇದ್ದರು.

ಈ ಸುದ್ದಿಯನ್ನೂ ಓದಿ: Sirsi News: ಶಿರಸಿಯಲ್ಲಿ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಬೃಹತ್‌ ಪ್ರತಿಭಟನೆ

ನಾಲ್ವರು ಸಾಧಕರಿಗೆ ಪುರಸ್ಕಾರ

ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘ ನೀಡುವ ಗೋಲ್ಡನ್ ಪೆನ್ ಪುರಸ್ಕಾರವನ್ನು ಯುವ ಪತ್ರಕರ್ತ ಮಂಜುನಾಥ ಈರಗೊಪ್ಪ ಅವರಿಗೆ ನೀಡಿ ಪುರಸ್ಕರಿಸಲಾಯಿತು. ಅದೇ ರೀತಿ ದತ್ತಿನಿಧಿ ಪುರಸ್ಕಾರಗಳಾದ ದಿ. ಮತ್ತಿಗಾರ ಸುಬ್ಬಣ್ಣ ದತ್ತಿನಿಧಿಯನ್ನು ಪತ್ರಕರ್ತ ಮಧುಸೂಧನ ಹೆಗಡೆ ಅವರಿಗೆ, ದಿ. ಲಕ್ಷ್ಮೀ ಮಂ. ಗೋಪಾಲಕೃಷ್ಣ ಭಟ್ ಬಿಸ್ಲಕೊಪ್ಪ ದತ್ತಿನಿಧಿ ಪುರಸ್ಕಾರವನ್ನು ಪತ್ರಿಕಾ ವಿತರಕ ಗಣೇಶ ನೀಲೇಕಣಿ ಅವರಿಗೆ ಹಾಗೂ ಗ್ರಾಮೀಣ ಅತ್ಯುತ್ತಮ ಪತ್ರಕರ್ತರಿಗೆ ನೀಡಲಾಗುವ ಕಬ್ನಳ್ಳಿ ದಿ. ಸರೋಜಾ ಮತ್ತು ಛತ್ರಪತಿ ಹೆಗಡೆ ಪುರಸ್ಕಾರವನ್ನು ಬನವಾಸಿಯ ವರದಿಗಾರ ಸುಧೀರ ನಾಯರ್ ಅವರಿಗೆ ನೀಡಿ ಪುರಸ್ಕರಿಸಲಾಯಿತು. ಚಿನ್ಮಯ ಕೆರೆಗದ್ದೆ ಪ್ರಾರ್ಥನಾ ಗೀತೆ ಹಾಡಿದರು. ನರಸಿಂಹ ಅಡಿ ಕಾರ್ಯಕ್ರಮ ನಿರ್ವಹಿಸಿದರು. ಸಂಘದ ಕಾರ್ಯದರ್ಶಿ ಕೃಷ್ಣಮೂರ್ತಿ ಕೆರೆಗದ್ದೆ ವಂದಿಸಿದರು. ಖಜಾಂಚಿ ಮಹಾದೇವ ನಾಯ್ಕ ಇತರರಿದ್ದರು.