ನಟಿ ಶ್ರದ್ಧಾ ಕಪೂರ್ ತಮ್ಮ ಮುಂದಿನ ಸಿನಿಮಾ ‘ಈಥಾ’ (Eetha trailer out) ಮೂಲಕ ಲಾವಣಿ ನೃತ್ಯದ ಲೋಕಕ್ಕೆ ಕಾಲಿಡುತ್ತಿದ್ದಾರೆ. ಈ ಚಿತ್ರದಲ್ಲಿ ಅವರು ತಮ್ಮ ಪ್ರತಿಭೆ ಮತ್ತು ಹೋರಾಟದ ಮೂಲಕ ದೊಡ್ಡ ಹೆಸರು ಮಾಡಿದ ಖ್ಯಾತ ಕಲಾವಿದೆ ಈಥಾ ಬಾಯಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಮ್ಯಾಡಾಕ್ ಫಿಲ್ಮ್ಸ್ ಮತ್ತು ಕಠ್ಪುತ್ಲಿ ಕ್ರಿಯೇಷನ್ಸ್ ಸಂಸ್ಥೆಗಳು ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿದ್ದು, ಅದರಲ್ಲಿ ಶ್ರದ್ಧಾ ( Shraddha Kapoor) ಅವರ ವಿಭಿನ್ನ ಲುಕ್ ಗಮನ ಸೆಳೆದಿದೆ.
ಲಕ್ಷ್ಮಣ್ ಉಟೇಕರ್ ನಿರ್ದೇಶನದ ಈ ಸಂಗೀತಮಯ ಚಿತ್ರವು ಮಹಾರಾಷ್ಟ್ರದ ಪ್ರಸಿದ್ಧ ಲಾವಣಿ ಮತ್ತು ತಮಾಷಾ ಕಲಾವಿದೆ ವಿಠಾಬಾಯಿ ಭಾವು ಮಾಂಗ್ ನಾರಾಯಣಗಾಂವ್ಕರ್ ಅವರ ಜೀವನದಿಂದ ಸ್ಫೂರ್ತಿ ಪಡೆದು ನಿರ್ಮಾಣವಾಗಿದೆ. ದಿವಂಗತ ನಾನಾ ಪಾಟೇಕರ್ ಅವರ ಕೊನೆಯ ಚಿತ್ರಗಳಲ್ಲಿ ಇದೂ ಒಂದಾಗಿದೆ.
ಟ್ರೇಲರ್‌ನಲ್ಲಿ ಲಾವಣಿ ಮತ್ತು ತಮಾಷಾ ನೃತ್ಯದ ಸುಂದರ ಲೋಕವನ್ನು ತೋರಿಸಲಾಗಿದೆ. ಆದರೆ ಈ ಚಿತ್ರ ಕೇವಲ ಹಾಡು, ನೃತ್ಯ ಮತ್ತು ಮನರಂಜನೆಗೆ ಸೀಮಿತವಾಗಿಲ್ಲ. ಒಬ್ಬ ಮಹಿಳೆ ತನ್ನ ಜೀವನದಲ್ಲಿ ಎದುರಿಸುವ ದ್ರೋಹ, ನೋವು, ಪ್ರೀತಿ ಮತ್ತು ಹಲವು ಸವಾಲುಗಳ ನಡುವೆಯೂ ತನ್ನದೇ ಆದ ಗುರುತನ್ನು ಹೇಗೆ ರೂಪಿಸಿಕೊಳ್ಳುತ್ತಾಳೆ ಎಂಬುದನ್ನು ಚಿತ್ರ ತೋರಿಸುತ್ತದೆ.
ಟ್ರೇಲರ್‌ನಲ್ಲಿರುವ ಒಂದು ಸಂಭಾಷಣೆ ಈಥಾ ಬಾಯಿಯ ಆತ್ಮವಿಶ್ವಾಸ ಮತ್ತು ಹೋರಾಟದ ಮನೋಭಾವವನ್ನು ಎತ್ತಿ ತೋರಿಸುತ್ತದೆ.
ಇದನ್ನೂ ಓದಿ: Bigg Boss Kannada 13: Shetty Donನ ಇಂಪ್ರೆಸ್ ಮಾಡಲು ಗಗನ್‌-ಯಶಸ್‌ ಹರಸಾಹಸ
“ಪ್ರಯತ್ನಿಸದೇ ಸತ್ತರೆ ಅಸಹಾಯಕಳಾಗಿ ನೆನಪಾಗುತ್ತೇನೆ. ಆದರೆ ನೃತ್ಯ ಮಾಡುತ್ತಾ ಸತ್ತರೆ ದಂತಕಥೆಯಾಗಿ ಉಳಿಯುತ್ತೇನೆ.”
ಈ ಚಿತ್ರದ ಮೂಲಕ ಲಾವಣಿ ಮತ್ತು ತಮಾಷಾ ಕಲೆಯ ಸಾಂಸ್ಕೃತಿಕ ಮಹತ್ವವನ್ನು ಪರಿಚಯಿಸುವುದರ ಜೊತೆಗೆ, ಈ ಕಲೆಯನ್ನು ಉಳಿಸಿ ಬೆಳೆಸಿದ ಮಹಿಳೆಯರ ಜೀವನದ ಕಥೆಯನ್ನೂ ಹೇಳಲಾಗಿದೆ. ಮಹಾರಾಷ್ಟ್ರದ ಸಂಸ್ಕೃತಿಯಲ್ಲಿ ಪ್ರಮುಖ ಸ್ಥಾನ ಹೊಂದಿರುವ ಲಾವಣಿ ಕಲೆಯ ಹಿಂದಿರುವ ಮಹಿಳೆಯರ ಪರಿಶ್ರಮ ಮತ್ತು ತ್ಯಾಗಕ್ಕೆ ಚಿತ್ರ ಗೌರವ ಸಲ್ಲಿಸುತ್ತದೆ.
ನೌವಾರಿ ಸೀರೆಯ ಮಹತ್ವ
ಟ್ರೇಲರ್‌ನಲ್ಲಿ ನೌವಾರಿ ಸೀರೆಯ ಮಹತ್ವದ ಬಗ್ಗೆಯೂ ಒಂದು ಸಂಭಾಷಣೆ ಇದೆ. ಈ ಸೀರೆ ಕೇವಲ ಉಡುಪಲ್ಲ, ಅದು ಮರಾಠಿ ಮಹಿಳೆಯರ ಹೆಮ್ಮೆ, ಗುರುತು ಮತ್ತು ಸಂಪ್ರದಾಯದ ಸಂಕೇತ ಎಂಬುದನ್ನು ಇಲ್ಲಿ ವಿವರಿಸಲಾಗಿದೆ.
ತಮ್ಮ ಪಾತ್ರದ ಬಗ್ಗೆ ಮಾತನಾಡಿರುವ ಶ್ರದ್ಧಾ ಕಪೂರ್, “ಕಲೆ, ಧೈರ್ಯ ಮತ್ತು ಸ್ವಂತ ವ್ಯಕ್ತಿತ್ವದಿಂದ ಎಲ್ಲರ ಮನಸ್ಸಿನಲ್ಲಿ ಉಳಿಯುವ ಮಹಿಳೆಯ ಕಥೆ ಇದು. ಲಕ್ಷ್ಮಣ್ ಸರ್ ಈ ಪಾತ್ರದ ಬಗ್ಗೆ ಹೇಳಿದಷ್ಟು ನನಗೆ ಆಕೆಯ ಜೀವನದ ಬಗ್ಗೆ ಹೆಚ್ಚು ಆಸಕ್ತಿ ಮೂಡಿತು. ಈ ಪಾತ್ರದಲ್ಲಿ ನಟಿಸಿರುವುದು ನನಗೆ ತುಂಬಾ ಸಂತೋಷ ತಂದಿದೆ. ಪ್ರೇಕ್ಷಕರು ಚಿತ್ರಮಂದಿರದಲ್ಲಿ ಆಕೆಯ ಜೀವನದ ಪಯಣವನ್ನು ನೋಡಲು ನಾನು ಕಾತರದಿಂದ ಕಾಯುತ್ತಿದ್ದೇನೆ. ‘ಸ್ತ್ರೀ’ ಮತ್ತು ‘ಸ್ತ್ರೀ 2’ ಚಿತ್ರಗಳ ಯಶಸ್ಸಿನ ಬಳಿಕ ಮತ್ತೆ ಮ್ಯಾಡಾಕ್ ಫಿಲ್ಮ್ಸ್ ಜೊತೆ ಕೆಲಸ ಮಾಡುತ್ತಿರುವುದು ವಿಶೇಷ ಅನುಭವವಾಗಿದೆ. ಇಡೀ ತಂಡ ತುಂಬಾ ಶ್ರಮವಹಿಸಿದೆ. ಪ್ರೇಕ್ಷಕರು ಈ ಚಿತ್ರದ ಜಗತ್ತನ್ನು ನೋಡಲು ಕಾಯುತ್ತಿದ್ದೇನೆ” ಎಂದು ಹೇಳಿದ್ದಾರೆ.
ನಿರ್ಮಾಪಕ ದಿನೇಶ್ ವಿಜನ್ ಮಾತನಾಡಿ, ಲಾವಣಿ ಕಲೆಯ ಹಿಂದಿರುವ ಮಹಿಳೆಯರ ಕಥೆಗಳನ್ನು ಮುಖ್ಯವಾಹಿನಿಯ ಹಿಂದಿ ಸಿನಿಮಾಗಳಲ್ಲಿ ಹೆಚ್ಚು ತೋರಿಸಿಲ್ಲ. ಅಂತಹ ಮಹಿಳೆಯರ ಜೀವನವನ್ನು ಜನರಿಗೆ ಪರಿಚಯಿಸುವ ಅವಕಾಶ ಈ ಚಿತ್ರದ ಮೂಲಕ ಸಿಕ್ಕಿದೆ ಎಂದು ತಿಳಿಸಿದ್ದಾರೆ.
“ಸಿನಿಮಾದಲ್ಲಿ ಕೆಲವೊಮ್ಮೆ ಜಗತ್ತಿಗೆ ಇನ್ನೂ ಪರಿಚಯವಾಗದ ಅದ್ಭುತ ಕಥೆಗಳು ಸಿಗುತ್ತವೆ. ‘ಈಥಾ’ ಅಂತಹ ಒಂದು ಕಥೆ. ಲಾವಣಿಯ ಸಂಗೀತ, ಲಯ, ಉತ್ಸಾಹ ಮತ್ತು ಅದನ್ನು ಜನಪ್ರಿಯಗೊಳಿಸಿದ ಮಹಿಳೆಯರ ಜೀವನ ನನ್ನನ್ನು ಬಹಳ ಆಕರ್ಷಿಸಿತು. ಹಲವು ವರ್ಷಗಳಿಂದ ಅವರ ಕಲೆಯನ್ನು ನಾವು ಸಂಭ್ರಮಿಸಿದ್ದೇವೆ. ಆದರೆ ಅವರ ಜೀವನದ ಹೋರಾಟ ಮತ್ತು ತ್ಯಾಗದ ಬಗ್ಗೆ ಎಷ್ಟು ಬಾರಿ ಯೋಚಿಸಿದ್ದೇವೆ? ಅವರ ಕಥೆಗಳಿಗೂ ನಾವು ಅಷ್ಟೇ ಪ್ರೀತಿ ಮತ್ತು ಗೌರವ ನೀಡುವ ಸಮಯ ಬಂದಿದೆ. ‘ಈಥಾ’ ಕೇವಲ ನೈಜ ಘಟನೆಗಳಿಂದ ಸ್ಫೂರ್ತಿ ಪಡೆದ ಸಿನಿಮಾ ಅಲ್ಲ, ಇದು ಒಂದು ಅದ್ಭುತ ಕಲೆಯ ಮತ್ತು ಅದನ್ನು ಉಳಿಸಿದ ಮಹಿಳೆಯರ ಜೀವನದ ಸಂಭ್ರಮ” ಎಂದು ಹೇಳಿದ್ದಾರೆ.
‘ಛಾವಾ’ ಚಿತ್ರದ ಭರ್ಜರಿ ಯಶಸ್ಸಿನ ಬಳಿಕ ನಿರ್ದೇಶಕ ಲಕ್ಷ್ಮಣ್ ಉಟೇಕರ್ ‘ಈಥಾ’ ಚಿತ್ರದ ಮೂಲಕ ವಿಭಿನ್ನ ಕಥೆಯೊಂದಿಗೆ ಮರಳಿದ್ದಾರೆ.
ಚಿತ್ರದ ಬಗ್ಗೆ ಮಾತನಾಡಿದ ಅವರು, “‘ಛಾವಾ’ ಚಿತ್ರದ ಮೂಲಕ ಪ್ರೇಕ್ಷಕರಿಗೆ ಅದ್ಧೂರಿ ಸಿನಿಮೀಯ ಅನುಭವ ನೀಡಿದ್ದೆವು. ಈಗ ‘ಈಥಾ’ ಮೂಲಕ ಸಂಪೂರ್ಣ ವಿಭಿನ್ನ ಜಗತ್ತಿಗೆ ಕರೆದೊಯ್ಯಲು ಬಯಸಿದ್ದೇನೆ. ಎರಡೂ ಚಿತ್ರಗಳ ಕಥೆ ಮತ್ತು ಹಿನ್ನೆಲೆ ಬೇರೆ ಬೇರೆಯಾಗಿದ್ದರೂ, ಅವುಗಳಲ್ಲಿನ ಮುಖ್ಯ ಪಾತ್ರಗಳ ಅಸಾಧಾರಣ ಶಕ್ತಿ ಒಂದೇ ರೀತಿಯಾಗಿದೆ. ‘ಈಥಾ’ ಒಬ್ಬ ಕಲಾವಿದೆ ಹೇಗೆ ಒಂದು ಪರಂಪರೆಯಾಗಿ ಬೆಳೆದಳು ಎಂಬ ಕಥೆ. ನೈಜತೆ, ಭಾವನೆ ಮತ್ತು ಅದ್ಧೂರಿತನವನ್ನು ಒಟ್ಟುಗೂಡಿಸಿ ಈ ಚಿತ್ರವನ್ನು ನಿರ್ಮಿಸಿದ್ದೇವೆ” ಎಂದಿದ್ದಾರೆ.
ಕಠ್ಪುತ್ಲಿ ಕ್ರಿಯೇಷನ್ಸ್ ನಿರ್ಮಾಪಕಿ ಕರಿಷ್ಮಾ ಶರ್ಮಾ ಮಾತನಾಡಿ, ಭಾರತದ ಶ್ರೀಮಂತ ಸಂಸ್ಕೃತಿ ಮತ್ತು ಪರಂಪರೆಯಲ್ಲಿರುವ ಅಪರೂಪದ ಕಥೆಗಳನ್ನು ದೊಡ್ಡ ಪರದೆಯ ಮೇಲೆ ತರುವುದು ನಮ್ಮ ಉದ್ದೇಶ. ಭಾರತೀಯ ಸಂಸ್ಕೃತಿಯಲ್ಲಿ ಬೇರುಬಿಟ್ಟಿರುವ ಈ ಕಥೆ ಎಲ್ಲ ಭಾಷೆಯ ಪ್ರೇಕ್ಷಕರಿಗೂ ಇಷ್ಟವಾಗಲಿದೆ ಎಂಬ ವಿಶ್ವಾಸವಿದೆ ಎಂದು ಹೇಳಿದ್ದಾರೆ.
ದಿನೇಶ್ ವಿಜನ್ ಮತ್ತು ಲಕ್ಷ್ಮಣ್ ಉಟೇಕರ್ ನಿರ್ಮಿಸಿರುವ ಈ ಚಿತ್ರವನ್ನು ಮ್ಯಾಡಾಕ್ ಫಿಲ್ಮ್ಸ್ ಹಾಗೂ ಕಠ್ಪುತ್ಲಿ ಕ್ರಿಯೇಷನ್ಸ್ ಸಂಸ್ಥೆಗಳು ಪ್ರಸ್ತುತಪಡಿಸುತ್ತಿವೆ. ಅಜಯ್–ಅತುಲ್ ಸಂಗೀತ ಸಂಯೋಜನೆ ಚಿತ್ರಕ್ಕಿದೆ.
ಡಿಸೆಂಬರ್ 4, 2026ರಂದು ‘ಈಥಾ’ ಸಿನಿಮಾ ದೇಶಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.