ಸೂರ್ಯನ ಪ್ರಕೋಪ: ಭಾರತಕ್ಕೆ ರೇಡಿಯೋ ಬ್ಲ್ಯಾಕ್‌ಔಟ್ ಭೀತಿ; ಇಸ್ರೋದಿಂದ ಕಟ್ಟೆಚ್ಚರ

ನವದೆಹಲಿ, ಫೆ. 4: ಸೂರ್ಯನು ಮತ್ತೆ ತನ್ನ ಪ್ರಕೋಪ ತೋರುತ್ತಿದ್ದು, ಸರಣಿ ಸೌರ ಜ್ವಾಲೆಗಳನ್ನು (Solar Flares) ಹೊರ ಹಾಕುತ್ತಿದ್ದಾನೆ. ಇದರಿಂದಾಗಿ ಭಾರತದ ಇಸ್ರೋ (ISRO) ಸೇರಿದಂತೆ ವಿಶ್ವದ ಪ್ರಮುಖ ಬಾಹ್ಯಾಕಾಶ ಸಂಸ್ಥೆಗಳು ಸಂವಹನ ಕಡಿತ ಅಥವಾ 'ರೇಡಿಯೋ ಬ್ಲ್ಯಾಕ್‌ಔಟ್' ಸಂಭವಿಸುವ ಎಚ್ಚರಿಕೆ ನೀಡಿವೆ. ತೀವ್ರವಾದ ಸೌರ ಜ್ವಾಲೆಗಳು ಭೂಮಿಗೆ ಅಪ್ಪಳಿಸಿದರೆ ಉಪಗ್ರಹಗಳು, ಟೆಲಿವಿಷನ್ ಸಿಗ್ನಲ್‌ಗಳು, ರಾಡಾರ್ ಮತ್ತು ವಿದ್ಯುತ್ ಗ್ರಿಡ್‌ಗಳ ಮೇಲೆ ಗಂಭೀರ ಪರಿಣಾಮ ಬೀರಲಿದೆ.

ಇಸ್ರೋ ಉಪಗ್ರಹಗಳ ಮೇಲೆ ನಿರಂತರ ನಿಗಾ

ಭಾರತದ 50ಕ್ಕೂ ಹೆಚ್ಚು ಕಾರ್ಯಾಚರಣೆಯಲ್ಲಿರುವ ಉಪಗ್ರಹಗಳನ್ನು ಇಸ್ರೋ ತೀವ್ರ ನಿಗಾದಲ್ಲಿರಿಸಿದೆ. "ರೇಡಿಯೋ ಬ್ಲ್ಯಾಕ್‌ಔಟ್ ಆಗುವ ಬಲವಾದ ಸಾಧ್ಯತೆಯಿದೆ. ಇಸ್ರೋ ಉಪಗ್ರಹಗಳಲ್ಲಿ ಯಾವುದೇ ತಾಂತ್ರಿಕ ದೋಷ ಕಂಡುಬಂದಲ್ಲಿ ತಕ್ಷಣ ಸರಿಪಡಿಸಲು ಸಿದ್ಧತೆ ನಡೆಸಲಾಗಿದೆ" ಎಂದು ಇಸ್ಟ್ರಾಕ್ (ISTRAC) ನಿರ್ದೇಶಕ ಅನಿಲ್ ಕುಮಾರ್ ತಿಳಿಸಿದ್ದಾರೆ.

ಭಾರತ-ಅಮೆರಿಕ ಮುಕ್ತ ವ್ಯಾಪಾರ ಒಪ್ಪಂದ: ರಫ್ತುಗಳ ಮೇಲೆ ಶೇಕಡಾ 18ರಷ್ಟು ಸುಂಕದೊಂದಿಗೆ ಭಾರತ ಯಾವ ಸ್ಥಾನದಲ್ಲಿದೆ?

ಸೂರ್ಯನ ಈ ಪ್ರಕೋಪಕ್ಕೆ ಕಾರಣವೇನು?

ಸೂರ್ಯನ ಮೇಲಿರುವ 'Active Region 14366' ಎಂಬ ಕಾಂತೀಯ ಸಂಕೀರ್ಣ ಸನ್‌ಸ್ಪಾಟ್ (Sunspot) ಈ ಬಿರುಗಾಳಿಗೆ ಕಾರಣವಾಗಿದೆ. ಇದು ಕಳೆದ ಕೆಲವು ದಿನಗಳಲ್ಲಿ ನಾಲ್ಕು ಪ್ರಬಲ ಸೌರ ಜ್ವಾಲೆಗಳನ್ನು ಹೊರಹಾಕಿದ್ದು, ಅದರಲ್ಲಿ X8.1-class ಎಂಬ ಜ್ವಾಲೆಯು 2026ರಲ್ಲೇ ಅತ್ಯಂತ ಶಕ್ತಿಯುತವಾದುದು ಎಂದು ಗುರುತಿಸಲಾಗಿದೆ. ಇದು 1996ರ ನಂತರ ದಾಖಲಾದ ಟಾಪ್ 20 ಪ್ರಬಲ ಜ್ವಾಲೆಗಳಲ್ಲಿ ಒಂದಾಗಿದೆ ಎಂದು ನಾಸಾ (NASA) ದೃಢಪಡಿಸಿದೆ. ಸೂರ್ಯನು ಪ್ರತಿ 11 ವರ್ಷಕ್ಕೊಮ್ಮೆ ಈ ರೀತಿಯ ತೀವ್ರ ಪ್ರಕೋಪ ಹಂತವನ್ನು ತಲುಪುತ್ತಾನೆ. ಇದನ್ನು 'ಸೋಲಾರ್ ಮ್ಯಾಕ್ಸಿಮಾ' (Solar Maxima) ಎಂದು ಕರೆಯಲಾಗುತ್ತದೆ.

ಭಾರತ ಮತ್ತು ಭೂಮಿಯ ಮೇಲೆ ಇದರ ಪರಿಣಾಮಗಳೇನು?

ಈ ಸೌರ ಜ್ವಾಲೆಗಳು ಮನುಷ್ಯರಿಗೆ ನೇರವಾಗಿ ಹಾನಿ ಮಾಡದಿದ್ದರೂ, ಭೂಮಿಯ ವಾತಾವರಣದ ಮೇಲ್ಪದರವಾದ 'ಐಯನೋಸ್ಫಿಯರ್' ಅನ್ನು ಅಸ್ತವ್ಯಸ್ತಗೊಳಿಸುತ್ತದೆ. ಇದರಿಂದ ಉನ್ನತ ಮಟ್ಟದ ರೇಡಿಯೋ ಸಂವಹನ ಕಡಿತಗೊಳ್ಳಬಹುದು, ಜಿಪಿಎಸ್ (GPS) ನಂತಹ ನ್ಯಾವಿಗೇಷನ್ ಸಿಗ್ನಲ್‌ಗಳಲ್ಲಿ ವ್ಯತ್ಯಯವಾಗಬಹುದು, ಧ್ರುವ ಪ್ರದೇಶಗಳಲ್ಲಿ ಹಾರಾಟ ನಡೆಸುವ ವಿಮಾನಗಳಿಗೆ ವಿಕಿರಣದ ಅಪಾಯ ಹಾಗೂ ಆಕಾಶದಲ್ಲಿ ಸುಂದರವಾದ ಅರೋರಾ (Aurora) ಬೆಳಕುಗಳು ಕಂಡುಬರುತ್ತವೆ.

ರಕ್ಷಣೆಗೆ ನಿಂತ ಆದಿತ್ಯ- L1 (Aditya-L1)

ಭಾರತದ ಮೊದಲ ಸೌರ ವೀಕ್ಷಣಾಲಯ 'ಆದಿತ್ಯ-L1' ಪ್ರಸ್ತುತ ಈ ಜ್ವಾಲೆಗಳ ಮೇಲೆ ನಿಗಾವಹಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ. ಇದು ಭೂಮಿಯಿಂದ 15 ಲಕ್ಷ ಕಿಲೋಮೀಟರ್ ದೂರದಲ್ಲಿದ್ದು, ಸೌರ ಸ್ಫೋಟದ ಪರಿಣಾಮಗಳು ಭೂಮಿಯನ್ನು ತಲುಪುವ ಮೊದಲೇ ನಮಗೆ ಎಚ್ಚರಿಕೆ ನೀಡುತ್ತದೆ.

ಭಾರತದ ಮುಂದಿನ ಹೆಜ್ಜೆ - ನ್ಯಾಷನಲ್ ಲಾರ್ಜ್ ಸೋಲಾರ್ ಟೆಲಿಸ್ಕೋಪ್ (NLST)

ಸೌರ ವಿದ್ಯಮಾನಗಳನ್ನು ಭೂಮಿಯಿಂದಲೇ ನಿಖರವಾಗಿ ವೀಕ್ಷಿಸಲು ಲಡಾಖ್‌ನ ಪಾಂಗಾಂಗ್ ಸರೋವರದ ದಡದಲ್ಲಿ ಸುಮಾರು 1,000 ಕೋಟಿ ರೂ. ವೆಚ್ಚದಲ್ಲಿ ಬೃಹತ್ ಸೌರ ದೂರದರ್ಶಕವನ್ನು ನಿರ್ಮಿಸಲು ಭಾರತ ನಿರ್ಧರಿಸಿದೆ. ಇದು ಮುಂದಿನ 5 ವರ್ಷಗಳಲ್ಲಿ ಸಿದ್ಧವಾಗಲಿದ್ದು, ಸೂರ್ಯನ ಕಾಂತೀಯ ಕ್ಷೇತ್ರಗಳ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಲಿದೆ.

ಸದ್ಯಕ್ಕೆ ಯಾವುದೇ ಭೀಕರ ಹಾನಿಯ ಮುನ್ಸೂಚನೆ ಇಲ್ಲದಿದ್ದರೂ, ಸೂರ್ಯನ ಈ 'Active Region' ಭೂಮಿಯ ಕಡೆಗೆ ಮುಖ ಮಾಡಿರುವುದರಿಂದ ವಿಜ್ಞಾನಿಗಳು ಮುಂದಿನ ಕೆಲವು ದಿನಗಳ ಕಾಲ ತೀವ್ರ ಕಟ್ಟೆಚ್ಚರ ವಹಿಸಿದ್ದಾರೆ.