ಇಂದಿರಾ ಗಾಂಧಿ ಕಾಲದ ಕಾಂಗ್ರೆಸ್ ದಾಖಲೆ ಸರಿಗಟ್ಟಿದ ಬಿಜೆಪಿ: ಈಗ ಕಛ್‌ನಿಂದ ಕಿಬಿತ್ತುವರೆಗೆ ಕೇಸರಿ ಅಲೆ

ಕೋಲ್ಕತ್ತಾ, ಮೇ 5: ಮೇ 4ರಂದು ಪ್ರಕಟವಾದ ಚುನಾವಣಾ ಫಲಿತಾಂಶದ ಬಳಿಕ ಬಿಜೆಪಿ ಅಭೂತಪೂರ್ವ ಶಕ್ತಿಯಾಗಿ ಮೂಡಿ ಬಂದಿವೆ. ಪಶ್ಚಿಮ ಬಂಗಾಳದಲ್ಲಿ (West Benagal) ತೃಣಮೂಲ ಕಾಂಗ್ರೆಸ್ (Trunamul Congress) ಅನ್ನು ಮಣಿಸಿ, ಅಸ್ಸಾಂನಲ್ಲಿ ಸತತ ಮೂರನೇ ಬಾರಿಗೆ ಭರ್ಜರಿ ಅಧಿಕಾರ ಹಿಡಿಯುವ ಮೂಲಕ ಬಿಜೆಪಿ ಹೊಸ ಇತಿಹಾಸ ನಿರ್ಮಿಸಿದೆ. ಈ ಗೆಲುವಿನೊಂದಿಗೆ ಬಿಜೆಪಿ ನೇತೃತ್ವದ ಎನ್‌ಡಿಎ ಮೈತ್ರಿಕೂಟವು (NDA Alliance) ದೇಶದ ಒಟ್ಟು 21 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಅಧಿಕಾರ ಸ್ಥಾಪಿಸಿದಂತಾಗಿದೆ. ಇದು 1970ರ ದಶಕದ ಅಂತ್ಯದಲ್ಲಿ ಇಂದಿರಾ ಗಾಂಧಿ (Indira Gandhi) ಅವರ ನೇತೃತ್ವದ ಕಾಂಗ್ರೆಸ್ ಹೊಂದಿದ್ದ ಐತಿಹಾಸಿಕ ದಾಖಲೆಯ ಮೈಲಿಗಲ್ಲನ್ನು ಈಗ ಬಿಜೆಪಿ ಸರಿಸಮ ಮಾಡಿದೆ.

2014ರಲ್ಲಿ ನರೇಂದ್ರ ಮೋದಿ ಮೊದಲ ಬಾರಿಗೆ ಪ್ರಧಾನಿಯಾದಾಗ ಬಿಜೆಪಿ ಕೇವಲ ಏಳು ರಾಜ್ಯಗಳಲ್ಲಿ ಮಾತ್ರ ಅಧಿಕಾರದಲ್ಲಿತ್ತು. ಆದರೆ ಅಮಿತ್ ಶಾ ಮತ್ತು ಜೆ.ಪಿ. ನಡ್ಡಾ ಅವರ ಸಂಘಟನಾತ್ಮಕ ಚತುರತೆ ಹಾಗೂ ಕಾರ್ಯತಂತ್ರದ ಮೈತ್ರಿಗಳ ಫಲವಾಗಿ ದೇಶದ ಶೇ. 72ರಷ್ಟು ಜನಸಂಖ್ಯೆಯನ್ನು ಬಿಜೆಪಿ ಆಳುತ್ತಿದೆ. ಉತ್ತರಾಖಂಡ, ಉತ್ತರ ಪ್ರದೇಶ, ಬಿಹಾರ ಮತ್ತು ಪಶ್ಚಿಮ ಬಂಗಾಳದ ಮೂಲಕ ಹರಿಯುವ ಪವಿತ್ರ ಗಂಗಾ ನದಿಯ ಸಂಪೂರ್ಣ ಹಾದಿಯು ಈಗ ಎನ್‌ಡಿಎ ಆಡಳಿತದ ವ್ಯಾಪ್ತಿಗೆ ಬಂದಿದೆ. ಇದು ನೆಹರೂ ಯುಗದ ನಂತರ ಭಾರತೀಯ ರಾಜಕೀಯದಲ್ಲಿ ಕಂಡುಬಂದ ಅತ್ಯಂತ ಪ್ರಬಲ ಭೌಗೋಳಿಕ ವಿಸ್ತರಣೆಯಾಗಿದೆ.

ಪಶ್ಚಿಮ ಬಂಗಾಳ ಚುನಾವಣೆ: ಟಿಎಂಸಿಗೆ ಅಧಿಕಾರ ಉಳಿಸಿಕೊಳ್ಳುವ ಚಿಂತೆ; ಬಿಜೆಪಿಗೆ ಐತಿಹಾಸಿಕ ಗೆಲುವಿನ ನಿರೀಕ್ಷೆ

2024ರ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ಸ್ವಂತ ಬಲದ ಮೇಲೆ ಬಹುಮತ ಕಳೆದುಕೊಂಡಾಗ, ಹಲವು ವಿರೋಧ ಪಕ್ಷಗಳು ಮತ್ತು ರಾಜಕೀಯ ವಿಶ್ಲೇಷಕರು ಮೋದಿ ಅಲೆ ಮುಗಿಯಿತು ಎಂದು ವಿಶ್ಲೇಷಿಸಿದ್ದರು. ಆದರೆ ಬಿಜೆಪಿ ಈ ಹಿನ್ನಡೆಯನ್ನೇ ಸವಾಲಾಗಿ ಸ್ವೀಕರಿಸಿತು. ಬೂತ್ ಮಟ್ಟದಲ್ಲಿ ಕಾರ್ಯಕರ್ತರನ್ನು ಮರುಸಜ್ಜುಗೊಳಿಸಿ, ಸ್ಥಳೀಯ ಸಮಸ್ಯೆಗಳ ಮೇಲೆ ಗಮನಹರಿಸಿ ಭರ್ಜರಿ ಪುನರಾಗಮನ ಮಾಡಿದೆ. ಮಹಾರಾಷ್ಟ್ರ, ಹರಿಯಾಣ, ಬಿಹಾರ ಮತ್ತು ಒಡಿಶಾದಂತಹ ಪ್ರಮುಖ ರಾಜ್ಯಗಳಲ್ಲಿ ಜಯಭೇರಿ ಬಾರಿಸಿದ ನಂತರ, ಈಗ ಅಸ್ಸಾಂ ಮತ್ತು ಬಂಗಾಳದ ಗೆಲುವು ಬಿಜೆಪಿಯ ಪ್ರಾಬಲ್ಯವನ್ನು ದೇಶಾದ್ಯಂತ ಮರು ಸ್ಥಾಪಿಸಿದೆ.

ಒಂದೇ ದಶಕದಲ್ಲಿ ಎರಡು ಬಾರಿ 21 ರಾಜ್ಯಗಳ ಗಡಿಯನ್ನು ತಲುಪಿದ ಬಿಜೆಪಿಯ ಈ ಸಾಧನೆಯು ಅದರ ಅಚಲ ಸ್ಥಿತಿಸ್ಥಾಪಕತ್ವವನ್ನು ಎತ್ತಿ ತೋರಿಸುತ್ತದೆ. ರಾಷ್ಟ್ರ ಮಟ್ಟದ ಸಣ್ಣ ಹಿನ್ನಡೆಯನ್ನು ಎಚ್ಚರಿಕೆಯ ಗಂಟೆಯಾಗಿ ಸ್ವೀಕರಿಸಿದ ಪಕ್ಷವು, ರಾಜ್ಯಮಟ್ಟದಲ್ಲಿ ತನ್ನ ಆಡಳಿತ ವೈಖರಿಯನ್ನು ಸುಧಾರಿಸುವ ಮೂಲಕ ಮತದಾರರ ವಿಶ್ವಾಸವನ್ನು ಮರಳಿ ಗಳಿಸಿದೆ. 21 ರಾಜ್ಯಗಳ ಆಡಳಿತದ ಬೃಹತ್ ಹೊಣೆ ಹೊತ್ತಿರುವ ಬಿಜೆಪಿ, ಅಭಿವೃದ್ಧಿಯ ಮೂಲಕ ಹೊಸ ಆಡಳಿತ ಮಾದರಿಯನ್ನು ಸೃಷ್ಟಿಸಲು ಹೊರಟಿದೆ. ಈ ಐತಿಹಾಸಿಕ ವಿಜಯವು ಭಾರತೀಯ ರಾಜಕೀಯದ ಭೂಪಟದಲ್ಲಿ ಕೇಸರಿ ಪಡೆಯ ಅಧಿಪತ್ಯವನ್ನು ಮತ್ತೊಮ್ಮೆ ದೃಢವಾಗಿ ಸಾಬೀತುಪಡಿಸಿದೆ ಮತ್ತು ಪ್ರಜಾಪ್ರಭುತ್ವದ ಹೊಸ ಆಯಾಮವನ್ನು ತೆರೆದಿದೆ.