ಗೀತಾ ಶಿವರಾಜ್‌ಕುಮಾರ್ (Geetha Shivarajkumar) ಸಾರಥ್ಯದ ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆ ‘ಗೀತಾ ಪಿಕ್ಚರ್ಸ್’ ತನ್ನ ಮೂರನೇ ಸಿನಿಮಾವಾಗಿ ತೆರೆಗೆ ತರುತ್ತಿರುವ ಬಹುನಿರೀಕ್ಷಿತ ಚಿತ್ರ ‘ಪಬ್ಬಾರ್’ನ (Pabbar Movie) ಬಿಡುಗಡೆ ದಿನಾಂಕವನ್ನು ಅಧಿಕೃತವಾಗಿ ಘೋಷಿಸಿದೆ. ತನ್ನ ವಿಭಿನ್ನ ಶೀರ್ಷಿಕೆ ಮತ್ತು ನಿಗೂಢ ಪೋಸ್ಟರ್‌ಗಳಿಂದಲೇ ಸದ್ದು ಮಾಡುತ್ತಿರುವ ಈ ಸಿನಿಮಾ, ಇದೇ ವರ್ಷ ಡಿಸೆಂಬರ್ 11ರಂದು ರಾಜ್ಯಾದ್ಯಂತ ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ.
ತಮ್ಮ ಚೊಚ್ಚಲ ಚಿತ್ರ ‘ಶಾಖಾಹಾರಿ’ ಮೂಲಕ ಪ್ರೇಕ್ಷಕರು ಹಾಗೂ ವಿಮರ್ಶಕರಿಂದ ಅಭೂತಪೂರ್ವ ಮೆಚ್ಚುಗೆ ಪಡೆದುಕೊಂಡಿದ್ದ ಪ್ರತಿಭಾವಂತ ನಿರ್ದೇಶಕ ಸಂದೀಪ್ ಸುಂಕದ್, ಈಗ ‘ಪಬ್ಬಾರ್’ ಮೂಲಕ ಮತ್ತೊಮ್ಮೆ ರಹಸ್ಯ ಮತ್ತು ಅಪರಾಧ ಲೋಕದ ಕಥಾಹಂದರವನ್ನು ಬೆಳ್ಳಿತೆರೆಗೆ ತರಲು ಸಜ್ಜಾಗಿದ್ದಾರೆ. ಈ ಚಿತ್ರದಲ್ಲಿ ಧೀರನ್ ರಾಮ್‌ಕುಮಾರ್ ಹಾಗೂ ಅಮೃತಾ ಪ್ರೇಮ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದು, ಅವರೊಂದಿಗೆ ಗೋಪಾಲಕೃಷ್ಣ ದೇಶಪಾಂಡೆ, ಅಚ್ಯುತ್ ಕುಮಾರ್, ಅಯ್ಯಪ್ಪ ಮತ್ತು ಬಹುಭಾಷಾ ನಟ ಸಯಾಜಿ ಶಿಂಧೆ ಮುಂತಾದ ಅನುಭವಿ ತಾರಾಗಣ ಪ್ರಮುಖ ಪಾತ್ರಗಳಿಗೆ ಜೀವ ತುಂಬಿದೆ.
ಇದನ್ನೂ ಓದಿ: Ramayana Movie: ಥಿಯೇಟ್ರಿಕಲ್ ಬಿಡುಗಡೆಯ ಬಳಿಕ ಈ ಒಟಿಟಿಯಲ್ಲಿ ರಾಮಾಯಣ ಸ್ಟ್ರೀಮಿಂಗ್‌
ರಹಸ್ಯಮಯ ವಾತಾವರಣ
ಇತ್ತೀಚಿನ ದಿನಗಳಲ್ಲಿ ಕೆಲವೇ ಸೆಕೆಂಡುಗಳ ಟೀಸರ್‌ಗಳು ಸಾಮಾನ್ಯವಾಗಿರುವಾಗ, ಚಿತ್ರತಂಡ ಬಿಡುಗಡೆ ಮಾಡಿರುವ 4 ನಿಮಿಷಗಳ ಸುದೀರ್ಘ ಪರಿಚಯಾತ್ಮಕ ವಿಡಿಯೋ ಪ್ರೇಕ್ಷಕರನ್ನು ಅಚ್ಚರಿಗೊಳಿಸಿದೆ. ಕೇವಲ ವೇಗದ ಕಟ್‌ಗಳನ್ನು ತೋರಿಸದೆ, ಪ್ರೇಕ್ಷಕರನ್ನು ಚಿತ್ರದ ರಹಸ್ಯಮಯ ವಾತಾವರಣ, ಪಾತ್ರಗಳ ಆಳ ಮತ್ತು ವಿಭಿನ್ನ ಕಥಾಲೋಕಕ್ಕೆ ಕರೆದೊಯ್ಯುವಂತೆ ಈ ವಿಡಿಯೋ ರೂಪಿಸಲಾಗಿದೆ. ಹಲವು ಬಿಚ್ಚಿಡದ ರಹಸ್ಯಗಳು ಹಾಗೂ ಪ್ರಶ್ನೆಗಳನ್ನು ಹುಟ್ಟುಹಾಕಿರುವ ಈ ವಿಡಿಯೋ ಪ್ರಚಾರ ಶೈಲಿ ಸಿನಿಪ್ರಿಯರಲ್ಲಿ ಭಾರಿ ನಿರೀಕ್ಷೆ ಮೂಡಿಸಿದೆ.
ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಕೂಡ ಚಿತ್ರದ ಗಾಂಭೀರ್ಯವನ್ನು ಮತ್ತಷ್ಟು ಹೆಚ್ಚಿಸಿದೆ. ಹಿಮಾಲಯದ ಹಿನ್ನೆಲೆಯ ಮಂಜು ಮುಸುಕಿದ ಬೆಟ್ಟಗಳು, ಬೌದ್ಧ ಪ್ರಾರ್ಥನಾ ಧ್ವಜಗಳು ಹಾಗೂ ಕಣಿವೆಯ ಕೆಳಗಿರುವ ಸಣ್ಣ ವಸತಿ ಪ್ರದೇಶದ ದೃಶ್ಯಗಳು ಇಲ್ಲಿನ ಪ್ರಕೃತಿಯೂ ಕಥೆಯ ಮುಖ್ಯ ಪಾತ್ರದಂತಿರಲಿದೆ ಎಂಬ ಸುಳಿವು ನೀಡುತ್ತವೆ.
ಪೋಸ್ಟರ್‌ನಲ್ಲಿರುವ ಧೀರನ್ ರಾಮ್‌ಕುಮಾರ್ ಅವರ ಎರಡು ಭಿನ್ನ ಲುಕ್‌ಗಳು ಅವರು ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆಯೇ ಎಂಬ ಕುತೂಹಲವನ್ನು ಹುಟ್ಟುಹಾಕಿವೆ. ವಿಶಿಷ್ಟ ಸಾಂಪ್ರದಾಯಿಕ ಉಡುಪಿನಲ್ಲಿರುವ ವ್ಯಕ್ತಿಗಳು, ನಿಗೂಢತೆಯನ್ನು ಸೂಚಿಸುವ ಹೊಳೆಯುವ ಜ್ಯಾಮಿತೀಯ ಚಿಹ್ನೆಗಳು ಮತ್ತು ಪೊಲೀಸರ ಉಪಸ್ಥಿತಿ ಹಲವು ವಿಭಿನ್ನ ಜಗತ್ತುಗಳು ಒಂದೆಡೆ ಮುಖಾಮುಖಿಯಾಗುವ ಸಂಕೇತವನ್ನು ನೀಡಿವೆ.
ಇದನ್ನೂ ಓದಿ: Bigg Boss Kannada 13: ರಕ್ಷಕರ ಜಗಳದಲ್ಲಿ ಲೂಟಿಗಾರರಿಗೆ ಲಾಭ!
ಗುಣಮಟ್ಟದ ಕಥಾವಸ್ತು, ವಿಶಿಷ್ಟ ದೃಶ್ಯ ನಿರೂಪಣೆ ಮತ್ತು ನಿಖರ ಮೇಕಿಂಗ್ ಮೂಲಕ ಸಿನಿಪ್ರಿಯರ ವಿಶ್ವಾಸ ಗಳಿಸಿರುವ ಗೀತಾ ಪಿಕ್ಚರ್ಸ್, ‘ಪಬ್ಬಾರ್’ ಮೂಲಕ ಮತ್ತೊಂದು ಮಹತ್ವದ ಹೆಜ್ಜೆಯಿಟ್ಟಿದೆ. ‘ಶಾಖಾಹಾರಿ’ಯಂತಹ ವಿಭಿನ್ನ ಚಿತ್ರವನ್ನು ಕೊಟ್ಟ ಸಂದೀಪ್ ಸುಂಕದ್ ಅವರ ಸಾರಥ್ಯವಿರುವುದರಿಂದ, ಡಿಸೆಂಬರ್ 11ರಂದು ತೆರೆಕಾಣಲಿರುವ ‘ಪಬ್ಬಾರ್’ ವರ್ಷಾಂತ್ಯದ ಬಹುನಿರೀಕ್ಷಿತ ಸ್ಯಾಂಡಲ್‌ವುಡ್ ಸಿನಿಮಾಗಳ ಸಾಲಿನಲ್ಲಿ ಮುಂಚೂಣಿಯಲ್ಲಿದೆ.